Кӧрбан
| Кӧрбан | |
|---|---|
 | |
| Валатонэз | Тулыс бусы ужъёсты йылпумъян |
| Пусъё | Удмуртиысь уйпал ёросъёсын |
| Пусъён ужрадъёс | Курбон сётон, калыкен вӧсяськон, вӧсь ӝук пӧзьтон, шулдыръяськон |
Кӧрба́н (бес. Көрбан) — Бесерман калыклэн йылолъёсыз пӧлысь валтӥсез шулдыръяськон, музъемлы йыбырттон нунал. Удмуртиысь уйпал ёросъёсын тулыс бусы ужъёс йылпумъяськем бере пусйиське, ӵапак та палан бесерманъёс уло.
Историез
Бесерман диалектысь курбон сётон шуыса берыктӥськись Кӧрбан йылоллэн историез кузь. Бесерманъёслэн малпамзыя, ӟеч урожай басьтон понна курбонэн вӧсяськон ортчыто вал. Та нуналэ гурт калык — воргоронъёс, арлыдо нылкышноос но пиналъёс — вазь ӵукна чаклам интые люкаськылӥзы, ошпиез вандылӥзы но вӧсязы, солэсь вӧсь ӝук пӧзьтылӥзы. Вӧсяськон, вӧсям сиёнэз веръян понна быдэс гуртэн люкаськылӥзы[1].
1930-тӥ аръёсы вӧсяськонъёс алэмын вал, котьма ке но йылолъёсты лушкем ортчытъязы[1].
2018-тӥ арын Юкаменскысь 84 аресъем Тамара Невоструева Кӧрбан ортчытъямзы сярысь тодэ ваёнъёссэ мадиз:
Пичи дыръям курбон пудоез Кӧрбон азьын вандылӥзы, сое пӧзьто, вӧсяло но тусьтыосын возь вылэ нуо вал. Вӧсясь азьпала огназ вамыштэ вал, мукетъёсыз со бӧрсьы ог дас метр кемын сылӥзы, Инмарен кусып тупатыны медаз люкетэ шуыса. Вӧсясь йыбырттыса вӧсяськылӥз. Собере люкаськемъёс пала берытскылӥз, сӥлен тусьтызэ соослы сётэ вал. Ваньзы сое юдэсэн-юдэсэн чепыллязы, нош кылем сӥлез куспазы люкылӥзы но коркась корка нуизы. Юртъёсын вӧсям сӥль вуттэмлэсь азьвыл ӝӧквыл сиёнэн тыро вал ини. Бускельёссэс ӧтчаллязы. Ӝӧк сьӧры люкаськыса, котькуд семья кулэм ӵыжы-выжыоссэ буре вайылӥз. Та нуналэ одно ик пересьёс доры куное ветлоно вал (таосыз асьсэос куное ӧз вуттӥськылэ ке)[2].
Туала вакыт
1996-тӥ арын Удмуртиын Кӧрбан элькун шулдыръяськонлы пӧрмиз. Соку ужрадэ 600 бесерманъёс пыриськизы[3]. Нырысь-валысь со кык арлы огпол радъяськылӥз, но бератаз арлы быдэ ортчылӥз. Кӧрбан огаз бесерман гуртын ортчылэ (уноез выжы калык Удмуртиысь уйпал ёросъёсын интыясько). Шулдыръяськонэ артысь каргуртъёсысь но гуртъёсысь улӥсьёс гинэ уг люкасько, Киров улосысь, Мускоысь но мукет интыосысь но бесарманъёс вуо. Озьы ик ужрадэ мукет выжы калыкъёс но лыкто: удмуртъёс, ӟучъёс, бигеръёс. Шулдыръяськонэз валтӥсь радъясь Удмурт Элькунысь бесерман калык огазеяськон луэ[1].
Вӧсяськон но курбон сётон сяна, туала Кӧрбанын бадӟым шулдыръяськон программа радъяло: творческой коллективъёслэн концертсы, этнодискотека, бесерман воргоронъёс, нылкышноос но нылпиос пӧлын сэзь но кужмо луонъя ӵошатсконъёс, валъёсын ворттылонъёс. Кылсярысь, 2018-тӥ арын пиосмуртъёс ӝоглыкъя уробо питыран тупатъязы, кортӵог йыгазы, пу чуркаосты уськытъязы[4]. 2021-тӥ арын турнасьёс вожвылъяськизы, озьы ик скал кыскон аппаратэз бичанъя но сэрттонъя ӵошатскизы[5].
Арлы быдэ шулдыръяськонын кибашлыосын лэсьтэм арбериосын вузкаронъя, киужен вырон искусствоя мастер-классъёс ортчытонъя пӧртэм азбаръёс ужало[5].
Ортчытон интыос
- 2011 — Шамардан, Юкаменск ёрос[6];
- 2013 — Юнды, Балезино ёрос[7];
- 2015 — Вортча, Яр ёрос[8];
- 2017 — Яр, Яр ёрос[9];
- 2018 — Ёжгурт, Юкаменск ёрос[4][2];
- 2019 — Ёжгурт, Юкаменск ёрос[10];
- 2021 — Тылыс, Юкаменск ёрос[5];
- 2022 — Качкашур, Глаз ёрос[11];
- 2023 — Качкашур, Глаз ёрос[12];
- 2025 — Юнды, Балезино ёрос[13].
Валэктонъёс
- ↑ 1 2 3 Национальный праздник «Кöрбан» [ӟуч], РОО «Национально-культурная автономия удмуртов Республики Татарстан». Эскеремын: 18 гудырикошконэ 2025 арын.
- ↑ 1 2 Майя Бывальцева. Кӧрбан: бесерманъёсын матэгес тодматскыны луонлык [ӟуч], ИА "Удмуртия". Эскеремын: 18 гудырикошконэ 2025 арын.
- ↑ Мария Векшина. Лачмыт. Кызьы бесерманъёс Кӧрбаназы шулдыръяськизы [удм.], Удмурт дунне. Эскеремын: 18 гудырикошконэ 2025 арын.
- ↑ 1 2 Бесермяне Удмуртии отметили праздник «Кӧрбан» [ӟуч], Министерство национальной политики Удмуртской Республики. Эскеремын: 18 гудырикошконэ 2025 арын.
- ↑ 1 2 3 Гордимся, что мы – бесермяне! [ӟуч], Знамя Октября. Эскеремын: 18 гудырикошконэ 2025 арын.
- ↑ Республиканский национальный праздник бесермянского народа «Корбан» [ӟуч], Йӧскалык политикая министерство. Эскеремын: 18 гудырикошконэ 2025 арын.
- ↑ 15 июня 2013 года бесермянский праздник "Кӧрбан" собрал более 1000 человек [ӟуч], Йӧскалык политикая министерство. Эскеремын: 18 гудырикошконэ 2025 арын.
- ↑ Галина Семёнова. 6-тӥ инвожое ортчозы пор Семык, бесерман Кӧрбан, старовер "Петровское заговенье" [удм.], Удмурт дунне. Эскеремын: 18 гудырикошконэ 2025 арын.
- ↑ Бесермяне Удмуртии отметили свой национальный праздник «Кӧрбан» [ӟуч], Ресурсный центр в сфере национальных отношений. Эскеремын: 18 гудырикошконэ 2025 арын.
- ↑ Йӧскалык шулдыръяськонъёс [ӟуч], Йӧскалык политикая министерство. Эскеремын: 18 гудырикошконэ 2025 арын.
- ↑ Республиканские национальные праздники («Масленица», «Гербер», «Сабантуй», «Семык», «Кӧрбан», «Выль») [ӟуч], idil2022-2032.org. Эскеремын: 18 гудырикошконэ 2025 арын.
- ↑ Республиканский бесермянский национальный праздник «Көрбан» [ӟуч], Центр культуры и туризма Глазовского района. Эскеремын: 18 гудырикошконэ 2025 арын.
- ↑ Анастасия Мурзинская. В Удмуртии отметили национальный праздник «Көрбан» [ӟуч], ijevsk.bezformata.com. Эскеремын: 18 гудырикошконэ 2025 арын.