Нюлэсмурт
| Нюлэсмурт | |
|---|---|
 | |
| Нюлэслэн кузёез | |
| Мифология | удмурт |
| Кин луэмез | айы |
Нюлэсму́рт (ӵаӵӵамурт) (ӟуч: Лесной человек), (мукет нимъёсыз: Нюлэс кузё (ӟуч: Хозяин леса), Нюлэс нюня (ӟуч: Лесной отец, дядюшка), Быдӟым нюня (ӟуч: Великий отец)) — удмурт мифологиысь персонаж, нюлэслэн но тӧллэн кузёез. Христианство удмурт калык пӧлы пыӵамен Нюлэсмуртлэн образэз Николай Угодниклэн образэныз валчеяськиз[1].
Вылтусыз
Со кузь йырсиё но тушо адями выллем маке. Улон радыз но дӥськутэз огшоры адямилы укша. Йыр вылаз пыдэстэм шляпа, со улысь валлэн выллем кузь пельёсыз адӟисько. Кузь азямен, котьку сьӧд яке буёло куэм кускерттонэн керттӥськемын. Югдурез лыдэ басьтыса, со аслэсьтыз туссэ воштыны быгатэ: нюлэскын со писпуосын огӝужда, возь вылын — турын-куарен, адямиос пӧлын — адямилэсь кӧня ке ӝужытгес[1].
Улэ пеймыт нюлэскын, бадӟым, паськыт ваё кыз улын. Та инты туж кышкыт лыдъяське, ӵемысь со «тодон кылын» котыртэмын луэ, со кылэз туно-пеллё гинэ вала. Кин, пе, та писпуез ӵогиз, юнме шорысь вайзэ чигиз яке со улын сылыны кемдӥз, со одно ик шудтэм учыре шедёз: сӧсырмоз, висьыны усёз яке кулоз[2].
Нюлэсмурт тӧллэн кузёез шуыса лыдъяське. Нырысь-валысь тӧлэз, пе, Инмар кылдытэм, шунды тылсиосты чонари вотэсъёс медаз сайялэ шуыса, нош тӧл Нюлэсмуртлэсь кылзӥськем но радтэм зол пельтыны кутскем, сильтӧлэз кылдытэм. Уйпал удмуртъёслэн таӵе осконзы вань: лек гудыръяса зорыку «Тӥре-пуртэ бордам!» шуыса верано яке со шоры пуртэн лэзёно, шуо, озьы сильтӧлэз дугдытыны луоно. Нюлэскын тӧлэн погыръям писпуосты Нюлэсмуртлэн сюресъёсыз шуо, озьы, пе, со сюан карем. Осконъёсъя, Нюлэскузёлэн, Вумуртлэн сямен ик, аслаз хозяйствоез, семьяез вань. Сюанзэс соос ӵемысь Воздвижение нуналэ радъялляло[1].
Мифологиын
Нюлэсмурт аслаз кулэлыкезъя удмурт мифологиысь вань мукет макеос пӧлысь висъяське. Куд-ог тодосчиослэн малпамзыя, «Глаз палась удмуртъёслэн языческой инмаръёссы пӧлысь нырысетӥез но тужгес кужмоез — нюлэсъёслэн но тӧлъёслэн инмарзы шуыса лыдъяське... Озьы ик пусъемын солэн удмуртъёслэсь языческой культсэс возьыны юрттэмез. Одӥг кылын вераса, солэн юн бадӟым кужымез вань»[3].
Ваньмыз со удмуртъёслэн улоназы но лулчеберетазы нюлэслэн бадӟым инты басьтэменыз валэктӥське. Вашкалагес дыръёсы калык нюлэс пушкын улӥз, нош соин ваньмыныз кузёяськиз Нюлэсмурт. Пӧйшуръёс но тылобурдоос солэн косэмезъя гинэ калго-лобало, шуо. Куддыръя со ачиз но пӧйшур уллёез нуллэ. Со сяна, Нюлэсмурт, пе, чакласа возе, кудаз гуэ кыӵе гондыр выдыны кулэ. Нош янгыше усем сьӧлыко гондыръёслы толлы инты уг шедьы, соин ик толбыт калгыса ветлоно луо. Нюлэсмурт пӧйшурасьёс вылэ йыркуръяське, соосыз вием гондырез ултӥяло, серекъяло ке[4].
Калыкен кусыпъёсыз
Калыкен кусыпъёсыз капчиесь ик ӧвӧл. Уг яраты инкуазьын асьсэды возьыны быгатӥсьтэм муртъёсты, нюлэскын ортчыт зол кесясько-ӵашето ке, со йыромытыны («нуллэ» шуо калыкын), лулыз потытозяз бичатыны быгатэ. Туж уг кельшы, сое «лешак» нимын верало ке, гажаса но лякытэн вазиськемзэ кулэ каре[2].
Кышка пуныослэсь но пуны гонлэсь. Соин ик пӧйшураны потыкузы яке нюлэскы ужаны мыныкузы, удмуртъёс вылдӥсьсы борды пуны кулэсь пичи юдэс вурӟылӥзы яке пыдбинялтон висказы пуны гон тырылӥзы. Куддыръя дары пуйыоссэс но юри пуны кулэсь вурылӥзы. Нош сое сӥлы карыса, курбон сёто ке, Нюлэсмуртлэн мылыкыдыз воштӥське, либытгес луэ. Уката ик сьӧд тылыё ӵӧжез, ӟазегез, турез яке сялаез яратэ.
Адямиос солы пӧйшуранын, муш вордонын юрттэт курыса, озьы ик пудо-животъёсты утьыны, гужем возь вылын чакланы курыса, таӵе кылъёсын вазиськылӥзы: «Уть пудо-животъёсмес пӧйшуръёслэсь но урод адямиослэсь. Милям пудо-животъёсмы 12 шур йылтӥ, 12 нюлэс пыртӥ ортчозы , утялты но уть сое висёнъёслэсь но вань уродэзлэсь!» Нылкышноос солы кумышказылэсь нырйылзэ сӥзьылӥзы, со котьку мед удалтоз шуыса. Ӟеч урожай басьтон но кизем юосты кужмо тӧллэсь утён вылысь, Нюлэсмуртлы калык бакча ужъёс кутскон азьын но вазиськылӥзы. Сое сӥлы карыса, кузё кышно ӵуж мильым пыжыса, нянь юдэсэн ӵош юбо йылэ яке писпу вае поныса кельтылӥз. Кинлэн урожаез удалтэ, со сярысь калыкын «Нюлэс нюняен кусып возе» шуо. Нюлэсмурт озьы ик ожгарчиосты уте. Та сярысь веран куд-ог выжыкылъёсын пумиськылэ, кылсярысь, Нюлэсмурт солдатлы дораз бертыны юрттэ, яке солдат солэн ыстэм муртэз луэ[1].
Нюлэсмурт «кыл тодыны» юрттэ, шуо калыкын: «нуись-вайись, валтӥсь-келись» дышетоно муртэз нюлэс вадьсытӥ нуллэ, пе. Со бӧрсьы адями веднаськыны яке йӧнатыны быгатэ. Нюлэскын ышем муртэ кӧня ке дыр ортчыса, кияз тӧдьы кышетэн яке вуж азвесь коньдонэн шедьто ке, со "тодон-валан" басьтӥз шуыса лыдъяло. Нош адями со "тодон-валанэз" басьтыны уг ке быгаты, со визьзэ ыштэ. Соин ик визьтэммем муртъёсты Нюлэсмурт курадӟытэ, шуо[1].
Мукет лулосъёсын кусыпъёсыз
Нюлэсмуртъёс но Вумуртъёс куспын котьку но ӟырдыт ожъёс мынылӥзы; соос ӵемысь нуназе шорын ортчыло, соин адямиосты та вакытэ пыласьконлэсь но шуре пыронлэсь алылӥзы. Та выллем малпанъёс коми калык пӧлын но вӧлмемын вал[5].
Туала лулчеберетын
Нюлэсмурт Кез ёрослэн тодметпусэз лыдъяське. Ёросын интыяськем «Живица» кунокуаын Нюлэсмуртлэн гужем юртъерез кылдытэмын. Та палъёсысь удмуртъёс языческой мифологиысь вань макеос пӧлысь тужгес но сӥлы карылӥзы Нюлэсмуртэз. Татын ик «Мудор кыз» турмаршрут радъямын. Сое кылдытон бордын трос тыршиз Екатерина Семёновна Лекомцева.
Татын ик, Кез ёросын, кык дауръем кыз вӧзын Нюлэсмуртлэн писпуэз будэ. Со кыз улын уйпал удмуртъёс вашкала вӧсьёссэс ортчытъяллязы. Кызь вить метръем вӧсьлыко писпу Россиысь пересь писпуослэн реестразы пыртэмын но солы улэп инкуазьлэн синпелетэз инлык сётэмын. Татысь улӥсьёслэн верамзыя, Кез гуртлэн нимыз «кыз» кыл бордысь кылдэмын[6].
Валэктонъёс
- ↑ 1 2 3 4 5 Т. Владыкина Нюлэсмурт- леший [ӟуч] Энциклопедия Удмуртской культуры. Эскеремын 22.07.2025 арын
- ↑ 1 2 Нюлэсмурт [ӟуч] Национальная библиотека Удмуртской Республики. Воршуд. Эскеремын 22.07.2025 арын
- ↑ Верещагин Г. Е. Старые обычаи и верования вотяков // ЭО. 1909. Кн. 83, № 3. С. 49.
- ↑ Первухин Н. Г. Эскизы преданий и быта инородцев Глазовского уезда. Эск. IV. Вятка, 1889. С. 77.
- ↑ Гагарин Ю. В. История религии и атеизма народа коми. М.: Наука, 1978. С. 35.
- ↑ В Удмуртии растёт дерево Нюлэсмурт - хозяин всех птиц, зверей и насекомых [ӟуч] Национальный реестр старовозрастных деревьев России (25 февраля 2013). Эскеремын 22.07.2025 арын
Литература
- Владыкин В. Е. Религиозно-мифологическая картина мира удмуртов. Ижевск: Удмуртия, 1994.
- Верещагин Г. Е. Собрание сочинений: В 6 т. Т.1: Вотяки Сосновского края. Ижевск: УИИЯЛ УрО РАН, 1995. С. 214;
- Верещагин Г. Е. Собрание сочинений: В 6 т. Т.3, Кн.1: Этнографические очерки. Ижевск: УИИЯЛ УрО РАН, 1995. С. 208—216;
- Владыкина Т. Г. Удмуртский фольклор: проблемы жанровой эволюции и систематики жанров. Ижевск: УИИЯЛ УрО РАН, 1998. С. 65;
- Первухин Н. Г. Эскизы преданий и быта инородцев Глазовского уезда. Вятка,1888 — 1889. Эскиз I. C. 80-83.
