Палэсмурт
| Палэсмурт | |
|---|---|
 | |
| мифологиысь сюрлыез кузя кыклы люкем маке | |
| Мифология | удмурт |
| Кин луэмез | айы |
| Мукет культураосын | бигер Шурале |
Палэсму́рт (ӟуч: Получеловек) — мифологиысь сюрлыез кузя кыклы люкем маке (ӟуч: половинный человек). Тодметъёсызъя бигер мифологиысь шуралелы тупа. Удмурт фольклорын ӵем пумиськись персонаж[1].
Вылтусыз
Палэсмуртлэн вань тодметъёсыз сьӧсь макослэн выллемесь. Нуналлэн одӥг вадесысьтыз мукетаз выжон вакытэ, яке акшан дыръя пумиське. Ӵемысь сое Алангасарлэн образэныз герӟало, куддыръя Нюлэсмуртэн ӵошатыло ке но, Палэсмурт котьку адямиосын тушмонъяське: соин пумиськон ишанлы, шуо. Со кыре лэзем пудоез сьӧраз нуэ, яке адямиез лулыз потымон серекъятыны быгатэ[1].
Вераськонэз валантэм, нимаз куараос но кыӵе ке междометиос гинэ поттэ[2]. Нюлэскысь кылӥськись шуш куараосты Палэсмурт черекъя, шуо. Соосты кылыку, одно ик «Шур уллань!» шуыса вераны косо. Нюлэскын пумиськыса, сюрес юакуз но отчы ик ыстоно. Шурлэн вылӥ люкетаз ыстӥд ке, со берытскоз но адямиез одно ик быдтоз, шуо.
Вылтусызъя со сюрлыез кузя кыклы люкем адямилы укша — ӝыны йыро, ӝыны мугоро, одӥг синмыз, одӥг ки-пыдыз, кӧтпушкыз адӟиське (яке эшшо кыкетӥ ӝыныез «пыр адӟиськись» шуо). Улэ нюлэскын, куддыръя нюлэс дуре поталля, адямилэн кенер котыраз но матэктылэ яке тылскем доры доры потыны быгатэ. Нюлэскын зол куараен черекъямлэсь но шуламлэсь ало — кесяськем куараез кылыса, Палэсмурт вазиськоз, шуо.
Солэсь утиськон понна, Инмарез тодэ вайыса, вӧсяськыны но палэзьпу сьӧры ватскыны[3] яке, пыдкутчанэз пыдысь пыдэ воштыса, туж зол бызьыны косо. Калык верамъя, Палэсмуртэз озьы гинэ быдтыны уг луы, угось солэн котькуд вир шапыкысьтыз со выллем макеос кылдо. Со шоры беризь шелепен яке латунь бирдыен лэзьыны дэмлало. Палэсмурт кышка пуныослэсь, пӧйшурась пуныен ветлэ ке, со борды со уг йӧты. Палэсмурт мед буйгалоз но адямиос азе медаз поталля шуыса, бадӟым пал кут кутаса, кыз вай вылэ ошыса кельто яке нюлэскы дӥскут ошыло[1].
Мукет калыкъёслэн
Ӝыныё макеос дуннеысь мукет калыкъёслэн мифологиосазы но пумиськыло, Африкаысен кутскыса, Океаниозь но Лымшор Америкаозь[3].
Асьсэлэн палэс луэменызы асьме Палэсмуртлы кӧня ке укшало скандинавъёслэн сопал дуннеысь Хель нимо инмарзы, солэн одӥг ӝыныез огшоры, мукетыз — лултэм, сисьмемын, озьы ик ӟуч мифологиысь Баба-Яга — «костяная нога». Озьыен, «ӝынылык» возьматэ улэпъёслэн но кулэмъёслэн дуннеоссы вискын луонэз, персонажлэсь «одӥг пыдыныз шайвылын» луонзэ. Ойкуменалэн но нюлэслэн дураз улӥсь маке. Улонын ӝынылыклэн прототипъёсыз луо — инсульт бере ӝыныяз мугорын кылдэм паралич яке кулэм муртлэн сьӧсь пӧйшуръёсын ӝыныё-урдсо кесям шӧйыз.
Туала лулчеберетын
Туала вакытэ, уката ик егитъёс пӧлын, та персонаж сярысь малпанъёслэсь воштӥськемзэс шӧдыны луэ. Мифологиен герӟаськем веросъёслэн выжыкыл прозае выжеменызы но Палэсмуртлэн образэз воштӥське. Кылсярысь, со ӵемысь визьтэм но туж кужмо маке выллем возьматэмын, соин ик визьмо но нодлыко луэменыз, адями сое котьку капчиен вормыны быгатэ . Удмурт выжыкылъёсын со котьку отрицательной герой луэ. Кылсярысь, одӥгаз выжыкылын адями вумуртэз пӧяса, одӥг пыдзэ пыж борды, нош мукетсэ вуко кӧ борды думем но вуэ тэтчыны косэм, озьы сое шори кесем.
Туала литератураын Палэсмурт Ольга Арматынскаялэн огезлэн нылпи веросэзлэн героез луэ[4]. Озьы ик мукет туала авторъёслэн произведениосазы но пусъемын. Ижкарлы сӥзем статьяяз Палэсмуртлэсь образзэ возьматэ удмурт культуролог Игорь Кобзев[5].
Удмурт мифологиен но Палэсмуртэн видеошудонъёс пыр но тодматскыны луэ. 2025-тӥ арлэн кутсконаз Интернет вотэсын удмурт кылын видеошудонъёс потӥзы. Соосты кылдытӥзы Удмуртиысь нырысетӥ IT-классын дышетскись егит программистъёс. Проект улонэ пыӵатэмын «Куара» огазеяськонлэн тыршеменыз но Президент грантъёсъя фондлэн юрттэменыз. Кылсярысь, «Ондӥ но Палэсмурт» шудонын пияш сузэрзэ лек палэсмуртлэсь утьыны кулэ. Мукетаз — гурт калыкез Палэсмуртлэсь мозмытоно[6].
Литература
- Износков И. А. Палес-мурт // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1897. — Т. XXIIa. — С. 627.
- Палэс-мурт // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1897. — Т. XXIIa. — С. 663.
Валэктонъёс
- ↑ 1 2 3 Т. Владыкина (25 декабря 2015) Палэсмурт - половинный человек [ӟуч] Энциклопедия Удмуртской культуры. Эскеремын 28.07.2025 арын
- ↑ Т.Г. Владыкина,Т. И. Панина Образы лесных духов в удмуртской мифологии и фольклоре: II. Палэсмурт («Половинный человек / Человекообразное существо - половинка») [ӟуч] Ежегодник финно-угорских исследований. Эскеремын 28.07.2025 арын
- ↑ 1 2 Берёзкин Ю. Е., Дувакин Е.Н. Тематическая классификация и распределение фольклорно-мифологических мотивов по ареалам. Существа-половинки [ӟуч] Аналитический каталог. Эскеремын 29.07.2025 арын
- ↑ Ольга Арматынская (24 ноября 2020) Археолог с душой поэта»: к юбилею Ольги Арматынской [ӟуч] Национальная библиотека Удмуртской Республики. Эскеремын 29.07.2025 арын
- ↑ Деревенский Петербург
- ↑ В Удмуртии создали мобильные игры на родном языке [ӟуч] Национальный акцент (20 февраля 2025). Эскеремын 28.07.2025 арын
