Донды батыръёс

Донды батыръёс (Н. Г. Первухинлэн вариантаз: Донды палась батыръёс сярысь мадёсъёс; ӟуч: Дондинские богатыри) — XIX даурлэн кыкетӥ люкетаз гожтэм удмурт мадёсъёс. Мадёсъёс Чупчи археологияя лулчеберетысь куштэм каръёсын куке но улэм батыръёс сярысь верало.

Мадёсъёсты нырысьсэ поттӥзы фольклорист Б. Г. Гаврилов (1880-тӥ арын), шаерчиос Н. Г. Первухин (1886-тӥ но 1888-тӥ аръёсы) но Г. Е. Верещагин (1886-тӥ арын). Н. Г. Первухин мадёсъёсты радъям гинэ ӧвӧл — соосты творчествоя зол тупатъяз-выльдӥз но, соин ик солэн изданиосын вылэ история но этнография ласянь чӧлскон азьын сак луоно.

Донды батыръёс сярысь мадёсъёс география нимъёсын — топонимъёсын — герӟаськемын но соосты валэкто, мукет сямен вераса, оттопоним луо. Со мадёсъёс Чупчи шур кузя улӥсь (али — Удмуртиысь Глазов ёрос) удмуртъёс пӧлынгес вӧлмемын вал, со дыре ик Идна сярысь мадёс паськыт кылӥськиз.

Пуштросэз

Мадёсъёсын удмурт батыръёслэн улэм-вылэмзы сярысь верамын. Котькуд батырлэн аслаз карез (ӟуч: городище) вал, ӵемысь со каръёс гурезь вылын интыяськылӥзы.

• Валтӥсь геройёсыз:
  • Донды́ — батыръёс пӧлысь тужгес арлыдоез (одӥгъёсызлэн верамзыя, вынъёс пӧлысь бадӟымез, мукетъёсызлэн пусъемзыя, мукет батыръёслэн атайзы), нырысь-валысь Иднакарын улэм, отӥяз Дондыкаре выжем;
  • Идна́ (Игна, Иднать), Гурья́, Весья́, Зуй — Дондылэн пиосыз яке вынъёсыз, соос Иднакарын, Гурьякарын, Весьякарын но Зуйкарын улӥллям.
• Кыкетӥ планысь персонажъёс:
  • Эбга́ — батыръёс пӧлысь огезлэн кышноез;
  • Чиби́нь — Эбгалэн пиез.

Нимъёслэн этимологизы

Батыръёслэн нимъёссы топонимъёс пӧлы пыро, соин ик мадёсъёс оттопонимъёс пӧлы пыртэмын. Оглом учкыса, соос ӟуч нимъёсты удмуртэ берыктэмъёс луо — Игнат, Гурий, Вася, Зуй. Удмурт тодосчи М. Г. Атаманов талы пумит, кылдэмзэс (этимологизэс) валэктытэк, соослэн чылкак удмурт кылысь потэмзы сярысь вералляз. Со Гурья нимлэсь гинэ кылдэмзэ валэктӥз: Гуръя ← удм. гур, "писпулэн гурыез + аффикс -я.В. В. Напольских но В. С. Чураков Атамановлэсь эскерон ужъёссэ курлаллязы. Донды, мукетъёсыныз ӵошатыса, ноку но нимъёс пӧлы, вылды, ӧз ик пырылы, солэн кылдэмезлы удмурт кыл ласянь валэктон шедьтыны нокызьы ӧз быгатэ. Эбга — со огез воршуд ним. Та выжыысь потэмъёс Чупчи шурлэн шорыз кузя улӥзы, ӵемысь — Вуж Эбга (ӟуч: Красная Слудка ) гуртын. Чибинь — ас ним, мукет диалектэн — кузьныр, кузькук, виръюись, ӟуч: «комар, ничтожество» шуэм луэ. Чибинькар гурт карлэн нимысьтыз поттэмын, XIX даурысен калыкез лыдъян-чотанъёсын ӟуч нимыз Комарово сямен тодмо.

Наука ласянь валэктон

Азьвыл батыръёсты археологияя Чупчи лулчеберет вашкала каръёсын герӟаллязы, но тазьы валэктон кӧня ке мугъёсъя умойтэм. Удмуртъёс Чупчи шурлэн шор котыраз XVI дауре выжыяськизы, мукет сямен вераса, та лулчеберет бырем бере кӧня ке дыр ортчыса. XVII даур кутсконысь калыкез лыдъян-чотанысь ивортонъёсъя, уйпал удмуртъёс пӧлын ӟуч черк но черк луисьтэм нимъёс XVI дауре ик вӧлмемын вал ни, нош ватка удмуртъёслэн христианствое пыремзы сярысь верась нырысетӥ ужкагазъёс 1557-тӥ арен герӟаськемын. Уноез удмуртъёс христианствое бергес, XVIII—XIX дауръёсы, пыризы ке но, батыръёслэн нимъёссы удмуртъёсын ик герӟаськыны быгатылӥзы. Мадёсъёсын поттылэмын, Идна «Тӧдьы эксэй» вакытэ ик улӥз шуыса, озьыен, Иван Грозный кивалтэмлэсь азьвыл ӧз улы шуыса валан кылдэ. Озьы ик мадёсъёсын пусъемын, Идна ӟучъёсын нюръяськиз шуыса. Таин валче батыръёсты вашкала каръёслэн историенызы герӟаны уг яра, нош «геройлыко эпослэн» тодметъёсыз чупчи лулчеберетысь «вашкала удмуртъёслэсь» политика ласянь азинскемзы шоры возьмато.

Историысь чылкак пӧртэм пластъёсты ог-огенызы ӵошатонлы калык тодэ ваёнъёсын параллельёс вань — кылсярысь, вашкала куашкам каръёсты «пугачъёсын» — Е. Пугачёвлэн шайкаысьтыз ёзчиосын — герӟась удмурт мадёсъёс вань, власть пумит ӝутскемъёс со палъёсын ноку ӧй вал ке но. Оглом учконо ке, Идна сярысь мадёс уйпал удмуртъёслэн нимысьтыз группазы пӧлын дано вал, солы йыбыртъязы, сое ӝутӥзы но.

Вылӥын пусъем фактъёс удмурт археологлы М. Г. Ивановалы, Н. Г. Первухинлэн мадёсъёс сярысь валэктонъёсыз вылэ пыкиськыса, аслэсьтыз концепцизэ юнматыны ӧз люкетэ, соя Иднакар «вашкала удмуртъёслэн центрзы» вал.

Туала чеберлыко литератураын

Донды батыръёс сярысь мадёсъёс, тужгес но Н. Г. Первухинлэн творчествоя обработкаяз но интерпретацияз, удмурт интеллигенция пӧлын ӵемысь кутӥсько но дано луо, мадёсъёсты огазеяса, Калевала но Калевипоэг выллем быдэс цикл кылдытыны кӧня ке пол выризы .

«Донды кругысь» батыръёс сярысь сюжетъёсты данэ поттон зэмос историкъёсты сюлэмшугъяськытэ, малы ке шуоно югдурез тодӥсьтэм лыдӟись пӧяськеме кыльыны быгатоз, со малпалоз, туала улонэ выжтыса тупатэм мадёсъёс уйпал удмуртъёслэн кылысь кылэ вӧлмись калык творчествозылэн аспӧртэмлыко образецез луо шуыса, отын чупчи археологияя лулчеберетэ пырись вашкала каръёслэн вакытысьтызы историысь зэмос улонзы фольклор амалэн возьматэмын, кожалоз.

Валэктонъёс

Чӧлсконъёс

• Напольских В. В. (Ижевск) Батыр пезьдэт : кто есть ху? [рус.], udmurt.info. Эскеремын: 27 пӧсьтолэзе 2025 арын.
• Работа Н. Г. Первухина над циклом «Легенды о богатырях Дондинского округа» [рус.], cyberleninka.ru. Эскеремын: 27 пӧсьтолэзе 2025 арын.