Вумурт
| Вумурт | |
|---|---|
 | |
| Вулэн кузёез | |
| Мифология | удмурт |
| Кин луэмез | айы |
| Мукет культураосын | ӟуч мифологиын Водяной |
Вуму́рт (ӟуч: Водяной человек), Вукузё (ӟуч: Хозяин воды), Ву нюня (ӟуч: Водяной дядя) — вулэн кузёез — удмурт мифологиысь демонологической персонаж[1].
Вылтусыз
Вумурт — валтӥсез ву кузё. Со мукет вутымъёсысь ву кузёосын кивалтэ. Ӵемысь сое бадӟым ӝужыт пересь адямиен возьмато, йырсиез кузь, пеймыт тусо, куддыръя тыбыраз одӥг синмыз луэ[2], пыдпыдэсыз ластъёс выллем кузесь. Шур куасьме ке, озьыен, отысь Вумурт кошкем, шуо калыкын.
Вумурт адямиос сямен ик бадӟым семьяен улэ . Синмаськымон чебер кышноез но туж трос пиосыз-нылъёсыз вань. Вумуртъёс пиоссэс бускель вуосысь вумуртъёслэн нылъёсынызы кузпалъяло; тулыс тудву кошкон вакытэ зол ӵашетыса сюан ортчыто. Бугыръяськыса кошкись тудвуэз вумуртлэн сюан поездэз, шуо, со ваньзэ сюрес вылысьтыз маялтыса кошке. Сюаназы, пе, ӵемысь пинал гогыясез ӧтчало.
Солэн нылъёсыз кузь сьӧд йырсиоссэс, ярдуръёсын, выжъёс вылын яке вуко питран вылын пукыса, тӧдьы сынэн сыналляло. Куддыръя пиосыз но вуысь поталляло, но соосты адӟон ишанлы, шуо.
Вумурт ӵемысь вуко палась вукожъёсын улэ. Толалтэ Вожодыр азьын вуысь музъем вылэ потэ но мунчоосы каръяське, ульчаысь но пумиталляны луэ[1].
Адямиосын кусыпъёсыз
Вумурт вукочиослы юрттэ, со понна кузьымлы сьӧд ыжпиез яке атасэз куре. Адями солы кельше ке, соку со вукочи доры пызь изыны курисьёсты вуттэ, яратоно чорыгасьлэн сетъёсаз чорыгъёсты улляса пыртэ. Нош кин ке солы уг кельшы ке, солэсь пудозэ тыметэ выйтэ, яке семьяез вылэ пӧртэм висёнъёс, шудтэм учыръёс келя. Шур дуре сьӧд дӥсен ветлӥсьёслы но шурын суаськем кырсь пуртыоссэс миськисьёслы юн вожзэ поттэ.
Озьы ик вузкаронын удалтонэз уте, вузкарись солы кельше ке. Базаръёсын адямиос пӧлтӥ ветлэ, сое тодман понна аспӧртэмлыко тодметэз чакланы кулэ: вумуртлэн паллянпал сӧзулыз котьку кот улэ[3]. Вумуртлэн узырлыкез уно, соин ик со яратоно муртъёсызлы кузьмаськыны быгатэ.
Вумуртлэсь вожзэ поттонтэм вылысь, адямиос солы тылобурдоен но ыжен курбон сётъяллязы, нош арлы одӥг пол — гордпыръем ошпи вандылӥзы. Со курбон сётон сям-йылолъя, Вумуртэз гажало но ӟеч инмаръёсын оградэ пукто шуыса валаны луэ. Куддыръя сое ӵуж мильымен но кумышкаен шумпоттылӥзы[1].
Вазенгес удмуртъёс шурысь шедьтэм белемнитъёсты «вумуртлэн чиньыосыз» шуыса лыдъяллязы. Соослэн малпамзыя, Вумуртлэн чиньыосыз,пе, ӵемысь усьыло но соос интые берен будо. Соосты октыса, пыргытылӥзы но эмъяськонын вир кошконэз дугдытон понна кутылӥзы[4][5].
Мифологиын
Тросаз дауркылъёсын но выжыкылъёсын Вумуртлэн чылкыт выжыысь дуно валъёсыз возьматэмын. Кылсярысь, Вумурт Эштэрек батырлы аспӧртэм валзэ кузьмаз, солы луыса батыр тушмонъёссэ вормыны быгатэ. Но ву кузёлы азьпал сётэм кылзэ быдэстымтэеныз бырыны шеде. Куд-ог веросъёсын но мифологической выжыкылъёсын Вумурт вуын «сылӥсь» чипей выллем возьматӥське, солэн йырыз ярдур пала берыктэмын луэ. Сыӵе чорыгез исаны уг лэзё, Вумурт пунэмзэ берыктоз, шуо[1].
Удмуртъёслэн осконъёссыя, вуэ выем яке каргам муртъёс Вумурт дорын вал интыын уло, ву кузёос соос вылын ворттыло. Сыӵе мурт огшоры адямиос пӧлысь кузпал шедьтыны быгатэ ке, сюан йылол ортчытыса, ас туссэ берыктэ[2]. Тросаз удмурт мифологической мадёсъёслэн но выжыкылъёслэн сюжетъёссы со оскон вылэ пыкиськыса кылдытэмын. Кылсярысь, ву улысь нылаш пияшлы возьматӥське но сое кышно басьтыны куре, соиз пумит луэ ке, кулонэн кышкатэ.
Мукет мифологи персонажъёсын кусыпъёсыз
Нюлэсмуртъёс но вумуртъёс куспын котьку но ӟырдыт ожъёс мынылӥзы; соос ӵемысь нуназе шорын ваче пумит вуо, соин ик адямиосты та вакытэ пыласьконэсь но вуэ пыронлэсь алыло. Сыӵе осконъёс коми калык пӧлын но вӧлмемын вал[6].
Валэктонъёс
- ↑ 1 2 3 4 Т. Владыкина Нюлэсмурт- леший [ӟуч] Энциклопедия Удмуртской культуры. Эскеремын 22.07.2025 арын
- ↑ 1 2 Нюлэсмурт [ӟуч] Национальная библиотека Удмуртской Республики. Воршуд. Эскеремын 22.07.2025 арын
- ↑ Первухин Н. Г. Эскизы преданий и быта инородцев Глазовского уезда. Эск. IV. Вятка, 1889. С. 62-80.
- ↑ Первухин Н. Г. Эскизы преданий и быта инородцев Глазовского уезда. Эск. I. Вятка, 1888. С. 73-74.
- ↑ Ложкина Е. В. «Чертовы пальцы» (вумурт чиньы) в народном целительстве удмуртов Архивная копия от 21 оштолэзе 2011 на Wayback Machine
- ↑ Гагарин Ю. В. История религии и атеизма народа коми. М.: Наука, 1978. С. 35.
Литература
- Владыкин В. Е. Религиозно-мифологическая картина мира удмуртов. Ижевск: Удмуртия, 1994.
