Лӧпшо Педунь
| Лӧпшо Педунь | |
|---|---|
| ӟуч: Лопшо Педунь | |
 | |
| Вордӥськем дырыз | 1875-тӥ арын |
| Прототипез | Фёдор Чирков |
Лӧпшо Педунь (ӟуч: Лопшо́ Педу́нь) — удмурт фольклорысь тодмо персонаж. Со туж нодлыко но огдыре ик огшоры воргорон, лэчыт кылыныз урод сямо муртъёсты сереме уськытэ но адямиослэсь мукет тырмымтэоссэс шарая.
Вылтусыз
Удмурт кылын «Фёдор» ним «Педор» шуыса кутӥське, малы ке шуоно, «Ф» буква удмурт алфавитэ туж бер, 1930-тӥ арлэн кутсконаз гинэ пыртэмын. Калык пӧлын капчиятыса — «Педунь». «Лӧпшо» кылэз ӟуч кылэ «Весельчак, балагур» шуыса берыкто. Лӧпшо Педунь — визьмо но нодлыко адями, пӧртэм шуг-секытъёсты капчиен ворме но нодтэм, азьтэм муртъёсты сереме уськытэ, соин валче, огшоры ужась калыкез юнме вӧсь уг кары. Педуньлэн аслаз алдаськыны яратэмез урод сям кадь уг возьматӥськы: со уго алдаськон пыр укылтэм адямиосты гинэ ултӥя. Солэн мадёсъёсыз удмурт калыклэн выжыкылъёсаз, вакчи мадёсъёсаз, юморескаосаз пыртэмын. Педунез ӵемысь ӵошато ӟуч выжыкылъёсысь Иванэн яке Шор Азиысь калык мадиськонъёсысь Ходжа Насреддинэн[1].
Лӧпшо Педуньлэн костюмезлэн валтӥсь люкетэз — дуннеез котыръяса ветлэм кутъёсыз. Сюрес вылэ потыкуз, мед удалтоз шуыса, Педор одно ик сьӧраз песьтэрзэ, пе кутэ вылэм[2]. Калыкын вӧлмемын таӵе мадён: вашкала дыръёсы удмуртъёслэн улонэз радъяны дышетӥсь Бадӟым Вӧсьлыко книгазы вылэм. Одӥг пол со книга чиптэм-чаптэм ышем, солэсь бамъёссэ тӧл быдэс дуннее вӧлмытэм. Ӵапак со книгалэсь одӥгзэ бамзэ дуннеез котыръякуз Педунь шедьтэм. Отын, пе: «Улонысь ваньзэ сюлэм пыртӥд эн потты, ваньмыз шоры капчиен серем пыр учкы но, удалтонлыкед бордад улоз» шуыса гожтэмын вылэм. Со дырысен Лӧпшо Педуньлы вань ужъёс капчиен сётӥськылӥзы, ачиз Вӧсьлыко книгаын гожтэмъя, серекъяса, маскаръяськыса улӥз[2].
Кылдэмез
Кема дыр ӵоже Лӧпшо Педунез малпаса кылдытэм персонаж шуыса лыдъяллязы. 1950-тӥ аръёсы Удмурт кун университетысь Кылъя но удмурт литературая но СССР-ысь литератураосъя кафедралэн доцентэз Даниил Яшин одӥгаз фольклоръя экспедициын Лопшо Педунь сярысь веранэз кылэм. Со дырысен эскерисьёс пыр-поч та темаез эскерон борды басьтӥськизы. Берло мытэм ужез Эгралась Шаертодонъя музейын ужасьёс азьланьтӥзы. Озьы, Левой Кушьяын улӥсь Капиталина Архиповна Чирковалэн сётэм материалэз вылэ пыкиськыса, зэмос Лӧпшо Педуньлэн улэмез сярысь тодэтъёс шедьтэмын вал[3]. Педор выжылэн инъясез ӵапак Лӧпшо Педунь — Фёдор Иванович Чирков вылэм. Со вордӥськемын 1875-тӥ арын Левой Кушьяын. Туж мыло-кыдо, ӟеч сямо, ужаны но, кырӟаны-вераны но, арганэн шудыны туж шаплы вылэм. Гуртысь одӥг шулдыръяськон но Фёдор Ивановичтэк уг ортчылы вылэм[4]. Кузпалыз Одок, черкын сётэм нимыз Феодосия[5], соос куинь пи но кык ныл будэтӥзы, соосызлэн асьсэлэн нылпиоссы, внукъёссы, правнукъёссы вордӥськизы. Лӧпшо Педуньлэн бадӟым семьяяз 300-лэсь трос улӥсез лыдъяське. 2009-тӥ арын басьтэм тодэтъёсъя, тужгес мӧйыезлы 89 арес, тужгес пичиосызлы – быдэн кык. Ӵыжы-выжыез быдэс кунын пазьгиськемын, нош тросэз вордӥськем гуртазы ик улэ[6].
Культураын
Туала вакытэ Лопшо Педунь Эгра ёрослэн тодметпусэз лыдъяське. Ёросэз тодмогес карон вылысь Сундур гуртын Удмурт калык культурая центрын Лӧпшо Педуньлэн юртъерез усьтэмын[5], со инбам улын кылдытэм вашкала юртъер котырен, кеносэн удмурт коркаен аспӧртэмлыко музей[2], отын ик «Лӧпшо Педор доры куное» эскурсионной программа кылдытэмын[7][8]. Со сяна, та героен тодматскон вылысь, Лӧпшо Педунь Эгралась шаертодонъя музейлэн экскурсионной программаосаз пыртэмын («Игра в Игре с Лопшо Педунем» яке «Пельменные истории»[9]).
2012-тӥ арын 6-тӥ оштолэзе Эгралась Калыкъёслэн эшъяськон юртазы ортчиз «Лӧпшо Педунь маскаръяське» нимо I элькун фестиваль. СоФёдор Чирковлэн вордӥськем нуналызылы но серекъян нуналлы сӥзыса радъямын вал, ортчытэмын Удмурт Элькунысь Йӧскалык политикая министерстволэн юрттэмезъя[10].
2019-тӥ арын «Удмуртия» издательство Лӧпшо Педунь сярысь выль книга поттӥз. Выль издание чурыт обложкаен но Михаил Вахринлэн буёло суредъёсыныз чебермамын[11].
Валэктонъёс
- ↑ Лӧпшо Педунь серекъя [ӟуч] Национальная электронная библиотека Удмуртской Республики. Эскеремын 21.07.2025 арын
- ↑ 1 2 3 Дом Лопшо Педуня [ӟуч] Центр развития туризма Удмуртской Республики. Эскеремын 21.07.2025 арын
- ↑ Лопшо Педунь [ӟуч] Игринская централизованная библиотечная система. Эскеремын 21.07.2025 арын
- ↑ Лопшо Педунь. Информационный центр финно-угорских народов Эскеремын 21.07.2025 арын
- ↑ 1 2 Лопшо Педунь [ӟуч] Живое наследие. Эскеремын 24.07.2025 арын
- ↑ Лопшо Педунь знает секрет счастья и юмора [ӟуч] RATA-news (30 марта 2009). Эскеремын 24.07.2025 арын
- ↑ На родину Лопшо Педуня [ӟуч] Финно-угорский мир.
- ↑ Игринский районный краеведческий музей. На родине Лопшо Педуня - Виртуальный тур
- ↑ Мария Ганиянц (3 апреля 2009) Самый веселый персонаж Удмуртии Лопшо-Педунь раскрыл секрет счастья [ӟуч] РИА Новости. Эскеремын 21.07.2025 арын
- ↑ I Республиканский фестиваль национального юмора «Лопшо Педунь смеётся» [ӟуч] Министерство национальной политики УР (13 апреля 2012). Эскеремын 21.07.2025 арын
- ↑ Новую книгу о Лопшо Педуне выпустили в Ижевске [ӟуч] Ресурсный центр (22 апреля 2019). Эскеремын 21.07.2025 арын
