Удмуртиысь драмая ӟуч кун театр

Удмуртиысь драмая ӟуч кун театр
Удмуртиысь драмая ӟуч кун театр
Кылдытэмын	1935
Театрлэн юртэз
Интыяськемез	Россия Россия, Ижкар, МаксимГорький нимо урам, 71
Кивалтэт
Кивалтӥсез	Стелла Кудрявцева
Валтӥсь режиссёрез	Яков Ломкин
Сайт	Официальный сайт
Медиафайлъёс РувикиМедиа пушкын

Россилэн лулчеберето кылёс лэсьтосъёсыз улос инлыкен
рег. № 181610681900005 (ЕГРОКН)
лэсьтос № 1800000023 (БД Викигида)

Удмуртиысь драмая ӟуч кун театр (ӟуч: Государственный русский драматический театр Удмуртии) интыяськемын Ижкарысь Октябрь ёросын Максим Горький нимо урамын. Кивалтӥсез Кудрявцева Стелла Александровна

Историез

1935-тӥ арын 11-тӥ инвожое Удмурт АССР-ысь Совнарком элькунын ялан ужась ӟуч драмая кун театр кылдытон сярысь Пуктэт кутӥз. Нырысетӥ коллектив Москваысь Художественной театрысь, провинциальной театръёсысь но театральной училищеосты йылпумъям актёръёслэсь люкамын вал. Усьтэмын 1935-тӥ арын 18-тӥ коньывуонэ «Аристократы» нимо спектаклен. Театрлэн нырысь ужан аръёсаз сцена вылын «Маскарад», «Три сестры», «Мёртвые души», «Иркутская история» произведениосъя дасям постановкаос возьматэмын вал.

Юртлэн уйпал люкетаз Удмуртилэн 1-тӥ Конституциезлы сӥзем буре ваён пул шуккемын

Театрлэн юртэз СССР-ын 1960-тӥ арын поттэм марка вылын тусъетамын

1941-тӥ арын куартолэзе ӟуч но удмурт драмая огазеяськем театрлэн юртэз, соин валче, ваньмыз сямен, реквизит тылпуын ӝуаса быриз. Коллективлэн оглюкетэз Сарапулэ выжиз, собере ӝоген тылож кутскиз. Труппа госпитальёсын, колхозъёсын, заводъёсын но фабрикаосын спектакльёс возьматъяса ветлӥз, озьы ик выль постановкаос дасялляз: «Русские люди», «Двенадцатая ночь», «Батальон идёт на запад», «Дама-невидимка», «Нашествие» но «Сирано де Бержерак».

1946-тӥ арын театр Карл Маркс урамысь нимаз юртэ интыяськиз, отчы ик берытскиз азьвыл труппа. Театрлэн юртэз В. Тишин архитекторлэн проектэзъя пуктэмын, 760 муртлы чакламын, интыяськемын карлэн шоразгес. Театрлэн выль юртэз усьтэмын И. Г. Гавриловлэн «Азин» произведениезъя пуктэм спектаклен.

1961-тӥ арысен театрлы ӟуч гожъясьчилэн В. Г. Короленколэн нимыз сётэмын. Солы сӥзьыса, но Удмуртилэсь историзэ улӟытыса, сцена вылын пуктэмын «Русский друг» спектакль. Отын возьматэмын дас укмысэтӥ даурлэн 80-тӥ аръёсаз ортчем «Мултан уж». Со кема кыстӥськись югдурын Владимир Короленко адями курбон сётонын юнме янгыше уськытэм удмуртъёс пала дурбасьтыса, соосты шонере поттыны быгатӥз. 1970—1980-тӥ аръёсы сцена вылын «Мария Стюарт», «Старомодная комедия», «Вечно живые», «Святая святых» но мукет спектакльёс возьматэмын. 1980—1990-тӥ аръёсы М. Шатровлэн «Диктатура совести», «Самоубийца», «Звёзды на утреннем небе», «Черный человек, или Я бедный Сосо Джугашвили» спектакльёсыз мынӥзы. 2000-тӥ аръёсы"Гений и беспутство", «Театр», «Волки и овцы», «Медовый месяц длиною в жизнь», «Пока она умирала» но «Плачу вперед» спектакльёс пуктэмын.

2011-тӥ арын театр Максим Горький нимо урамысь В. П. Орлов архитекторен пуктэм юртэ выжиз, солэсь азьпал отын «Ижмаш» культурая дворец ужаз. Война вакытэ со юртэ пыӵалтӥрлык поттон цехъёсты интыязы. 2010-тӥ арозь та юртэз «Триумф Победы» композиция чебермаз. Ужасез но ожгарчиез возьматӥсь скульптура 1948-тӥ арын лэсьтэмын вал, нош Культура юртэз вылдэм бере, сое утялтӥзы.

Юртлэсь архитектура ласянь азьвыл туссэ берыктон вылысь, Ижысь скульпторъёс, вашкала туспуктэмъёс но архив материал вылэ пыкиськыса, скульптурной композицилэсь копизэ лэсьтӥзы.

Театр туала вакытэ

Театрлэн туала репертуараз пыртэмын «Мария Стюарт», «Тёмные аллеи», «Игроки», «Барин, Полина и петух», «Дама с камелиями» но мукет — ваньмыз-ӧвӧлыз 25 произведение. Берло дас арзэ театрен кивалтӥз Росиысь сӥё-дано артист, Удмурт Элькунысь искусство удысысь дано ужась Владимир Сафонов. 2010-тӥ арын сӥзьылысен валтӥсь режиссёре юнматэмын Виктор Прокопов.

Театр юртлэн шундыпуксёнпал люкетэз. Бур палаз Михайловской колонна сылэ.

Театр мукет каръёсысь артистъёсын ӟеч кусып возе. 2012-тӥ арын «Егит режиссёръёслэн творческой лабораторизы ортчытэмын».

2002-тӥ арысен Удмуртиысь ӟуч драмая кун театрен кивалтэ Кудрявцева Стелла Александровна. 2017-тӥ арысен театрлэн валтӥсь режиссёрез — Яков Ломкин. Али дыре труппаын тыршо: Росси Федерацифысь сӥё-дано артистъёс Ю. П. Малашин, Н. Н. Ротов, Удмурт Элькунысь калык артистъёс Г. А. Аносова, И. В. Дементова, А. Н. Демышев но мукетъёсыз.

Удмуртиысь ӟуч театрын шудӥсь Росси Федерациысь сӥё-дано артист Юрий Малашин Россиысь «Золотая маска» Йӧскалык премилэн лауреатэз луиз, «Папа» спектакльын «Тужгес устоез воргорон роль» номинациын. Вылӥ театральной премиен пусъён ужрад ортчиз 2025-тӥ арын 26-тӥ инвожое Казаньын

Ӟуч театрен герӟаськем тодмо муртъёс

• Августина Миклашевская — РСФСР-ысь сӥё-дано артистка (1945). Ӟуч кылбурчилэн Сергей Есенинлэн яратоно муртэз, «Любовь хулигана» сузьетысь сизьым кылбурез солы сӥземын;
• Евреинова, Ванда — УАССР-ысь сӥё-дано артистка;
• Гальнбек, Борис — УАССР-ысь сӥё-дано артист;
• Гляттер, Соломон — УАССР-ысь сӥё-дано артист, Удмуртиысь искусство удысысь дано ужась;
• Гусаров, Николай Николаевич — УАССР-ысь сӥё-дано артист;
• Кац, Аркадий Фридрихович — Росси Федерациысь искусство удысысь дано уджась;
• Конопчук, Павлина Васильевна (1949—1961), РСФСР-ысь калык артистка;
• Пастунов, Александр Михайлович — РСФСР-ысь калык артист, Удмурт АССР-ысь калык артист;
• Мази, Анжелина Гулермовна — Удмурт АССР-ысь калык артистка; Россиысь сӥё-дано артист;
• Свечников, Владимир Дмитриевич — Удмурт АССР-ысь калык артист, Россиысь сӥё-дано артистнародный артист.

Валэктонъёс

Чӧлсконъёс

• О театре [ӟуч] Государственный русский драматический театр Удмуртии. Эскеремын 15.07.2025 арын

• Государственный Русский Драматический театр Удмуртии [ӟуч] izhevskinfo.ru. Эскеремын 15.07.2025 арын