Финн-угор кылъёс

Википедиысь материал
Финн-угор кылъёс
Кыл систематика вай
Кылдэм родинаез Урал
Ареал Венгрия, Норвегия, Россия, Финляндия, Швеция, Эстония но мукетъёсыз.
Классификация
Дуннеысь кылъёс Евразиысь кылъёс
Урал кылъёс
Пуштросэз
Угор кылъёс, Финн-пермь кылъёс
Висъяськон вакыт кыкетӥ палараысьтыз 3 сюрс ар асьме эралэсь талэсь азьвыл[1]
Лексикостатистика 34 %
Кылъёслэн кодзы
ГОСТ 7.75–97 фиу 742
ISO 639-2 fiu
ISO 639-5 fiu

Финн-угор кылъёс (озьы ик — у́гро-финн кылъёс; ӟуч: Финно-угорские языки) — урал кылсемьяе пырись выжы луись группае шедем кылъёс. Та кылъёс Венгрия, Норвегия, Россия, Финляндия, Швеция, Эстония но мукет кунъёсын кутӥсько.

Кыл писпу

Статусэз

Азьло дырысен лыдъяло вал: вашкала урал кыл кык вайлы люкиськиз — финн-угор но самоди, малы ке шуоно самоди лексика мукет урал кылъёслэсь туж зол висъяське. Но уноез туала лингвистъёс вашкала финн-угор кыллэн кылдэмезлы но нимаз азинскемезлы уггес оско, угось вань финн-угор кылъёслы тупась фонологиын, морфологиын но лексикаын огъя тодметъёсыз ӧвӧл. Самоди кыллэсь лексика ласянь аспӧртэмлыксэ ӝог азинскеменыз герӟало, финн-угор кылъёс та ласянь бере кылизы, оло, тодмотэм субстрат яке адстрат луись кылъёсты вераськоназы трос пыртэменызы[2][3].

Финн-угор кыллэсь азинскон этапезлы туннэ уралистъёс Юха Янхунен[4] но Владимир Напольских дурбасьто, нош та теорилы Тапани Салминен, Анте Айкио, Янне Саарикиви, Яакко Хаккинен, Юхо Пюстюнен но Михаил Живлов пумит луо[5].

Кылъёсты тодон-эскеронъёслэн историзы

Урал калыкъёс сярысь нырысетӥ ивортонъёс Вашкала Римысь Публий Корнелий Тацит историклэн «Германия» произведенияз пумисько, отын «фенни» калык сярысь верамын (ӵемысь та калыкез вашкала саамъёсын ӵошато), озьы ик отын Скандинавилэн  [ӟуч] (удм. пыдлось улосъёсаз улӥсь кык финн-угор лыдъяськись племенаос сярысь пусъемын.

XV даурлэн пумаз Европаысь тодосчиос «Хунгария» но «Югрия» нимъёслэсь тупамзэс пусйизы (Ураллы шундыӝужан пала интыяськем улос). Таос герӟаськемын шуыса лыдъязы, но лингвистика ласянь валэктыны ӧз быгатэ. 1671-тӥ арын швед тодосчи Георг Шернъельм (1598—1672) саам (лапланд), финн но эстон кылъёслэсь тупамзэс эскериз но возьматӥз, озьы ик финн но венгер куд-ог огвыллем кылъёсты ӵошатӥз. Со дыре ик немец тодосчи Мартин Фогель финн, саам (лапланд) но венгер кылъёслэсь герӟаськемзэс эскерыны выриз. Озьы та тодосчиос нырысь ик кылъёсты финн-угор кылсемьяе пыртӥсь луизы.

1717-тӥ арын швед профессор Улоф Рудбек (пичиез) (1660—1740) финн но венгер кылъёс куспысь ог 100 этимологияя герӟетъёсты шараяз, соос пӧлысь ог 40-эз туала вакытэ шонересь луо (Коллиндер, 1965). Со аре ик немец тодосчи Иоганн Георг фон Экхарт (ужез Лейбницысь «Collectanea Etymologica»-ын печатламын) нырысьсэ финн-угор кылъёсты самоди кылъёсын герӟаз.

1770-тӥ арын финн-угор кылсемьяе пырись вань кылъёс тодмоесь вал ни, озьыен, индоевропейской  [ӟуч] (удм. кылъёсты дышетон-эскеронлэсь 20 ар азьвыл. Котьма ке но, эскеронъёслэн емышъёсынызы ваньмыз соку ик ӧз тэрытӥське: кылсярысь, венгер интеллигенция пӧлын, кылзы тюрк кылысь потэмын шуыса, вераськонъёс ветло вал, Рюлен 1987-тӥ арын та теорилы оскемзэс «аспӧртэм но вормонтэм романтизм вакытлэн» улонэ пыӵаменыз валэктылӥз. Озьы ке но, лек пумит вераськисьёс шоры учкытэк, венгер иезуит Янош Шайнович 1770-тӥ арын венгер но лапланд (саам) кылъёслэн ог-огенызы герӟаськемзэс пусйиз. 1799-тӥ арын венгр Самуэль Дьярмати финн-угор кылъёсъя рос-прос эскеронъёсты печатлаз.

XIX даурлэн кутсконаз финн-угор кылъёс, индоевропейской кылъёс сярысь, рос-просгес эскеремын вал, но ӵошатон лингвистика азинскемен, индоевропейской кылъёслы саклык йылӥз, таин валче финн-угор кылъёс кыкетӥ планэ кылизы. Калыкъёс пӧлын югдур шоры учкон пӧртэм луэмен, Европаысь улосъёс пӧлысь (Габсбургъёслэн Австрийысь империязы пырись) Венгрия гинэ фин-угор кылсемьяосын тунсыкъяськыны быгатысалыз (Финляндия но Эстония соку Росси империлэн люкетэз вал). Но политикаын кылдэм югдур кылъёсты ӵошатонлы азинскыны ӧз сёты. Немец лингвист Йозеф Буденцлэн ужъёсыз печате потэм бере гинэ умой пала воштӥськонъёс шӧдскизы, ог 20 ар ӵоже со Венгриысь финн-угор кылъёсты эскеронъя валтӥсь ӧнерчи вал. XIX даурлэн пумаз кылъёсты эскерон понна венгер лингвист Игнац Халас трос лэсьтӥз, 1890-тӥ аръёсы со, финн-угор но самоди кылъёсты ӵошатыса, трос ужъёсты печатлаз. Солэн эскеронъёсыз та кык кылъёсты выжы кылъёс пӧлы пыртон но калык пӧлын тае валэктон понна бадӟым инъет луизы.

Аспӧртэмлыкез

Вань финн-угор кылъёслэн огъя аспӧртэмлыксы но инъет луись огъя кыллюкамзы вань. Та аспӧртэмлыкъёс гипотезаысь вашкала финн-угор кылысь пото. Та кылысь ог 200 валтӥсь кылъёс ӵектэмын вал, соос пӧлын ӵыжы-выжы луись, мугор люкетэз возьматӥсь, лыдъянын кутӥськись кылъёслэсь кылвыжыоссэс пусйизы. Лайл Кэмпбеллэн огъя кыллюкамезъя, словаре чорыгъёсын герӟаськем ог 55 кылъёс пыризы, пӧйшуръёсын — 33, пужеен герӟаськемъёсыз 12 луизы, будосъёс — 17,  технологиос — 31,  лэсьтӥськон — 26, дӥськут — 11, куазь — 18, калык — 4, оскон — 11, вузкарон — 3.

Финн-угор кылъёс пӧлысь уноез агглютинативной кылъёс пӧлы пыро, таослэн огъя тодметсы — кылэз кылдӥнь борды кылӥтэт йылтыса вошто, нимбер (послелог) интые нимазь (предлог) пукто, озьы ик кылӥтетъёсты синтаксис ласянь тупато. Со сяна, финн-угор кылъёсын грамматикая родэз ӧвӧл, таин валче куинетӥ ымнырысь местоимение гинэ кутӥське (со «он», «она» но «оно» валатонъёсты огазея), кылсярысь, hän финн сямен, tämä водь сямен, tema эстон сямен, ő венгер сямен, ciйӧ коми сямен, тудо пор сямен, со удмурт сямен.

Унояз финн-угор кылъёсын «мынам» яке «тынад» асъян (притяжательной) тодметнимъёс но нимвоштосъёс (местоимение) шер кутӥсько. Кинлэн луэмзэ возьматэ кылэз воштон. Ӵемысь со возьматон вошъетысь (родительный падеж) ас нимвоштосъёс (местоимениос) луо. Кылсярысь, «мынам пуные» эстон кылын mu koer чузъяське, вераськон финн кылын — mun koira, саам кылын — mu beana яке beatnagan («пуны-мынам»), коми кылын — менам пон («мынам пуные») яке менам понмӧй.

Мукет кылъёсын та понна кылӥтэт (суффикс) куто, куддыръя нимвоштосъёс интые возьматон падеж кутӥське: «мынам пуные» финн кылын minun koirani чузъяське, koira «пуны» кылысь. Озьы ик пор кылын мыйын пием, пий «пуны» кылысь. Венгер кылын ниман падежын сылӥсь местоимение борды асъян кылӥтэт йылтӥське. Кылсярысь, «пуны» — kutya, «мынам пуные» — az én kutyám («(та) мон пуны-мынам», az — валэктӥсь артикль) яке огшоры a kutyám («(та) пуны-мынам»). Озьы ке но венгер кылын нимаз асъян местоимениос но кутӥсько: enyém («мынам»), tiéd («тынад») но мукет. Соос озьы ик вошъяськыны быгато, кылсярысь, enyém (ниман п.), enyémet (адӟон п.), enyémnek (сётон п.) но мукет. Та местоимениос нимась сказуемой чот кутӥсько: enyém kutya шуыны — янгыш, но Kié ez a kutya? юанлы («Кинлэн та пуныез?») Ez a kutya az enyém («Та пуны — мынам») яке огшоры Az enyém («Мынам») валэктыны яра.

Классификация

Финн-угор кыл вае пырись кылъёсты таӵе группаослы но кылъёслы люко:

Финн-угор кыл вай кыл дуннеысь гипотеза ласянь азинскон схемаын
  • Угор вайлэн люкетэз
    • венгер кыл;
    • Шундыпуксён Сибирьысь обь-угор группа;
      • ханты кыл (вужмем обь-остяц кыл);
      • манси кыл (вужмем вогул кыл), котькудӥз кӧня ке наречиослы (оло, нимаз кылъёслы) висъяське.
  • Финн-пермь вайлэн люкетэз
    • пермь группа;
    • пор группа;
      • гурезь пор кыл (шундыпуксён);
      • уйпал-шундыпуксён пор кыл;
      • возь пор кыл;
    • финн-волга группа;
      • мордва группалэн люкетэз;
      • мерян кыл †;
      • муром кыл †;
      • мещер кыл †;
      • прибалт-финн группалэн люкетэз.
        • Уйпал вайлэн люкетэз
          • финн кыл;
            • квен кыл;
            • меянкиели;
          • ижор кыл;
          • карел кыл;
            • ас карел наречие;
            • ливвик наречие;
            • людик наречие;
            • карел твер;
          • вепс кыл кыл.
        • Лымшор вайлэн люкетэз
          • водь кыл;
          • эстон;
            • лымшор эстон кыл;
            • выру диалект;
          • лив кыл † — уйпал-шундыпуксён Латвия (Курземе).
      • Саам группалэн люкетэз
        • Шундыпуксён саам кластер;
          • лымшор саам кыл— Норвегия но Швеция;
          • уме-саам кыл (ууме) — Норвегия но Швеция;
          • луле-саам кыл (лууле) — Норвегия но Швеция;
          • пите-саам кыл (пите) — Норвегия но Швеция;
          • уйпал саам кыл — Норвегия, Швеция но Финляндия.
        • Шундыӝужан саам кластер
          • бабин саам кыл (аккала) † — Россия;
          • кеми-саам кыл † — шор Финляндиысь саамъёс;
          • инари-саам кыл — Финляндия;
          • йоканьг-саам кыл (тер-саам) — Россия;
          • кильдин-саам кыл — Россия;
          • колтта-саам кыл (сколт, Россиысь нотозер диалектэз но лыдэ басьтыса).

Али ке но тодмо ӧвӧл бырем финн кыл пӧлы пырись биарма кыллэн кылдэмез, та кылын Уйпал Двиналэн ву усёназ но Тӧдьы зарезьлэн ярдураз азьвыл биармия калык улӥз. Лингвистъёс пӧлысь одӥгъёсыз, Норвегиысь сагаос вылэ пыкиськыса, «биармиослэн кылзы нюлэс финнъёслэн кылзылы тупа» шуо, сое прибалт-финн группае пырто; мукетъёсыз, «Биармия» но «Пермь» кылъёслэн огпорма чузъяськемзы вылэ пыкиськыса, биарма кылэз пермь группае пырто яке летописьёсысь биармия калыкез коми-пермякъёс пӧлы пырто. Берло дыре тодос удысын финн-угор калыкъёс пӧлы пырись Заволочьеысь финнъёслэн аспӧртэм нимаз уйпал финн группазы сярысь малпан юнма, таос пӧлы биармаосты но пырто[6].

Валэктонъёс

  1. ↑ Блажек, Вацлав. Uralic Migrations: The Linguistic Evidence Архивная копия от 13 куартолэзе 2019 на Wayback Machine
  2. ↑ Ante Aikio. Proto-Uralic Архивная копия от 10 толсуре 2021 на Wayback Machine // The Oxford Guide to the Uralic Languages. Oxford University Press, 2022. P. 4.
  3. ↑ Живлов М. Лексические инновации и классификация уральских языков Архивная копия от 28 пӧсьтолэзе 2022 на Wayback Machine
  4. ↑ Janhunen J. Proto-Uralic — what, where, and when Архивная копия от 28 пӧсьтолэзе 2022 на Wayback Machine // The quasquicentennial of the Finno-Ugrian society. 2009. Volume 258. P. 65.
  5. ↑ Bakró-Nagy M., Laakso J., Skribnik E. (ed.). The Oxford Guide to the Uralic Languages. Oxford University Press, 2022. P. 31-32.
  6. ↑ Едовин А. Г. Заволочье в средневековой русской истории X—XIII вв. Диссертация на соискание степени кандидата исторических наук.— Архангельск, 2001.— Л.99.

Литература

  • Основы финно-угорского языкознания: Вопросы происхождения и развития финно-угорских языков. — М.: Наука, 1974. — 484 с.
  • Историко-типологические исследования по финно-угорским языкам. / Отв. ред. Б. А. Серебренников. — М.: Наука, 1978.
  • Напольских В. В. Введение в историческую уралистику. — Ижевск: УИИЯЛ, 1997. — ISBN 5-7691-0671-9

Чӧлсконъёс

«https://udm.ruwiki.ru/w/index.php?title=Финн-угор_кылъёс&oldid=506938»-ысь басьтэмын