Крезь
| Крезь | |
|---|---|
 Удмурт Элькунысь Кузебай Герд нимо йӧскалык музейын вашкала быдӟым крезь утиське | |
| Классификациез | Сиосты чиньыосын чепылляса шудон тӥрлык |
| Выжы луись тӥрлык | Гусли |
 Медиафайлъёс РувикиМедиа пушкын | |
Крезь — сиосты чиньыосын чепылляса шудон удмурт йӧскалык крезьгуро тӥрлык, шудон манерезъя ӟуч гуслилы тупа[1][2].
Пӧртэмлыкез
Искусствоведъёс кык пумо крезьгуро тӥрлыкъёсты висъяло: улон-вылонын кутӥськись крезь (удм. покчи крезь — ӟуч: малые гусли) но вӧсяськонъёсын кутӥськись крезь (удм. быдӟым крезь — ӟуч: великие гусли)[1][3]. Быдӟым крезь удмуртъёслэн воршуд куалаязы утиськылӥз, калыкен вӧсяськонъёс дыръя соин одно шудылӥзы. Вӧсяськон-йыбырттон дыръя но вӧсясьёсты быръён дыръя быдӟым крезен шудыны воргоронъёсты гинэ лэзьылӥзы. Пичи крезь удмуртъёслэн улоно коркаязы пумиськылӥз, огшоры улон-вылонын но шулдыръяськонъёс дыръя кутӥськылӥз. Пичи крезен ӵемысь нылкышноос шудылӥзы[1].
Вашкала мадёсъёсъя, быдӟым крезез ӵашъем кызлэсь лэсьтылӥзы[4][5].
Тодметэз
Крезез лэсьтон Поволжьеын вӧлмем бигер, чуваш но пор гуслиосты лэсьтонлэсь ӧз висъяськылы[4]. Тӥрлыкез ӝыны овал выллем вӧлылӥзы, ымнырызлэн (верхняя дека) кузьдалаез 700—1000 мм, ӝуждалаез — 350—500 мм вуылӥз. Урдэсъёссэ ӵӧж я юсь пыдъёс выллем вандылӥзы. Крезез лэсьтонэ кызэз, пужымез, пипуэз кутылӥзы. Куд-ог нимысьтыз люкетъёссэ вӧлон понна тыпы, сирпу но ньылпу тупалляз. Дускоосты пӧсь вуын кӧня ке пол котыса возьылӥзы но куинь арозь куасьтылӥзы, собере гинэ соосты вӧлӥзы-волятӥзы[4]. Крезьлэн ӵоксэтаз круг, ӝыны круг, бадяр куар, кирос я прямоугольник выллем вандэм одӥг яке кӧня ке резонатор пасьёс лэсьтылӥзы. Ӵоксэтэз итылэм дускоослэсь лякылэмын ке, соку резонатор сямен дускоосысь висъёсыз ужаллязы[1]. Мугор люкетъёссэ лякылӥзы, соосты пулэсь штифтъёсын, куддыръя пушказ интыям вамен пуэн юнматъязы[5].
Крезьлэн паллян люкетаз сиосты юнматон, золтон, чузъяськемзэс тупатон вылысь позыръянъёс интыяллязы. Соослы валлин бур палаз 15—20 мм ӝуждалаем сиосты возись кутэт юнматъязы, со пӧртэм фигураослы укшалляз[5][4]. Сӥнырлэсь, ыж, така яке скал сюллэсь, вал быжлэсь лэсьтэм пичи крезьысь сиослэн лыдзы нырысь-валысь 15-ёзь вуылӥз, быдӟым крезьлэн — 35. Куд-ог крезьёслэн экземпляръёсазы (ӵемысь — быдӟым крезьлэн[5]) пуш си кутэтэ (резонатор ящик) ватсаса 12 сиос интыямын вал. Бератаз кортлэсь сиос кылдӥзы[1].
Крезен пукыса шудӥзы, крезьгуро тӥрлыкез ал вылазы мыкыртыса возьылӥзы, озьы ик музъем валлин яке сылыса сиоссэ кысказы, крезез гозыен чыртыязы ошылӥзы[1]. Гурез огдыре кык сиосты бур киысь пӧлыен но азьчиньыен чепылляса поттылӥзы. Паллян киын кык полэс бас луись нотаослэсь аккомпанемент быдэстылӥзы[4][5].
Крезь сярысь ивортонъёс В. С. Кошурниковлэн но Б. Гавриловлэн 1880-тӥ аръёсысь эскеронъёсазы нырысьсэ пусъемын[1][6]. Быдӟым крезь XIX даур пумын нырысьсэ шараямын вал, можга удмуртъёслэсь сое Ю. Вихман шедьтӥз[3].
Валэктонъёс
- ↑ 1 2 3 4 5 6 7 Загребин, 2012, с. 256.
- ↑ Туганаев, 2008, с. 420—421.
- ↑ 1 2 Ложкин, 1989, с. 18.
- ↑ 1 2 3 4 5 Ложкин, 1989, с. 17.
- ↑ 1 2 3 4 5 Туганаев, 2008, с. 420.
- ↑ Туганаев, 2008, с. 421.
Литература
- Истоки искусства Удмуртии. Сборник научных трудов / под ред. В. В. Ложкина. — Ижевск: Удмуртский институт истории, языка и литературы Уральского отделения Академии наук СССР, 1989. — 120 с. — 500 экз. — ISBN 978-5-7659-0486-2.
- Крезь (гусли) / Карпов А. М. // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 420—421. — 768 с. — 2200 экз. — ISBN 978-5-7659-0486-2.
- Удмуртская Республика : Культура и искусство : Энциклопедия / гл. ред. А. Е. Загребин. — Ижевск : Удмуртский институт истории, языка и литературы УрО РАН, 2012. — 540 с. — 300 экз. — ISBN 978-5-901304-62-4.
- Коротаева Е.А. Гусельная игра в удмуртских коллекциях 1937 г. фонограмм архива института русской литературы (Пушкинский Дом) Российской академии наук // Ежегодник финно-угорских исследований. — Ижевск: Удмуртский государственный университет, 2018. — С. 45—61.