А. Овчинниковлэн юртэз
| А. Овчинниковлэн юртэз | |
|---|---|
 | |
| Юрт сярысь ивортон | |
| Интыяськемез | Вотка кар |
| Кун | |
| Лэсьтыны кутскемын | ХХ даурлэн кутсконаз |
| Архитектураысь стиль | псевдоӟуч стиль |
 |
|
А. Овчинниковлэн юртэз (озьы ик Овчинниковлэн теремез; ӟуч: Дом А. Овчинникова) — Удмурт Элькунысь Воткаысь псевдоӟуч стилья пуктэм пулэсь улыно-вылыно юрт. Улосэн утёно архитектурая синпелет. Адресэз: Вотка кар, Республиканской ульча, 104.
Историез
ХХ даурлэн кутсконаз Вотка заводын кык этажъем пулэсь корка кылдӥз. Сое лэсьтон сярысь кык пумо вераськонъёс ветло. Огезъя Алексей Овчинниковлэн кузпалыз Волга кузя шутэтскон сямен пулэсь терем выллем ӝутэм юртэз синйылтӥз но сыӵе ик коркан улэмез потӥз[1]. Мукет вераськонъёсъя, юртъерлы проект ачиз Овчинников малпаз. Коркалэн кыкна палаз вить сэрго эркер пуктӥз — котькуд нылызлы быдэн одӥген. Вылтусызъя выжыкылысь коркалы укша, таин сэрен калыкын сое терем нимазы[2].
Овчинников сярысь номыр ик тодмо ӧвӧл: одӥг ивортонъёсъя, со карысь лесничий вал, мукетъёсызъя — купеч, куинетӥосызъя — Вотка заводысь бадӟымез мастер[3][4].
Революция бере юртэз национализировать каризы. Отын нылпи сад усьтӥзы. Корка вужмем бере сое тупатъяны уксё ӧз шедьтэ, соин ик садэз мукет юртэ выжтӥзы[4]. Бератаз коркан библиотека но заводын ужасьёслэн квартираоссы интыяськылӥзы[3].
1965-тӥ арын теремез улосэн утёно архитектурая синпелетъёс пӧлы пыртӥзы[3].
Постсовето вакытэ юртын баптистъёслэн общиназы интыяськылӥз[2]. Отӥяз Овчинниковлэн коркаез уно аръёс ӵоже буш улӥз но куашканы кутскиз[4].
2017-тӥ арын Вотка администрацилэн распоряжениезъя юртэз тупатъяны кутскизы: липетсэ выльдӥзы, укнооссэ воштӥзы, вылтуссэ буязы. Рос-прос тупатъян ужъёс 2019-тӥ арын йылпумъяськизы. Юртын музей усьтыны чаклало вал[1][5].
2024-тӥ арын ивортонъёсъя, Овчинниковлэн теремаз вуылон «Чайковскийлэн дорез» турмаршрутэ пыртэмын[1].
Архитектураез
Алексей Овчинниковлэн кык этажъем пулэсь коркаез псевдоӟуч стилья ӝутэмын. Юрт пужыятыса вӧлэмын, Удмуртиысь сыӵезэ уд шедьты ни[5]. Коркалэн урдэсъёсаз эркеръёс пуктэмын вал, соос югыт но ыркыт тӧл пыртӥсь декоративной укноосын лэсьтэм тямыс сэрего шатёръёсын йылсаськылӥзы. Эркеръёслэсь улзэс но этажъёс вискысь интыез чеберъязы вӧлэм но лякылэм геометрической фигураос. Наличникъёс аспӧртэмлыко тусъемесь вандылэмын: нырысетӥ этажын соос арка выллем быдэстэмын, нош кыкетӥяз — куинь сэрего. Юртъер пушкысь вӧлмыт залъёс утиськемын, вӧлдэтъёсаз — аспӧртэм лепниналэн люкетъёсыз. Озьы ке но оглом пушсузьетэз уно выльдӥськонъёсын сэрен туж воштӥськиз, корка пушкысь тросэз аспӧртэм лэсьтэмъёс ышизы-быризы[3].
Валэктонъёс
- ↑ 1 2 3 Родина Чайковского [ӟуч] Центр развития туризма Удмуртской Республики. Эскеремын 05-11-2025 арын
- ↑ 1 2 Жанна Ситникова (28-01-2016) Заколдованный терем. Кому выгодно разрушить уникальный дом купца Овчинникова в Воткинске? [ӟуч] day.org.ru. Эскеремын 05-11-2025 арын
- ↑ 1 2 3 4 «Терем Овчинникова» [ӟуч] историческийбагаж.рф. Эскеремын 05-11-2025 арын
- ↑ 1 2 3 Марина Смоляная Дворянские усадьбы Удмуртии [ӟуч] Культура.РФ. Эскеремын 05-11-2025 арын
- ↑ 1 2 Началась реставрация Дома Овчинникова в Воткинске [ӟуч] udmgazeta.ru (23-03-2017). Эскеремын 05-11-2025 арын