Кутлыбаев, Геннадий Андреевич
| Геннадий Андреевич Кутлыбаев | |
|---|---|
 | |
| Вордӥськем нуналыз | 7-тӥ куартолэзе 1968 (58 лет) |
| Вордӥськем интыез | |
| Кун | |
| Ужудысэз | скульптор |
| Данъетъёсыз | |
Генна́дий Андре́евич Кутлыба́ев (ворд. 7-тӥ куартолэзе 1968, Актэмыр, Удмурт Автономной Советской Социалистической Республика) — совето но росси скульптор, суредась. Удмуртиысь но Россиысь калык суредась, Россиысь Суредасьёслэн огазеяськонысьтызы ёзчи, Мускоысь суреданъя академиысь зэмос ёзчи. Удмуртиысь Кун премилэн лауреатэз[1].
Улон сюресэз
Вордӥськиз 1968-тӥ арын 7-тӥ куартолэзе Удмурт АССР-ысь Алнаш ёросысь Актэмыр гуртын. Школаез йылпумъямез бере столярлы дышетскиз. 27 аресказ университетэ пыроно кариськиз[2].
Вылӥ образование басьтӥз Удмурт кун университетысь искусствоосъя факультетысь скульптурая ёзэтын (дышетӥсез — А. Аникин). Студент вакытысеныз элькун адӟытонъёсы пыриськылӥз: «Эрумаа» (1998), «Мушому» (2000), «Тангыра» (2001), «Идна» (2002) но мукет[3][4].
Дышетсконзэ йылпумъяса, Удмурт кун университетэ ик кылиз: скульптуралы дышетӥз но искусствоосъя факультетын скульптурая мастерскоен кивалтӥз[3].
2001-тӥ арысен 2002-тӥ арозь Мускоысь С. Г. Строганов нимо суреданъя но промышленностья кун университетысь архитектурно-декоративной пластикая кафедраын стажировка ортчиз, 2002-тӥ арысен 2004-тӥ арозь — А. Бурганов профессорлэн мастерскояз[3].
2006-тӥ арын Россиысь Суредасьёслэн огазеяськоназы кутӥзы[3].
2008-тӥ арын Франциын стажировка ортчиз[3].
2024-тӥ арын ивортонъёсъя, Геннадий Кутлыбаев Ижкарын аслаз мастерскояз ужа[3].
Творчествоез
Кутлыбаев писпулэсь, излэсь, кортлэсь, бетонлэсь скульптураос лэсьтэ, толалтэ — йӧлэсь но лымылэсь[3][2]. Ӵемысь вашкала удмурт мадёсъёсты ужъёсаз улӟытэ, скульптуралэсь академической формаоссэ образъёслэн архаикаенызы герӟалля[1].
Пӧртэм пумо адӟытонъёсы пыриськылэ[3].
Профессор Александр Бурганов дорын тодон-валанзэ муромытыкуз, юрттӥськиз Мускоысь Утись Христослэсь черксэ (ӟуч: Храм Христа Спасителя) чеберъяны, Киевской бульварысь Леся Украинкалы сӥзем скульптурая ансамблез, Лакост француз коммунаысь маркиз де’Садлы синпелетэз, Ижкаре А. С. Пушкинлы сӥзем синпелетэз лэсьтыны но мукет[3][1].
Удмуртие берытскемез бере Ижкарысь Ялан ӝуась тыл дорысь синпелетэз но рельефез выльдон бордын тыршиз[3].
2007-тӥ арын В. Овчинниковен ӵош Кутлыбаев лэсьтӥз Удмурт автономиез кылдытӥсьёс пӧлысь огезлы — Трофим Борисовлы — синпелет. Сое Алнаш черкогуртысь ёрос администрация азе юнматӥзы[3]. Собере скульпторъёс Ижкаре пуктон вылысь удмурт югдытӥсьлы кыкетӥ синпелет лэсьтӥзы[5][6][7].
Адӟытонъёс
Геннадий Кутлыбаев пӧртэм пумо адӟытонъёсы пыриськылӥз. Тужгес тодмоосыз: йӧ но лымы скульптурая калыккуспо фестиваль (Харбин, 2006; нимысьтыз призэн пусъемын — Францие стажировкаен), «Егитъёслэн адӟытонзы» (Москва, 2002), «Вормонлы 60 ар» (Муско, 2005), «Бадӟым Волга» (Н. Новгород, 2003; Самара, 2004) но мукет[3].
Валэктонъёс
- ↑ 1 2 3 Знаменательные и памятные даты. 2018 год [ӟуч] dates.unatlib.ru. Эскеремын 03.10.2025 арын
- ↑ 1 2 Рябина О. В. Трокай агаез данъясь синпелетъёс [удм.] Удмурт кылдунне — информационно-образовательный портал по изучению удмуртского языка. Эскеремын 03.10.2025 арын
- ↑ 1 2 3 4 5 6 7 8 9 10 11 12 Г. Кутлыбаев [ӟуч] «Финно-угорский мир» образовательные и межкультурные программы. Эскеремын 03.10.2025 арын
- ↑ Кутлыбаев Геннадий Андреевич [ӟуч] Удмуртский республиканский музей изобразительных искусств. Эскеремын 03.10.2025 арын
- ↑ Елена Миннигараева (05.10.2011) Трокай — асьме пӧлын! [удм.] Удмурт дунне. Эскеремын 03.10.2025 арын
- ↑ Елена Панфилова (08.02.2012) Трокай сылэ ини... мастерскойын [удм.] Удмурт дунне. Эскеремын 03.10.2025 арын
- ↑ Геннадий Андреевич Кутлыбаев [ӟуч] izdania.unatlib.ru. Эскеремын 03.10.2025 арын
Литература
- Геннадий Кутлыбаев (удм.) // Инвожо. — 2008. — № 5/6. — С. 52—54. — ISSN 0868-796X.
- Скульпторы Удмуртии. — Ижевск: Удмуртия, 2013. — С. 15.
- Гартиг В. О., Виноградова, Е. П. Художники Удмуртии — Удмуртиысь суредасьёс. — Ижевск: Удмуртия, 2015. — С. 93. — 198 с. — ISBN 978-5-7659-0569-2.
Чӧлсконъёс
- Г. Кутлыбаев [ӟуч]
 |
|---|
