18-тӥ толсуре
18-тӥ толсур — Григориан дырпусъя — арлэн 352-тӥ нуналыз (касьян аре — 353-тӥез). Ар пумозь 13 нунал кылемын.
☀️ Ижкарын Шунды 9 час 4 минутэ ӝужа, пуксе 15 час 50 минутэ. Югыт нуналлэн кыстӥськемез 🕒 6 час 45 минут.
🌓 Нырысетӥ ньыльмосэз (будэмез 8.71 нунал).
|
|||||||||||||||||||||||||||||||||||||||||||
| 2026-тӥ ар | |||||||||||||||||||||||||||||||||||||||||||
| Толшор | Тулыспал | Южтолэзь | Оштолэзь | Куартолэзь | Инвожо | Пӧсьтолэзь | Гудырикошкон | Куарусён | Коньывуон | Шуркынмон | Толсур |
Нунал тодметъёс
- Калык дырпусъя туннэ Саввалэн нуналыз. Та нуналэ уг яра керӟегъяськыны, тэкшерыны. Туннэ убиръёс, пе, ульчаостӥ калго, мынӥсь-ветлӥсьёсты йыромыто. Соос ки улэ шедёнтэм вылысь, кулэезтэк сюрес вылэ потонлэсь ало.
- Ӵын музъем вылтӥ погыльске ке, ӝоген лымыялоз.
- Та нуналэ зол тӧлаське ке, быдэс толэзьзэ таӵе ик тӧло улоз.
- Шушыос кырӟало ке, ӝоген пельскоз.
- Укно пиялаосысь йӧ чильтэр шунаса быриз ке, ӝоген шунытскоз.
- Коньыос писпуысь васько ке, куазь шуныт кариськоз.
Нимнуналзэс пусъё
Анастасий, Гурий, Захар, Карион, Нектарий, Савва, Даниил.
Праздникъёс но буре ваён нуналъёс
Йӧскалык праздникъёс
Россия — ЗАГС-ын ужасьёслэн ӧнер нуналзы[1].- Россия — Росси Федерациысь ас кышкыттэмлыкъя ОВД-лэн ӧнер нуналыз.
— Араб кыллэн Калыккуспо нуналыз.- — Мигрантъёслэн Калыккуспо нуналзы.
Иран — Иранысь дышетон ужъюртъёслэн но университетъёслэн огазеяськон нуналзы.
Катар — Катарлэн йӧскалык нуналыз.
Нигер — Нигер Элькунлэн нуналыз
Луэм учыръёс
Удмуртиын
- 1928 — Вотской областной судын Лудорвай, Лудӟи но Юсь гуртъёсысь 10 крестьянъёсты РСФСР-ысь УК-лэн 58/8, 109 но 110 статьяосызъя («совето властьлэн оскем муртъёсыз пумитэ терроризм актъёс радъян…») янгыше уськытон уж кутскиз, со Лудорвай уж нимын тодмо луиз.
- 1905 — Ижын ужась калык пӧлын боевой дружина кылдытэмын.
- 1916 — Агрыз — Ижевск — Воткинск чугун сюрес линия усьтэмын.
- 1982 — Ижысь Киров но Максим Горький урамъёс вожын пыдын мынӥсь-ветлӥсьёслы музъемул выжонни усьтэмын.
- 1942 — Воронеж улосысь Цапкино черкогурт котырын ожмаськонъёс мыныку, бырыны шедиз Удмуртиысь Комсомоллэсь нимзэ нуллӥсь 174-тӥ нимазъям истребительной противотанковой артиллерийской дивизионэзлэн санинструкторез Инна Механошина. 4-тӥ толсуре берпум гожтэтаз таӵе чуръёс кылемын: «Скоро в бой. Очень хочется жить, жить, дышать, ходить по земле, видеть небо над головой, но не всякой жизнью я хочу жить, не на всякую жизнь согласна…»
Россиын но дуннеын
- 1833 — (Бадӟым театрын спектакль бере) нырысьсэ чузъяськиз Росси империлэн гимнэз «Боже, Царя храни!»
- 1892 — Мариус Петипа Чайковскийлэсь «Щелкунчик» балетсэ пуктӥз.
- 1925 — Мускоын ВКП(б)-лэн XIV съездзы усьтӥськиз.
- 1981 — нырысьсэ инме ӝутскиз Ту-160 стратегической бомбардировщик.
- 2009 — Россиын бадӟым ӝоглыкен мынӥсь «Сапсан» электропоездъёс ялан ветлон режиме поттэмын.
- 1898 — граф Гастон де Шаслу-Лоба историын ӝоглыкъя нырысетӥ рекорд пуктӥз (63 км/ч).
- 1923 — Европаысь кунъёс Танжерез нейтральной зона шуыса ялӥзы.
- 1940 — Куинетӥ рейхын «Барбаросса» план юнматэмын.
- 1987 — программировать карон Perl кыллэн нырысетӥ версиез потӥз.
Вордӥськизы
- Удмуртиысь тодмо муртъёс
- 1912 — Степан Широбоков, удмурт гожъяськись но кылбурчи.
- 1918 — Михаил Можгин, удмурт гожъяськись, кылысь кылэ берыктӥсь, Быдӟым Атыкай оже пыриськись.
- 1938 — Николай Белоногов, удмурт гожъяськись но журналист.
- Россиысь но дуннеысь тодмо муртъёс
- 1921 — Юрий Никулин, Россиысь актёр, клоун, Мускоысь Цветной бульварысь цирклэн кивалтӥсез, СССР-ысь калык артист.
- 1856 — Джозеф Джон Томсон, Англиысь физик, Нобель премилэн лауреатэз.
- 1930 — Владимир Яковлевич Ворошилов, суредась, режиссёр, телепередачаосты нуись, «Что? Где? Когда?» программалэн авторез.
- 1946 — Стивен Спилберг, Америкаысь кинорежиссёр.
- 1955 — Алексей Венедиктов, Россиысь журналист, «Эхо Москвы» радиостанцилэн валтӥсь редакторез.
- 1963 — Брэд Питт, Америкаысь актёр.
- 1980 — Кристина Агилера, Америкаысь поп-кырӟась.
Кулӥзы
- Удмуртиысь тодмо муртъёс
- 2006 — Василий Смирнов, удмурт гожъяськись но журналист.
- 2012 — Вениамин Чикваров, Удмурт АССР-ысь физической культурая отличник, греко-римской нюръяськонъя тренер.
- Россиысь но дуннеысь тодмо муртъёс
- 1737 — Антонио Страдивари, Италиысь скрипкаосъя усточи.
- 1829 — Жан Батист Ламарк, Франциысь биолог.
- 1848 — Бернард Больцано, Чехиысь математик но философ.
- 1892 — Сэр Ричард Оуэн, Англиысь зоолог, анатом но палеонтолог.
- 1971 — Александр Твардовский, совето вакытысь кылбурчи.
- 1980 — Алексей Косыгин, совето кун но партийной ужась, СССР-ысь Министръёслэн Кенешсылэн тӧроез.
- 2011 — Вацлав Гавел, чех кун ужась, Чехословакилэн берпум президентэз (1989—1992) но Чехилэн нырысетӥ президентэз (1993—2003).
Валэктонъёс