Лудорвай уж
Лудорвай уж (ӟуч: Лудорвайское дело) — Ижкарын 1928-тӥ ар пумын ортчем но Удмуртилэн палэназ тодмо луэм суд. Нимыз улосысь улон инты нимъя — Лудорвай гуртъя — кылдэмын.
Азьвылъёсыз учыръёс
1928-тӥ арын 26-тӥ—27-тӥ инвожое Лудорвай, Юсь но Лудӟи гуртъёсысь узыргес улӥсьёс (кулакъёс), сельсоветысь куд-ог ёзчиос лэземен, межаос вылысь котыртэмъёс тӥяськем понна куанер аспалъёссэс кылкутытон понна жугоно кариськизы. Со сярысь 1928-тӥ арын 11-тӥ пӧсьтолэзе «Ижевская правда» газетын пыр-поч гожтӥзы[1]
Удмурт гуртъёсын азьвыл дырысен пудозэс пастухасьтэк эрикын возьылӥзы. Котыртэм сике, возь вылэ яке кизьытэк парлы кельтэм бусые животъёссэс лэзьязы но сӥзьыл пал гинэ соосты гидазы вайылӥзы. Таин валче юртъер кузёослэн лыдзыя люкылэм участокъёс вылысь котыртэмъёсты гуртысь община юн чаклалляз. Кенер борды котькуд кузё ас выжыезлэсь пуссэ пуктылӥз, соя чакласьёс валаллязы, кинлэн участокез радъямтэ. Сыӵе дыръя гурт кенешын кутэм приговоръя община янгыше усем муртлы кылкутытонлэсь быдӟалазэ юнматылӥз. Ӵемысь ньӧрен жугылӥзы. Та сям чурыт вал ке но, сое огшоры правоен лыдъяллязы но ӧз пумитъяськылэ, ӧз ӝожтӥськылэ[2]. Соин ик кылдэм югдур шоры но удмурт гуртъёсын вашкала дырысен кылдэм огшоры право шоры кадь учкылӥзы. Но Лудорвай ужез кунысь партийной но кун органъёс мукет сямен дунъязы: кулакъёс гуртын социалистической воштӥськонъёслы пумит луэмзэс возьмато[3].
ВКП(б)-лэн ЦК-ез Удмуртиысь партийной огазеяськонэз кулачествоен рос-прос нюръяськонъя ужез радъяны но со дыре ик крестьян хозяйствоосты коллективен ужатыны луонлыкъёс кылдытыны косӥз[4]. Калыкын кылдэм бугыръяськон мылкыдъёсын валче уголовной уж ӝутэмын вал.
Лудорвайын учыр пуромемен, озьы ик ю-нянь утялтон, самообложение, выт бичан но кизён ужъёс начар мынэмен, ВКП(б)-лэн ЦК-ез удмурт партогазеяськонлэсь ужзэ эскероно кариськиз. 1928-тӥ арын коньывуонэ Удмуртиын ВКП(б)-лэн ЦК-езлэн нимысьтыз комиссиез ужаз. ВКП(б)-лэн Вотской обкомысьтыз кылкутӥсь секретарезлэсь В. Г. Егоровлэсь отчётсэ кылзыса, ВКП(б)-лэн ЦК-ез со аре ик 22-тӥ коньывуонэ Вотской партогазеяськонлэн ужез сярысь постановление кутӥз, кулакъёсын нюръяськонэз кужмоятыны косыса. Озьыен, Лудорвайын кылдэм учыръёсты валтӥсь органъёс чакланы ӧдъязы, удмурт партогазеяськонэз лэчыт но чурыт кариськыны косылӥзы[5].
ВКП(б)-лэн обкомез облисполкомез югдурез эскерыны куриз. Улосысь кивалтӥсьёс лыдъязы: вань мылкыд карисьёслы музъемез выль сямен люкылонэз ӝегатон, пудоослэн мурт угодиосты быдтэмзы пумысен крестьянъёслэсь ӝожтӥськонъёссэс эскеронъя судэз кыскон, самообложениын мултэс куасалтонъёс Лудорвай ужлы пуромыны муг сётӥзы. Но партийной органъёс югдурез котыр ласянь рос-прос ӧз чаклалэ. Уж классъёс куспын кылдэм югдур сямен дунъет басьтӥз, коллективизация но музъемез выль сямен люкылон понна сюлмаськись куанер но шоро-куспо улӥсь муртъёсты кулакъёс террорын возе шуыса[5].
Суд
Ужез нуыны РСФСР-ысь Прокуратура бордысь валтӥсь ужъёсъя следователь М. С. Эльмановичлы оскемын вал. Югдурез валэктыны курыса, со М. И. Ильин тодосчилы вазиськиз, таиз 4-тӥ гудырикошконэ гожтӥз: «Эксэй вакытэ самосудъёс ӵемысь гужем бусыосын культо куасьтон пуӵъёсты я урод котыртэмен валче пудоен быдтэм нянен эскерон сямен ортчылӥзы». Но удмурт тодосчилэн таӵе йылпумъянэз судын воксё ӧз пумиськы[5].
Следствие кык толэзьлэсь кема кыстӥськиз. 1928-тӥ арын 9-тӥ толсуре «Ижевская правда» газет ужъя янгыше уськытон заключениез печатлаз[1].
1928-тӥ арын 18-тӥ толсуре Вотской областной судын Лудорвай, Лудӟи но Юсь гуртъёсысь 10 крестьянъёсты РСФСР-ысь УК-лэн 58/8, 109 но 110 статьяосызъя («совето властьлэн оскем муртъёсыз пумитэ терроризм актъёс радъян…») янгыше уськытон уж кутскиз[3].
95 адӟисьёс ӧтемын вал, озьы ик удмуртъёс пӧлысь мерлыко янгыше уськытӥсьёс но Мускоысь янгыше уськытӥсьёс. Следствие но суд дыръя крестьянъёсты ньӧрен жугонэз, улон-вылонын пумиськись учыр интые, политикаез куашкатон квалификацие выжтӥзы. Прокурор чурыт кылкутон улэ кыскыны косӥз — эриксэс 10 арлы таламысен кылкутытонъя вылӥ мераозь[1].
Судлэн пуктэтэзъя, 10 крестьянъёсты 3-сен 10 арозь пытсэт сьӧры тупатскон ужъёсты быдэстон вылысь келязы, ваньбурзэс талазы[5]. Соос пӧлысь витез — 58/8 статьяя. Дмитрий Французов но Матвей Ермолаев 6 но 10 арлы кечат-вамат корт сьӧры пуктэмын вал[1]. 1930-тӥ арын 6 крестьянъёс репрессиос улэ сюризы. Ваньзы соос Удмурт автономной область сьӧры келямын вал[3].
Ужлэн пайдалыкез
Калык сюлэмын мур пытьы кельтэм Лудорвай уж «антикулацкой» политикалы кутскон сётӥз. Ижевскын кулакъёсты суд пыр поттэм бере та выллем ваньзылы адӟытымон ужъёс Удмуртилэн мукет ёросъёсаз но ӝутэмын вал. Кулакъёсты кылкутон улэ кысконъя куинь суд Шарканын ортчиз. Глазов уездысь Понино волостьын музъемез выль сямен люкылыны пумит луыса вераськись 4 кулакъёс кырмемын вал, Дэбес уездысь Тыловайын — 5 кулакъёс, Советскойын — 7. Глазов волостьын куанеръёсты жугемзы понна 5 мурт янгыше уськытэмын, Сосновка волостьын — 2 мурт, Брангуртын — 3[6].
Валэктонъёс
- ↑ 1 2 3 4 Фёдоров Л. Лудорвайское дело — взгляд сквозь десятилетия // Известия Удмуртской республики : Газета. — 1998. — 13 коньывуонэ (№ 154). — С. 2. Архивировано 24 гудырикошконэ 2018 арын.
- ↑ Васильева, Дмитриев, Куликов и др., 2005, с. 178.
- ↑ 1 2 3 Туганаев, 2008, с. 454.
- ↑ Коган Э. Удмуртская АССР / отв. редактор Коренев Г. Е.. — М.: Ведомости Верховного совета РСФСР, 1939. — С. 11. — 31 с. Архивная копия от 19 тулыспалэ 2019 на Wayback Machine
- ↑ 1 2 3 4 Васильева, Дмитриев, Куликов и др., 2005, с. 179.
- ↑ Васильева, Дмитриев, Куликов и др., 2005, с. 180.
Литература
- Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
- Васильева О. И., Дмитриев П. Н., Куликов К. И. и др. История Удмуртии: XX век / под ред. К. И. Куликова. — Ижевск: Институт истории, языка и литературы УрО РАН, 2005. — С. 101. — 544 с. — ISBN 5-7691-1649-8.
- Родэн Д. Лудорвайское дело. — Москва-Ленинград: Госиздат, 1929. — 74 с.