Туризм Удмуртиын

Удмуртиын туризм экономикалэн ӝог азинскись удысэз луэ. Стрелка консалтинговой бюролэн 2025-тӥ арлы «Россиысь улосъёслэн туристъёслы тунсыко луэмзыя индекс» дунъетэзъя, Удмурт Элькун, Россиысь мукет куинь асмосъёсын ӵош, нимысьтыз категорие пыре — со возьматэ, кылем ар ӵоже элькунысь туризм сярысь ивортодэтъя ёзъёсын но мерлыко вотэсъёсын уно публикациос поттэмын вал (12 сюрслэсь ятыр), соос пӧлысь тросэз — ӟеч дунъетэн. Озьы ке но шорлыдын шаерамы ӧжыт туристъёс вуо, уго уноез соос пӧлысь Удмуртиез туризмъя тунсыко направлениез сямен уг адӟо.

«Лудорвай" музейысь тӧл вуко. Лудорвай гурт, Дэри ёрос.

2025-тӥ арлэн кутсконэзлы регионын туризм удысын ужало 2500-лэсь трос ужбергатӥсьёс, 234 кунокуаос, 3000 кафеос но ресторанъёс, 60 транспорт компаниос, 21 туроператоръёс но 245 туризмъя объектъёс.

2023-тӥ арын элькунамы «Влюбиться в Удмуртию» йӧскалык турмаршрут усьтӥськиз, со туристъёслы 3 нунал куспын шаерлэн лулчеберетэныз но историеныз тодматскыны но валтӥсь синпелетъёс доры вуылыны луонлык сётэ.

Удмурт Элькунын туризмъя катъёслэсь быдэсъяськемзэс чакла Удмурт Элькунысь Туризмъя министерство (2024-тӥ арын 23-тӥ пӧсьтолэзёзь — Удмурт Элькунысь Туризмъя агентство).

Огъя ивортодэт

Удмуртилэн инкуазез, историез но лулчеберетэз туризмлэсь трос пумо ӧръёссэ азинтыны луонлык сёто, кылсярысь, лулчеберет, пӧйшуран но чорыган, ужбергатон, гурт, ужрадъёс, активной (соос пӧлын спортъя но тазалыкез утёнъя), инкуазез утён, тазалыкез кыдатон удысъёсын. Солы луыса арысь аре шаере лыктӥсьёслэн лыдзы йылэ. 2015- тӥ арлы лыдпусъёсъя, Удмуртие арлы быдэ шорлыдын 3 сюрслэсь трос кунгожсьӧр куноос но Россиысь 200 сюрслэсь трос улӥсьёс вуылӥзы. Ӵемгес вакчи дырлы — 1-2 нуналысен 1-2 арняозь.

2021-тӥ арлы туристъёслэн лыдзы 2 поллэсь ятырлы йылӥз — 560 сюрс адями луиз. Соку ик «Туризм но куно пумитан» йӧскалык ӵектослы кутскон сётэмын вал. 2022-тӥ арын шаерын Туризмъя агентство (2024-тӥ арын 23-тӥ пӧсьтолэзьысен — Удмурт Элькунысь Туризмъя министерство) кылдытэмын, со туризм удысын ужпумъёсты радъя. Ведомство ачиз азе ужпум пуктӥз: 2023-тӥ арын туристъёслэсь лыдзэс 700 сюрсозь вуттыны но туризмъя инфраструктураез умоятыны. Та ужпумъёслы 16 миллион манет висъямын вал.

2023-тӥ арын Удмуртия «Больше, чем путешествия» программа улсын «Пыдын ветлон туризмез азинтон» ӵектос борды итӥськем пилотной улосъёс пӧлы пыриз. Нырысетӥез ужрад луиз туристъёслэн слётсы, отчы пыриськизы шаерысь 500 школьникъёс но студентъёс.

2024-тӥ арын Удмуртие тужгес трос туристъёс вуылӥзы — 1,6 миллионлэсь ятыр. Со дыре ик шаерамы улон дырзы но 1,5 нуналысен кык нуналозь но солэсь трослы будӥз. Элькунысьтымы куноос тужгес ӵем ветлӥзы Иже, Воткае но Сарапулэ, озьы ик Завьял, Шаркан, Эгра но Сарапул ёросъёсы.

Ӧръёс

Уддядиысь Удмурт культурая центр

Лулчеберет

Удмуртия лулчеберетъя туризм удысын зол азинскемын. Элькунлэсь шоркарзэ — Ижез — «Поволжьелэн лулчеберетъя шоркарез» но нимало. Шаерын вань театръёс, музейёс, паркъёс, зоопарк, цирк, филармониос, кинотеатръёс, лулчеберетъя дворецъёс но центръёс но трос мукетыз.

Удмуртиысь тросэз музейёс удмурт историен но лулчеберетэн тодмато. Озьы ик вань художественной музейёс; мукетъёсыз сӥземын гуртъёслы, нимаз калыкъёслы, осконъёслы, удмурт сиён-юонлы но мукет. Оглом Удмурт Элькунын, 2025-тӥ арлы лыдпусъёсъя, ог 70 музей ужа.

Театръёсын спектакльёс удмурт но, ӟуч но кылын мыно. 2025-тӥ арлы шаерамы 11 театръёс ужало.

Активной туризм

Удмуртиын уно шутэтскон базаос усьтэмын. Соос пӧлын вань чорыганъя, агротуризмъя, ожгар но исторической, гужем усадьбаос но мукет.

Шаерамы спортъя 2 тодмо курортъёс ужало: «Чекерил» но «Нечкино» — со куасэн нискыланъя туала базаос, кытын вань фуникулёръёсыз, кунокуаос но кафеос. Озьы ик спортэз яратӥсьёс вуыло Г. А. Кулакова нимо спортъя куасэн бызьылонъя комплексэ, А. М. Демидов нимо ыбылӥськонъя комплексэ, 1949-тӥ арысен усьтэм Ижысь ипподроме, татын валэн ворттылонъя ӵошатсконъёс радъяськыло. Семьяен шутэтскыны чалкамын Динополис, Енот-парк.

Со сяна, Удмуртиын азинско мукет удысъёс но: валъёсын ветлон, спелеотуризм, ву вылын шудонъёс, гурезьёсы тубан, куасэн походэ ветлон.

Ужрадъёс

Арлы быдэ Удмуртиын трос калыклы ужрадъёс ортчытъясько. Со крезьгуро, цирк, йӧскалык, сиён-юонъя фестивальёс, фольклор праздникъёс но мукет. Тужгес тодмоосыз соос пӧлын луо фестивальёс: «На Родине П. И. Чайковского», Пельняньлэн калыккуспо нуналыз, Удмурт скороход но Горд фестиваль. Озьы ик арлы быдэ радъясько элькун йӧскалык праздникъёс: Гербер, Семык, Сабантуй, Кӧрбан но мукет.

Промышленной туризм

Удмуртия кемаласен кунмылэн ож тӥрлыкъя шоркареныз лыдъяське, солэн мугез таче: шаерын 19-тӥ даурлэн кутсконысеныз ож тӥрлыклэн пӧртэм модельёсыз пото. Удмурт АССР сое Быдӟым Атыкай ож вакытэ фронтэ тросэн келялляз, но тужгес тодмо луиз Калашников автоматэз поттыны кутскемез бере.

Элькунэ лыктэмъёс заводъёсы вуылыны но соослэсь историзэс, ужамзы но продукцизы сярысь тодыны быгато.

Эмъяськон но тазалыкез кыдатон удыс

«Варзи-Ятчи» санаторий

Удмуртия тодмо луэ музъем пушкытӥ бызись юон но минерал ошмесъёсыныз но пайдаё дэриосыныз, соин ик шаерысь санаторийёсы шутэтскыны но эмъяськыны палэнысь сюрсъёсын адямиос вуо. Элькунысьтымы тужгес тодмо санаторийёс: «Ува», «Варзи-Ятчи», «Металлург», «Озон» но мукетъёсыз.

Йӧскалык турмаршрут

2023-тӥ арын толсур толэзе Удмуртилэн туризмъя йӧскалык маршрутэз кылдӥз — «Влюбиться в Удмуртию». Со туристъёслы куинь нунал ӵоже элькунлэн историеныз но лулчеберетэныз тодматскыны, учкымон интыосаз вуылыны луонлык сётэ. Куноос ветло Иже, Сарапулэ но Воткинске, П. Чайковскийлэн усадьбаяз но Башенинлэн дачаяз театрализованной представлениос учко, удмурт сиёнъёсты пӧраны дышетско, купецъёслэн вашкала рецептъёссыя пӧрамъёсты веръяло.

Маршрут тупа котькыӵе арлыдъем туристъёслы — пиналъёслы но, мӧйыослы но.

Можга станция

Туризмъя инфраструктура

Удмуртиын «Ижевск» федерал аэропорт ужа, сое калыккуспо аэропортлы пӧрмытыны чакламын. Элькун пыр чугун сюрес ортче. 3 автовокзал, 16 автостанция, 1 дугдылонни но 5 кассаос ужало.

2025-тӥ арлэн кутсконэзлы шаерын 234 кунокуаос, 3 сюрс кафе-ресторанъёс, 60 транспорт компаниос, 21 туроператор но 245 турообъектъёс усьтэмын.

История но лулчеберет удысысь туризмъя объектъёс

Ижкар

• Удмуртиысь зоопарк
• Дунчылкыт Архистратиг Михаиллэн черкез
• М. Т. Калашников нимо музей
• Удмурт Элькунысь йӧскалык музей
• Арсенал
• Александр Невскойлэн черкез
• Шор площадь
• Ож тӥрлык заводлэн валтӥсь корпусэз
• Чайковский нимо операя но балетъя театр

Вотка

• П. И. Чайковскийлэн музей-дорез
• А. Овчинниковлэн юртэз
• Пантелеимон нимо черк
• Благовещенской собор

Сарапул

• Тылпу каланча
• Башенинлэн дачаез
• Урал гурезь

Глазов ёрос

• «Иднакар» музей-заповедник
• «ДондыДор» историяя но лулчеберетъя парк
• Глазовысь духовной училищелэн юртэз

Мукет ёросъёс

• «Лудорвай» музей-заповедник (Завьял ёрос);
• Зуевы Ключи (Каракулино ёрос);
• Байгурезь (Дэбес ёрос);
• «Шаркан» парк;
• Тол Бабайлэн резиденциез (Шаркан ёрос);
• Нечкино национальной парк (Сарапул ёрос);
• Мало-Дивеевской Серафимовской монастырь (Пичи Пурга ёрос);
• Кам вадьсысь бурдъёс (Каракулино черкогурт).

Туспуктэмъёс

• 
• 
• 
• 
• 
• 
• 
• 
• 

Валэктонъёс

Чӧлсконъёс

• Отдых в Удмуртии 2025: национальный колорит, родина Чайковского и исток Камы
• Экотуризм на любой вкус: 10 мест в Удмуртии, куда можно поехать с семьёй на выходные
• Развитие туризма способствовало росту потребительской активности в Удмуртии
• Удмуртия оздоровительная: где в регионе можно отдохнуть и подлечиться?