Гордъёслэн фестивальзы
| Гордъёслэн фестивальзы | |
|---|---|
 | |
| фестиваль[d] | |
| Кылдытӥсьёсыз | Ижысь Индустри ёрос администраци |
| Кутсконэз | 2003 |
| Ортчытон ӵемлыкез | арлы быдэ |
| Ортчытон интыез | |
| 56°53′15″ с. ш. 53°14′52″ в. д.GЯO | |
| Ортчытон интыез | Космонавтъёслэн парксы |
| Кар | Ижкар |
| Кун | |
 |
|
Гордъёслэн фестивальзы (ӟуч: Рыжий фестиваль) — Ижкарын 2003-тӥ арысен радъяськись кар фестиваль. Ортче арлы быдэ. Ижлэсь выль ӟечлыко имиджзэ лулчеберет пыр вӧлмытон вылысь малпамын.
Фестивальлэн валтӥсь малпанэз герӟаськемын удмуртъёслэн горд луэменызы. Этнографъёслэн верамзыя, Россиын улӥсь финн-угор калыкъёс пӧлысь соос тужгес кельытэсь. Солэсь ортчыт, ирландецъёсын ӵош удмуртъёсты дуннеысь тужгес горд йырсиё этнос пӧлы пырто[1].
Историез
2003-тӥ арын Ижысь Космонавтъёслэн парказы Индустри ёросын улӥсьёс понна шулдыръяськон радъяськиз — Гордъёслэн фестивальзы. Ужрадлэн программаяз пыртӥзы нап-ӵуж костюмъёсын кырӟась-эктӥсь нылпи коллективъёсты, маскаръяськись клоунъёсты, выль урожаен, тужгес но ӵужкушманэн но тыкваен адӟытонэз, озьы тужгес горд тушлы, тужгес горд урожайлы, тужгес горд вордослы сӥзем конкурсъёсты но мукетсэ[2][3].
Тямыс ар ӵоже ужрад ёрос праздник сямен ортчылӥз, нош 2012-тӥ арысен Ижысь кык интыын — Космонавтъёслэн парказы но Шор площадьын — радъяськылӥз, озьы кар шулдыръяськонлы пӧрмиз[3]. 2019-тӥ арысен ужрадэ элькунысь мукет муниципал кылдытэтъёс пыриськыны ӧдъязы.
Фестивальлэн программаез
Гордъёслэн фестивальзы арлы быдэ паськыта. Нырысетӥ аръёсаз кӧня ке ӵошатсконъёс но мастер-классъёс гинэ радъяськылӥзы ке, бератаз куд-ог ужрадъёс весяклы юнмазы, кылсярысь: «Папа, мама, мон — горд семья», «Горд крезьгур», «Горд подиум» («Горд йырси», «Горд туш», «Горд карнавал», «Горд быдӟала» номинациос), «Тумошо коньыгубиос», «Горд вордосъёс» но мукет[1]. Котькуд учыре быръё «Арысь тужгес горд адямиез»[4] но «Арысь тужгес горд пиналэз»[5]. Фестиваль дыръя озьы ик «Тон горд ӧвӧл на — лу!» девиз улсын ужа «Кельыт луисьтэмъёс понна сэрег», татын вань мылкыд карисьёслы макияж, грим, парик, костюм пыр луонлык сёто асьсэды горд шӧдыны[1].
Фестивальын огпол чаклам ӵошатсконъёс но акциос ортчыло. Озьы 2012-тӥ арын Ижетӥ «Горд» трамвай котыръяськиз, карын улӥсьёсты шулдыръяськонэ ӧтьыса, нош дугдылонниосын волонтёръёс фестивальлэн программаезлы сӥзем флаеръёсты люкылӥзы. Со аре «Юмшан57» промогруппа сюлмаськемен, Шор площадьын удмурт но ирланд эктонъёслы сӥзем «Тыпыртон vs. Reel» баттл ӧръяськиз[6]. 2016-тӥ арын «Гордъёс питыран вылын» велопробег ортчиз, отчы ог 300 адями пыриськиз. Ижкарлэн йырыз Юрий Тюрин вормисьлы выль велосипед кузьмаз[7]. 2018-тӥ арын фестиваль борды Удмуртиысь дышетсконниос итӥськизы, соос «Горд арня» акция ялӥзы[8]. 2019-тӥ арын фестиваль карысь 20 интыын радъяськиз. Ужрадэ пыриськисьёс Мунё театрысь артистъёсын пумиськизы, химияя эскеронъёс ортчытъязы, тунсыко фильмъёс учкизы но мукет[9]. 20-тӥ юбилей фестивале ужрадэз радъясьёс тылъёсын шоу но шулдыръяськонлы сӥзем торт дасязы, отысь 20 горд шаръёс лобӟизы. Нош сцена вылын «Планка» тодмо группа кырӟаз[5][2][10][4].
Фестивальлэн радъяськемез
Ижкарын сяна, Гордъёслэн фестивальзы улосысь мукет улоно пунктъёсын но радъяське. Кылсярысь, Пичи Пургалан та шулдыръяськонэз 2011-тӥ арысен удмурт элькунысь егитъёслэн «Шунды» огазеяськонзылэн ёросысь ёзэз ортчытъяны кутскиз[11].
«Тодмотэм апельсин»
2012-тӥ арын ужрадэз дасясьёс аспӧртэм флешмоб ортчытоно кариськизы: Ижысь Шор площадьысь фонтанэз тонна тыр апельсинъёсын тырмытӥзы, озьы туспуксьыны инты лэсьтӥзы но праздник мылкыд кылдытӥзы[12]. Но емышез интыяса ӧз вуттэ — калык сое бичаны ӧдъяз. Апельсинъёс син куспын быризы[13][14].
Вуоно араз Шор площаде юнматӥзы бадӟым апельсинэз пӧртэм пала питыртӥсь адямиосын корт синпелетэз. Авторъёсызлэн малпанзыя, апельсин сьӧд буёло луыны кулэ вал, адямиослэн аксым луэмзы шоры возьматыса. Но 2016-тӥ арын сое карын улӥсьёс яркыт нап-ӵуж буязы[15].
2017-тӥ арын синпелетэз Шор площадьысь Космонавтъёслэн парказы выжтӥзы, татчы сое нырысь ик пуктыны чакламын вал[16][13].
Валэктонъёс
- ↑ 1 2 3 Санникова Т. О. «Рыжий фестиваль» и новые удмуртские традиции // Новые традиции. — 2009. — С. 276—280.
- ↑ 1 2 Ижевский Рыжий фестиваль отметил свое двадцатилетие [ӟуч] izh.ru (16-09-2023). Эскеремын 02-11-2025 арын
- ↑ 1 2 Анна Вардугина (20-09-2013) Апельсиновый трэш/концептуальный фреш [ӟуч] ИА «Сусанин». Эскеремын 02-11-2025 арын
- ↑ 1 2 Вероника Избулатова (12-09-2023) Гастрономическая аллея, солнечная фотозона и фаер-шоу: в Удмуртии пройдет фестиваль рыжих [ӟуч] izh.kp.ru. Эскеремын 02-11-2025 арын
- ↑ 1 2 «Рыжий фестиваль» [ӟуч] Центр развития туризма Удмуртской Республики. Эскеремын 02-11-2025 арын
- ↑ Ижын «Гордъёслэн фестивальзы» мынэ [удм.] Удмурт дунне (13-09-2012). Эскеремын 02-11-2025 арын
- ↑ Ижкарын Гордъёслэн фестивальзы йылпумъяськиз [удм.] Моя Удмуртия (19-09-2016). Эскеремын 02-11-2025 арын
- ↑ XV «Рыжий Фестиваль» [ӟуч] Министерство национальной политики Удмуртской Республики (14-09-2018). Эскеремын 02-11-2025 арын
- ↑ «Рыжий фестиваль-2019» в Ижевске: программа мероприятий на 14 сентября [ӟуч] susanin.news (13-09-2019). Эскеремын 02-11-2025 арын
- ↑ На XX «Рыжий фестиваль» в Ижевск приехала группа «Планка» [ӟуч] Деловой квадрат (16-09-2023). Эскеремын 02-11-2025 арын
- ↑ День Рыжих в детском саду д. Курчум-Норья [ӟуч] Газета «Маяк» Малопургинский район (13-09-2024). Эскеремын 14-10-2025 арын
- ↑ На «Рыжем фестивале» в Ижевске будет фонтан апельсинов, гора тыкв и группа «Чили» [ӟуч] izh.kp.ru (10-09-2012). Эскеремын 02-11-2025 арын
- ↑ 1 2 Юрий Абашев (27-08-2017) В Ижевске перенесли памятник «Неизвестному апельсину» [ӟуч] izh.kp.ru. Эскеремын 02-11-2025 арын
- ↑ Я — главный экспонат! Самые нелепые памятники со всей России [ӟуч] Lenta.RU (22-04-2016). Эскеремын 02-11-2025 арын
- ↑ Покраску скульптуры с апельсином в Ижевске авторы назвали актом вандализма [ӟуч] ijevsk.bezformata.com (05-10-2016). Эскеремын 02-11-2025 арын
- ↑ Ася Александрова (26-08-2017) Скульптуру апельсина поставили в парке Космонавтов [ӟуч] izhlife.ru. Эскеремын 02-11-2025 арын
Литература
- Новые традиции / Е. Э. Сурова, С. А. Рассадина. — СПб.: Издательский дом «Петрополис», 2009. — С. 276—280. — 364 с. — 500 экз.
Чӧлсконъёс
- Рыжий фестиваль-2023 [ӟуч]
 |
|---|
