Байгурезь
| Байгурезь | |
|---|---|
 | |
| Тужгес ӝужыт азьыз | |
| Оглом ӝуждалаез | 251 м |
| Интыяськемез | |
| 57°39′17″ с. ш. 53°46′12″ в. д.GЯO | |
| Кун | |
| РФ субъектъёс | Удмуртия |
 | |
Байгурезь — Удмурт Элькунысь одӥгез тужгес ӝужытэз вырйыл, инкуазь синпелет. Россиысь валтӥсь туризмо интыос понна куара сётонын Russian Traveler Awards номинациын кыкетӥ интые потӥз[1].
Интыяськемез
Байгурезь интыяськемын Дэбес ёросын, Дэбес каргуртлэсь 1.5 иськемын, Ижкарлэсь 150 иськемлы уйпалангес, Чупчи шурлэн бурпал ярдураз[2].
Удмуртиысь тужгес ӝужытэз инты, вырйыллэн ӝуждалаез 251 м. Ярдурлэн тужгес меӵ азьыз 20 метрозь вуэ. 1988-тӥ арын Байгурезь инкуазь синпелетъёс пӧлы пыртэмын, 1995-тӥ арысен —нимысьтыз утиськись интыен лыдъяське. Солэн огъя быдӟалаез 30 га. Горд гурезьлэн тусъетэз Дэбес ёрослэн гербаз пуктэмын[3]
Гурезь выжыетӥ Чупчи шур бызе, сое лысо нюлэс котыртэ. Гурезьлэн огпалыз нап будосэн шобырскемын. Отын кызъёс но пӧртэм эмъюм будосъёс будо. Муэз горд сюё, солы луыса, гурезьлэн тусыз гордмыт, соин сое «Горд» гурезь шуыса нимало. Гурезь йылын писпуос вискын пичияк кырал интыез вань, отысен синсузёнтэм нюлэс но читыръяса бызись Чупчи шур адӟиське[3].
Историез
Байгурезь — со Дэбес ёросысь тодмо инкуазь синпелетлэн огшоры нимыз. Ӟуч кылэ берыктыса, «богатая гора» шуэмез возьматэ. Та инты зэмзэ но узыр паймымон чебереныз но историеныз.
Байгурезьлэн, адямилэн сямен ик, мукетыз, лушкем нимыз вань на— Бакгурезь («Немая гора»). Вашкала дауркылъя: гужем шунды берытскон вакытэ бак адями гурезь йылэ тужгес меӵ палтӥз тубыны быгатӥз ке, выльысь вераськыны быгатоз. Гурезе одно ик кумышкаен тырмытэм чаркаен тубыны кулэ, шуо, тубыку шапыксэ но палькканы уг яра. Малы ке шуоно, вашкалаослэн осконзыя, кумышка — инмаръёслэн кузьымзы, калыклы инмаръёсын кусып возён понна сётэмын вылэм. Сое инмаръёслы сӥзем бадӟым праздник нуналъёсы гинэ веръяны яра. Дауркылын бак мурт сярысь юнме шорысь верамын ӧвӧл. Со пыр возьматӥсько вашкала выжыос. Со — азьвыл кулэмъёссэ но али улӥсьёсты огазеясь лулос. Удмуртъёслэн малпанзыя, шунды берытскон вакытэ дунне кулэ но выльысь вордӥське. Дэбесысь шаертордосчилэн Павел Роготневлэн эскеронъёсызъя, ог витьтон ар талэсь азьвыл пересьёс инвожо толэзе — вожодыре, дунне вордсконлы люкетод шуыса, Байгурезе ветлыны уг лэзё вал. Малы ке шуоно, Байгурезез ӵапак дунне вордӥськон интыен лыдъяллязы. Туала вакытэ Байгурезез Удмурт Элькунлэн уйпал люкетэзлэн утись-вордӥсез шуо[4].
Вань на мукетыз дауркыл, кудӥз озьы ик гурезьлэн кужымо инты луэменыз герӟаськемын. Куке но вашкала вакытъёсы гурезь выжыын ву вуко сылэм, со вӧзын бай вукочилэн семьяез улэм. Бадӟымез нылыз быдэ вуэм бере, вукочи тазьы шуэм: «Кин гурезь йылэ тужгес меӵ интыетӥз тубыны быгатоз, солы ик нылме сёто». Сыӵе куронэз быдэстыны нокинлэн мылккыдыз тырмымтэ, бускель гуртысь пудо возьмась бак пияшлэн сяна. Со капчиен гурезь йылэ тубем. Инмаръёс бакель карыса, солы выльысь кыл-куара кузьмаллям[5]
Мукет дауркылъя, та гурезьлэн кузёез ачиз Инмар луэ. Со, пе, чылкыт сюлэмо муртъёсты гинэ вырйылэ тубыны лэзе. Мукетъёссэ чилектэмен-гудыртэмен но лек зорен кышкатэ. Гурезь йылын верам вӧсь кылъёс пырак Инмар дорозь вуо, шуо[3].
Туалаез
Археологъёслэн тодэтъёссыя, куке но та интыын Полом культураысь (собере Чепецкой) вашкала кар интыяськемын вылэм[2]. Озьы ик та вырйыл — Инмаръёслэн улон интызы — аспӧртэмлыко Олимп шуыса оскылӥзы вашкала удмуртъёс. Туала дыре но та интыез юн кыжымлыко интыен лыдъяло. Арлы быдэ татчы трос калык вуылэ.
Валэктонъёс
- ↑ Гора Байгурезь Удмуртии: кандидат на звание лучшей природной достопримечательности России [ӟуч] Деловой Квадрат (24 октября 2023). Эскеремын 28.07.2025 арын
- ↑ 1 2 Гора Байгурезь [ӟуч] Центр развития туризма Удмуртской Республики. Эскеремын 28.07.2025 арын
- ↑ 1 2 3 Гора Байгурезь [ӟуч] Туристер (21 февраля 2024). Эскеремын 28..07.2025 арын
- ↑ Ольга Чичирко (июнь, 2015) Тайны горы Байгурезь [ӟуч] Maavalla Koda. Эскеремын 28.07.2025 арын
- ↑ Елена Кардопольцева Семь чудес Удмуртии. Гора Байгурезь [ӟуч] Izhlife. Эскеремын 28.07.2025 арын