Кам вадьсысь бурдъёс
| Кам вадьсысь бурдъёс | |
|---|---|
 | |
| Кун | Россия |
| Кылдэмын | 1979 |
| Проектлэн авторез | В. П. Бехтенев |
| Сӥземын | |
| Быдӟым Атыкай ож вакытэ быремъёслы | |
 |
|
Кам вадьсысь бурдъёс яке Бурдъёс (ӟуч: Крылья над Камой) — Удмурт Элькунысь Каракулино черкогуртысь мемориал комплекс, Россиысь гурт ёросъёс пӧлысь тужгес бадӟымез луэ. Быдӟым Атыкай ож вакытэ бырем ожгарчи аспалчиоссылы сӥземын.
Историез
1979-тӥ арын Каракулино шорын В. П. Бехтенев архитекторлэн проектэзъя мемориал комплекс пуктыны ӧдъязы. Синпель инты кылдытон пумысен кичӧлтонэн потӥз КПСС-лэн Каракулино райкомезлэн нырысетӥ секретарез А. П. Осинкин[1][2].
Проектъя Кам шурлэн ӝужыт ярдураз пуктэм мемориал кулэ вал «вить бурдо кизили выллем лэсьтэм бурдъёсыныз инмозь вылӥе ӝутскыны, тубатъёсыныз шур дурозь васькыны». Быдэс комплекс кузя малпамын вал бырем аспалчиоссылэн но герой каръёслэн нимъёсынызы мемориал пулъёс юнматыны. Гулбечысьтыз висъетаз Быдӟым Атыкай ожлэн историезлы сӥзем музей усьтыны чаклаллязы. Пуктӥськонлы ог 300 сюрс манет висъязы, но лэсьтӥськон материалъёслы дунъёс йылэмен, чаклам ужъёслы дунъёс 500 сюрс манетозь будӥзы. Со сяна, Удмуртиын кулэ луись тӥрлык ӧз шедьы — мраморез но гранитэз вандон вылысь нимысьтыз станокъёсты палэнысь вуттӥзы[1].
Мемориалэз Быдӟым Вормонлы 30 ар тырмонэз пусъён ужрадлы 1980-тӥ арын вуттыны чакламын вал, но пуктӥськон 1988-тӥ арозь кыстӥськиз. Комплекс бордын В. П. Бехтенев кивалтэм улсын ужазы Свердловскысь архитектурая институтысь лэсьтӥськонъя «Зодчий» отрядысь студентъёс. Но 1988-тӥ арын соос, ужан но улон условиос ярамтэен, пуктӥськонэз азинтыны мыр-мыр пыкиськизы но Удмуртие ӧз мынэ. Озьы проектэз 12 арлы кынтӥзы[2].
Котьма ке но йылаз-пумаз вуттымтэ «Бурдъёс» мемориал Россиысь гурт ёросъёсын лэсьтэм мемориалъёс пӧлысь тужгес бадӟымез луиз[3][4].
Каракулиноысь шор ёзо школа пиртэш лэсьтос понна кылкутонэз ас вылаз басьтӥз. Дышетскисьёс котырзэ утялтон, сяськаос мерттон вылысь субботникъёс радъяллязы.
12 ар ӵоже «Бурдъёс» куашканы ӧдъязы. 2000-тӥ арын огкылэ вуизы: мемориалэн тупатоно. Сое нырысетӥ чаклам проектэзъя йылаз-пумаз вуттон сярысь вераськон ик ӧй вал, малы ке шуоно со понна трос коньдон кисьтоно луысал, нош ёрос бюджетын сомында барыш ӧй сюрысал. Таин валче синпелет улысь пырон-потон ӧсъёссэ весяклы пытсазы, зэмос гырлыос интые пуктӥзы соосты воштыны луонлык сётӥсьёссэ, котырзэ кенеразы, трибунаяз мрамор плитка вӧлдӥзы, вылаз гожтӥзы: «Дугды гранит борддор доры, чусомы огдырлы, тодад вай соос сярысь!». Куинь террасоас вылысь плитаос вылэ ожын бырем аспалчиоссылэсь но герой каръёслэсь нимъёссэс гожтӥзы. Соку ик комплексэ Быдӟым Атыкай ож вакытысь кык артиллерияя пушкаосты юнматӥзы. Соосты Каракулинолы РФ-ысь Обороная министерство висъяз, соосты Чувашия улосысь Алатырь карысь вуттӥзы[5]. Со аре ик Вормонлы 55 арез пусъён улсын Быдӟым Атыкай ожысь ветеранъёс комплекс котыре чагыр кызъёс мерттӥзы.
2010-тӥ арын мемориалэз выльдӥзы: стелаос вылысь но трибунаысь мраморез воштӥзы, штукатуркалэсь лэсьтэмъёссэ тупатъязы[1].
Комплекс «Каракулино ёрос» муниципал кылдытэтлэн ваньбуръя реестраз пыртэмын.
Туала вакытэ
«Бурдъёс» комплекс Каракулиноысь тужгес дано инты луэ. Татын Быдӟым Вормонлы сӥзем ужрадъёс гинэ уг ортчыло — школаез йылпумъясьёс шулдыръясько, сюанчиослы туспуктон радъяло[5].
Совето вакытэ сямен ик комплексэз утялтон но чаклан понна кылкуто Каракулино шор ёзо школаысь дышетскисьёс[1].
Татын чакламын Каракулино ёросын вордӥськем но кыдам Совето Союзысь куать Геройёслы но Данъян орденлэн куинь кавалеръёсызлы сӥзем аллея усьтыны[5][4].
Валэктонъёс
- ↑ 1 2 3 4 Вера Гибадуллина (17.04.2020) Величественный и гордый [ӟуч] Прикамская правда. Эскеремын 16-10-2025 арын
- ↑ 1 2 Мемориальный комплекс воинам-землякам, павшим в годы Великой Отечественной войны [ӟуч] МО «Муниципальный округ Каракулинский район Удмуртской Республики». Эскеремын 16-10-2025 арын
- ↑ Маршрут выходного дня. Каракулино и Каракулинский район: старая часовня и юный храм, родники со «святой» и «мёртвой» водой и «Крылья» над Камой [ӟуч] yakshurbodya.bezformata.com. Эскеремын 16-10-2025 арын
- ↑ 1 2 Крылья над Камой [ӟуч] visitudmurtia.org. Эскеремын 16-10-2025 арын
- ↑ 1 2 3 Мемориальный комплекс [ӟуч] udm.travel. Эскеремын 16-10-2025 арын
Чӧлсконъёс
- Мемориальный комплекс [ӟуч]