Нечкино (спортъя но туризмъя центр)
| Нечкино | |
|---|---|
 | |
| 56°40′12″ с. ш. 53°44′45″ в. д.GЯO | |
| Матысез кар |
Сарапул Ижевск |
| Трассаос | 10 |
| Бадӟымез трасса | 1200 м |
| Сайт | nechkino.ru |
«Нечкино» — Удмуртиысь Сарапул ёросысь спортъя но туризмъя центр, озьы ик куасэн бызьылонъя курорт. Арлы быдэ отчы 200 сюрслэсь уно мурт вуылэ.
Интыяськемез
Спортъя но туризмъя «Нечкино» центр интыяськемын Кам шур дурын, Сарапул карлэсь 25 иськемын но Ижкарлэсь 45 иськемын[1]. Россиысь одӥг гинэ курорт, кудӥз интыяськемын йӧскалык парк пушкын (Нечкино национальной парк)[2].
Историез
«Нечкино» комплекс Удмуртиысь Сарапул ёросын кылдӥз 2005-тӥ аръёсы но элькунын куасэн бызьылонъя нырысетӥез курорт луиз. Бизнес-планэзъя со чакламын вал семьяен яке пичи группаосын шутэтскон понна. Но 2006-тӥ арын, усьтӥськемез бере, радъясьёс жалязы, тросгес калыклы инты ӧз чаклалэ шуыса, малы ке шуоно куд-ог нуналъёсы трасса вылэ 10 сюрслэсь ятыр адями потаз. Сыӵе трос лыктэмъёслы луыса спортъя центр сое пуктонлы быдтэм уксёез вить ар куспын берыктӥз[2].
2018-тӥ арын курортлэн кивалтӥсьёсыз «Ижавиа» авиакомпаниен, Удмуртиысь зоопаркен но «Лыжи мечты» проектэн валче ужан сярысь тупанкылъёс гожтӥзы. Ваньмыз та огкылъёс «Нечкино» спортъя но туризмъя центре гинэ ӧвӧл, оглом элькунэ тросгес туристъёсыз кыскон вылысь лэсьтэмын вал[3].
2025-тӥ арын тулыспаллы ивортодэтъя, арлы быдэ «Нечкино»-е 200 сюрслэсь трос адями вуылэ. Куноос пӧлысь бадӟым люкетэз толалтэ лыктэ, но гужем но, 2020-тӥ арын куартолэзьлы лыдпусъёсъя, «Нечкино» туристъёслэсь толэзяз 15 миллион манет пала табыш поттэ вылэм[2].
Центр сярысь
Спортъя но туризмъя «Нечкино» центр быдэс ар ӵоже туристъёсты пумита. Гужем толэзьёсы арендае басьтыны луэ велосипед, ролик, веломобиль, скейтборд, самокат, маунтинборд, дертсерф но мукетсэ. Спортъя центрын массовой ужрадъёс ортчыло: ӵошатсконъёс, фестивальёс, праздникъёс. Соос пӧлын ӟеч сямлы пӧрмизы ни Лымылэсь нуналзэ, «БикиниFest»-эз, Валхалалэсь уйзэ, Сноубордлэсь нуналзэ но мукет ужрадъёсты ортчытон[4].
Куасэн бызьылон сезон усьтӥське толсурлэн кутсконаз но кыстӥське южтолэзь пумозь[1][4]. Толалтэ спортъя центрын 10 трассаос усьтӥсько, соослэн огъя кузьдалазы 8 иськем луэ[2][5]. Тужгес кузез трасса — 1200 метр, со ог 200 метр ӝуждалаё гурезьёсын лэсьтэмын. Озьы ик нимысьтыз сюресъёс вань (куд-огез соос трамплинъёсын) тюбинген но сноубордэн нискылан понна[1][4]. «Нечкино» — Удмуртиысь одӥг гинэ курорт, кытын вань 4 интыё Doppelmayr подъёмникъёс[2][5].
Озьы ик спортъя но туризмъя комплексын усьтэмын инструкторской центр, отын ужасьёс юртто мылкыд карисьёслы куасэн яке сноубордэн нискыланы дышетскыны яке быгатонлыкъёссэс волятыны, озьы ик 6-16 аресъем нылпиос понна куасэн бызьылонъя школа ужа[4].
Инфраструктура
- 78 номерен кунокуа[5]
- куно коркаос
- тол беседка
- ширм-кафе
- бар
- сауна
- усьтэм омырын бассейнъёс
- мунчоос
- тылскыны интыос
- нылпиослы шудон интыос воспитательёсын
- SPA-центр[2][1][6][5]
Данъетъёсыз
- 2018 — SkiBusiness Awards-2018 огъяросси премия «2018-тӥ ар понна нискыланы дышетӥсь устоез школа» номинациын[3]
Валэктонъёс
- ↑ 1 2 3 4 Горнолыжный курорт Нечкино в Удмуртия [рус.] ski2.ru.
- ↑ 1 2 3 4 5 6 Юлия Ермилова, Анна Садова. "Все будет клево, и в стране, и в Нечкино". Как горнолыжному курорту пережить пандемию, TACC (29.05.2020). Эскеремын: 17 тулыспалэ 2025 арын.
- ↑ 1 2 Алина Музафарова. В «Нечкино» активно привлекают туристов со всей страны: какие условия создает курорт для отдыха в Удмуртии, Ижлайф (30.11.2018). Эскеремын: 17 тулыспалэ 2025 арын.
- ↑ 1 2 3 4 Курорт активного отдыха «Нечкино» [ӟуч] visitudmurtia.org.
- ↑ 1 2 3 4 Курорт - Нечкино. Эскеремын: 17 тулыспалэ 2025 арын.
- ↑ Горнолыжный курорт «Нечкино» — Стоянка в Республике Удмуртия, RV Land. Эскеремын: 17 тулыспалэ 2025 арын.