Нечкино национальной парк

Нечкино национальной парк
Категория МСОП — II (Йӧскалык парк)
Валтӥсь тодэтъёс
Быдӟалаез	207,52
Кылдытэмын	16 коньывуонэ 1997 арын
Интыяськемез
Кун	Россия Россия
РФ субъектъёс	Удмуртия
Матысез кар	Ижевск, Воткинск, Сарапул, Чайковский
nechkinsky.ru
Нечкино национальной парк
Нечкино национальной парк
Медиафайлъёс РувикиМедиа пушкын

«Нечкино» национальной парк (ӟуч: Национальный парк «Нечкинский») — Удмуртиысь национальной парк. Кылдытэмын 1997-тӥ арын 16-тӥ коньывуонэ Россия Федерациысь правительстволэн 1323 номеро пуктэтэныз. Парклэн администрациез Вотка ёросысь Новый каргуртын интыяськемын.

Удмурт шаерысь нимысьтыз утиськись инкуазь интыос пӧлысь та парк луэ одӥгез тужгес дунлыкоез инкуазез утись инты. Отын утисько Шор Прикамье котырысь паймымон возьвыл нюлэсъёс, шур, ты но нюр экосистемаос, нюлэс пӧйшуръёс, инкуазь, историен но культураен герӟаськем комплексъёс но объектъёс, кудъёсыз экология но история ласянь дунлыко луо.

Историез

Нечкино йӧскалык паркез кылдытонлэн кичӧлтӥсез луиз Удмурт Элькунысь кивалтэт, со 1995-тӥ арын 3-тӥ куартолэзе 50/6 номеро косэт поттӥз. Собере элькунысь Нюлэс хозяйствоя министерство Россиысь ӵектосъёсъя «Росгипролес» институтэн огкыл гожтӥз Нечкино йӧскалык паркез радъян но азинтон пумысен. Уже озьы ик кыскемын вал Удмурт кун университетысь биологъёс, географъёс, экологъёс но историкъёс.

Удмуртиысь 14 сюрс гектар быдӟалаё Нечкино йӧскалык парк одӥгез дунлыкоез инкуазез утись интылы пӧрмиз. Отын утисько шер пумиськись пӧйшуръёс, тылобурдоос, будосъёс, аспӧртэмлыко археологической памятникъёс.

Географиез

Парк интыяське Камлэн шор бызёнэз котырын, Воткинск водохранилище дурын. Парклэн территорияз пыро Вотка, Завьял но Сарапул ёросъёслэн музъемъёссы.

Парклэн бур но паллян ярдуръёсыз ог-огзылэсь зол висъясько. Кама котырысь музъемъёс — со лазег инты, кудъёсаз трос пичи шуръёсыз но ӵыпетъёсыз. Кам шурлэн ву кошкон интыез нёжало, отын трос ӵыпетъёсыз.

Фаунаез

Нечкино национальной паркын пумисько Удмуртиысь 70 процент пала будосъёс но пӧйшуръёс.

Отын музъем вылын улӥсь 95 семьяосысь 916 пӧртэм беспозвоночнойёс шараямын. Соос пӧлысь тужгес трос пумисько нымы-кибыос. Зонаос ласянь ке учконо, уноез соос пӧлысь нюлэс зонаын уло. Но вань пӧлазы степьын улӥсьёсыз но: толстоголовая травянка, сатир диада, зефир дубовый, жужелица лесостепная но куд-ог мукетъёсыз. 15 нымы-кибыос Удмуртиысь шер пумиськылӥсь но бырон калэ вуэм пӧйшуръёс пӧлы пыртэмын.

Йӧскалык паркын 36 турлы пӧртэм чорыгъёс уло, соос лыо классысь 7 отрядъёсы пыро. Соос Удмуртиысь быдэс ихтиофауналэн ог 80 процент луо. Тужгес узыр со ласянь луэ карпъёслэн отрядзы (26 пӧртэм пумо). Со бӧрсьы мынэ окунеобразной отряд (4 турлы).

Парклэн герпетофаунаяз 16 пӧртэм пӧйшуръёс пыро. Тужгес ӵем пумиськылэ тымет бака. Камлэн паллян но бур ярдуръёсысьтыз нюлэсъёсын уло огшоры тритон, гребенчатой тритон, турын бака, пурысь бака но огшоры чесночница. Озьы ик отын уло огшоры уж но огшоры гадюка.

Парклэн орнитофаунаез но узыр. Оглом отын 14 выжыысь 191 пӧртэм тылобурдоос пусъемын. Со Удмурт Элькунлэн музъем вылаз пумиськылӥсь тылобурдоос пӧлысь 70 процентэз. 21 турлыез тылобурдоос шер пумиськылӥсь но бырон калэ вуэмъёс пӧлы пыро.

Парк котырын 6 отрядысь 44 пумо млекопитающейёс шараямын. Тужгес ӵем пумисько огшоры ӵушъял, пичи, шоро-куспо но бадӟым бурозубкаос, огшоры арыслан, койык, огшоры белка, огшоры вучайы, урал шыр но мукет.

Флораез

Зоналэн тодметъёсыз тужгес но яркыт адӟисько лысо нюлэсъёсын. Кызо нюлэсъёс быдэс паркын сокем трос ӧвӧл. Кызэн ӵош ӵемысь будо сибирь ньылпу, беризь, кызьпу но пужым.

Йӧскалык парклэн интывылаз вань типъем нюръёс пумиськыло: ӝутэм нюръёс, переходной нюръёс но лазег нюръёс. Ӝутэм нюръёс пумиськыло пужым нюлэсъёсын. Лазег нюръёсын будо нюро сабельник, шашъёс, вахта трёхлистной, огшоры тростник, канареечник, вех ядовитой но мукет.

Йӧскалык паркын 60-лэсь трос ву будосъёс пусъемын. Ярдуръёсын ӵемысь будо шашъёс но эмъясь окопник.

Парклэн флораез туж узыр, со сярысь вера таиз но: Удмуртиысь вань будосъёс пӧлысь 70 процентэсь тросэз парклэн музъемаз будо, нош куинь турлыез отын гинэ пумиське. Со белокопытник язычковый, пупочник ползучий но денец полевой. Йӧскалык паркын будӥсь 71 будосъёсты нимысьтыз утёно.

Учкымон интыосыз

Йӧскалык парк история, лулчеберет объектъёсын узыр луись городъёс вискын интыяськемын: Ижевск, Сарапул, Вотка, Чайковский.

Элькун статусэн инкуазь синпелетъёс:

Сива шурлэн пумыз

«Галёво» урочище

«Сидоровы горы» урочище

«Нечкино» урочище

«Кемульское» нюр

«Чистокостоаатовское» нюр

«Макаровский» минерал ошмес

Заборное ты

История но лулчеберет синпелетъёс:

Крещенско-Богоявленской черк (XIX даурысь архитектурая синпелет)

Археология синпелетъёс:

Кӧльы даурысь Рычинской стоянка

Неолит вакытысь Поваренской стоянка

Неолит но бронза вакытысь Заборное ты дорысь стоянка

Бронза вакытысь Макаровское гурт

Вазь корт даурысь Усть-Нечкинское, Дуванакское но Макаровское городищеос

• 

  Лысву

• 

  Кам шур

• 

  Заборное ты

• 

  Паркысь сюрес

Туризм

Туризмъя маршрутъёс

Туристъёс понна йӧскалык паркын ужасьёс кӧня ке туризмъя маршрутъёс кылдытӥзы:

• Пыдын ветлон сюресъёс
  • «Дорогой предков»
  • «История царского бора»
  • «Тропа здоровья» (терренкур)
  • «Тайны Костоватовского бора»
  • «Орланьи кручи»
  • «Сидоровы горы»
• Ву маршрутъёс
  • «Сивинские просторы»
• Тол маршрутъёс
  • «По зимнему бору на лыжах»
• Тодматскон но дышетскон маршрутъёс (машинаен)
  • «Язевский»
  • «Сивинский»
  • «Заборное»
  • «Галевский»

Туризмъя объектъёс

2017-тӥ арын куартолэзе паркын «Орлан-белохвост»-лэн музеез усьтӥськиз. Со «Орланьи кручи» экоцентрын интыяськемын. Музейын Нечкино йӧскалык паркысь тылобурдоос сярысь пыр-поч ивортодэт люкамын. Нимысьтыз саклык висъяське Кам шур дурын улӥсь орлан-белохвостлы. Музее ветлӥсьёс тылобурдо сярысь трос выльзэ тодыны но солэсь карзэ адӟыны быгато.

Озьы ик туристъёс понна парклэн территорияз «Вежа» беседка, кӧня ке кемпингъёс но дугдылон инты радъямын.

Валэктонъёс

Чӧлсконъёс

• Официальный сайт Национального парка «Нечкинский»
• Особо охраняемые природные территории России