Глазовысь духовной училищелэн юртэз
| Юрт | |
| Глазовысь духовной училищелэн юртэз | |
|---|---|
 | |
| 58°08′09″ с. ш. 52°40′23″ в. д.GЯO | |
| Кун | |
| Кар | Глазов, Революцилэн ульчаез, 17 |
| Кылдытэмын | 1846 |
| Инлыкез |
 ОКН № 1800065000 |
 |
|
 Медиафайлъёс РувикиМедиа пушкын | |
 | Россилэн лулчеберето кылёс лэсьтосъёсыз улос инлыкен рег. № 181610539740005 (ЕГРОКН) лэсьтос № 1800065000 (БД Викигида) |
Глазовысь духовной училищелэн юртэз (ӟуч: Здание Глазовского духовного училища) — Удмурт Элькунысь Глазовысь улыно-вылыно из юрт. Историысь но лулчеберетысь улосэн утёно синпелет.
2024-тӥ арын ивортонъёсъя, татын Глазовысь В. Г. Короленко нимо кун пединститут интыяське.
Историез
Преображенской собор
1845-тӥ арын Вӧсьлыко Синод лыдъяз: Глазовын духовной уезд но приход училищеос кылдытыны кулэ[1]. Соосты усьтыны валтӥсь муг таӵе вал: «Глазов округе пырись интыослэн Ватка епархиын татчыозь ужам духовной училищеослэсь кыдёке пуксемзы».
Дышетсконнилы шуыса интыысь баӵкоос кар шорысь Преображенской соборлэсь кык из юртъёссэ висъязы. Соосты училищелы тупамон карон, тӥрлыкен узырмытон вылысь огдырлы кылдытэмын вал лэсьтӥськонъя комитет, со Глазов округысь духовенстволэсь пожертвование чот коньдонзэ бичаз. Вакчи дыр куспын 1000-лэсь ятыр азвесь манет бичамын вал. Та уксёен комитет дышетскон но кӧлан висъетъёс лэсьтӥз, мунчо но юртъер котырез возён интыос пуктӥз, пу но сиён-юон люказ, котырзэ умоятӥз[1].
1846-тӥ арын 1-тӥ куарусёнэ 107 кузя нырысетӥ дышетскисьёс визь люканы ӧдъязы[1].
1867-тӥ—1871-тӥ аръёсысь духовной но дышетон реформа духовной училищелэн ужаз воштонъёс пыртӥз. Глазовысь дышетон ужъюртлэн висъетъёсыз (1852-тӥ арын уезд но приход училищеос огазеямын вал) выль уставлэн куронъёсызлы ӧз тупаллялэ: татын визьнодасьёслы но дышетскисьёслы шутэтскыны интыос но библиотека ӧй вал. Та югдурез эскерон вылысь округын ӧтчам ортчиз, отын училищелы юрт басьтыны я пуктыны коньдон утчаны ӵектӥзы. Со понна 10 сюрс азвесь манет кулэ вал. Глазовысь училище котыре интыяськем черкъёсысь уксё бичан пумысен огкылэ вуизы. Тырмыт коньдон люкамзы бере училищелы выль юрт басьтӥзы, калыкын сое «Завалин купечлэн коркаез» нималлязы[2].
Завалинлэн юртэз
Куинетӥ гильдиысь купечлэн Григорий Завалинлэн одӥг этажъем юртэз сылӥз Преображенской урамын (али — Революцилэн ульчаез). Со 1820-тӥ аръёсы ӝутэмын вал, Глазовысь частной из коркаос пӧлысь нырысетӥез луэ[3][4]. 1880-тӥ аръёслэн кутсконазы духовенствоен басьтэм юртъерез тупатъязы: Гросс земской архитекторлэн проектэзъя бадӟым пристрой пуктӥзы но кыкетӥ этаж ӝутӥзы. Кыкетӥ этажаз пичи черк но кӧлан интыос радъязы, нырысетӥ этажаз — вить класс, библиотека, кивалтэт висъет но чакласьлы висъет лэсьтӥзы. Гулбечаз сиён пӧран, сиськон, тыриськон, дӥсь возён интыос, утялскись-пӧраськисьёслы висъет, карцер но пыласькон сэрег радъязы[2]. 1878-тӥ арын 26-тӥ куарусёнэ Глазовысь духовной училищеын 60 дышетскисьлы огъя улонни усьтӥськиз.
Паськытатон
1881-тӥ арын юртэз эшшо огпол выльдӥзы: кыкетӥ этажын кивалтэтлэн висъетэз кылдӥз, нырысетӥяз — учительской, нош гулбечын — пӧраськон висъетэ мышкытӥз пырон ӧс. Со аре ик дышетскисьёс понна рекреационной зал усьтэмын вал[1].
Котьма ке но, выль пуктэм висъетъёсын но татын 100 дышетскисьёс понна интыен ёркыт вал. 1905-тӥ—1907-тӥ аръёсы озьы Завалинлэн юртэз котыре горд кирпичлэсь бер классицизм стилья куинь этажъем выль юрт ӝутӥзы, солы корказь но барельефен колоннада лэсьтӥзы, мисьтаськон инты радъязы. Кык дышетон корпусъёсты нимысьтыз выжонэн герӟазы. Завалинлэсь юртсэ тӧдьмазы, таин валче калыкын сое «тӧдьы» нимазы, нош выль юртэз — «горд»[5].
1912-тӥ арын училищелэн сквераз Александра II императорлы сӥзем туйлэсь бюст юнматӥзы. Революция бере со куашкатэмын, нош 2022-тӥ арын выльысь ӵыжатэмын но Глазовысь мукет сквере пуктэмын вал[4][3].
Революция бере
Духовной училище 1918-тӥ арозь ужаз, отӥяз юртъёссэ асэстӥзы (национализировать каризы). Шуркынмонэ отын сӥё-дано усьтӥськиз Калык юрт.
1920-тӥ арын тулысысен купеч юртын карысь театр но улӥ командной составлэн школаез интыяськылӥзы, 1921-тӥ арын гужемысен — Калыкез дышетонъя Вотской институт но Глазовысь дышетӥсьёсты дасянъя техникум, таиз 1952-тӥ арын реорганизация пыр потӥз но В. Г. Короленко нимо педагогикая кун институт луиз[4].
1940-тӥ арын юртъерын совето-финн ожын сӧсырмемъёслы госпиталь усьтӥськиз. Финляндиен миръясь огкыл юнматэм бере госпиталь огдырлы пытсаськылӥз, но Быдӟым Атыкай ож кутскем бере выльысь усьтӥськиз.
Глазовысь институт дышетон корпусаз 1945-тӥ арын берытскиз, но ож вакытъёсы дышетон ӧз уретӥськылы[5].
1979-тӥ арын УАССР-ысь Министръёслэн Кенешсы 362 номеро постановление поттӥз, соя Революцилэн ульчаысьтыз Глазовысь пединститутлэсь 17 номеро юртсэ лулчеберетъя улосэн утёно синпелетъёс пӧлы пыртӥзы[5][6].
2024-тӥ арын ивортонъёсъя, духовной училищелэн азьвыл юртаз интыясько ГГПИ-лэн педагогикая но крезьгуръя факультетъёсыз.
Дышетон корпус борды институтэз йылпумъям дано выпускникъёссылы сӥзем кӧня ке мемориал пул шуккемын: Совето Союзысь Геройёслы, Быдӟым Атыкай ож пыр потэмъёслы Т. Н. Барамзиналы, А. П. Пряженниковлы, озьы ик нимо-дано муртъёслы Г. Н. Матвеевлы, А. Д. Тороповлы, Ф. И. Васильевлы, О. А. Поскрёбышевлы[3].
Дано дышетскисьёсыз
- Бердников Илья Степанович — ӟуч богослов, канонист;
- Алексий (Молчанов) — епископ;
- Авраамий (Дернов) — архиепископ[7].
Валэктонъёс
- ↑ 1 2 3 4 К. В. Тимчак Из истории зданий глазовского духовного училища [ӟуч] Глазовский краеведческий музей. Эскеремын 11-11-2025 арын
- ↑ 1 2 Ксения Тимчак (04-08-2015) Духовный ветроград. Из истории Глазовского духовного училища [ӟуч] Глазовский краеведческий музей. Эскеремын 11-11-2025 арын
- ↑ 1 2 3 «Корпус Глазовского государственного инженерно-педагогического университета имени В. Г. Короленко» [ӟуч] Глазовский краеведческий музей. Эскеремын 11-11-2025 арын
- ↑ 1 2 3 Здание бывшего духовного училища [ӟуч] Историческийбагаж.рф. Эскеремын 11-11-2025 арын
- ↑ 1 2 3 Лихачева Е. В. Два века света просвещения [ӟуч] ggpi.org. Эскеремын 11-11-2025 арын
- ↑ Здание бывшего Глазовского духовного училища [ӟуч] edh.psk-mp.ru. Эскеремын 11-11-2025 арын
- ↑ Выпускники Глазовского духовного училища [ӟуч] petergen.com. Эскеремын 11-11-2025 арын
Чӧлсконъёс