Пряженников, Александр Павлович

Рувикиын таӵе фамилиен мукет муртъёс сярысь гожтосъёс вань. Учке: Пряженников.

Александр Павлович Пряженников
Вордӥськем дырыз	26-тӥ куарусёнэ 1922(1922-09-26)
Вордӥськем интыез	Артёнки, Глаз ёрос, Вотской автономной область, РСФСР
Кулэм дырыз	19-тӥ оштолэзе 1945(1945-04-19) (22 арес)
Кулэм интыез	Крженовице, Чехословакия
Кунмуртлыкез	СССР СССР
Кыӵе войскоез	штурмовой авиация
Служить карон аръёсыз	1940—1945
Званиез
Частез	90-тӥ гвардейской штурмовой авиационной полк (5-тӥ штурмовой авиационной корпуслэн 4-тӥ гвардейской штурмовой авиационной дивизиез)
Интыужез	эскадрильялэн командирезлэн воштӥсез
Ожмаськонъёс/ожъёс	Быдӟым Атыкай ож
Данъетъёсыз

Александр Павлович Пряженников (1922-тӥ арын 26-тӥ куарусёнэ Глаз ёросын—1945-тӥ арын 19-тӥ оштолэзе Чехословакиын) — Быдӟым Атыкай оже пыриськем мурт, 90-тӥ гвардейской штурмовой авиационной полклэн эскадрильяезлэн воштӥсез (2-тӥ Украин фронтысь 5-тӥ воздушной армилэн 5-тӥ штурмовой авиационной корпуслэн 4-тӥ гвардейской штурмовой авиационной дивизиез), гвардилэн старшой лейтенантэз. Совето Союзлэн Героез (1946-тӥ ар, кулэмез бере).

Улон сюресэз

Вордӥськиз 1922-тӥ арын 26-тӥ куарусёнэ Глаз уездын Понино волостьысь Артёнки гуртын (али Удмуртиысь Глаз ёросысь гурт) ӟуч крестьян семьяын. Укмыс нылпи пӧлысь ньылетӥез. Атаез но куинез бадӟым агайёсыз ожын быризы. 1938-тӥ арын Почашысь сизьым классъем школаез йылпумъяз. Собере Глазысь педагогикая техникумын дышетскиз, огдыре ик планерной станциын авиаци спортэн выриз. Дышетсконзэ йылпумъяса, дышетӥсь луыса ужаз.

1940-тӥ арын Глаз ёрос военкомат косэмъя, армие кошкиз. Отын Балашовоысь пилотъёсты дасянъя военной авиационной школае ыстӥзы.1942-тӥ арын, сое йылпумъямез бере, Ил-2 штурмовикез тодон-валан понна Ижкарысь 34-тӥ запасной авиационной полке вуиз.

1943-тӥ арын тулыспалысен Калинин фронтын ожмаськиз. Инвожо толэзе штурмовой авиаполкез, кудаз Пряженников служить кариз, Воронеж фронтэ выжтӥзы но Курской дугаын мынӥсь ожмаськонэ келязы. Боевой заданиосты быдэсъякуз, Пряженниковлэн самолётэз трос пол тушмон истребительёс улэ шедьылӥз, озьы ке но, аслэсьтыз группазэ котьку аслаз аэродромаз вуттыны быгатылӥз. Эскадрильялэн командирез чотын тушмонлэсь техниказэ но луло кужымзэ пушкытъянэ со 80 пол Ил-2 штурмовикъёсын бадӟым группаосты валтылӥз.

Белгород, Харьков но Киев котырын ожмаськиз, Корсунь-Шевченковской, Львовско-Сандомирской операциосы, Трансильваниез мозмытонэ но Будапештэз штурмен басьтонэ пыриськиз. 1944-тӥ арысен Огъяросси Коммунист партилэн(б) ёзчиез луэ.

Подвигъёсыз

1943-тӥ арын 6-тӥ гудырикошконэ Пряженниковлэн самолётаз тушмон снаряд вуиз, лётчик сӧриськем управлениен самолётэз фронт линия сьӧры поттыса, асьме интывылэ пуктыны быгатӥз.

Гудырикошконлэн кыкетӥ ӝыныяз со 20 пол боевой лобанъёсы потаз но военной грузэн но немец солдат-офицерен тырмытэм 19 автомашинаез пушкытӥз. 24-тӥ гудырикошконэ, огзэ заданиез быдэстыку, эшезлэн самолётаз тушмон снаряд вуиз. Пряженниковлэн прикрытиез улсын лётчик Алфёров сӧриськем машиназэ аслаз аэродромозяз вуттыны быгатӥз.

1-тӥ шуркынмонэ, куать самолётъёсын огазеяськыса, Липовый Лог гурт пала интыяськем тушмон техникаез пушкытыны потаз. Цель доры матэктыкузы, асьме самолётъёс шоры зенитной артиллерия ыбылыны кутскиз. Пряженников соку ик тушмонлэсь ыбылон точкаоссэ синйылтӥз. Валтӥсь группалэсь люкиськыса, меӵак тушмонлэн зенитной батареяез пала лобиз но, шонерак ыбылыса но реактивной снарядъёс куяса, тушмонэз дугдытӥз.

1944-тӥ арын 20-тӥ толсуре, контратакае ӝутскыны дасяськыса, немец Надошани гурт котыре трос техниказэ но солдат-офицеръёссэ интыяз. Синтэм-пельтэм пелляськыку, быдэн куать ИЛ-2 самолётъёсын кык группа сое пушкытыны лобиз. Пряженниковлы, зенитной артиллерилэн пумит ыбылонэз шоры учкытэк, тушмонлэсь техниказэ но луло кужымзэ быдтыны приказ сётэмын вал. Группа, котретэ кариськыса, 18 минут ӵоже вить полскын тушмонлэсь каръяськем интызэ пушкытъяз. Штурмовикъёслэн юрттэмзы улсын, асьме музъемвыл войскоос соку ик тушмон рубежез киултыны быгатӥзы.

Мукет нуналаз Пряженников мукет ИЛ-2-ен парен Ясберень гурт палась тушмонлы шуккет сётыны лобиз. Асьме самолётъёс вылэ 12 «фокк-вульфъёс» ожалскизы. Кужымзыя огкадь луисьтэм ожын Пряженников витьсэ атакаез пазьгыны быгатӥз. Воздушной стрелокъёслэн патронъёссы бырем бере, Пряженниковлэн но самолётэз пушкытэмын вал. Фронт линиез потэм бере, музъем вылысен, немец снаряд вуыса, сӧриськем самолёт ӝуаны кутскиз. Пряженников но солэн стрелокез мырдэмен лулоесь кылизы но асьмелэнъёс пала вуизы.

Пряженниковез эскадрильялы командире юнматэм бере, солэн пилотъёсыз нокыӵе ыштонъёстэк 1100 пол боевой лобанъёсы потазы.

Ачиз 180 пол лобаз. Тушмонлэсь 123 автомашиназэ, 27 танксэ, 6 артиллерийской но зенитной батареяоссэ, 40 тыро повозказэ, горючийен 3 цистерназэ, боеприпасъёсын 8 магазейзэ пушкытӥз. Омыр ожын одӥг «Ju-87» бомбардировщикез быдтӥз.

1945-тӥ арын 19-тӥ оштолэзе Чехословакиын Крженовице гурт котырын огзэ боевой заданизэ быдэстыкуз, Пряженниковлэн самолётэз зенитной артиллериен быдэсак пушкытэмын вал.

СССР-ысь Вылӥ Кенешлэн Президиумезлэн 1946-тӥ арын 15-тӥ куартолэзе гожтэм Косэтэзъя гвардилэн старшой лейтенантэзлы А. П. Пряженниковлы кулэмез бере Совето Союзлэн Героез дано ним сётэмын.

Данъетъёсыз

• «Зарни Кизили» медаль (1946-тӥ арын 15-тӥ куартолэзе, кулэмез бере);
• Ленин орден;
• Куинь Горд Знамялэн орденэз;
• Александа Невскийлэн орденэз;
• Атыкай ожлэн 1-тӥ степенё орденэз;
• медальёсыз.

Буре ваён

• А. П. Пряженниковлэн нимыз Ижкарын Ялан ӝуась тыл дорысь мемориал стела вылын гожтэмын.
• Глазкарын одӥгезлы ульчалы Геройлэн нимыз сётэмын.
• Глазысь Педагогикая кун институтын буре ваён пул юнматэмын.
• Глазкарын «Аллея славы» мемориал комплексын Пряженниковлэн бюстэз пуктэмын. Геройлэн нимыз гожтэмын Свободы нимо площадьысь буре ваён из вылын.
• Понино черкогуртын школа азьын Геройлэн бюстэз пуктэмын. Школаын солы сӥзем музей кылдытэмын.

Валэктонъёс

Чӧлсконъёс