Демидов, Александр Макарович

Википедиысь материал
Александр Макарович Демидов
437.jpg
Быдэс нимыз Александр Макарович Демидов
Вордӥськем нуналыз 3-тӥ куартолэзе 1933(1933-05-03)
Вордӥськем интыез
Кулон нуналыз 27-тӥ тулыспалэ 1996(1996-02-27) (62 арес)
Кулэм интыез
Кун
Ужудысэз строитель

Алекса́ндр Мака́рович Деми́дов (1933 — 1996) — лэсьтӥськись, Главспецстройлэн 17 номеро трестэзлэн азьвыл кивалтӥсез, Удмуртиысь лэсьтӥськисьёслэн огазеяськонзылэн правлениезлэн нырысетӥ тӧроез. Генерал-майор. Россия Федерациысь дано лэсьтӥськись, СССР-ысь Министръёслэн Кенешсылэн премиезлэн лауреатэз, Ужъя Горд Знамя но «Знак Почёта» орденъёслэн кавалерзы.

Улон сюресэз

Вордӥськиз 1933-тӥ арын 3-тӥ куартолэзе Украин ССР-ысь Днепропетровск улосысь Каменское карын. Атаез, Макар Власович, бакча сиёнэн базаен кивалтӥз; куинетӥзэ кышнояськемын вал. Кузпалэныз Ольга Андреевнаен, юртъер котырез чакласен, будэтӥзы Александр но Алла нылпиоссэс. Атайзылэн азьвыл семьяосыз но нылпиосыз сярысь ноку ӧз вераське, соин Александр но Ольга мукет апай-агайёссы сярысь номыр ӧз тодэ[1].

Пичи дыръяз Александр Демидов аэроклубе ветлӥз. Но тазалыкез лябен лётной училищее сое ӧз кутэ. Соку со Днепропетровскысь лэсьтӥськонъя институтэ пыриз[2].

Дышетсконзэ йылпумъяса, 1959-тӥ арын Александр Демидов Днепродзержинске (Каменское карлэн выль нимыз; 2016-тӥ арысен нош ик Каменское нимаське) берытскиз. Нырысь плотник, собере каменщик, мастер но прораб луыса тыршиз. Со арын ик Совето армие басьтэмын вал. Ленинградын инженер-лейтенант званиен служить кариз. Кык ар ортчыса, лэсьтиськисьёслэн ожгар войскоосазы службазэ азьланьтиз. Ленинград улосын но Карелиын утиськон объектъёс пуктӥз. Ӝоген сое пуктӥськонъя управление валтӥсь инженере юнматӥзы[2].

1970-тӥ арын Иже выжиз[2], отын СССР-ысь Монтажъя но лэсьтӥськонъя министерство бордысь Главспецстройлэн 17 номеро лэсьтӥськон управлениезлы (бӧрысь — ФГУП УССТ № 6) кивалтӥсе пуктӥзы[3]. 17 ар ӵоже трос сюрс муртъем коллективен кивалтӥз[1]. Солэн кивалтэмез улсын Удмурт шаерын уноез бадӟым объектъёс пуктӥськизы, соос пӧлын «Ижысь автозавод», «Ижмаш»-лэн МСК-14 комплексэз но мукет[2].

1991-тӥ арын Александр Демидов пенсие потӥз, нош 1995-тӥ арын Удмуртиысь лэсьтӥськисьёслэн огазеяськонзылэн правлениезлэн нырысетӥ тӧроез луиз[4].

1996-тӥ арын 27-тӥ тулыспалэ пекляез висемлэсь кулӥз. Ватэмын Ижысь Хохряки шайвылын[1].

Данъетъёсыз

  • Россия Федерациысь дано лэсьтӥськись
  • СССР-ысь Министръёслэн Кенешсылэн премиезлэн лауреатэз
  • Ужъя Горд Знамя орден
  • «Знак Почёта» орден
  • «За во­ин­скую доб­лесть. В оз­на­мено­вание 100-ле­тия со дня рож­де­ния В. И. Ле­нина» медаль
  • «За безупречную службу в вооружённых силах СССР» медаль
  • ВДНХ-лэн медальёсыз

2020-тӥ арын, Удмуртилэн кунлык басьтэмез дырысен 100 ар тырмонлы сӥзьыса, «Деловая Репутация» улосвыл журнал «Удмуртиысь 100 адӟем карымон адямиос» рейтинг кылдытӥз, Александр Демидов «Производствоын ужасьёс» номинациын пусъемын вал[5].

А. Демидовлэсь нимзэ сётӥзы Удмуртиысь спортъя но ыбылӥськонъя «Строитель» комплекслы, кудзэ пуктонэ со пыриськиз. Дыр ортчемъя комплекс федерал значениен биатлон площадкалы пӧрмиз, отын, кылсярысь, «Ижкар винтовка» огъяросси ӵошатсконъёс ортчо[3].

Семьяез

Александр Демидов, атаез сямен, 3 пол кышнояськылӥз. Нырысетӥ кузпалыз — Рита Дмитриевна (нылдыр фамилиез — Коновалова). Соин Демидов одӥг школаын дышетскиз. Кышнояськизы институтысь 2 курсэз йылпумъямзы бере. Соослэн 2 пиоссы — Сергей но Алексей[1].

Кыкетӥ кышноез — Ва­лен­ти­на Сер­ге­ев­на (нылдыр фамилиез — Чистякова), со понна но та кузпалъяськон кыкетӥ луиз. Со Ижысь механикая заводын одӥгеныз ёзэтэн кивалтӥз. Кулӥз 1986-тӥ арын кема висемез бере[1].

Куинетӥ кышноез — Алек­сан­дра Гри­горь­ев­на Ло­гуш. Со Главспецстройысь медициная службалэн коньдон ужпумъёсъя ёзэтэныз кивалтӥз. Кузпалъяськизы Ижын 1987-тӥ арын 2-тӥ южтолэзе [1].

Валэктонъёс

  1. ↑ 1 2 3 4 5 6 Н.Д. Ук­ра­инец. Город на Иже дела его хранит... Воспоминания о генерале А.М. Демидове. — Ижевск: ИИЦ «Бон Анца», 2007. — 284 с. — ISBN 978-5-903140-07-7.
  2. ↑ 1 2 3 4 Золотой фонд республики: генерал Демидов // Деловой квадрат. — 2013. — 29 гудырикошконэ.
  3. ↑ 1 2 КаЛенДарь >> Демидов Александр Макарович [ӟуч]
  4. ↑ История создания регионального объединения работодателей "Союз Строителей Удмуртии" РОР «Союз Строителей Удмуртии».
  5. ↑ 100 выдающихся личностей Удмуртии | Деловая Репутация, Деловая Репутация (4 шуркынмонэ 2020). Эскеремын: 5 пӧсьтолэзе 2024 арын.

Литература

  • В память о генерале Демидове // Долг. — 2007. — 2 авг. — С. 4.
  • Демидов Александр Макарович // Инженеры Урала: энциклопедия. — Екатеринбург, 2000. — С. 90.
  • Кравченко С. Строитель специального назначения // Известия Удмуртской Республики. — 2013. — 30 янв. — С. 4. — (Гордость Удмуртии).
  • Украинец Н. Д. Город на Иже дела его хранит. — Ижевск, 2007. — 284 с.
«https://udm.ruwiki.ru/w/index.php?title=Демидов,_Александр_Макарович&oldid=485959»-ысь басьтэмын