Удмурт культурая центр (Уддяди)
| Удмурт культурая центр | |
|---|---|
 | |
| Юнматэм кылъёс | ӟуч, удмурт |
| Кивалтӥсьёсыз | |
| директор | Белослудцева Елена Петровна |
| Кылдэмез | |
| Кылдон дырыз | 2010[1] |
 |
|
Уддядиысь (ӟуч Карамас-Пельга) Удмурт культурая центр — удмурт калыклэн лулчеберетэныз, улон-вылонэныз, сям-йылолъёсыныз тодматскыны ӵектӥсь улосвыл ужъюрт. Удмурт Элькунысь Кияса ёросысь Уддяди гуртын интыяськемын. Центрлэн мукет нимыз — Удмурт корка.
Историез
Удмурт корка 2004-тӥ арын усьтэмын, 1870-тӥ арын пуктэм юртын интыяськиз. Туристъёсты 2010-тӥ арысен пумитало. 2011-тӥ арын Удмурт культурая центрлы пӧрмытэмын[2].
Уддяди гурт Уддяди муниципал кылдытэтэ пыре но луэ солэн администраци центрез. Удмурт корка Уддяди гурт шорын ик интыяськемын. Азьвыл со вӧзын калыкен вӧсяськон Быдӟым куала вал[3]. Уддяди язычникъёслэн гуртсы котьку лыдъяськылӥз, али но со Удмуртиысь ӧжытэз сыӵе гуртъёс пӧлы пыре. Татын улӥсьёс инмаръёссылы йыбыртъяло, курбон сёто, вӧсясько но ӝук пӧзьто Луд, Камай, Акташ вӧсяськон арамаосын[4].
«Центрмес усьтыны валтӥсь кичӧлтӥсьёс но мылкыд сётӥсьёс, бурдъясьёс гуртамы улӥсьёс, кылсярысь, пенсионеръёс луизы. Соос Уддядиын вӧсяськон инты радъяны туж куризы. Та ужпумез вырӟытон борды «Удмурт Кенеш» ассоциацилэн ёросысь ёзэныз соку кивалтӥсь Надежда Пахомова басьтӥськиз. Огъя кужымен Удмурт корка усьтэмын вал. Со дырысен милям центрамы пӧртэм пумо трос ужрадъёс ортчо».
— Елена Белослудцева, Уддядиысь Удмурт культурая центрлэн директорез[2]
Гуртоос нырысь-валысь Удмурт коркаез ӵапак тазьы ик нималлязы, сое лулчеберетъя центр чот кутыны малпамын воксё но ӧй вал, татын гуртоосын пумиськонъёс-кенешонъёс радъяны чаклаллязы. 2004-тӥ арысен уддядиос та юртын календарьысь но сям-йылолъёсысь ужрадъёсты но праздникъёсты пусйылӥзы. 2005-тӥ арын Удмурт корка Уддяди гуртлы 300 ар тырмонэз сӥё-дано пусъёнэ-радъянэ но «Юмшан» калыккуспо фестиваль ортчытонэ мыло-кыдо пыриськиз. Ӵапак соку гуртэ нырысьсэ трос туристъёс вуылӥзы, пӧлазы Россиысь улосъёсысь но, кунгож сьӧрысь но куноос вал[2].
Удмурт коркаез МБУК «Удмурт культурая центр» каремзы бере, ужъюртлэн штатэз но кылдӥз. Отын ужась ӧнерчиос удмурт йӧскалык сиён-юонъёсты пӧранъя мастер-классъёс ортчытъяны, удмуртъёслэн улон-вылонзы, лулчеберетсы сярысь вераны кутскизы. Бӧрысь соос сяме пырем праздникъёслы сценарийёс гожтӥзы-дасязы, ӵапак со радъяно ужрадъёсы туристъёс но мыло-кыдо пыриськыны мед быгатозы шуыса, чаклазы. Озьы ик быдэс Кияса ёросысь но Уддядиысь историысь учкымон чебер интыосъя турмаршрутъёсты но сценарийёсын ик герӟазы[2].
«Милям куноосмы, праздникъёсы, йылолъёсы пыриськыса, удмурт лулчеберетэн тодматско. Кылсярысь, удмурт сюанлэн инсценировкаяз шудо. Табань пыжыны дышетско, удмурт костюмъёсты мертало».
— Е. П. Белослудцева[2]
Инфраструктураез
Удмурт культурая центрын вань:
- этно-кафе;
- вашкала удмурт сямъя лэсьтэм но чеберъям 2 кунокуа корка;
- XVIII даурлэн шораз лэсьтэм пуктӥськемъёс — юрт, кенос, амбар;
- ӟуч мунчо но сьӧд мунчо;
- гужем пукон инты;
- удмуртъёслэн вӧсяськон Быдӟым куалазы;
- киужлы усточи, ковёръёс пужыятӥсь, лымшор удмуртъёслэсь туала пужыё куиськонзэс кылдытӥсь Зоя Алексеевна Мазитовалы сӥзем музей[4][2].
Туризм
Арлы быдэ Удмурт центр 10 сюрслэсь трос куноосты пумита. Соос пӧлын Удмуртиысь но Россилэн улосвылъёсысьтыз улӥсьёс гинэ ӧвӧл — пӧртэм кунъёсысь туристъёс но вуыло: Эстониысь, Венгриысь, Финляндиысь, Австралиысь, Нигериысь, Китайысь, Япониысь но мукет. Центрын куное огназы лыктэмъёсты но, бадӟым группаослы но тунсыко программаос дасямын[2].
Со сяна, центрлэн инъетаз азьвыл сямен ик уддяди пумиськонъёс, йылолъёс но праздникъёс ортчыло, озьы ик ёроскуспо лагерь сменаос но ёросъёсысь егитъёслэн ужрадъёссы, футурист суредасьёслэн калыккуспо этно-футуристической симпозиумъёссы, нылкышноос пӧлын ленд-артъя «КЫЗ» элькун этнофестивальёс но мукет ужрадъёс радъяськыло[4][5].
Турмаршрутъёс
Удмуртиысь Кияса ёросын пӧртэм 7 турмаршрутъёс кылдытэмын. Соос пӧлысь куатез быдэсыз сямен яке ог люкетэз Уддяди пыр пото[2].
Нырысетӥез тунсыко маршрут — со «Куинь сюан гуръёс», адямилэн улоназ пумиськись куинь сюанлы сӥземын: нуны сюан, сюан но сопал дуннее келян. Та ужрадын куноосты удмурт калыклэн лулчеберетэныз но дунне шоры учконэныз тодмато.
Озьы ик удмурт калыклэн лулчеберетэныз, историеныз, йылолъёсыныз тодматскыны календарь праздникъёслы сӥзем туръёс юрттозы: Виль (выль емышлы сӥзем праздник), Гужем юон (турнаны кутскон азьын гужем праздник), Акашка (Паска), Трочинь (Троица), Вӧйдыр (Масленица), Пӧртмаськон (Колядки); семья праздникъёслы но: сюан, армие келян.
«Азвесь ошмесъёс» экологи турмаршрутэ вуэмъёс Уддядиысь Сарали нимо ошмес доры вуыло, ческыт но чылкыт вузэ юо.
«Юмшан» шулдыръяськон радъямын вал кунгож сьӧрысь туристъёсты удмурт сям-йылолъёсын, куронъёсын тодматон вылысь. Быдэс гуртэтӥ ортчись Карамас пи но Пельга ныл сярысь мадёсъя гожтэм квест тужгес но вӧлмемын нылпиос но быдэ вуымтэос пӧлын[6][2].
Вормонъёсыз
2022-тӥ арын Уддядиысь Удмурт культурая центр Россиысь устоосыз музейёс пӧлы шедиз, со путешествиосъя «Туту» сервислэн «Медиаразведка» ӵектосэзъя тревел-блогеръёсын но журналистъёсын кылдытэмын. Уддядиысь центр 10 балл пӧлысь 9,7 балл люказ[7].
Озьы ик учке
- Бырем гуртъёслы сӥзем Эгра ёросысь Сеп гуртысь музей
- Яг Бабалэн выжыкыл резиденциез
- Эгра ёросысь Бачкей гуртысь этапной пункт (музей)
Валэктонъёс
- ↑ https://biblio-kiyas.udm.muzkult.ru/media/2018/09/16/1216583384/Dostoprimechatelnosti.PDF
- ↑ 1 2 3 4 5 6 7 8 9 Уддяди гуртысь Удмурт корка кунооссэ 6 маршруттӥ ортчытэ [удм.] Удмурт дунне.
- ↑ Центр удмуртской культуры д. Карамас-Пельга Культура.РФ.
- ↑ 1 2 3 Белослудцева Е. П. Карамас-Пельга Живое наследие.
- ↑ Элина Кумачёва Выжы ке зол, вайёс юнэсь [удм.] Удмурт дунне.
- ↑ Карамас-Пельга Экологический портал Удмуртской Республики.
- ↑ Музеи Удмуртии попали в ТОП лучших музеев России Знамя Октября.