Яг Бабалэн выжыкыл резиденциез
| Чеберлыко инты | ||
| Яг Бабалэн выжыкыл резиденциез | ||
|---|---|---|
 | ||
| 56°07′03″ с. ш. 52°00′18″ в. д.GЯO | ||
| Кун |
 Россия |
|
| Интыяськемез | Котловка, Грак ёрос, Удмуртия | |
| Кылдытэмын | 2013-тӥ арын | |
| Сайтэз | babayaga.udm.muzkult.ru | |
|
|
||
 |
||
Яг Бабалэн выжыкыл резиденциез — Удмуртиысь Грак ёросысь Котловка гуртысь туризмъя объект. 2013-тӥ арын усьтэмын.
Историез
Художествоя но этнографияя «Яг Бабалэн выжыкыл резиденциез» комплекс лулчеберет удысысь муниципал ужъюрт луэ, 2013-тӥ арын 4-тӥ инвожое Удмуртиысь Грак ёросысь Котловка гуртын ужаны кутскиз. Комплекс азьвыл культурая юртлэн инъетаз усьтэмын, со вакытэ татын ӟуч культурая «Оберег» центр интыяськылӥз[1][2]. Комплексэз сӥё-дано усьтон ужрад 2013-тӥ арын 12-тӥ оштолэзе ортчиз, ужрадэз Инсьӧртодослэн нуналызлы тупатӥзы, инме ӝутскем нылкышноос пӧлын ӵужонэн лобась Яг Баба нырысетӥез вал шуыса[3][4][5].
Котловка сьӧрын ик пужымо яг будэ. Ӵапак таин сэрен ик котыртӥз бызись шурлы но Яг ним понӥзы[6]. Котловкалэн паймымон интые пуксеменыз но та палась гурт пумын улӥсь туно-пеллё сярысь мадёсъёс вӧлмемен ик «Яг Баба доры куное» турмаршрут усьтыны мылкыд каризы[1].
Малпанэз улонэ пыӵатон понна Котловка пуме кык юрт ӝутӥзы — Нюлэс Кузёлы но Яг Бабалы. Кыкетӥез, ӟуч калык выжыкылъёсын сямен ик, курег пыдъёс вылын ас котыраз берга, «куноослы азьпалласянь, нош сиклы мышласянь султэ»[7]. Резиденцилэсь котырзэ ӟуч выжыкылъёс вылэ пыкиськыса лэсьтӥзы. Куноосты пумитаны сцена пуктӥзы, шутэтскыны пукон инты ӝутӥзы[8].
Сӥё-дано ужрадлы комплексэ пырон азе пулэсь синпелетъёс пуктӥзы но Яг Бабаез шудӥсь муртлы кастинг ортчытӥзы. Озьы резиденциын выжыкылысь геройёс вить кузя луизы. Грак ёросын угось трос выжы калыкъёс уло, валче удмуртъёс, ӟучъёс, поръёс, чувашъёс но вӧсям бигеръёс тупало. Вить вегин геройёс пӧлын валтӥсез ӟучез луэ, нош мукетъёсыз солы экскурсиос но шудонъёс радъяны юртто[6].
Туно-пеллё песянай сярысь мадёс
Котловкаын улӥсьёс вералляло вал, гуртсылы матысь нюлэскын, Яг шур дурын, туно-пеллё улӥз шуыса. Со бурмытыны но, висьытыны но быгатэ вылэм. Мадёсъёсъя одӥг пол веднаськемез бере улоно коркаезлэн курег пыдъёсыз кылдӥллям. Куддыръя пересь та курег пыдо юртэныз ик ветлылӥз, куддыръя ӵужон вылын лобалляз. Калык соин пумиськыны кышкалляз, коркаезлэсь кыдёке палэнтӥ кошкыны тыршылӥз. Пересь анайлэсь нимзэ нокин ӧз тоды, ваньзы сое Яг Баба нималлязы, мукет сямен — Яг шур дурын улӥсь баба[1][5][4].
Программаез
Яг Баба выжыкыл резиденцилэн валтӥсь ужез — туризмъя экскурсиосты радъян. Котьку сямен куноосты кык люкетлэсь чаклам программа возьма. Арлэн котькуд вакытаз со аспӧртэм луэ[9].
Программае квест но мастер-классъёс пыро. Маршрутэз ортчыкузы, куноос Ваньзэ тодӥсь песятаен, разбойникъёсын, Нюлэсмуртэн, Яг Бабаен лушкам Василиса Прекраснаяен но сое утчась Иванушкаен пумисько. Куноос Яг Баба ки улэ сюрем нылмуртэ утьыны юртто, пӧртэм могӟетъёс, шуг-секытъёс пыр пото. Программалэн кыкетӥ люкетаз туристъёс кырӟало, хороводэ султо, шудо, мадиськонъёсты тодыны выро. Озьы ик соос понна бинялтэм мунё лэсьтонъя «Чиньы вылысь лудкеч» нимо мастер-класс ортчыто[3][10]. Со сяна, куноосты нюлэскысь аспӧртэм барабанъёслэн коллекциенызы тодмато: соосты учкыны гинэ ӧвӧл, кылзыны но луэ[3].
Арысь вакытъёсын герӟаськем ужрадъёсты программае пыртэм сяна, комплексысь ӧнерчиос мукет ужрадъёсты но ортчыто: Вӧйдыр, Тунаськон, Пельменьфест но мукет[11].
Резиденциын озьы ик валэн ворттылыны, пукыӵысь но арбалетысь ыбылӥськыны луонлык сётӥське[12].
Инфраструктураез
Котловкаысь туризмъя комплексэ, Яг Бабалэн резиденциез сяна, кунокуа но пыре[13], эшшо пужыятыса вӧлэм, пӧйшурасьёслэн трофейёсынызы но усточиослэн киосынызы чеберъям кафе ужа на[3].
Данъетъёсыз
- Россиысь «Диво России» туризмъя видеопрезентациослы сӥзем фестивальын «Калыклы тупамон но нылпи туризм» номинациын 2-тӥ инты (2024)[14];
- Иранын ортчем калыккуспо «Диво Евразии» туризмъя видеоослы, туспуктэмъёслы но анимациослы сӥзем фестивальын «Калыклы тупамон но нылпи туризм» номинациын 1-тӥ инты.
Яг Бабаез сяна, резиденциын мукет выжыкыл геройёсты но пумитаны луэ
Куноосты пумитан театр постановка
Яг Баба дорын куноын
Яг Бабен ӵош Вӧйдырез келян
Резиденицысь ӧнерчиос «Дуннеысь пельняньлэн нуналыз» акция борды итӥськизы
Гужем тунаськон
Озьы ик учке
- Удмурт культурая центр (Уддяди);
- Бырем гуртъёслы сӥзем Эгра ёросысь Сеп гуртысь музей;
- Эгра ёросысь Бачкей гуртысь этапной пункт (музей).
Валэктонъёс
- ↑ 1 2 3 Общая информация МАУК «Сказочная резиденция Бабы Яги».
- ↑ Марина Боярко Удмуртская Баба-Яга отмечает день рождения в День космонавтики Известия Удмуртской Республики.
- ↑ 1 2 3 4 Резиденция Бабы Яги: сказка стала былью Известия Удмуртской Республики.
- ↑ 1 2 В гостях у Бабы Яги: сказочная резиденция в селе Котловка в России moscow-airports.com.
- ↑ 1 2 Сказочная резиденция Бабы-Яги АНО «Центр развития туризма Удмуртской Республики».
- ↑ 1 2 Резиденция Бабы-Яги в Удмуртии ИА «Сусанин».
- ↑ Галина Семёнова Тол бабай юрттоз, Яг бабуш уз кушты Удмурт дунне.
- ↑ Художественно-этнографический комплекс «Сказочная резиденция Бабы-яги» Культура.рф.
- ↑ «Сказочная резиденция Бабы Яги» из Граховского района победила в международном туристском фестивале «Диво Евразии» Официальный сайт Агентства по туризму Удмуртской Республики.
- ↑ Резиденция Бабы-Яги в Удмуртии Ижевск и Удмуртия.
- ↑ Галерея МАУК «Сказочная резиденция Бабы Яги».
- ↑ Сказочная резиденция Бабы-яги tmatic.travel.
- ↑ Ксения Аксенова, Екатерина Опарина Пора гулять: этнокомплексы, усадьбы и заповедники Удмуртии, которые можно посетить в выходные КП-Ижевск.
- ↑ «Сказочная резиденция Бабы Яги» из деревни Котловка Граховского района Удмуртии вошла в число победителей Всероссийского фестиваля туристских видеопрезентаций «Диво России» Совет Федерации Федерального Собрания РФ.