Чекерил
| Чекерил | |
|---|---|
 Чекерил котыр сюрес вылысен | |
| Тужгес ӝужыт азьыз | |
| Оглом ӝуждалаез | 201,4 м |
| Интыяськемез | |
| 56°47′35″ с. ш. 53°03′20″ в. д.GЯO | |
| Кун | |
| РФ субъектъёс | Удмуртия |
 Медиафайлъёс РувикиМедиа пушкын | |
Чекери́л — Удмуртиысь гурезь (вырйыл) но со выжые интыяськем спорт курорт.
Нимыз
«Чекерил» интыним кык люкетлэсь пӧрмемын: «чекер» + «ил» (гурезь йыл), «чекер» люкетэз Удмуртилэн топонимикаяз ӵем кутӥськись «четкер» апеллятивен герӟало, со возьматыны быгатэ гурезь йылъёсы, вырйылъёсы, меӵ ярдуръёсы интыяськем вашкала карез (карйыл)[1].
Интыяськемез
Чекерил Ижкарлэн шорызлэсь лымшорен шундыпуксён вискы 12 иськеме интыяськемын, оглюкетэз Ижкарлэн Ленин ёросаз пыре, мукетыз — Дэри ёросэ. Гурезен артэ Чумойка шур бызе, отын ик пичияк тымет ӵыпемын. Ог иськемлы палэнэтӥ Ижкарлэн котыр сюресэз ортче.
Чекерил — Дэри ёрослэн но Ижкарлэн тужгес ӝужыт вадескыз лыдъяське. Азьвыл солэн ӝуждалаез 201,4 м вал. Отчы спорт курорт пуктэм бере, гурезез кӧня ке метрлы ӝутӥзы. Йылыз но выжыез вискын меӵ интыез 100 метрлэсь ятыр луэ.
Спорт комплекс
90-тӥ арозь татын Ижмашлэн вылӥ кивалтэтэзлэн спорт базаез интыяськемын вал. 2002-тӥ арын 24-тӥ толсуре со интые туала куронъёслы тупась спорт комплекс усьтӥськиз[2]. 2003-тӥ арын татын тупатэмын Удмуртиын нырысетӥез бугельной подъёмник. 2004-тӥ арын толсуре Чекерилын нырысьсэ радъямын вал горнолыжной инструкторъёслэн Огъяросси школазы. 2002-тӥ—2005-тӥ аръёсы комплекс выльдӥськиз, соин валче, тол вакытэ нискылан но Удмуртиын спортэз азинтон луонлыкъёслэн ӟечлыксы будӥз.
Толалтэ спорт комплексын пӧртэм секытлыкен но кузьдалаен 7 горнолыжной трасса ужа[3], ваньмаз гурезе тубон подъёмникъёс тупатэмын. Ӝытазе вань сюресъёс югдытӥсько. Озьы ик вань сноуборд парк, каток, куасэн бызьылон трасса, тюбинген но салазкиен нискылан сюресъёс. Трассаез искусственной лымыен тырмытон толсурысен оштолэзёзь куасэн нискылан луонлык кылдытэ[4]. Гужем мылкыд карисьёслы кылдытэмын пляж (татын вейкбордэн уяны луэ), спорт площадкаос но теннис кортъёс ужало, маунтинбайклы чаклам трасса радъямын[5].
Татын ужа «Горнолыжной спортъя но сноубордъя олимпи резерв дасясь спорт школа», таӵе инлыкен быдэс Элькунын одӥг гинэ луись нылпи спорт школа[6]. Арлы быдэ татын тулыспал толэзе Удмурт Элькунлэн Тӧроезлэн кубокез понна горнолыжной спортъя ӵошатсконъёс ортчыло. Пӧртэм арлыдо спортсменъёс куспын сноубордъя но параллельной слаломъя ӵошатсконъёс радъясько[7]. Озьы ик юри шутэтскон понна, гостиницаез, ресторанэз но мунчоез вань.
Мерлыко транспорт
Чекерилозь вуыны луэ 53-тӥ номеро маршрут таксиен. Со нуналаз кӧня ке пол ветлэ.
Валэктонъёс
- ↑ Атаманов М. Г. Язык земли удмуртской = Удмурт музъемлэн аснимъёсыз: Волгаен Урал ёросвылъёсысь интынимъёслэсь пуштроссэс эскерись кыллюкам : Историко-этимологический словарь топонимов Волго-Уральского региона / рецензенты Н. В. Кондратьева, И. В. Тараканов. — Ижевск : Ижевская республиканская типография, 2015. — С. 841—842. — 976 с. — 90 экз. — ISBN 978-5-89806-136-4.
- ↑ Геокэшинг.Чекерил
- ↑ Путешествуй по Удмуртии. Спортивный комплекс «Чекерил»
- ↑ Горнолыжки. Чекерил
- ↑ Больше чем путешествие. Спортивный комплекс «Чекерил»
- ↑ АУ УР СК "Чекерил"
- ↑ Федерация сноуборда в России. Архив по метке: чекерил
Чӧлсконъёс
- Сайт спортивного курорта [ӟуч]