Можга карысь историяя но шаертодонъя музей

РФ Лулчеберетъя министерство

Министерство культуры Российской Федерации

Можга карысь историяя но шаертодонъя музей
Кылдытэмын	1935-тӥ арын
Адресэз	Россия, Удмуртия, Можга, Устюжанинлэн ульчаез, 11-тӥ юрт
Кивалтӥсез	Семакина Альбина Прокопьевна
Сайтэз	mozhga-muzeum.udm.muzkult.ru

Можга карысь историяя но шаертодонъя музей (ӟуч: Историко-краеведческий музей города Можги) — Удмурт Элькунысь Можга карысь музей. Можгаысь Устюжанинлэн ульчаысьтыз 11-тӥ юртын интыяськемын.

Историез

Карысь шаертодонъя музей XX даурлэн 30-тӥ аръёсаз усьтэмын вал, отын историяя, археологияя, палеонтологияя, этнографияя люкетъёсыз ужазы. Музейлэн фондъёсъя архиваз историысь «Социалистической Можга» материал утиське, сое 1935-тӥ арын директорез Зуев Валентин Иванович люказ. 1937-тӥ арын музеен кивалтӥсь Яков Константинович Кондратьев луиз.

1946-тӥ арысен 1979-тӥ арозь музей ужамысь дугдылӥз.

1975-тӥ арын Можгалы 50 ар тырмон котырын Калык депутатъёслэн кар кенешсылэн исполкомез городын шаертодонъя музей усьтон сярысь решение кутӥз. 1979-тӥ арын 25-тӥ коньывуонэ карын музей усьтӥськиз, со Удмурт Элькунысь «Удмурт калык творчество» шаертодонъя музейлэн ёзэз луиз. Музейлэн валтӥсь темаез «XIX даур пумысь—XX даур кутсконысь удмурт калыклэн сяме пырем крестьян улон-вылонэз но искусствоез» экспозиция луиз.

1979-тӥ арысен 1984-тӥ арозь музеен Лев Афанасьевич Смирнов кивалтӥз. Музее директор луыса Надежда Евграфовна Лушникова вуэмен, Можга карлэн но Можга ёрослэн историезъя материалъёсты люкан-радъян борды басьтӥськизы. Ужамзылэн емышез «Можга карлы — 60 ар» экспозициез усьтон луиз. Музей бордын «Шаерчи» клуб кылдытэмын вал, отчы карысь но ёросысь арлыдоос но шаерчиос пыризы. Тӧрое Пётр Дмитриевич Коршунов быръемын вал.

1989-тӥ арысен 2006-тӥ арозь директор луыса Галина Петровна Блинова тыршиз. Шаерлэн историезъя тема удмурт калык творчествоя темаосты вӧлмытонэн но эскеронэн ӵош отӥяз но азинскиз.

Можгаын музей ужез азинтонэ дунъяны луонтэм кужымзэс понӥзы мыло-кыдо общественникъёс: Горбунов Борис Павлович, Максютин Михаил Алексеевич, Тарасова Гута Яковлевна но мукетъёсыз.

1930-тӥ аръёсы татын ӧнерчи луыса тыршиз нимо-дано дышетӥсь Вера Толстая.

1999-тӥ арын шаертодонъя музейлы «Дубитель» заводлэсь азьвыл управлениезлэсь юртсэ висъязы.

Та дыре музеен Альбина Прокопьевна Семакина кивалтэ. Туала музей — со наукая но историяя пӧртэм пумо ужрадъёсты, конференциосты ортчытъян инты. Шаертодонъя музей этнографияя но фольклор шулдыръяськонъёсты ортчытон центр луиз, гурт но кар калыкез огазеяны юрттэ, пӧртэм выжы калыкъёслэсь лулчеберетсэс, йылолъёссэс вӧлмытэ. Будӥсь поколенилы патриот мылкыд пыӵатонъя бадӟым уж нуэ. Музейын тодон-валанзэс муромытыны вань улӥсьёс быгато. Валтӥсь ужпум — шаерлэсь лулчеберетысь узырлыксэ утён. Историяя но шаертодонъя музей — со Удмуртилэн лымшор палысьтыз методикая но лулчеберетъя центр.

Валэктонъёс

Чӧлсконъёс

• Историко-краеведческий музей [ӟуч]

• Муниципальное бюджетное учрежение культуры «Историко-краеведческий музей» города Можги [ӟуч]