Удмурт Элькунысь Профсоюз Федерацилэн нуналыз
| Удмурт Элькунысь Профсоюз Федерацилэн нуналыз | |
|---|---|
 | |
| Типез | Удмуртиын пусйиськись праздник |
| Пусъё |
 Удмуртия16-тӥ шуркынмонэ |
| Дырыз | 1 (16) шуркынмонэ |
| Герӟаськемын | Профсоюзъёслэсь Удмурт областной Советсэс кылдытон нуналэн |
Удмурт Элькунысь Профсоюз Федерацилэн нуналыз (ӟуч: День Федерации профсоюзов Удмуртской Республики) ― Удмурт Элькунын пусйиськись праздник. Юнматэмын Удмуртиысь азьмуртлэн Александр Волковлэн 2012-тӥ арын 26-тӥ коньывуонэ гожтэм Косэтэныз[1]. Пусйиське арлы быдэ 16-тӥ шуркынмонэ.
Историез
Удмуртиын нырысьсэ профсоюзъёс кылдытэмын вал 1907-тӥ арын. Со дыре кылдӥз Ижысь пыӵал тӥрлык поттон но корт кисьтон заводысь ужасьёслэн ӧнерлыко огазеяськонзы — Металлистъёслэн союззы. Металлургъёслэн мукетыз бадӟым огазеяськонзы Воткинскын кылдӥз. Озьы ке но, 1914-тӥ арын, заводъёсын ужасьёслэн лек пумитъяськонъёссы бере, профсоюз огазеяськонъёс быдтэмын вал.
Выльысь кылдылыны кутскизы революци бере. Профсоюз комитетъёс улсын эшъяськон дисциплинарной судъёс кылдытэмын вал. Удмурт автономной область кылдэмен валче, улосвылысь профсоюзъёсты одӥг валтӥсь союзкуспо ёзэсэ огазеязы. Партилэн обкомезлэн бюроезлэн решениезъя 1921-тӥ арын куарусёнэ профсоюзъёслэн областной бюрозы кылдытэмын вал, нош 1921-тӥ арын 15-тӥ южтолэзьысен со профсоюзъёслэсь областной съездзэс люканъя оргбюро шуыса нимаськыны кутскиз. Областной профсоюз огазеяськон азе калык хозяйствоез выльдон, социалистической экономикаез но культураез кылдытон ужпумъёс пуктэмын вал. 1937-тӥ арын Профсоюзъёслэн Всесоюзной Центральной Советсылэн VI Пленумезлэн Пуктэтэзъя профсоюз кенешъёс быдэс кунын быдтэмын вал.
Профсоюзъёслэн Удмурт областной Советсы (облсовпроф) выльысь кылдытэмын УАССР-ысь профсоюзъёслэн I союзкуспо конференциязы 1948-тӥ арын 16-тӥ инвожое. Со дырысен та нунал Удмуртиын туала профсоюзъёслэн кылдэм нуналэнызы лыдъяське.
Приволжск Федерал округын Удмуртия куинетӥез улос, кудаз профсоюз ёзчиослэн асьсэ праздник нуналзы вань[2]. 2020-тӥ арын Кун Кенешысь депутатъёс Удмурт Элькунысь Профсоюз федерацилэсь нуналзэ «Удмурт Элькунысь праздникъёс но буре ваён нуналъёс сярысь» Катэн юнматӥзы[3].
2023-тӥ арын Удмуртиысь Профсоюз федераци 75 ар тырмонзэ пусйиз[4].
Кулэлыкез
Туала дыре Удмурт Элькунысь Профсоюз федераци 12 кун удыс профсоюз организациосты, 11 первичной профсоюз организациосты огазея. 2023-тӥ арын басьтэм тодэтъёсъя, отын 124,3 сюрс ёзчи лыдъяське.
Удмурт Элькунысь Профсоюз федерацилэн кичӧлтэмезъя таӵе катъёс кутэмын: «Удмурт Элькунысь мерлыко вачеуж сярысь», «Удмурт Элькунын прожиточной минимум сярысь», «Удмурт Элькунысь потребительской корзина сярысь», «Удмурт Элькунысь коньдэт сярысь»[5] но мукет. Профсоюз Федерацилэн тӧроезлэн, Сергей Шерстобитлэн верамезъя, профсоюз огазеяськон ужась калыклэсь эрикрадъёссэс но тунсыкъёссэс уте. Профсоюз огазеяськонъёс мер но ужан удысын нуналлы быдэ тужгес шуг ужпумъёсты сэртто-пертчо: коллективной огкылъёс но тупанкылъёс дасяло, пӧртэм ужрадъёс радъяло, юридик юрттэт сёто но каткылдытон кичӧлтонъёсты ӝуто, ужез утёнъя ужпумъёсты сэртто-пертчо но ужасьёслэн тазалыксы сярысь сюлмасько.
2025-тӥ арын 31-тӥ коньывуонэ Удмурт Элькунысь профсоюзъёслэн федерацизы куинетӥзэ ортчытӥз «ПРОФРИНГ-2025» интеллектуальной турнир. Ужрадэ 28 огинъёс пыриськизы, соос пӧлысь куинез вормись луиз[6].
Валэктонъёс
- ↑ Указ Президента УР от 26 октября 2012 г. N 199 «О Дне Федерации профсоюзов Удмуртской Республики»
- ↑ День Федерации профсоюзов Удмуртской Республики
- ↑ Закон Удмуртской Республики от 14 декабря 2020 года N 81-РЗ О праздничных днях и памятных датах Удмуртской Республики (с изменениями на 11 октября 2023 года)
- ↑ Федерация профсоюзов Удмуртской Республики отметила 75-летие
- ↑ Федерация профсоюзов Удмуртской Республики
- ↑ Интеллектуальная Битва Умов: итоги III тура "ПРОФРИНГ-2025" [ӟуч] ВК. Профсоюзы Удмуртии. Эскеремын 6-11-2025 арын
