Ижысь пыӵалтӥрлык поттон заводлэн ӵыпетэз

Википедиысь материал
Гидротехнической сооружение
Ижысь пыӵалтӥрлык поттон заводлэн ӵыпетэз
Damb of Izhevsk Arms Plant.jpg
56°50′40″ с. ш. 53°11′46″ в. д.GЯO
Кун РоссияFlag of Russia.svg Россия
Интыяськемез Ижкарысь Дерябинлэн проездэз[1]
Проектлэн авторез Москвин А. С. — нырысетӥ проект[2][3]; Дерябин А. Ф., Дудин С. Е. — выльдонлы проект[4]
Лэсьтӥсез Москвин А. С.[5]
Инъясез Москвин, Алексей Степанович
Кылдытэмын 1759
Юртэз пуктэмын 1760-тӥ арын 10-тӥ оштолэзе[1] — 1763-тӥ арын инвожое
Валтӥсь датаос
  • 1763 арын — пуктӥськонэз йылпумъян
  • 1816—1824 аръёсы — ӵыпетэз выльдон но паськытатон
  • 1954—1957 аръёсы — ву кошконъёссэ выльдон
  • 1963—1966 аръёсы — ву кошконъёссэ выльдон
  • 1983—1984 аръёсы — ӵыпетэз выльдон но паськытатон
Инлыкез Логотип конкурса «Вики любит памятники» ОКН № 1810003002№ 1810003002
ИжевскВоткинскГлазовМожгаСарапулАлнашский районБалезинский районВавожский районВоткинский районГлазовский районГраховский районДебёсский районЗавьяловский районИгринский районКамбарский районКаракулинский районКезский районКизнерский районКиясовский районКрасногорский районМалопургинский районМожгинский районСарапульский районСелтинский районСюмсинский районУвинский районШарканский районЮкаменский районЯкшур-Бодьинский районЯрский районИжысь пыӵалтӥрлык поттон заводлэн ӵыпетэз (Удмуртия)
Описание изображения
Точка
Логотип РУВИКИ.Медиа Медиафайлъёс РувикиМедиа пушкын

Ижысь пыӵалтӥрлык поттон заводлэн ӵыпетэз (Завод ӵыпет, Иж тыметлэн ӵыпетэз) — XVIII даурысь гидротехнической сооружение, Ижысь пыӵалтӥрлык поттон заводэз ужатон вылысь, Иж шурез тымыса, лэсьтэмын. Уралысь нырысетӥосыз пӧлысь огез гидротехнической сооружение луэ[3]. Ӵыпет Ижкарын интыяськемын. Иж шурез шундыӝужан палысеныз шундыпуксён палозяз котыртэ, таин валче шурез тыме. Ӵыпетлэн тужгес ӝужыт вырйылтӥз Дерябинлэн проездэз ортче. Ӵыпет выжыын Ижысь пыӵалтӥрлык поттон заводлэн Валтӥсь корпусэз сылэ. Ӵыпетлы нырысетӥ проектсэ гожтӥсь но сое пуктӥсь Москвин А. С.[1] луэ. 1995-тӥ арысен ӵыпет историысь но лулчеберетысь федерал инлыкен синпелет луэ[3].

Историез

XVIII даур

1760-тӥ арын тулысысен кутскыса, ӵыпетэз ожтӥрлык заводлэн валтӥсь корпусъёсыныз огдыре ӝутӥзы (али со Ижсталь но «Калашников» нимо концерн). Заводлэсь механизмъёссэ ужатон вылысь Иж шурез 1760-тӥ арын 10-тӥ оштолэзе тымизы. Ӵапак та нуналэз Иж заводлэн (Ижкарлэн) кылдэменыз герӟало[4]. Ӵыпет но пыӵалтӥрлык поттон заводлэн Валтӥсь корпусэз Ижысь тужгес вашкала пуктэм сооружениос луо. Отӥяз пролкаос ӵапак ӵыпетлэн осез валлин лэсьтӥськизы, нош ульчаос — солы мыд-мыд ласянь пуксизы[6][7].

Иж завод борды юнматэм артысь гуртъёсысь кӧня ке сю крепостной крестьянъёс азьвыл ик пусъем гожъёсъя 4 траншеяос гудӥзы, мурдалаез но пасьталаез сажень быдӟа луиз (2,16 метр). Ӵыпетлэсь каркассэ пужым но тыпы коръёслэсь ӝутӥзы, соосты корт юдэсъёсын, болтъёсын но паськыт кульчоосын юнматӥзы, висъёсаз горд сюй тып-тып тыризы. Ӵыпет нырысь-валысь горд сюйлэсь лэсьтэм фундамент вылэ ӝутэм музъем кесэг выллем адскылӥз. Куинь гужем ӵоже крестьянъёс Иж шур доры 13 159 кубической сажень горд сюй вуттӥзы, со 60 сюрс тонналэсь ичи уз луы. Ярдуръёссэ ог-огзы борды дэмӟись сваяослэсь юнматӥзы, медаз куашкалэ шуыса, музъем валлин коръёсын радэн-радэн котыртӥзы на[8][9]. Пуктӥськон йылпумъяськем бере ӵыпетлэн кузьдалаез 570 метр, пасьталаез 27,7 метр, ӝуждалаез 8,5 метр пӧрмиз. Кылдэм водохранилищелэн котырыз 60 иськемлэсь паськыт луиз, площадез — 20 км²[4][10][11].

Вуэз лэзьыны луонлык кылдытон вылысь ӵыпетэз одӥг интыетӥз пасяса вандӥзы, ӵапак отысен ву заводъёсысь цехъёслэн бергась колёсаосазы усьылӥз. Со сяна, эшшо одӥг интыетӥз пичигес вандӥзы на, татысен ву 1764-тӥ арын инвожое мытэм нюлэс дасянэ кошкылӥз[12]. Нош тулыс ӧръяськись тудвулы, пырон инты мед сюроз шуыса, эшшо пасьёс лэсьтылӥзы на, соосты шлюзъёс нимазы. Соосты ворсан я усьтон понна пулэсь щитъёс юнматӥзы. Ву лэзён валтӥсь интыысен, мукет сямен — ларьысен, шлюзъёс дорозь ӵыпет кузя 145 метр вал. Валтӥсь ларь тып-тып радэн тырем коръёслэсь каналлы укшалляз, пасьталаез 2,3 метр, ӝуждалаез 3,5 метр, кузьдалаез 90,8 метр вал[10].

Ӵыпетлэн улӥяз, валтӥсь ларь кузя, ог-огзылэсь 7 метр кемын куать висъетъёс пуктӥзы (дырды кузя мыд-мыд палаз быдэн куинен). Котькудаз 10 ву колёсаос юнматӥзы, соос ларьысь ву сётон вылысь пу дырдыосын герӟамын вал. Колёсалэн кужымез бордысь потылӥз кулэяськемъя ву лэзён. Колёсаез молотъёс но мех ужатӥз[10]. Нырысетӥ крич молотъёс 1763-тӥ арын пӧсьтолэзе Иж заводын ужаны кутскизы[13].

Ӵыпетэз пуктыны кутскем бере, кӧня ке ар ортчыса, адӟиськиз: шлюзъёсын артэ ярдурез ву гылтыны кутскем. Сое ӝог тупатыны уг луы вал. Бадӟым луэмысьтыз мурдалазэ но валыны шугъяськылӥзы. Югдурез эскерыны пырем разведчик татын бырем шуыса, тодмо. Уродмем интыез горд сюен но тыпы ваёсын тырмытэмзы бере, ӵыпетэз тымет ласянь паськытатӥзы[9][14].

1773-тӥ арын академик Пётр Паллас  [ӟуч] (удм., Иж заводэ вуылыкуз, лэсьтэм ӵыпетлы вылӥ дунъет сётӥз[15][16]. 1774-тӥ арын 27-тӥ—28-тӥ инвожое Иж заводэз киултэм Пугачёвлэн кивалтэмез улсын ожмаськисьёс ӵыпетэ тыл понӥзы: пулэсь лэсьтэм колёсаос но ларьёс ӝуазы, озьы ик ӵыпет котыре ӝутэм губка кадь небыт корт ӵыжатон фабрикаос но ву вукоос сутскизы[17][18]. Ӵыпетэз выльысь рос-прос тупатъян понна 5 ар кулэ луиз[8].

XIX—XX дауръёс

Иж завод но ӵыпет. XX даурлэн кутсконэз

1807-тӥ арын городын пыӵалтӥрлык поттон завод лэсьтыны кутскемзы бере, тыметысь вуэз ӝутон но йылтон сярысь ужпум кылдӥз. А. Ф. Дерябинлэн но С. Е. Дудинлэн проектсыя ӵыпетлэсь кузьдалазэ 303 саженёзь (646,6 метрозь) йылтӥзы, нош пасьталазэ 14 саженёзь (30 метрозь) будэтӥзы. Ӵыпетлэсь быдэс кузьдалазэ тымет ласянь сваяосын юнматӥзы, медаз куашкалэ шуыса, музъем валлин радэн-радэн коръёсын кыскизы. Висказ луэ кисьтӥзы. Тулыс тудву дыръя йӧ ӵыпетэз медаз быдты шуыса, нимысьтыз котыртэм лэсьтӥзы. Вань та ужъёсты заводысь солдатъёс, мастеровойёс, ужасьёс, завод котырын улӥсьёс быдэстӥзы, соослы нуналаз 40 коньы тыризы[19][4].

1834-тӥ арын ӵыпетлэн вылӥ сӥез юнматэмын вал, отӥяз тужгес ӝужыт интыетӥз из сюрес лэсьтӥзы, кема мед сылоз шуыса, ву кошкон интыоссэ но чаклазы, пыдын мынӥсь-ветлӥсьлы но сюрес вӧлдӥзы[20][4][21][22]. Тыметлэн ярдуръёсыз кузя ульчаос ӝутӥзы. Городын пуктӥськон ӧръяськиз, ульчаосты тыметлэн интыяськеменыз герӟаса пуктылӥзы[8]. 1836-тӥ арын ӵыпетэз но пыӵалтӥрлык поттон заводлэсь куинетӥ этажзэ герӟась арка выллем выж лэсьтӥзы[23]. 1842-тӥ арын тыметысь вуосты корт ӵыжатон заводлэн 32 колёсаосыз но ожтӥрлык заводлэн 23 колёсаосыз бергатӥзы. Пу колёсаосты пумен корт турбинаослы воштӥзы, лыдзэс но кулэстӥзы, 1874-тӥ арлы 33 кылиз[8].

1875-тӥ арын заводэн кивалтӥсь П. А. Бильдерлинг  [ӟуч] (удм. тыметэз кыкетӥ ӵыпыны ӵектэ вал. Угось тол пумын тыметын ву заводлы рос-прос тырмемысь дугдылӥз, нош кыкетӥ ӵыпетэ люкаськем ву та югдурын зол юрттысал. Инты но быръемын ни вал. Выль пуктӥськонлэсь изъян бадӟым уз луы шуыса но эскеризы, угось Иж шур выллапалан, 25 верста кемын, нюр интыос сяна, сикъёс но, поселениос но ӧй вал. Но лэсьтӥськон ужъёс таки мытэмын ӧй вал. 1885-тӥ арын гидросооружениез рос-прос тупатъязы, собере кема дыр ӵоже ӵыпет вылтӥ каретаосын но уробоосын ветлыны алэмын вал[8].

Чугунлэсь юнматэм кенер (бур палаз) лулчеберетысь утёно объектъёс полы пыре

1907-тӥ арын 10-тӥ инвожое ӵыпет вылэ, ожтӥрлык поттон заводлэн Валтӥсь корпусэз азе, заводлы 100 ар тырмон юбилей ужрадэз пусъён дыръя, заводэз кылдытӥсьлы А. Ф. Дерябинлы синпелет пуктэмын вал[23][24][25]. 1914-тӥ арын Нырысетӥез дунневыл ож кутскемен валче, Ижысь пыӵалтӥрлык поттон заводлэн кулэлыкез но улонын интыез шуак будэмен, тыметэз чаклан ужрадъёс эшшо золгес чурытатэмын вал. 1917-тӥ 18 часысен 6 часозь ӵыпет вылтӥ воксё но ветлыны алӥзы[8]. Быдӟым Атыкай тылож кутскем бере нырысетӥ нуналъёсаз, нокыӵе кышкытлык ӧй вал ке но, ӵыпетэз озьы ик юн утьыса возизы[26][22].

1950-тӥ аръёсы ӵыпет вылтӥ пыдын ветлон но техникаен ортчон сюресъёс ог-огзылэсь чугунлэсь ӵыжатэм кенерен висъямын вал, сое заводысь усточиос лэсьтӥзы[4]. Ӵыпетлэн лымшор палысьтыз откоссэ возись 217 секцилэсь чаклам кенерлэн суредэз вылын будосъёс но совето вакытысь пусъёс возьматэмын вал[3]. 1963-тӥ—1966-тӥ аръёсы гужем заводлэн кужыменыз ву кошкон сливъёс тупатъямын. Пулэсь дырдыос интые кортлэсь но бетонлэсь кисьтэмын, ву гылтэм интыос векчи изъёсын юнматэмын. 1983-тӥ—1984-тӥ аръёсы ӵыпетлы выль мугор лэсьтӥзы, азьлоезлэсь со кык поллы бадӟымгес луиз[1][27].

1995-тӥ арын ӵыпет Уралысь огез вашкалаез гидротехнической сооружениос пӧлы пыриз, Ижкарлэн азинсконаз со бадӟым инты басьтӥз[28]. Со сяна, ӵыпетлэн лымшор палысьтыз чугунлэсь юнматэм откосъёсыз историысь но лулчеберетысь федерал инлыкен пусъем синпелетъёс пӧлы пыриз[3].

Туала югдурез

2010-тӥ арын Иж тыметлэсь ярдурзэ выльдӥзы, озьы ик Дерябинлэсь проездзэ тупатӥзы-юнматӥзы[22][29].

2014-тӥ арын оштолэзе Дерябинлэн проездэз котырысь пыдын ветлон сюрес но кенерезлэн ог люкетэз куашказы, ӵыпетэз аварийной лыдъязы. 2016-тӥ арын тупатъян-выльдон ужъёс йылпумъяськизы, ӵыпетлэсь историысь люкетъёссэ утьыны быгатӥзы[30].

2017-тӥ арын эскеронъёсъя, ӵыпет интыяз умой возиське[3].

Галерея

  • Ивортонъёсын пул но чугун котыртэмлэн люкетэз

    Ивортонъёсын пул но чугун котыртэмлэн люкетэз

  • Иж тыметлэсь ярдурзэ тупатъямлэсь азьвыл ӵыпетлэн тусыз, 2006-тӥ ар

    Иж тыметлэсь ярдурзэ тупатъямлэсь азьвыл ӵыпетлэн тусыз, 2006-тӥ ар

  • Ӵыпетлэн тусыз

    Ӵыпетлэн тусыз

  • Ӵыпетлэн тусыз

    Ӵыпетлэн тусыз

  • Ӵыпетлэн тусыз

    Ӵыпетлэн тусыз

  • Тымет ласянь ӵыпет

    Тымет ласянь ӵыпет

  • Иж шур ӵыпет уллапалан

    Иж шур ӵыпет уллапалан

Валэктонъёс

  1. ↑ 1 2 3 4 Заводская плотина [ӟуч] Информационно-аналитическоe управление Администрации города Ижевска. Эскеремын 2019-06-04 арын
  2. ↑ Загребин, 2012, с. 29.
  3. ↑ 1 2 3 4 5 6 Охранное обязательство собственника объекта культурного наследия [ӟуч] Агентство по государственной охране объектов культурного наследия Удмуртской республики. Эскеремын 2019-06-04 арын
  4. ↑ 1 2 3 4 5 6 Паспорт объекта культурного наследия [ӟуч] Министерство культуры СССР. Эскеремын 2019-06-04 арын
  5. ↑ Шумилов, 1978, с. 113.
  6. ↑ Шумилов, 2018, с. 214.
  7. ↑ Васильева, Дмитриев, Куликов и др., 2005, с. 227—228.
  8. ↑ 1 2 3 4 5 6 Ижевский пруд Центральная муниципальная библиотека имени М. Горького (Ижевск). Эскеремын 2013-01-03 арын
  9. ↑ 1 2 Елена Кардопольцева 4 мифа Ижевского пруда [ӟуч] Сетевое издание IZHLIFE. ООО «Радио - Инвест». Эскеремын 2018-11-22 арын
  10. ↑ 1 2 3 Сергеев, 1958, с. 45.
  11. ↑ Александров, 1957, с. 6.
  12. ↑ Сергеев, 1958, с. 49.
  13. ↑ Шумилов, 1978, с. 7.
  14. ↑ Новиков, 1999, с. 6—7.
  15. ↑ Сергеев, 1958, с. 44.
  16. ↑ Ижевский пруд История Ижевска. Эскеремын 2019-06-04 арын
  17. ↑ Васильева, Дмитриев, Куликов и др., 2005, с. 139.
  18. ↑ Александров, 1957, с. 41.
  19. ↑ Перестройка плотины История Ижевска. Эскеремын 2019-06-04 арын
  20. ↑ Благоустройство плотины История Ижевска. Эскеремын 2019-06-04 арын
  21. ↑ Александров, 1957, с. 51.
  22. ↑ 1 2 3 Елена Кардопольцева Ижевский пруд: 12 интересных фактов ООО «Радио - Инвест». Эскеремын 2020-01-07 арын
  23. ↑ 1 2 Туганаев, 2008, с. 525.
  24. ↑ Иванов А. В. Горнозаводская цивилизация. — М.: АСТ, 2014. — С. 196. — 283 с. — (Хребет России). — 3000 экз. — ISBN 978-5-17-079642-7.
  25. ↑ Васильева, Дмитриев, Куликов и др., 2005, с. 490.
  26. ↑ Шумилов, 2007, с. 336.
  27. ↑ Шумилов, 2007, с. 496, 554.
  28. ↑ Лотарёва Р. М. Города-заводы России : XVIII — первая половина XIX века. — Екатеринбург : Издательство «Сократ», 2011. — С. 131. — 288 с., 16 с. ил. — 1000 экз. — ISBN 978-5-88664-372-5.
  29. ↑ Алиса Звонкая Фотогалерея: ижевская набережная круче, чем в Ницце ИА «Аргументы в Ижевске». Эскеремын 2020-01-07 арын
  30. ↑ В столице Удмуртии после реконструкции открылся мост через плотину Ижевского пруда pp-udmurt.ru. Официальный сайт Постоянного представительства Главы Республики Удмуртия при Президенте Российской Федерации. Эскеремын 2020-01-07 арын

Литература

Архивная копия от 8 инвожое 2021 на Wayback Machine

Архивная копия от 3 пӧсьтолэзе 2019 на Wayback Machine

«https://udm.ruwiki.ru/w/index.php?title=Ижысь_пыӵалтӥрлык_поттон_заводлэн_ӵыпетэз&oldid=506830»-ысь басьтэмын