Дун-чылкыт Михаил Архангеллэн кафедральной соборез (Ижкар)

Википедиысь материал
Та кыллэн мукет валатонъёсыз но вань, учке Михайловский собор.
Православной черк
Дун-чылкыт Михаил Архангеллэн кафедральной соборез (Ижкар)
Дун-чылкыт Михаиллэн соборез
Saint Michael the Archangel Church (Izhevsk)-100.jpg
56°50′58″ с. ш. 53°12′19″ в. д.GЯO
Кун РоссияFlag of Russia.svg Россия
Город Ижкар
Конфессия Православие
Епархия Ижысь
Благочиние Ижкар 
Архитектурной стиль Ӟуч стиль
Проектлэн авторез Чарушин Иван Аполлонович
Кылдытэмын 1907
Юртэз пуктэмын 2004—2007 аръёс
Валтӥсь датаос
  • 1929-тӥ арын — пытсамын
  • 1937-тӥ арын — куашкатэмын
  • 2004-тӥ арын — выльысь ӝутыны кутскемын
Приделъёс курадӟытэм вӧсьлыко Вера, Надежда, Любовь но София анайзылы сӥземын
Инлыкез Логотип конкурса «Вики любит памятники» ОКН № 1830048000№ 1830048000
Югдурез Али ужась
Сайтэз ижсобор.рф
Дун-чылкыт Михаил Архангеллэн кафедральной соборез (Ижкар) (Россия)
Точка
Логотип РУВИКИ.Медиа Медиафайлъёс РувикиМедиа пушкын

Дун-чылкыт Михаил Архангеллэн кафедральной соборез — Ижкарысь православной черк, Ӟуч православной черклэн Ижысь епархиезлэн кафедральной соборез луэ. Карлэн тужгес ӝужыт интыяз, Горд (Михаловской) площаде, ӝутэмын. Соборлэн ӝуждалаез 67 метр[1].

Настоятелез — Ижысь епархилэн архиереез, 2025-тӥ арын со — Викторин (Костенков), Ижысь но Удмуртиысь митрополит. Настоятельлэн воштӥсез —протоиерей Роман Воскресенских[2].

Историез

Михаил Архангеллэн черкез, 1897-тӥ—1907-тӥ аръёс

Черк 1765-тӥ арысен кылдэм Иж заводлэн шайвыл бервылаз ӝутэмын. Татын азьвыл Илия пророклы сӥзем Ижысь нырысетӥ черклэн бурд улаз возиськись Трочин часовняез ужалляз. 1784-тӥ арын часовняез черк каризы, но 1810-тӥ арын со быдэс ӝуаз.

Нырысетӥ черк

Туспуктэмын 1918-тӥ арысь собор

XIX даурлэн нырысетӥ палараз Ижын улӥсьёс Михаил Архангелэз[ru] сӥлы карыны кутскизы, со генерал-фельдцейхмейстер великий князь Михаил Павловичлэн — Россиысь вань пыӵалтӥрлык поттон заводъёслэсь кивалтӥсьсэс — вӧсьлыко утись луэ шуыса. Берлоезлы 1823-тӥ арын Александр Невский нимо собор азе синпелет пуктэмын но вӧсямын.

1855-тӥ арын ӝуам Трочин черк бервылэ 30 метр ӝуждалаем византийской амалъя лэсьтэм излэсь вӧл-вӧл часовня пуктэмын вал, сое Михаил Архангеллы сӥзизы.

1876-тӥ арын Михайловской часовня интые выль черк пуктон вылысь коньдон бичаны ӧдъязы. 1893-тӥ арын Иж заводысь ужасьёс огкылысь кенешизы: черк ӝутыны уждунысьтызы одӥг процентсэ висъялозы. Проект лэсьтон борды ватка архитектор Иван Чарушин басьтӥськиз. Ужзэ со 3 ар ӵоже быдэстӥз, та понна 5850 манет басьтӥз[3]. 1896-тӥ арын Лэсьтӥськонъя комитет огкылэ вуиз: выль черклы бичано коньдонлэн быдӟалаез Александр Невский нимо соборез пуктыны люкам уксёлэсь бадӟымгес луыны кулэ ӧвӧл. 1897-тӥ арын Нагорной лудын, соборлы шуыса, нырысетӥ из сиё-дано понӥзы. 1907-тӥ арлы валтӥсь пуктӥськон ужъёс йылаз-пумаз вуттэмын ни вал. Со арын ик 4-тӥ шуркынмонэ престолэз Архистратиг Михаил нимын вӧсязы. Но пуромем революциен сэрен азьланяз черкез вуттон, чеберъян ужъёс дугдытэмын вал[4].

1915-тӥ арын 4-тӥ шуркынмонэ черклэсь валтӥсь престолзэ Иж заводлэсь приходтэм черксэ сямен вӧсязы, со Александр-Невский нимо собор борды юнматэм вал. 1917-тӥ арын гинэ сое нимысьтыз приходэз сямен вӧсязы. Таин валче черкын куинь престолэз вал: валтӥсез — Архистратиг Михаил нимоез, лымшор паласез — Николай Чудотворец нимоез но уйпаласез — курадӟытэм вӧсьлыко Александра нимоез[4].

Черкез суреданэн выризы Мускоысь устоосыз мудор суредасьёс. Храмысь вань обросъёссэ Ижысь иконаосты суредась В.П. Гурьяновлэн мастерскояз быдэстӥзы.

1929-тӥ арын 19-тӥ южтолэзе Ижысь ужасьёслэсь но красноармеецъёслэсь депутатъёслэн кар кенешсы постановление юнматӥз: «Михайловской, Александро-Невской соборъёслэн но Покров черклэн религияя общинаосынызы юртъёсты арендае кутон пумысен огкылъёсты тӥяно-кесяно». 1929-тӥ арын 26-тӥ южтолэзе соборез пытсазы, Ижысь милициын ужасьёс сое печатьёсын лякылӥзы. 1932-тӥ арысен 1937-тӥ арозь соборлэн юртаз Вотской автономной областьлэн шаертодонъя улосвыл музеез интыяськылӥз. 1937-тӥ арын 8-тӥ оштолэзе УАССР-ысь Совнарком[ru] Михайловской соборез куашкатон сярысь решение кутӥз, (ужкагаз 1937-тӥ арын 14-тӥ-15-тӥ оштолэзе юнматэмын), озьы собор ӝоген сэрттэмын-кесямын вал[5].

Выльысь ӝутон

2000-тӥ арын 11-тӥ тулыспалэ Удмурт Элькунысь Кун Кенешлэн Президиумез но Удмурт Элькун Кивалтэт Михайловской соборез выльысь ӝутыны кутскон сярысь огъя постановление кутӥзы. 2004-тӥ арын куартолэзе вуоно собор интые вӧсям кирос юнматӥзы. Выльысь улӟытоно соборлы архитектор Евгений Скопин луиз.

2007-тӥ арын 16-тӥ куартолэзе, Быдӟым Паска праздник азьын берпуметӥ нуналаз, Ижысь но Удмуртиысь митрополит Николай (Шкрумко), вӧсьлыко Вера, Надежда, Любовь но соослэн София анайзылы сӥзьыса, улысьтыз черкез вӧсяз.

2007-тӥ арын 5-тӥ гудырикошконэ Архистратиг Михаиллы сӥзем валтӥсь престолэз вӧсян понна Мускоысь но быдэс Русьысь Патриарх Алексий II[ru] вуылӥз, черкын со нырысетӥ литургиез чирдӥз. Сиё-дано ужрадэ Удмуртилэн Президентэз Александр Волков но мукет бадӟым кивалтӥсьёс пыриськизы[6].

2017-тӥ арын пӧсьтолэзе Михайловской соборлы Ижысь но Удмурт епархиысь кафедральной черкез статус сётӥзы.

Революциысь некрополь

Валтӥсь статья: Совето власть понна нюръяськемъёслэн Вынлыко шайгузы

1922-тӥ арын архитектор Г. Ф. Сенатовлэн проектэзъя черк вӧзы, Граждан ож вакытэ Совето власть понна Ижын тӧдьыосын нюръяськыса, 1918-тӥ арын Горд Армилэн бырем ожгарчиосызлы сӥзем вынлыко синпелет пуктӥзы-юнматӥзы, сое Революциысь некрополь нимазы. Та синпелет лулчеберетысь но историысь кунэн утёно объектъёс пӧлы пырылӥз. 1937-тӥ арын, соборез кесякузы, монумент котырез мерттэм беризьёсын сквер усьтӥзы, татын совето вакытэ Ижын улӥсьёс шутэтскылӥзы.

2007-тӥ тулыспалэ, соборез выльысь ӝуто-пуктон ужрадъёс дыръя, лэсьтӥськонын кутӥськись техника монумент котырысь чугунлэсь ӵыжатэм кенерзэ тӥяз, озьы ик монумент доры нуись тубатъёсты, стелла азьысь площадкаез но синпелетлэсь кыксэ но бурдъёссэ куашкатӥз[7]. Синпелетэз утьыны курыса, калык монумент азе митинге потӥз, адямиосты тазьы ӝутӥськыны Россиысь коммунистъёслэн партизылэн[ru] Ижысь комитетэз но «Патриоты России[ru]» партилэн улосысь ёзэз бурдъязы[8]. Собере гинэ митинге люкаськем калыклы ялэмын вал: синпелетлэсь ог люкетсэ куашкатон — со монументэз выльдонлэн кутсконэз, сое соборлэн архитектурая ансамблезлы тупамон кароно. Соборез усьтонлы монумент азьысь площадка тупатъямын ни вал. Котьма ке но, выльдон ужъёс архитекторъёсын малпам некропольлэсь туссэ зол воштӥзы: озьы синпелет котырысь чугунлэсь ӵыжатэм котыртэмез ышиз-быриз, кык бурдъёсыз ӧз кылдэ ни, нош монумент дорозь нуись тубатэз сюбегомытӥзы но вакчиятӥзы, со но уйпала, Бородинлэн ульчаез пала, выжтэмын вал.

Галерея

  • Пушкыз
  • Saint Michael the Archangel Church (Izhevsk)-5.jpg
  • Свято-Михайловский собор.JPG
  • Saint Michael the Archangel Church (Izhevsk)-6.jpg
  • Saint Michael the Archangel Church (Izhevsk)-7.jpg
  • Инмысен тусыз
  • Aerial photographs of Izhevsk-17.jpg
  • Aerial photographs of Izhevsk-19.jpg
  • Saint Michael the Archangel Church, Izhevsk (September 2022) - 7.jpg
  • Saint Michael the Archangel Church, Izhevsk (September 2022) - 4.jpg
  • Saint Michael the Archangel Church, Izhevsk (September 2022) - 1.jpg
  • Saint Michael the Archangel Church, Izhevsk (September 2022) - 2.jpg

Валэктонъёс

  1. ↑ Свято-Михайловский собор
  2. ↑ Список действующих храмов, часовен и молитвенных домов Ижевской и Удмуртской епархии [недоступная ссылка]
  3. ↑ Шумилов, 2001, с. 309.
  4. ↑ 1 2 Воронцова и др., 2017, с. 161.
  5. ↑ Воронцова и др., 2017, с. 162.
  6. ↑ Визит Предстоятеля Русской Православной Церкви в Ижевск 4 — 5 августа 2007 г. от Р. Х. [недоступная ссылка]
  7. ↑ Восстановить в прежнем виде Архивная копия от 30 южтолэзе 2015 на Wayback Machine //День. — № 9. — 8.3.2007.
  8. ↑ Ижевчане вступились за памятник Архивная копия от 4 южтолэзе 2016 на Wayback Machine // День.

Литература

  • Православные храмы Удмуртии : Справочник-указатель по документам Центрального государственного архива Удмуртской Республики / Составители: О. И. Воронцова, Е. С. Воронцова, И. Н. Зайцева и др. Науч. ред. А. Н. Кутявин, А. А. Тронин. — 2-е изд., исп. и доп. — Ижевск : Издательство «Удмуртия (издательство), 2017. — 608 с. — 1000 экз. — ISBN 978-5-7659-0993-5.
  • Шумилов Е. Ф. Христианство в Удмуртии : Цивилизационные процессы и христианское искусство. XVI — начало XX века / науч. ред. Щапов, Ярослав Николаевич. — Ижевск : Издательский дом «Удмуртский университет», 2001. — 434 с. — 1000 экз. — ISBN 5-7029-0306-4.

Чӧлсконъёс

«https://udm.ruwiki.ru/w/index.php?title=Дун-чылкыт_Михаил_Архангеллэн_кафедральной_соборез_(Ижкар)&oldid=492184»-ысь басьтэмын