Ижысь нылкышно гимназия
| Чеберлыко инты | ||
| Ижысь нылкышно гимназия | ||
|---|---|---|
 | ||
| 56°50′33″ с. ш. 53°11′53″ в. д.GЯO | ||
| Кун |
 Россия |
|
| Кар | Ижкар, Свердлов нимо ульча, 28, 30 | |
| Архитектурной стиль | Кирпичлэсь пуктэм юрт | |
| Архитекторез |
Я. П. Максимович, И. А. Чарушин — лымшор корпус; И. К. Плотников, И. А. Чарушин — уйпал корпус |
|
| Кылдытэмын | 1910 | |
| Юртэз пуктэмын | 1911—1915 | |
| Валтӥсь датаос | ||
|
||
| Инлыкез |
 ОКН № 1830070000 |
|
|
|
||
 |
||
 Медиафайлъёс РувикиМедиа пушкын | ||
 | Россилэн лулчеберето кылёс лэсьтосъёсыз лэсьтос № 1830070000 (БД Викигида) |
Ижысь нылкышно гимназия — 1907-тӥ арын кылдытэм Ижысь нылкышноослы нырысетӥ шоро-куспо дышетонни. Гимназилэн Пурысь но Горд корпусъёсыз Удмурт Элькунысь историысь но лулчеберетысь утёно синпелетъёс пӧлы пыро[1][2][3].
Историез
Прогимназия
1907-тӥ арын 9-тӥ гудырикошконэ Иж заводысь волостьысь но гурт правлениосысь кивалтӥсьёслэн сходазы кышномуртъёслэсь грамотазэс будэтон вылысь нылкышно гимназия усьтон сярысь огкылысь кенешизы. Сарапул уездысь земской управа таин соглаш кариськиз. Ужпумез быдэстон вылысь Иоанн Рябов баӵко чаклам улсын ужась комитет кылдытэмын вал. 1907-тӥ арын 11-тӥ шуркынмонэ Ижын нылкышно калык прогимназия усьтӥськиз, отын пичи но бадӟым пиналъёс понна дышетскыны дасянъя но 1-тӥ но 2-тӥ огшоры классъёс чакламын на вал. Нырысетӥ дышетскон аре прогимназиын 180 нылмурт тодон-валанзэ муромытӥз, 1908/1909 арын — 250 дышетскись, 1909/1910 арын — 400 дышетскись. Прогимназия Кузонысь дышетон округе пыре вал, Калыкез югдытонъя министерстволэн бурд улаз ужаз. Гуртысь нылпиос понна татын дышетсконлэн дуныз нырысь-валысь 15 сюрс манет вал, чиновникъёслэн нылпиоссылы — 30 манет. 1911-тӥ арын пӧсьтолэзе прогимназия Ижысь нылкышно гимназилы пӧрмиз. Нырысь-валысь ужъюрт Березин генераллэн юртаз интыяськиз, вузчиос, ужбергатӥсьёс, интыысь интеллигенция, черк попечительство но Иж заводын (али Ижсталь но «Калашников» нимо концерн) ужасьёс чотын возиськиз. Излэсь юртэз (та дырозь утиськемын ӧвӧл) Березин генераллэсь 12 сюрс манетэн Сергей но Иван Бодалёв купечъёс басьтӥзы но гимназилы сётӥзы[4][5][6][7].
Гимназилэн нырысетӥ кивалтӥсез Ольга Николаевна Виноградова вал[7].
Гимназия
1911-тӥ арын Я. П. Максимовичлэн но И. А. Чарушинлэн проектсыя гимназилэн лымшор («пурысь») улыно-вылыно излэсь корпусэз пуктэмын. Гимназиын уногес гуртын улӥсьёслэн, артысь гуртъёсысь крестьянъёслэн но Иж заводысь чиновникъёслэн нылпиоссы дышетскизы. Гимназилэн дышетон программаез Калыкез югдытонъя министерстволэн «Нылкышно гимназиос но прогимназиос сярысь положенилэн» куронъёсызлы тупаз. Ӟуч, немец но француз кылъёсты, географиез, арифметикаез, физикаез но Инмар законэз дышетӥзы. Озьы ик нылъёсты гигиеналы, кырӟаны, суредаськыны но киужлы валэктылӥзы. Дышетскисьёслэн огъя дӥсьсы пӧлы пеймыт-лыз дэрем но айшет (огшоры нуналэ — сьӧд, праздникъёсы — тӧдьы) пыризы. Гимназилэн уставезъя чеберъяськон арбериос дӥсяны, парта сьӧрысь интыез ас мылкыд каремъя воштыны, озьы ик занятиосы палэнысь арбериос вайыны алэмын вал. Котькуд класс борды чаклась мурт юнматэмын вал. Арнянуналъёсы но праздник нуналъёсы гимназисткаосты вӧсяськонъёсы ветлыны косылӥзы. Балъёсы, маскарадъёсы вуылыны юн алэмын вал. Калык ужрадъёсы анай-атайёсынызы яке ӵыжы-выжыосынызы гинэ пыриськыны лэзьылӥзы, но ӝыт 10 часлэсь бере кыльыны уг яра вал. Толалтэ 18 час бере, гужем 21 час бере юмшаны алылӥзы[4][3][5][7].
1911-тӥ арын куарусёнэ гимназиысь 13 классъёсын 528 нылъёс дышетскизы: 5 параллель, 7 шор ёзо но 1 подготовительной классъёс. Гимназиын педсовет дышетон но нодъян ужен выриз. Улонзэс дышетӥсьлэн удысэныз герӟаны малпасьёс понна 1912-тӥ арын гимназиын тямысэтӥ педкласс усьтӥзы. Сое медален йылпумъямъёслы кинэ ке доразы визьноданы луонлык сётъязы, мукетъёсыз гуртысь дышетӥсь луылӥзы. Гимназиысь 7-тӥ классэз йылпумъям нылъёс покчи училищеосын но школаосын ужаны быгатылӥзы[4][5].
1912-тӥ арын 17-тӥ коньывуонэ Попечительской кенешлэн тӧроез Иоанн Рябов баӵко Ватка губерниысь Лэсьтӥськонъя ёзэ гожтэтэн вазиськиз, гимназилэсь юртсэ паськытатыны курыса. 1912-тӥ арын 12-тӥ толсуре губерниысь И. А. Чарушин инженерен но И. К. Плотников архитекторен юнматэм юртэз бадӟыматон сярысь проектэз но сметаез губернаторлы ыстӥзы[5].
1912-тӥ—1915-тӥ аръёсы уйпалаз («горд») кирпич улыно-вылыно корпус пуктэмын вал, проектлэн архитекторъёсыз — И. К. Плотников но И. А. Чарушин. 1930-тӥ аръёсы эшшо кык этаж ӝутӥзы на[3][5].
1916-тӥ арын Ижысь гимназиын 637 пинал дышетскиз. 1917-тӥ ар кутсконын гимназиын 17 классъёсын 750 нылъёс визь люказы: 7 шор ёзо но 8 параллель классъёс. 1918-тӥ арын гимназия воргоронъёслы чаклам училищеен огазеямын но кыкетӥ тубатъем 1 номеро огъя ужъя совето школалы пӧрмытэмын. Дас ар ӵоже гимназиез 1 сюрс 214 нылъёс йылпумъязы.[4][5][3][7].
Быдӟым Атыкай ож вакытэ гимназилэн уйпал корпусаз Мускоысь эвакуацие шедем Н. Э. Бауман нимо вылӥ техникая училищелэн оглюкетэз интыяськылӥз[6].
Архитектураез
Гимназилэн лымшор корпусэз кирпич стильлы укшатыса быдэстэмын. Фасадэзлэн улӥ люкетэз ӝужыт лэсьтэмын, отчы кузь вандэм укноос тыремын, этажъёс куспын кузяз пинё сюбег карниз выллем лэсьтэмын. Нырысетӥ этажысь укноос бадӟым изъёслэсь вӧл-вӧл тыремын, вискысьтызы борддор кӧня ке азьпала учке, со паськыт но сэрго лэсьтэмын[5].
Туала югдур
Кыкез ик корпусъёс одӥг гожъя пуктэмын, юртлэн ымнырыз туала Свердловлэн ульчаез шоры учке. Уйпал корпусаз али Гурт_удысъя_удмурт_кун_университетлэн огез корпусэз интыяське. Лымшор корпуссэ коммерцияя огазеяськонъёс арендае куто[3][5].
Удмурт Элькунысь Правительстволэн 2001-тӥ арын 17-тӥ куарусёнэ юнматэм пуктэтэныз кыкез но корпусъёс лулчеберет удысысь улосэн вашкала утёно объектъёс пӧлы пыртэмын[1][2].
Галерея
Валэктонъёс
- ↑ 1 2 Объекты культурного наследия (памятники истории и культуры) регионального (Удмуртской Республики) значения
- ↑ 1 2 Постановление Правительства Удмуртской Республики № 966 от 17.09.2001 «Об отнесении недвижимых объектов историко-культурного наследия Удмуртской Республики к категории памятников истории и культуры местного (Удмуртской республики) значения»
- ↑ 1 2 3 4 5 Елена Кардопольцева Старинные особняки и парфюмерные магазины: прогуливаемся по улице Свердлова [ӟуч] Сетевое издание IZHLIFE. ООО «Радио - Инвест». Эскеремын 2020-01-22 арын
- ↑ 1 2 3 4 Ижевская женская гимназия / Кутявин А. Н. // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 351. — 768 с. — 2200 экз. — ISBN 978-5-7659-0486-2.
- ↑ 1 2 3 4 5 6 7 8 Рыжкова Н. В. Историко-архитектурные особенности женской гимназии в Ижевском заводе в начале ХХ в. (к 100-летнему юбилею со дня основания) // Восточно-Европейский научный вестник : журнал. — Ижевск: Частное образовательное учреждение высшего образования «Восточно-Европейский институт», 2017. — № 1 (9). — С. 58—64. — ISSN 2411-3476.
- ↑ 1 2 Селивановский С. Н. Старый Ижевск. События и люди в объективе фотографов / рецензент И. И. Кобзев. — 3-е издание, исправленное. — Ижевск: КнигоГрад, 2015. — С. 39—40. — 292 с. — 100 экз. — ISBN 978-5-9631-0309-8.
- ↑ 1 2 3 4 Шумилов Е. Ф. Город на Иже, 1760—2000 : Историческая хроника с прологом и эпилогом в двух томах, повествующая о славных традициях и драматической истории столицы Удмуртии. — 2-е изд., дополненное и переработанное. — Ижевск : Издательство «Свиток», 1998. — С. 100—101. — 400 с., 26 с. ил. — 10 000 экз. — ISBN 5-89296-006-4.
.svg)