Бодалёв, Иван Иванович
| Иван Иванович Бодалёв | |
|---|---|
 | |
| Вордӥськем нуналыз | 1831 |
| Кулон нуналыз | 1906 |
| Ужудысэз | купец |
| Атаез | Иван Александрович |
| Анаез | Устинья Ивановна |
| Кузпалыз |
|
| Нылпиосыз |
|
| Данъетъёсыз |
|
Ива́н Ива́нович Бодалёв (1831—1906) — Сарапулысь 1-тӥ гильдиысь ӟуч купеч, Сарапуллэн выжыезъя дано муртэз[1], Иж завод каргуртлэн (али — Ижкар) выжыезъя нырысетӥез дано муртэз[2]. 1899-тӥ арын «Сюлмысь тыршем понна» Анненской ленталэн зарни медаленыз пусъемын[3].
Улон сюресэз
Иван Иванович Бодалёв Рязань губерниысь Зарайск уездысь Ловцы гуртын вордӥськиз. 2-тӥ гильдиысь купечлэн Иван Александрович Бодалёвлэн но Устинья Ивановна кышноезлэн со ньыль пиоссы пӧлысь покчиез вал. Бодалёв-атай нянь но виноград вылын пукем винаен быгатыса вузкариз; музъемъёслэсь ӟечлыксэс но мукет уездъёсын вузаськон луонлыкъёсты эскерыса, кунэтӥ трос ветлӥз. Валаз: Кам шур дуре пуксем каръёсын аслэсьтыд ужзэ усьтыны, барышез бадӟым уже поныны тужгес ӟеч. Рязань губерниын со вакытэ 40-лэсь ятыр заводъёс вина пӧзьтылӥзы, уноез соос дворянъёслэн вал, соин ик зол конкуренциен валче та удысэ купечъёслы сюрес пытсамын вал[4].
Сарапул
1860-тӥ аръёслэн кутсконазы, атайзы Иван Бодалёв кулэм бере, ньыль пиосыз — Иван Иванович, Александр Иванович, Алексей Иванович, Егор Иванович — асьсэ семьяосынызы но Устинья Ивановна анаенызы ужбергатӥсьёс пӧлын тодмо луэм Кам шур дурысь Сарапулэ вуизы. Татын Ватка казённой палата 1864-тӥ арлэн кутсконаз Зарайскысь купечъёсты Сарапулысь купечъёсы выжтӥзы-юнматӥзы. Агай-вынъёс пӧлысь тужгес сэзез но визьмоез Иван Иванович Сарапулын водка пӧзьтонъя завод усьтӥз[4].
1863-тӥ арын заводаз 85 мурт тыршиз, таос араз 76 330 манет тыр 111 379 ведра спирт пӧзьтылӥзы. Бодалёв Иван Иванович заводаз со вакытысь тужгес ӟеч тӥрлык басьтӥз[5].
Иж завод
1865-тӥ арын 3-тӥ инвожое Иж заводэн кивалтӥсьёс 2-тӥ гильдиысь сарапул купечлы Иван Иванович Бодалёвлы каргуртын ваньбур басьтыны-кутыны лэзизы. 1868-тӥ арын 25-тӥ оштолэзе солы тымет дурысь аракы пӧзьтон заводэн, складэн но коркаен валче 858 квадрат сажень музъем сётэмын вал. 1872-тӥ арын та интыын ик Бодалёв, водка пӧзьтон сяна, сур но чечы вина лэсьтон завод (И. И. Бодалёвлэн сур пӧзьтон заводэз) пуктӥз на. Нырысетӥ юртъёс пулэсь шуккемын вал. 1882-тӥ арын излэсь ньыль этажъем неогитика амалъя корпус пуктон борды басьтӥськиз. Пуктӥськон вакытаз Иван Иванович Бодалёв быдэс Удмуртиетӥ заводаз кутон вылысь чылкыт юон ву утчалляз. Ву сюриз лэсьтӥськонэн артэ ик, Иж тымет котырысь Полковниклэн ошмесаз. Ошмес татын ватэм Фёдор Фёдорович Венцель полковниклы, Гороблагодатской но Кам заводъёслэн валтӥсь командирзылы, пугачёвъёсын быдтэм муртлы сӥземын [6].
Сур но вина пӧзьтонэ Бодалёв каргуртысь усточиосты кыскиз, палэнысь лыктэмъёс нокин ӧз ужа. Чечы вина пӧзьтӥсьёсты дышетӥз. Иван Иванович вуззэ ачиз эскерылӥз, рецептъя лэсьтэмын-а шуыса, куронъёсты тӥясьёсын чурыт кариськылӥз[7].
1873-тӥ арын завод 10 сюрс манет тыр водка поттӥз, 2 сюрс манет тыр сур пӧзьтӥз. Бератаз Бодалёв сур но чечылэсь вина пӧзьтон вылэ гинэ на выжиз. Иж заводын арлы быдэ юон кабакъёс но погребокъёс йылыны ӧдъязы, 1874-тӥ арын лыдзы 88 вал ни (1862-тӥ арын воксё но 4 гинэ вал)[7]. Курыт юон пӧзьтон завод вуззэ Ватка, Уфа, Пермь, Кузон губерниостӥ вӧлмытӥз[5]. Бодалёвлэсь вуззэ Россиысь но кунгож сьӧрысь адӟытонъёсын вылӥ дунъяллязы[4]. Заводын маял, сюкась, вина, 40 пумо сур лэсьтылӥзы. Тужгес устоез «Портер» нимо сур лыдъяськылӥз, сое чечыен но алоен лэсьтылӥзы. «Портерез» Прикамьеын сяна, Крымын но эмъяськонын гинэ но кутылӥзы[2].
Ижлэн историяз Иван Бодалёв сур пӧзьтись заводэн кивалтӥсь сямен гинэ тодэ ӧз кыльы, со меценат но вал. Агайёсыныз ӵош нылкышно прогимназия усьтонлы 12 сюрс манет висъяз, со Иж заводлэн нырысетӥ шоро-куспо дышетон заведениез луиз. Со сяна, Михайловской соборез ӝутыны вань быдтэм коньдон пӧлысь одӥг ньыльмос люкетсэ тыриз. Бодалёвъёс трос нылпиё семьяослы ялан юрттылӥзы, приютъёс но пересьёслы юртъёс пуктылӥзы[5][2].
Семьяез
Иван Иванович Бодалёвлэн нырысетӥ кузпалыз Анна Ивановна вал. Соослэн сизьым пиналзы вордӥськиз — Василий (1853—1897), Сергей (1863—?) но Иван (1881—?) пиоссы но Аграфена, Александра, Мария но Юлия (вазь кулӥз) нылъёссы[4].
1879-тӥ арын Бодалёвлэн кышноез кулӥз. 65 аресказ со Ижысь 39 аресъем Ирина Родионовнаен кузпалъяськиз, Соослэн Надежда нылзы вордӥськиз[4].
Данъетъёсыз
- 1893-тӥ арысен 1-тӥ гильдиысь купеч
- Иж завод каргуртлэн (али — Ижкар) выжыезъя нырысетӥез дано муртэз
- Вузкаронъя но промышленностья товариществолэн кивалтӥсез
- Гурт удысысь вормонъёсъя Россиысь адӟытонын зарни медаль утӥз (1882)
- Ливорноын ортчем адӟытонын зарни медаль утӥз (1885)
- Парижысь йӧскалык академилэн дано дипломеныз пусъемын (1885)
- «Сюлмысь тыршем понна» Анненской ленталэн зарни медаленыз пусъемын (1899)
- Атыкай музъем понна трос лэсьтэмез понна Дун-чылкыт Анналэн III степенё орденэныз пусъемын (1903)[8].
Озьы ик учке
Валэктонъёс
- ↑ Бодалев Иван Иванович (1831 - 1905), купец МБУК «Централизованная библиотечная система» города Сарапула. Эскеремын 2018-08-02 арын
- ↑ 1 2 3 Бодалев Иван Иванович Эскеремын 2018-08-02 арын
- ↑ Елена Кардопольцева Улица Горького: бизнес-центр дореволюционного Ижевска Эскеремын 2018-08-02 арын
- ↑ 1 2 3 4 5 Н. П. Лигенко. История жизнедеятельности династии Бодалёвых – крупных предпринимателей камско-вятского региона в пищевой отрасли промышленности // Вестник Удмуртского университета : журнал. — Ижевск: Издательский центр «Удмуртский университет», 2015. — Т. 25, вып. 4. — С. 29—38. Архивировано 22 толсуре 2018 арын.
- ↑ 1 2 3 Адреса Ижевска: наследие Ивана Бодалева ИА "Удмуртия".
- ↑ Книга Россия : полное географическое описание нашего отечества: настольная и дорожная книга для русских людей|том=5|с=521—522. Россия. Т. 5. Урал и Приуралье
- ↑ 1 2 Н.А. Красильникова Иван Бодалев - коммерсант, заводчик, пивовар Архивная служба Удмуртской Республики.
- ↑ Ольга Шмыкова. Пивоварня Бодалёва, ИА «Сусанин» (09.06.2014). Эскеремын: 8 пӧсьтолэзе 2024 арын.