Пугачёв, Емельян Иванович

РАН экспертиза

Экспертизаез ортчытэ
Россиысь Тодосъёсъя Академия

Рос-прос лыдӟе

РАН экспертиза

Экспертизаез ортчытэ
Россиысь Тодосъёсъя Академия

Рос-прос лыдӟе

Емельян Пугачёв
Вордӥськемын	1742(1742) Дон улосысь Зимовей станицаын
Кулэмын	10‑тӥ (21-тӥ) толшоре 1775 Муско, Росси империя[d]
Атаез	Иван Михайлович Пугачёв
Анаез	Анна Михайловна
Кузпалыз	Софья Недюжева, Устинья Кузнецова
Нылпиосыз	Трофим, Аграфена, Христина
Кыӵе войскоосын вал	Донысь казак войско[d]
Званиез	хорунжий[d]
Ожмаськонъёс	Емельян Пугачёв кивалтэм улсын крестьян ож Пугачёвлэн Уралын но Сибирын ӝутӥськемез[d] Пугачёвлэн Башкириын ӝутӥськемез[d] Сизьым аръем ожмаськон[d] 1768—1774-тӥ аръёсы Росси но Осман империос куспын ожмаськон[d] Емельян Пугачёвлэн Царицыноез штурмен басьтонэз[d] Кузон понна ожмаськон[d] Юзеево котырын ожмаськон[d] Яицкой крепостез котретэ басьтон[d] Татищев нимо крепость котырын ожмаськон[d] Солениковой ватага котырын ожмаськон[d]
Медиафайлъёс РувикиМедиа пушкын

Емелья́н Ива́нович Пугачёв (1742^[…], Зимовей^[d], Воронеж губерния^[d] — 10‑тӥ (21-тӥ) толшоре 1775, Муско) — дон казак, Россиын 1773-тӥ—1775-тӥ аръёсы пуромем Крестьян ожлэн азьветлӥсез. Россиысь Пётр III улэп шуыса супыльтонъёс вӧлскемен, Пугачёв ассэ императорен ниманы ӧдъяз, асьсэды Пётр III карись кӧня ке дасо самозванецъёс пӧлысь огез но тужгес даноез вал.

Улон сюресэз

Егит аръёсыз

Емельян Пугачёв вордӥськиз Дон улосысь Зимовей станицаын (али — Волгоград улосысь Котельниково ёрос). Историысь совето литератураын нимысьтыз пусйылӥзы: Зимовейын Пугачёв вордӥськемлэсь 100 ар азьвыл казакъёсты бугыръяськонэ ӝутэм мукет азьветлӥсь вордӥськиз — Степан Разин. Емельян Пугачёвлэн вордскем арез документъёсын шараямтэ. 1774-тӥ арын Пугачёв Яицк карын Маврин следовательлы показаниос сётыкуз, вералляз «вордскем дырысеным мыным 32 арес». Мускоын следствие дыръя обер-секретарь Степан Шешковский озьы ик гожтӥз: «аслыз куамын куинь ар лыдъя». Со дыре ик тодмо мукетыз но: пеган вакытъёсаз Добрянскысь форпостын паспорт басьтыкуз, Пугачёв ивортӥз, солы 40 арес шуыса. Та арлыдэз ик со 1772-тӥ арын яицк казакъёс доры нырысьсэ вуылэмез бере, арес улэ сюрыкуз, пусйылӥз. Уноез историкъёс, Пугачёвлэсь историысь пӧртэм учыръёсын улон вакытсэ ӵошатыса, огъя малпанэ вуизы: вордӥськем ареныз 1742-тӥ арез лыдъяны кулэ.

Емельян дон казаклэн Иван Михайлович Пугачёвлэн но Анна Михайловна кузпалызлэн семьяязы покчи пизы вал. Пугачёвъёс Зимовейскын кемалась дырысен улӥзы, фамилизы Емельян песятайзылэн кушемнимызлэсь — Михаил Пугачлэсь — выжылы кылиз. Бадӟымез Дементий пизы семьяезлэсь вазь, службазэ кутскыса, люкиськиз. Ульяна но Федосья апайёсыз кузпалъяськемзы бере озьы ик дорысьтызы кошкизы. Допросъёс дыръя юалляськонъёсын Пугачёв пусйылӥз, семьяез православие осконлы матын вал, Украинаысь вуэмъёсын тырмытэм Зимовей станицаысь черкас (малороссийск) казакъёс пӧлысь уноез сямен ик, зэм, яицкъёс но вылӥ но шор донъёс пӧлысь со вакытъёсы уноез казакъёс вуж сямен вӧсяськылӥзы ке но. Дыр вуытозь, Емельян семьяезлы юртъер котыразы юрттылӥз, «атаез мышкытӥ музъемез усыялляз», нош 17 аресказ сое отставкае потэм бубиз интые казак службае гожтӥзы. Казак службазэ мытэмез бере ар ортчыса, Емельян Есаул станицаысь казак кышноен Софья Дмитриевна Недюжеваен паръяськиз.

Сюан шудэмзы бере арня ортчыса, Емельян Пруссие келям казакъёслэн командаязы пыртэмын вал. 1756-тӥ—1763-тӥ аръёсысь Сизьым аръем оже пыриськиз, полкеныз ӵош граф З. Г. Чернышёвлэн дивизияз вал. Походъёсы пыриськись атаман, дон полкъёсысь полковник Илья Денисов Пугачёвез ас дораз ординареце кутӥз. Пруссиын куинь ар ӵоже службазэ нуытозяз, Емельян Торуне, Познане, Кобылинэ вуылӥз, ожмаськонъёсы пыриськиз, сӧсырмемлэсь утиськиз. Огпол уй тревога дыръя Денисовлэсь огзэ валзэ ки улысьтыз лэзиз, та понна сюлоямын вал.

Пётр III император кулэмен, войскоос Россие берыктэмын вал. 1763-тӥ арысен 1767-тӥ арозь Пугачёв аслаз станицаяз службазэ нуиз, татын 1764-тӥ арын солэн Трофим пиез вордӥськиз, 1768-тӥ арын — Аграфена нылыз. Нылпиосыз вордскон вискын Пугачёвез Елисей Яковлев есауллэн командаеныз пегӟем старообрядецъёсты утчан но Россие берыктон вылысь Польшае ыстӥзы. Бератаз Пугачёв допросъёсын вералляз, со казакъёсын ялан «толэзь, кытын кык партиосы пыриськылӥз но собере корказ бертылӥз».

1769-тӥ арын ӟуч-турк ож кутскемен, Пугачёв полковник Ефим Кутейниковлэн командаяз 2-тӥ сотняысь хорунжий офицер сямен Бендере келямын вал. 1770-тӥ арын 16-тӥ (27)-тӥ куарусёнэ, Пётр Панин генерал кивалтэм улсын Бендерез басьтыкузы, хорунжий Пугачёв но данэ потӥз. 1771-тӥ арын войскоосты Елисаветградысь тол квартираосы выжтэмзы бере Пугачёв черлаз («…солэн гадьыз но пыдъёсыз сисьмизы»). Полковник Кутейников сое Дон дуре сю казакъёсын командаен ӵош валъёсты воштыны ыстӥз. Висеменыз сэрен Пугачёв берен берытскыны ӧз быгаты, соин ик со аслыз воштӥсь шедьтӥз — «Глазунов станицаысь (Гондыр шур дурын) Бирюков казакез, та понна солы энеръёсын 2 вал, сабля, бурка, лыз зипун, пӧртэм сиськон но 12 манет коньдон сётӥз». Толэзь ӵоже дораз висьыса, Пугачёв станицаысь пересьёслэн дэмламзыя Черкасске отставкае куриськыны мынӥз. Станицаысь атаман Трофим Фомин Емельянлы та понна паспорт гожтӥз.

1771-тӥ арын пӧсьтолэзьлэн нырысетӥ люкетаз Черкасске вуыса, Пугачёв полкысь эшезлэн анаезлэн квартираяз дугдӥз. Куронзэ эскерись войскоысь дьяк Колпаков Пугачёвез отставкае келяны пумит луиз, лазаретын эмъяськыны ӵектӥз. Малпаськемез бере Пугачёв лазаретлэсь куштӥськиз но ас понназ йӧнатӥськоно кариськиз — «ас коштаз». Бурмытскыны выронъяз, куинь нунал ӵоже пыдъёсыз борды така тыосты тырылӥз, солы капчигес луиз. Отставкае келяны пумит луэмзы бере, со атаман Ефремовлэн лэземезъя, Феодосия апаеныз но Симон Павлов эмеспиеныз Таганроге адӟиськыны мынӥз, эмеспиез татын службазэ нуиз. Соин вераськыса, Пугачёв тодӥз, Симон кӧня ке эшъёсыныз службалэсь жадиз но пегӟыны медэ шуыса, угось казакъёс интые соосты солдатъёс каризы. Кудпала пегӟон сярысь ужпумъёсты («Русе? Прусе? Запорожье Сече?») эскерыса, Терысь семья войское кошконэз умоен лыдъязы, отын казакъёслы, пе, воля тросгес сёто. Пугачёв эмеспиезлы но эшъёсызлы юрттэм гинэ ӧвӧл, ачиз но соосын Тереке выжыны мылкыд кариз. Кенешемъя Федосья апаез аслыз но нылпиосызлы Зимовей пала мыныны паспорт куриз. Симон Павлов эшъёсыныз ӵош арня ортчыса пегӟыны кулэ вал, Пугачёв вылэ малпась медаз луы шуыса. Но витетӥ нуналаз ик Симон мукет куинь беглойёсын ӵош Пугачёвез Черкасск дорысен сутӥз. Пугачёвлэн верамезъя, со туж ӝожомемын вал, угось сокем ӝог кошкемез малпаськыны инъет сётылӥз, со пегӟыны юрттӥз шуыса.

Зимовей пала вуыса, таганрог беглойёс огдырлы степьёсы ватскизы, Федосья нылпиосыныз ӵош варматаез доры кунояськыны кошкиз, нош Емельян Пугачёв эмеспиеныз ӵош Тереке кошкыны мылкыд каремез сярысь дораз ивортӥз. Отӥяз допросъёсын Емельянлэн Софья кузпалыз вералляз, кызьы анаеныз пыд азяз уськытскизы, та малпанэзлэсь куштӥськыны тэльмыризы. Кышноезлэн но мумизлэн валэктэменызы-куременызы соглаш луыса, Пугачёв Симон Павловен выляз пумиськонын беглойёсын Тереке мыныны пумит луэмез сярысь ялӥз, но соосты Дон вамен пыжен «ногай палаз» выжыны юрттыны соглаш луиз. Павлов эшъёсыныз Емельянэз пыкылыны, либатыны кутскизы, соиз соглаш луэмъяськиз, но пегӟисьёсты Зимовейлэсь сизьым версталы палэнэ Дон сьӧры выжтэмез но соосты пыжысьтыз васькытэмез бере, дораз берытскиз, отын толэзьлэсь кема улӥз, ас понназ эмъяськонзэ азьланьтӥз.

Пегӟем казак

Беглойёс Терекозь асьсэ коже вуыны ӧз быгатэ, кӧня ке арня ӵоже йыромыса костаськемзы бере, Зимовей пала берытсконо кариськизы, татын станицаысь канцелярие вуизы. Симон Павлов пегӟем мугъёсыз сярысь вераз, Дон вамен выжыны соослы озьы ик Тереке кошкыны мылкыд карись Емельян Пугачёв юрттӥз шуыса. Таин валче Пугачёв станицаысь пегӟыны но котырысьтыз камышъёс пӧлы ватскыны выриз. Со куспын Павлов эшъёсыныз, озьы ик Пугачёвлэн анаез Черкасске следствие лэсьтыны келямын вал. Отын пегасьёс асьсэлэсь сьӧлыксэс со вылэ куштыны тыршозы шуыса валаса, Емельян отчы ик мыныны дыртӥз, войскоысь канцеляриын вань проездной документъёссэ возьматӥз но, арестованнойёс вуытозь, учырез рос-прос вераз: «… мон де кылӥсько, ма мон сярысь верало, мон пегӟи, пе, нош мон де ӧй пегалля». Но арестованнойёслэн Терек сярысь малпан Емельян бордысь ик потэм шуыса мадиськемзы бере, Пугачёв пегӟоно кариськиз, выльысь вордскем станица котыраз ватскыны турттӥз, но со ӝегатэмын но станица коркась замок улэ ворсамын вал.

Пытсэт улын кык нунал улыса, Пугачёв выльысь пегӟиз но вордскем станицаез котыре ватскиз. Кылем гужемез но сӥзьылэз озьы улыса, кезьытъёс вуэмен, Пугачёв дораз бертыны дӥсьтӥз, отын сое уз утчалэ малпаз. Станицаысь но войскоысь кивалтӥсьёслэн, зэмзэ но, йыразы ӧз лыктылы, олокӧня толэзьзэ ни («быдэс Филипп пост дыръя») беглой аслаз корказ ик улӥз шуыса. Но ялан пытсаськыса уд улы — Пугачёв Тереке выжон сярысь малпанзэ пумозяз быдэстоно кариськиз. 23-тӥ толсуре, кузпалэныз люкиськыса, семьязэ интыяськемез бере сьӧраз кутыны оскытыса, Пугачёв Донлэн алэм пал ярдураз выжиз. 1772-тӥ арын толшорлэн шораз со Ищёрски станицае вуиз, отысен сое Тер семья войсколэн атаманэз Павел Татаринцев доры Дубовски станицае келязы. Таид осконтэм шуыса малпан нокинлэн ӧз кылдылы, войскоысь ведомостьын со сярысь гожтэмын вал: «Емельян Пугачёв гожтыса пусъемын ӧвӧл. Донысь войскоос. Семья войскоын казак луыны мылкыдыз вань». Сое Дубовски станицае улыны юнматӥзы, но ӝоген Пугачёв Ищёрске берытскиз.

Тер семья войскоысь казакъёслэн реестразы Пугачёв кузпалъяськемен пусъемын, кышноен Прасковья Фоминишна гожтэмын. Рос-прос тодмо ӧвӧл, Пугачёв мукет кышно басьтыны вуттӥз яке кыӵе ке малпанъёсызъя Софья кузпалзэ мукет нимын возьматоно кариськиз. Котьма ке но, Терекын службазэ нуон кема ӧз кыстӥськы. Алигес кылдытэм Тер линиез юнматон понна правительствоен татчы кужмысь выжтэм волга но дон казакъёс туж йыркуръяськизы выль интые сюремзылы но улон условиослы. 1772-тӥ арын тулыспалэ Ищёрски, Галюгаев но Наур станицаосысь казакъёс Ожгар коллегие ӝожтӥськонэн делегациез келяны малпазы, со ӝожтӥськонэз нуыны Емельян Пугачёв но мылкыд кариз. Соин ик кенешизы: «Ожгар кун коллегиын казакъёслэн Тер семья войскозылы пумит коньдон уждун но сиён-юон поттон сярысь соос понна куриськонэз со ас вылаз мед басьтоз». Казакъёслэсь сюрес вылэ 25 манет кутыса, 1772-тӥ арын 8-тӥ тулыспалэ Пугачёв соослэн кулэяськонъёссы сярысь сюлмаськыны мынӥз, со понна Моздокысь кулэ «харч» басьтӥз, но карысь потыкуз, ӝегатэмын вал. Югдурез сэрттон-пертчон дыръязы Пугачёв вераз, Донысь пегӟиз, нош 13-тӥ тулыспалэ, караулысь солдатэз Венедикт Лаптевез лӧпкытыса, пытсэт сьӧрысь кошкыны быгатӥз шуыса.

Улысь Курмоярскысь станицаын сюрес вылысен вал шедьтыса, Пугачёв ӝоген вордскем Зимовеяз берытскиз, кузпалызлы вуэмез сярысь лушкемен тодытӥз. Софья нылпиоссэ агаезлэн кышноез доры нуиз, собере Емельянэз куашкам улонэз понна синвуаськыса пыкылыны кутскиз. Пугачёв сое буйгатыны-оскытыны турттэ вал, Терекын сое атаманэ бырйизы шуыса, но кышноез валатскиз: со нош ик пегӟемын. Та дырлы Симон Павлов простить каремын вал ини, службазэ Таганрогын азьланьтӥз. Кылдэм югдурын Емельянлэн янгышез ӧжытгес, но со выросъёсыныз сое секытомытэ гинэ шуыса, Софья Емельянэз станицаысь кивалтӥсьёслы вузаны малпаз, семьяез понна тазьы умойгес луоз кожаз. Пугачёв сюлмысьтыз ик куаретӥз: «Ну ин, тазьы ке, мын но вера лыктэме сярысь». Софья агаезлэсь кышнозэ станицаысь кивалтӥсьёслы ивортыны куриз, ӝоген корказы казакъёс вуизы, Емельянэз, арест улэ кутыса, конвоен Улӥ Чир станицае келязы, татын сое пегӟисьёсты утчанэн вырись командалэн Федотов атаманэзлы сётӥзы. Федотов, сю манетэн вузаськыса, Емельянлы вань шуг-секытъёсысь потыны ӵектӥз. Пугачёв 50 манет шедьтыны оскытӥз но тодмо старшинаез Карп Денисовез куриз солы та коньдонэз пунэманы, Денисов мылысь-кыдысь соглаш луиз. Но коньдонлэсь кытысь потэмзэ тодэмез бере, Федотов взятка сярысь тодмо луэмлэсь кышкатскиз но Пугачёвез одӥгаз командировкае келям командае гожтыны пумит луиз. Пугачёв коньдонзэ Денисовлы берыктӥз, но соиз туж куриз, Емельян 10 манетсэ аслыз мед кельтоз, Черкасскын та уксё кулэ луоз шуыса.

Пугачёв Черкасске конвоен келямын вал. Сюрес вылысен, Цимлянск станицаын, пумитазы Пугачёвлэн Пруссиын службазэ нуэм эшез Лукьян Худяков сюриз. Пугачёвез Худяковлы оскизы, арестованноез интыяз вуттыны кылзэ юаса. Пугачёвлэн но Худяковлэн мадиськемъёсысьтызы азьпалаз кылдэм учыръёс воксё пӧртэмесь луо. Мускоын допросъёс дыръя Пугачёв вераз: Худяков солы валзэ сётӥз но соин пизэ келяз, арестованноез лушкем лэзьыны нодъяз, пичи пиезлы со понна кыл кутон уз луы шуыса. Худяковлэн верамезъя, куспазы номыр та сярысь нокыӵе кенешон ӧй вал, Пугачёв солэсь пизэ алдаз но пегӟиз. Озьы-а, тазьы-а, Емельян Пугачёв выльысь законэз пӧяз, таяз радэ Койсуха шур дурысь раскольникъёслэн поселениоссы пала вамыштӥз. Нырысь-валысь со ассэ Турциен кунгож дорозь мынӥсь партилэсь бере кылем казакен нималляз. Но сое «партия сьӧры уйиськыса» келяны мылкыд карем старообрядец Каверинэн вераськыкуз, Пугачёв ассэ вуж сямен вӧсяськись кариз. Пугачёвлы оскем Каверин, соиз «Инмарлы тыршемысьтыз пегӟиз» но огкадь вӧсяськисьёс борды итӥськыны мылкыд кариз кожаса, старообрядец Осип Коровка доры хуторе мыныны дэмлаз.

Осьып Коровка Пугачёвлы юрттыны мылысь-кыдысь басьтӥськиз, кенешыкузы Пугачёв беглой дон казак луэмзэ ӧз ваты ке но. Со вакытэ Россиысь азьвыл пегӟем уноез старообрядецъёслы Пётр III императорлэн Екатерина II императрицалэн юнматэм указэзъя Россие берытскыны но империлэн кунгож дуръёсаз интыяськыны луонлык сётӥзы. Польшаысь потэм вуж сямен вӧсяськисьёслы тупатэм Бендере мыныны дэмласа, Коровка Антон пизэ Пугачёвез келяны куриз, солы аслэсьтыз паспортсэ но сётӥз. Но Бендере мынон сюрес вылысен Антон Коровка но Пугачёв тодӥзы: Бендерын нокыӵе поселение ӧвӧл. Беглой староверъёсты берыктонъя партиосы пыриськыкуз, Пугачёв Польшаен кунгож котырысь интыосты умой-умой эскериз. Кӧня ке толэзьлы соос Антон Коровкаен Стародуб монастырьын ӝегазы, татысь Василий старец «кин кыӵе поселениын улыны мылкыд каре, отчы билетъёс басьтон» амал пумысен визьнодаз. Со понна старообрядческой Ветка слобода пыр кунгож дорысь Добрянскысь форпостэ вуыны но поселение выжон сярысь направление басьтыны мылкыд каремзы сярысь вераны кулэ вал. Пересь Василий Пугачёвлы кунгожез выжон понна тужгес умой вакыт бырйыны юрттӥз. Отӥяз ваньмыз могӟетъёстэк ортчиз — Россие бертӥсь трос мукет староверъёсын ӵош форпостэ вуыса, Пугачёв Добрянскысь комендантлы Мельников майорлы зэмос нимтулзэ ивортӥз, сое карантинэ келязы. Карантинын улыкуз, Емельян пегӟем солдатэн Алексей Логачёвен тодматскиз, соос старовер купеч Кожевников доры ӵош уже куриськизы, солы лапас пуктыны оскытӥзы. Карантин куать арня кыстӥськиз. 1772-тӥ арын 12-тӥ гудырикошконэ Пугачёв кема витем паспортсэ басьтӥз, соя со Волга дурысь Малыков волосте интыяськыны ыстэмын вал. Кожевников Пугачёвлы но Логачёвлы сюрес вылэ нянь сётӥз, озьы ик соос пыр Иргизысь вуж сямен вӧсяськись общиналэн кивалтӥсезлы игумен Филаретлы салам вераз.

Яицкысь казакъёсын пумиськон. Ассэ мурт чот возьматон

Паспортъёссэс кутыса, Пугачёв Логачёвен ӵош раскольникъёслэн тодмо сюрессы кузя вамыштӥзы, Черниговка гуртысь старовер Каверин доры пыразы, собере Осьып Коровка доры хуторе вуылӥзы, Глазунов станицаысь старовер казак Андрей Кузнецов доры кожазы. Сюрес кык толэзьлэсь кема кыстӥськиз. Паспортазы пусъем дыръя Малыковкае вуизы, Мечеть слободае игумен Филаретэн адӟиськыны дыртӥзы. 1772-тӥ арын шуркынмонэ интыязы вуыса, Инмар Анайлэн пыртон старообрядецъёслэн скитазы каръяськизы, настоятелез Филарет вал. Татын соос Яицк войскоын алигес пуромем бугыръяськонъёс сярысь кылӥзы.

Кожевников купечлэн Пугачёвлы дэмланъёсыз Иргизысь старообрядецъёслэн общинаысьтызы нимо-дано Филарет понна бадӟым инты басьтӥзы, лэся. Бератаз следствиын Логачёв солдат ивортылӥз: Филарет Пугачёвен кемалы кенешон вылысь ворсаськылӥзы, отчы сое, Логачёвез, пыриськыны ӧз лэзе. Ачиз Пугачёв следствие дыръя Филаретэн вераськемез сярысь показаниоссэ кӧня ке пол вошъяз, но, веранэз ӧвӧл, игумен яицк казакъёслэн ортчем бугыръяськонзы сярысь туж жаляса пусйиз, соос быдэсак староверъёс вал. Пугачёв вераськон куспазы Яикысь казакъёсты Кубаньысь некрасовецъёс борды итӥськыны дасян сярысь поттылыкуз, Филарет, пе, та ужрадын юрттӥськыны оскытӥз: «…Яике мын но вера соослы, тон соосты отчы келяны быгатӥськод шуыса. Соос де тонэн шумпотыса мынозы, ма, ми но ваньмы мыном… Яикысь казакъёслы туж бадӟым ыштон». 1774-тӥ арын коньывуонэ Пензаын допросъёс дыръя, бугыръяськисьёсты зӥбломытэмзы бере ни, Пугачёвез сюлоен тышказы, раскольникъёслэн лушкем вераськонъёссы улсын Емельян косэмысьтызы ивортӥз: Филаретлы шараям, ассэ утиськем Пётр III эксэй ниманы малпанэн улэ шуыса. Филарет, пе, малпан борды кырмиськиз но солы мыло-кыдо дурбасьтӥз: «Яикысь казакъёс талы оскозы, малы ке шуоно али соос туж урод уло, ваньзы пегӟемъёс пӧлысь, соос тыныд шумпотозы. Соос пӧлысь кин ке ӧз тодылы шат кулэм императорез, но со юнме шорысь, соос уз ченгеше, соослы возьматскы гинэ».

Заговоре пырем раскольникъёс сярысь темаез муромытыса, Пугачёв Пензаын ивортӥз: ассэ утиськем Пётр Фёдорович интые пуктыны малпанэз раскольникъёслэн скитазы польша кунгож дорын вордскиз, талы ваньзы дурбасьтӥзы; заговорщикъёс пӧлысь уноез солы юрттӥсь староверъёс вал, пе. Бератаз, Осип Коровка но мукет раскольникъёсын очно амалэн ставка дыръя, Пугачёв та верамъёсызлэсь быдэсак куштӥськиз. Али дырлы уноез историкъёс оско, ассэ Пётр III ниманы малпан Пугачёвлэн йыраз шуак чилектӥз 1772-тӥ арын шуркынмонэ, Яик каре нырысьсэ вуылэмез бере.

Пугачёвен кенешемез бере, Филарет солы Степан Косов тодмоезлэн квартираяз интыяськыны юрттӥз. Каръяськемез бере кӧня ке нунал ортчыса, Пугачёв тодӥз, Косовлэн варматаез Семён Филиппов крестьян Яицк каре чорыглы мыныны дасяське шуыса. Филиппов сьӧры куриськиз, сюрес вылын ни Пугачёв яицк казакъёсты Кубане кошкыны ӝутъяны малпанэз сярысь чакласькытэк шараяз. Яицк каре мыныкузы, Филиппов Таловой умётэ (постоялой дворе) дугдӥз, сое Ерёмин Курег кушемнимо отставкаысь солдат Степан Оболяев возиз. Пугачёв Оболяевлэсь Яицк карысь калыклэн мылкыдъёсыз сярысь юалляськыны кутскиз но, соиз сое артысь пӧйшуран землянкае огдырлы интыяськем Закладнов казакъёсын ваче вуттӥз. Григорий но Ефим Закладновъёс Пугачёвлы алигес ортчем бугыръяськонъёс, властьлы пумит ӝутӥськемъёсты пазьгемзы бере быдэс войсколэн «Астрабадэ» хан доры кошкемез потон сярысь мадизы. Ассэ купеч нимась Пугачёв соосын некрасовецъёс доры кошкон сярысь вераськон мытӥз, та ужрадлы солэн трос коньдонэз вань шуыса, пусйиз. Закладновъёс мятеж «войско» палась мукет казакъёслэсь мылкыдъёссэс тодыны оскытӥзы. 22-тӥ шуркынмонэ Яицк каре вуыса, Филиппов но Пугачёв алигес восстание пыриськем мукет мурт Денис Пьянов доры квартирае дугдӥзы. Емельянэн вераськыкуз, Пьянов казакъёслэн правительство но «старшина» ласянь чиданъёссы, ӝожомонъёссы, мынӥсь следствие но возьмам приговор сярысь эшшо пыр-почгес вераз на. Пугачёв ачиз ласянь бугыръяськонэ пыриськемъёслы но ватскемъёслы Кубане пегӟыны юрттонэз радъян мылкыдыз сярысь мадиз, солэн со понна коньдонэз вань шуыса вераз, котькуд казак семьялы 12 манет сӥзиз, соосын ӵош «турецкой улосэ» мыноз шуыса пусйиз. Кенешон куспазы Пьянов ивортӥз: вань бугыръяськись казакъёслэсь мылкыдзэс ӝутӥз Волга палась казакъёс пӧлын «царицын» Пётр III императорлэн кылдэмез сярысь вераськон. Пумитаз Пугачёв аслыз но малпамтэ шорысь, вылды, вераз: «Мон-де ведь купеч ӧвӧл — государь Пётр Фёдорович, мон со-де Царицынын но вал, Инмар но ӟеч адямиос монэ утизы, нош мон интые караул солдатэз быдтӥзы, Питерын но монэ одӥг офицер утиз».

Пьяновлэн шуак кылдэм государьлы оскыны дась луэмез Пугачёвез аслаз Петербургын но Царицынын «паймымон утиськемез» сярысь выль мадёсъёс малпаны мылкыдзэ бугыртӥз. Яицк карын арня улыса, соос кенешизы: Пугачёв Яике тол багренье вакытлы — осетръёсты сяме пырем кутылон вакытлы вуоз, ӵапак соку вань казакъёс огазе люкаськозы, соку ик «умой адямиосын» вераськыны луонлык кылдоз. Пьянов пересьёсын государь сярысь вераськонэзлы оскытӥз. Каре вуылыкуз, Пугачёв городын кузёяськись мылкыдъёсты синйылтылӥз. 1774-тӥ арын куарусёнэ следователь Маврин Пугачёвлэн нырысетӥ допросэз ортчем бере гожтӥз: «Со, Пугачёв, Яик каретӥ калык пӧлтӥ ветлылӥз, озьы казакъёслэсь кылдэм югдур сярысь йыркуръяськемзэс, ог-огзылы кӧтӝожъёссэс, старшина сярысь мадёнъёсты кылӥз». Филиппов вузкарон ужъёссэ йылпумъяз шуыса ялӥз гинэ (Пугачёв кӧня ке бадӟым сазанъёсты басьтэмъяськиз), сюресчиос Волга пала берен вырӟизы. Но Филиппов ӝоген эшезлэсь ӝегаз, Пугачёв талы воксё ӧз паймы. Таловой умётын Пугачёв, пыр-поч пусйылытэк, Ерёмин Куреглы ивортӥз, Ымусьтонлы берытскоз шуыса. Вуэмез бере Пугачёв Малыковкае ваем чорыгзэ вузаны мынӥз, отын 19-тӥ толсуре сое Филипповлэн казакъёсты Кубань сьӧры пегӟыны ӝутъямез пумысен чагиськемезъя арестовать каризы.

Пугачёвез кырмизы но следствие ортчытон вылысь Симбирске келязы. Пугачёв ивортӥз, со пегӟем дон казак шуыса, но Яикын Кубаньын улӥсь некрасовецъёс сярысь мадьылэмъёсыз пумысен ӝот-ӝот шуиз: ноку нокинэ пегӟыны ӧз ӝутъя. Арестованноез Симбирске келясь «розсыльщик» Попов Пугачёвлы ӵектӥз судьяосын ужез взятка пыр сэрттыны-пертчыны, коньдон понна ачиз но сое лэзьыны дась луэмзэ возьматӥз. Но Пугачёвлэн коньдонэз чик ӧй вал, Мечеть слободае берытскемез бере сётыны сӥзиз вал, уксёез, пе, Филарет игумен дорын утиське. Симбирскысь Пугачёвез ӝоген Кузонэ келязы, отын 1773-тӥ арын 4-тӥ толшоре сое кузон генерал-губернатор Брандт доры допросэ вуттӥзы. Соиз Пугачёвлэн ужезлы бадӟым саклык ӧз висъя, токма супыльтонъёс сярысь вераськон мынэ шуыса. Кузон тюрьмаысен Пугачёв Филаретлэн вераськонъёсаз поттылэм Щёлоков купечен герӟаськиз, солы «кирос но туш понна» курадӟемез сярысь ивортӥз. Щёлоковлэн выль тодмоезлы кызьы ке юрттыны луонлыкез ӧй вал, но Пугачёвез сотэк но ӝоген пытсэт сьӧрысь капчиятэм режиме выжтӥзы.

Следствие йылпумъяськем бере Пугачёвез «сюлояны» но Сибире каторгае келяны, «татын казённой уже кыскыны но сиськон-улон понна нуналаз куинь копейка тырыны» косэмын вал. Приговорез Петербургын 3-тӥ инвожое ӟечен юнматӥзы. Котьма ке но, 1773-тӥ арын куартолэзе, тюрьмаосын выльдӥськонъёс мынэмен, пуктэмъёсты пытсэт сьӧрысь азбаре выжтӥзы, татысь соосты дырын-дырын кураськон вылысь эрике потталязы. Со вакытэ Пугачёв соин ӵош пукись Парфён Дружинин купечен но Григорий Мищенков караул солдатэн пегӟон сярысь огкылысь вераськизы. Малпам планзэс 29-тӥ куартолэзе быдэстӥзы, со понна кыкетӥзэ караул солдатэз сектазы. Пегӟон ужрад ӟеч радъяськем бере, 1773-тӥ арын гудырикошконлэн кутсконаз, Пугачёв Яицк войсколэн музъем вылаз, Яик карлэсь 60 версталы гинэ кыдёке пуксем солы тодмо Таловой умётысь Степан Оболяевлэн постоялой двораз вуиз.

Восстанилы дасяськон

Росси кунлэн шоркарезлэсь кема дыр ӵоже палэнын интыяськеменызы, яицк казакъёс XVIII дауре петербург кивалтӥсьёслэн зӥбетсы улэ шедизы, аскивалтонысь трос люкетъёссэ ыштӥзы, старшинаосты но атаманъёсты бырйыны ӧз быгатэ ни. Даурлэн шораз ожгарчиос кыклы люкиськизы. «Старшина» палыз быръёнъёсы пыриськонлэсь палэнтэменызы пайдазэ шӧдыны ӧдъязы, правительстволэсь политиказэ вӧлмытӥсь луиз. Яицк войское пырись бадӟым люкетысьтыз «ожгар» палыз выльдӥськонъёслы пумит луиз, трос пол ӝутскылӥз, ярантэм старшинаосты но атаманъёсты ужудысъёсысьтызы куштыны правоез берыктыны, Петербургысь Ожгар коллегия пыриськытэк, войско чакламъя выльёссэ интыязы юнматыны курылӥз. Кема дыр ӵоже гыбдась ваче вуонъёс 1772-тӥ арын толшоре шара бугыръяськонозь вуттӥзы, пуромем войско правительство ки улысь ӝыны арлы потӥз. 1772-тӥ арын шуркынмонэ, Пугачёвлэн Яике нырысьсэ вуыку, Фрейман генераллэн зӥбломытӥсь экспедициеныз инвожое пазьгем ожгар палась казакъёс следствилэсь йылпумъянъёссэ возьмало на вал. 1773-тӥ арын пӧсьтолэзе, Пугачёвлэн кузон тюрьмаысь пегӟемез дырысен Таловой Умётэ вуэмезлэсь кӧня ке арня азьло, бугыръяськонэ пыриськемъёслы Яик карын берпуметӥ приговор ялэмын но быдэстэмын вал. Екатерина II приговорлэсь нырысетӥ куронъёссэ трослы небӟытӥз, кужмысь виёнэз палэнтӥз. 16 казакъёслэсь нырпелесъёссэс ишканы, ымныразы пусъёс пуктылыны но каторгае келяны юнматэмын вал, 38 казакъёсты семьяосынызы ӵош — Сибире келяны, Турциын ожмаськем 31 казакъёсты армейской полкъёсы келязы. Восстание вань пыриськемъёс вылэ со вакытъёсъя туж бадӟым штраф понӥзы, тыриськонлэн быдӟалаез улыны вормонтэм вал. Штраф войско партилы дурбасьтӥсьёс гинэ тыризы бере, войскоын ваньбуръя висъяськон зол шӧдӥськиз, ожгар но старшина луись партиослэн ваче вуонъёссы эшшо но кужмоязы. «Пётр Фёдорович» ӟеч эксэй сярысь супыльтонэз вӧлмытонлы инъет тужгес ӟеч луиз, соин ик та вераськонъёс ялан йылӥзы но паськытазы.

1772-тӥ арын шуркынмонэ—толсуре Пугачёвлэн Яицк каре но Таловой Умётэ вакчи дыр куспын ветлэмез яицк казакъёс пӧлын трос куашетон поттӥз. Яике государьлэн вуылэмез сярысь вераськонъёс соку ик быдэс войско тыр вӧлмизы, 1772-тӥ арын восстание пыриськемъёс но кыдёкысь хуторъёсын, старообрядческой скитъёсын, Узеньысь степьын следствилэсь пегасьёс пӧлын но. Котькинлэсь яркытгес со сярысь допросъёсын арест улэ шедем Пугачёвлэн одӥгез валтӥсь юрттӥсез Чика Зарубин мадиз: «…ми де, ожгар палась казакъёс, ваньмы со сярысь малпаллямы но тулысэз витьылӥмы; кытын гинэ ӧм пумиськылэ, войскоысь казакъёс ялан вераллязы: „Вот государь луоз!“ Лыктӥз ке, сое пумитаны дасяськылӥмы».

Оболяев, постоялой двораз Пугачёвез адӟыса, соку ик тодмаз. Яицк карын ужъёс сярысь юалляськыса, Пугачёв тодӥз: Денис Пьянов, ас дораз «Пётр Фёдорович императорен» нимам адямиез пумитам-утялтэмез пумысен иворъёс вӧлскемен, ачиз пегӟисьёс радын. Пугачёв Таловой Умётын кӧня ке нунал улӥз, Яицк каре сюрыны луонлык витьыса. Огаз нуналэ Оболяевен мунчое мынӥзы, отын Ерёмин Курег Пугачёвлэн висемез бере кылем гадьысьтыз вурысъёсыз пумысен тунсыкъяськиз. Пугачёв соосты эксэй пусъёс шуыса нимаз, Оболяевлы валэктӥз: со нокыӵе казак ӧвӧл — «государьды Пётр Фёдорович». Куалектэм Оболяев пумитъяськиз, Пётр эксэй кулӥз шуыса. Но Пугачёв лулысь-сюлмысь аслэсьтыз историзэ азинтӥз: Пётр Фёдорович улэп, трос аръёс ӵоже «зарезь сьӧрын» вал, нош али, «яицк казакъёсты таркамзы сярысь» тодыса, юри татчы вуиз но соослэн юрттэменызы, «Инмар лэзиз ке, нош ик эксэй луыны медэ». Кышкатскем Оболяевез куриз азьвыл восстаниез ӝутӥсьёс пӧлысь азьветлӥсен пумиськон радъяны. Оболяев, самозванецлы оскыса, талэсь азьвыл нуналъёссэ соин огшоры адямиен сямен ассэ воземез понна простить карыны куриз, Пугачёвлы вераз, тодмо казак Григорий Закладнов вите ни, солы усьтӥськыны яралоз шуыса.

Закладнов Пугачёвез тодмаз, солэн Таловой Умётын кылдэмезлы воксё ӧз паймы. Пумиськонзы дыръя Пугачёв ассэ нош ик Пётр Фёдорович эксэй кариз но карын оскымон казакъёслы ӝегатскытэк та сярысь ивортыны куриз. Закладнов Яицк каре дыртӥз, татын тодмо казакъёслы, алигес бугыръяськонъёсы пыриськемъёслы, нырысь ик Иван Фофановлы но Максим Шигаевлы ивор сярысь мадьыны медэ вал, но таосты дорысьтызы ӧз шедьты. Закладновлэсь кема витем «государь» сярысь кылыса, Таловой Умётэ мадиськонъёслэсь зэмлыксэс эскерыны Караваев но Кувшинников казакъёс шонтӥзы. Соос азьын Пугачёв, Ерёмин Курег юрттэмен, «эксэй аудиенциез» возьматӥсь сценаез аслаз валамезъя шудӥз, казакъёс абдразы. Соос куашкан калэ вуэмзы но старшина вылэ кӧтӝожъёссы сярысь мадизы, войско партие пырись оскымон муртъёслы лушкем ивортыны сӥзизы, кошкон азязы синвуаськизы. Казакъёс кыӵе ке но гожтэм указ сьӧразы келяны куризы, соку Пугачёв нырысьсэ малпаськонэ усиз, мадёсъёссэ азинтон понна солы, воксё неграмотной адямилы, «подлинной» эксэй ужкагазъёс пӧраны быгатӥсь мурт али ик кулэ.

Кӧня нуналъёс ӵоже Пугачёв Григорий Закладнов, Денис Караваев но Кунишников казакъёсын ӵош Яицк войсколы «государьлэн» вуэмез сярысь ӝоген ивортон понна нырысь ик радъяно ужпумъёсты эскериз: знамяос но ожгар походлы чаклам мукет материалъёс, озьы ик «ӟеч платья но бархат изьы» кулэ вал. Казакъёс лулысь-сюлмысь «гожтэм указ» кулэ шуыса вераллязы, сотэк вазиськонлэн законлы тупась луэмзэ выль бунтлы дасяськись казакъёс но уз валалэ. Огкылэ вуизы: Пугачёв Оболяевен ӵош Мечеть слободае «эксэй ужъёсъя» мынозы — «эксэй указъёсты» лэсьтыны грамотной адями ӝогак шедьтыны кулэ вал. Со вакытэ казакъёс оскымон адямиосты тросгес ивортыны кулэ вал. Уноез историкъёс пусъемъя, самозванец но яицк казакъёс огъя ужпумъёссэс нырысьсэ эскерыкузы ик, Кубань сьӧры кошкон сярысь нокыӵе вераськонъёс ӧз мынэ ни, соку ик казакъёслэсь улонзэс зэмлыко эксэй кивалтэм улсын шонер радъям пумысен кенешылӥзы. Казакъёсын люкиськыса, Пугачёв старообрядецъёслэн поселениосазы дыртӥз, татын чаклам ужрадын юрттыны быгатӥсь грамотной адями шедьтыны оскиз. Мечеть слободаын со тодмамын вал, Пугачёвлэн тодмоез Степан Косов, кинлэн юрттэмезлы со оскиз, валаз, Пугачёв пегӟемын шуыса, Кузонысь пегӟем арестант сярысь Мечеть слободалэн старостаезлы ивортӥз. Радъям утчанъёс борды старообрядецъёслэн скитъёсысьтызы монахъёс итӥськизы. 1773-тӥ арын 27-тӥ гудырикошконэ Пахомиев скитэ вуэм Пугачёв но Оболяев адӟизы, монахъёс соосты ӝегатон вылысь доразы бызё шуыса. Оболяев, кивалтӥсьёслы сьӧлыктэм луэмез пумысен оскытыны быгатоз кожаз, Пугачёвлы Яик доры пегӟыны ӵектӥз, ачиз ассэ арестовать карыны сётӥз. Пугачёвлы ватскыны удалтӥз, со Таловой Умётэ вуыны быгатӥз, отын сое яицк казакъёс Денис Караваев, Максим Шигаев, Иван Зарубин-Чика но Тимофей Мясников возьмало вал ини.

Та выль пумиськонын Пугачёв «эксэй пусъёссэ» выльысь возьматӥз, но соосты адӟемысь кылдэм мылкыдъёс котькуд выль тодмозэ огкадь ӧз шукке ни. Берпум допросъёсын Тимофей Мясников, ӝоген «императорлэн» личной сотняезлы командире юнматэм мурт, «эксэй вирлэсь» тодметъёссэ возьматэмысь, пе, юзыр-кезьыр луиз, осконо я ӧвӧл шуыса, сюлмаськонъёс быризы. Но кыкез казакъёс, алигес восстание пыриськемъёс гинэ ӧвӧл — сое валтӥсьёс Максим Шигаев но Чик Зарубин нокыӵе ӧз кариське. Арестовать каремзы бере допросъёсын Зарубинэн Шигаев но, ачиз Пугачёв но вераллязы, алдаськон ӧй вал со шуыса. Ваче син юн-юн юалляськонъёс дыръя Пугачёв дон казакъёс пӧлысь потэмез сярысь оскытӥз. «Эксэй история» борды кырмиськем вань яицк казакъёслэсь малпанъёссэс валэктыны луэ Чикалэн Пугачёвлы верам кылъёсыныз: «…ведь мыным нокыӵе уг йӧты: хоша тон дон казак, только ми тонэ государь чот лыдъямы ини, озьы ик со луыны кулэ». Соин ик, дыр, Тимофей Мясников но янгышсэ небӟытон понна допросъёсын ассэ ваньмызлы капчиен оскись возьматыны турттэ вал. Огез эшсылэн пусъемезъя, бугыръяськонъёс дыръя со чылкак мукет вераськиз: «… ми трос дэмланъёс но вераськонъёс пӧлын адӟимы со пушкысь (Пугачёвысь) кужмо луэмзэ но быгатонлыкъёссэ, сое утёно кариськимы но сое милемын кивалтӥсь, бытэм-ыштэм йылолъёсмес но сямъёсмес выльысь улӟытӥсь карыны асьмеос малпамы. Озьы но ми сое асьмелы кулэм эксэй Пётр Фёдоровичен ниманы малпамы…».

Кожевниковлэн хутораз, отӥяз эшшо пыдлосьгес Усихиноын войсколы но калыклы вазиськонъёс пумысен кенешонъёс азинтӥськизы. Яицк карысь вуэм казакъёс войскоысь 12 вуж знамяосты вуттӥзы, соосты 1772-тӥ арын бугыръяськонъёс дырысен лушкем ватыса возизы, со сяна, выль знамяосты вурон вылысь материалъёс (шёлк, шнуръёс но мукет) басьтэмын вал. Указъёсты гожъяны быгатӥсь визьмо казак но сюриз: 1772-тӥ арысь бугыръяськонъёсы пыриськем Яков Почиталин атайлэн нодъямезъя, Пугачёв доры Иван Почиталин лыктӥз. Со дыре правительстволэн гарнизонысьтыз комендант, Яицк карысь подполковник И. Д. Симонов, ассэ «Пётр III» нимась адями войскоын кылдэмын шуыса тодэмез бере, самозванецез кутыны кык команда келяз. 8-тӥ куарусёнэ Пугачёв палаз пыриськисьёсын ӵош Толкачёв хуторе выжиз. 1773-тӥ арын 13-тӥ куарусёнэ Е. И. Пугачёвлэн нимыныз Яицк каре казакъёс пӧлын агитация нуыны лыктэм Т. Мясников войскоын ватскись «государь» сярысь шара сямен вералляз, шӧдтэк кыльыса, пегӟем интызэ но пусйиз. 15-тӥ куарусёнэ комендантлэн канцелярияз донос вуиз, Караваев кырмемын вал, со нуналэ ик комендант И. Д. Симонов степе М. М. Бородин старшиналэсь утчась командаоссэ ыстӥз. 16-тӥ куарусёнэ Пугачёвлы ивор сётыса вуттӥзы. Та дырлы заговорщикъёслэн радазы Е. И. Пугачёвен ӵош пыризы: И. Н. Чика-Зарубин, В. С. Коновалов, И. Я. Почиталин, С. А. и С. В. Кожевниковы, В. Я. Плотников, А. Т. но К. Т. Кочуровъёс, Идеркей Баймеков, Т. Г. Мясников, М. А. Кожевников, Д. С. Лысов, К. И. Фофанов, Баранга Мустаев, В. А. Кшинин, Сюзюк Малаев, Уразгильды Аманов, Ф. А. Чибикеев, Балтай Идеркеев, М. В. Чернухин, П. П. Толкачёв, Яицк карын соосты М. Г. Шигаев, Я. Ф. Почиталин витизы.

Восстаниез ӝутыны музъем дась вал ни: эриксэс талам казакъёс пӧлын йыркуръяськисьёс, крестьянъёсты монастырьёс бордысь люкемзы бере эрико луэмзэс витисьёс, горно-заводской крестьянъёс пӧлысь ӝожомисьёс. Тросэз казакъёс ӧз оскылэ Пугачёвлэн Пётр III луэмезлы, но ваньзы со сьӧры вамыштӥзы. Аслэсьтыз неграмотной луэмзэ ватыса, со манифестъёс улэ ӧз гожтӥськылы; зэм, солэн «автографез» нимысьтыз кагазын утиськиз, сое возьматыкуз, та ужкагаз «латынь» кылын гожтэмын шуыса, визьмо адямиослы ивортылӥз.

Бунтэз валтӥсь

Валтӥсь статья: Пугачёвлэн восстаниез

1773-тӥ арын 16-тӥ куарусёнлы ӝыт Бударино форпост котырысь Толкачёв агайёслэн хуторазы ог 40 яицк казакъёс, служивой калмыкъёс но бигеръёс, люкаськизы. Почиталинэн гожтэм указэз Яицк войсколы лыдӟизы, солы ваньзы дурбасьтӥзы. Пугачёв указ улэ ӧз гожтӥськы, валэктӥз: Петербурге вуытозяз ужкагазъёс улэ кинюртэмзэ пуктыны уг быгаты. Люкаськем калыкез матысь форпостъёсысь но хуторъёсысь палазы пырисьёсты бичаны курыса, Пугачёв ӵуказеяз Яицк кар доры потоно кариськиз.

Василий Перов, «Пугачёвлэн судэз» (вариант), 1875.
Историяя кун музей (Муско)

17-тӥ куарусёнэ 60 муртлэсь отряд вӧлъям знамяосын походэ вырӟиз, пумиськем форпостъёсысь но хуторъёсысь адямиосты люкаса, 18-тӥ куарусёнэ Яицк кар доры вуыкузы, отрядын 200 пала адями лыдъяськиз ни. Ӝоген Пугачёв доры Чаган шур вамен Д. Лысовлэн, бӧрысьгес А. Овчинниковлэн отрядъёссы итӥськизы, со сяна, бугыръяськисьёс вылазкае потэм А. Витошнов старшиналэсь 200 казакъёсын войскоысь командазэ котыртӥзы но сётскыны косӥзы. Озьы ке но карез штурмен басьтыны кужымзы тырмыт ӧй вал, 19-тӥ куарусёнэ выльысь кар доры вуыса, Пугачёв войскоеныз Яик кузя выллань вамыштӥз. Та нуналэ ик Витошновлэн отрядысьтыз Пугачёвез государен лыдъяны пумит луись 11 казакъёсты казнить каризы .

Рубёжной форпост дорын круг люкамын вал, отын походэ потэм войсколы атаманэ Андрей Овчинников быръемын вал, полковнике — Дмитрий Лысов, Андрей Витошнов есаул ним басьтӥз, Тимофей Мясников Пугачёвлэн гвардейской сотняеныз кивалтыны ӧдъяз. Допросъёсын Пугачёв пусйылӥз, со та дырысен армиеныз ӧжыт кивалтӥз, угось котыр интыосты но, адямиосты но ӧз тодылы. Казакъёс асьсэос форпостъёсын, станицаосын но хуторъёсын калыкен вераськылӥзы, эшъёссэс бордазы итӥськыны ӧтьыса.

20-тӥ куарусёнэ Илек каре Овчинниковез келяса, ӵуказеяз Пугачёв отчы нокыӵе могӟетъёстэк пыриз, Иван Творогов кивалтэмез улсын илек казак полкез войское кутӥз. Яик гоже сюрем крепостьёсты — Рассыпное, Нижнеозерное, Татищево, Чернореченое — басьтон огвыллем сценария ортчиз, казакъёс Пугачёв доры выжизы, офицеръёс берпум шокчытозязы жугиськизы, улэп кылемъёсты виселица витиз. Татищевоез киултэмзы бере Пугачёв Елагин комендантлэн нылызлы, Нижнеозёрное крепостьысь нунал азьвыл ошем комендантлэн З. И. Харловлэн кышноезлы Татьяна Харловалы синмаськиз. Сое аслаз коляскаяз келяны косӥз, соин артэ вынзэ кельтӥзы.

Казакъёс Пугачёвлэн синмаськонъёсыз шоры кырыж учкылӥзы, кыӵе ке решениосты кутыкуз, мукетыз малпанъёссэ воштыны медаз быгаты шуыса, чаклаллязы. 3-тӥ шуркынмонэ, Пугачёв палэнскем дыръя, соос Харлова наложницазэ но солэсь Николай вынзэ ыбылӥзы. Бератаз озьы ик пленэ кутэм но Пугачёвен жалям, службае аслыз кельтэм куд-ог офицеръёсты но быдтӥзы.

Ортчем Крестьян ожлэн интыосызъя карта

Черноречное крепостез киултэмзы бере Пугачёвез бигер Сеитов слободаын но Сакмара карын сӥё-дано пумитазы, ӵапак татын командировкае келям яицк палась казакъёс службазэс нуизы. Сеитовысь слободаын мишари но башкир калыклы «государьлэн» армияз пыриськыны ӧтьыса вазиськон указ гожтэмын вал, со понна сикъёсын, шуръёсын, дарыен но сылалэн кузёяськыны лэземын вал. Бугыръяськисьёс радэ озьы башкиръёс, бигеръёс, калмыкъёс мыло-кыдо султӥзы. 1773-тӥ арын 5-тӥ коньывуонэ Пугачёв Оренбург дорозь вуиз, оренбург казакъёслэн люкетсы — Бёрды слободаын но Форштадтын (Оренбург котырысь казакъёслэн улон интызы) улӥсьёс озьы ик восстание ӝутэм армие пыриськизы. Карез котыртӥзы, 1774-тӥ арын южтолэзёзь сое котыртэмын возизы. Крепость котырысь валъёсты юнматыса, гуосты муромытыса но паськытатыса, губернатор Рейнсдорп офицеръёсын ӵош огкылэ вуизы: карез вань кужмысь возёно, угось пугачёвъёсын ожмаськонэ келям кӧня ке вылазкаоссы куашказы. Тазьы возиськонзылэн одӥгез валтӥсь мугез — казакъёслэсь но солдатъёслэсь бугыръяськисьёс доры выжемзылэсь кышкан вал.

Тодмо инты: татын 1773-тӥ арын Емельян Пугачёвлэн ставкаез вал. Оренбург, Бёрды микрорайонысь Восстанилэн ульчаез, 30-тӥ юрт

Кезьытъёс вуэм бере бугыръяськисьёслэсь армия лагерьзэс Оренбурглэсь кӧня ке иськемлы палэнэ пуксем Бёрды слободае выжтӥзы. Ситников казаклэн куать укноем юртаз эксэй дворец лэсьтӥзы — «Зарни палаталэн» пушкысьтыз борддоръёсыз зарнивуам фольгаен лякылэмын вал, ӵапак со В. Перовлэн «Пугачёвлэн судэз» картинаяз суредамын. Оренбургез котыртэм дыр ӵоже бёрды лагерьын Пугачёв ожмаськонъя но ожез нуонъя дышетонэ мыло-кыдо пыриськиз. Яикысь казакъёс бератаз вераллязы, со «…ваньмызлэсь умой тодэ вал, кызьы артиллериын радлыкез возьыны», «… пушкаосты но мукет орудиосты ӵемысь ачиз пуктылӥз», «…пушкаосысь, мукет орудиосысь ыбылыны тодылӥз, канониръёслы ачиз указаниос сётъяз» (И. Почиталинлы, Т. Подуровлы, М. Шигаевлы лэсьтэм допросъёсъя протоколысь), ожмаськыны быгатонлыкез озьы шӧдскылӥз.

«Пугачёв пушка» ас лэсьтэм лафет вылын (34-мм калибр, туй, 51 кг секталаез)

1774-тӥ арын толшор пумын Пугачёв Яикысь кар крепостез штурмен басьтонэн ачиз кивалтыны вуиз, отчы правительстволэн гарнизонэз правительстволы оскымон кылем казакъёсын пытсаськиз. Та дырлы Толкачёв атаман, улысь Яик доры адямиосты но пыӵалтӥрлыкез люкаса, Яицк карез киултӥз, бератаз со борды Гурьевез вормем Овчинников итӥськиз. Казакъёс, «эксэез» войско борды юнгес думемзы потыса, Пугачёвез яицк нылъёс пӧлысь кышно бырйыны косӥзы. Кӧня ке пумитъяськемез бере, Пугачёв соглаш луиз. 1772-тӥ арысь бугыръяськонъёсы пыриськем отставкаысь казаклэн Пётр Кузнецовлэн 17 аресъем синмаськымон Устинья Кузнецова нылыз доры курасьёсты ыстӥзы — яратоно Иван Почиталинэз но атаман Михаил Толкачёвез кышноеныз ӵош. 1-тӥ толсуре Яицк карысь Петропавловской черкын эксэй сюан шудӥзы, отӥяз Устинья «императрица» луиз. Егитъёсты азьвыл атаманлэн А. Н. Бородинлэн юртаз интыязы. Черкын кузпалъёсты вӧсям баӵкоосты бугыръяськонэз зӥбем бере ужудысысьтызы палэнтӥзы, санзылэсь мозмытӥзы. Со дыре ик пленэ кутэм Тимофей Мясников допросын вералляз, та сюан бугыръяськисьёс пӧлысь ваньмызлы ӧз кельшы шуыса: «Соку вань пересьёс та сярысь малпаськонэ усизы, ма, вань ожгарчиос но та ужлы йыркуръяськизы. Соку куд-огъёсыз та кышнояськонлы паймизы-валатскизы, государьёс угось огшоры муртъёсты кышно уг басьто вал, соос котьку но мукет государствоосысь эксэй яке эксэй нылэз ваё. Озьы солы но, государствоез киултэм бере ини та сямез адӟем кароно вал».

Ӧвӧлтэм дыръяз оренбург гарнизонлэн мерскемез но бугыръяськисьёслэн армиысьтызы Шигаев, Подуров но Хлопуша кивалтэм улсын соосты вормемзы сярысь тодыса, Пугачёв огдырлы Бёрды слободае берытскиз, та дыр куспын Михайло-Архангельской собор улэ гу дасяны косӥз, отын котыртэме сюрем правительстволэн гарнизонэз дары (ӟуч: порох) возе вал.

Тулыспал шорын со Яицк каре выльысь берытскиз, бадӟым войскоосты люказ, отын войсколы атаманэ Никита Каргин быръемын вал, старшинае — Перфильев но Фофанов. 19-тӥ тулыспалэ гудэм бервылэ интыям минаез пуштӥзы. Та Михайловской соборлэсь гырлы ӝугонзэ быдэсак куашкатӥз, но гудӟон сярысь азьвыл ик алэм крепостез утисьёс дарыосын запасэз поттыса вуттӥзы, озьы ке но 42 мурт быриз но Симонов комендант сӧсыртэмын вал, ретраншементэз утисьёс Андрей Прохорович Крылов капитан (вуоно баснописецлэн атаез) кивалтэм улсын урдскисьёсты вормыны быгатӥзы.

Южтолэзе, Яиц карысь Михайло-Архангельской соборез киултыны быгатымтэзы бере, Бёрдые вуыса, Пугачёв котыр гуртъёсысь крестьянъёслэсь Лысов атаман вылэ калыклэсь ваньбурзэ таламез пумысен ӝожтӥськемзэс кылзӥз. Та понна Пугачёв сое куаретыны кутскиз, казнить каронэн кышкатӥз. Лысов пумитаз Пугачёвлэн урдэсаз пикаен донгиз, но сое дӥсь улысьтыз кольчугаез быронлэсь утиз. Юрттыны вуэм Почиталин Пугачёвез мукет урдсконъёслэсь утиз. Шигаев азьвыл дырысен эш луись Лысов пала пыриз, пыдесъяськыса улэп кельтыны куриз ке но, Дмитрий Лысовез Бёрдыысь слободаын ошизы.

Правительстволэн войскоосыныз А. Бибиков кивалтыны кутскемен, пугачёвъёс ожмаськонэз келяны, гож дорысь басьтэм крепостьёсты огзы бӧрсьы огзы сётыны ӧдъязы. Котыртэме басьтэм Оренбург пала кык колоннаен вамыштыса, Мансуров но Голицын генералъёслэн кивалтэмзы улсын правительстволэн войскоосыз Пугачёвез улослэсь шоркарзэ мозмытыны косӥзы. 22-тӥ южтолэзе Татищевоысь выльысь дыртыса ӝутэм крепость дорын ожмаськон пуромиз. Ожмаськон лек вал ке но, ӝоген валамон луиз: правительство палась ожгарчиос вормо. Пугачёв аслаз гвардиысьтыз сотняен Тимофей Мясниковлэн кивалтэмез улсын крепостьысь кошкизы, сое утён, Пугачёвлы ӟечкын кошкыны луонлык сётон вылысь яицк казакъёслэн походысь атаманзы Андрей Овчинников кылиз.

Бёрды лагере вуыса, Пугачёв казак полковникъёсын Яицк кар доры потоно кариськиз. Выль ожлэсь кышкаса, пугачёвъёс правительстволэн войскоосыныз киултымтэ сюресъёсты утчаны ӧдъязы, но Переволоцкысь крепость котырын тушмонъёсын пумиськизы, шундыӝужан пала кожизы. Озьы 1-тӥ оштолэзе Сакмар кар дорын Голицын генераллэн валтӥсь кужымъёсыныз эшшо одӥг пол ожмаськоно но ожез тар-тар келяно луизы.

Аслаз сотняысьтыз кӧня ке кузя кылем казакъёсын но башкиръёсын Пугачёв Ташла черкогурт доры чигназ, отӥяз Белая шурлэн меӵ кожонэз сьӧры потӥз, нырысь Воскресенск заводэ, собере Белорецк заводэ вуиз, татын со 1774-тӥ арын 1-тӥ куартолэзёзь улӥз. Быдэс толэзь ӵоже шутэтскыны но кужым люканы луонлыклы шедем муг — Бибиков командующийлэн кулэмез, та генералъёс пӧлын эчешонъёс кылдытӥз — генерал Голицын генерал Щербатовез та постэ пуктэмлы йыркуръяськиз. Восстание ӝутӥськемъёслэн пазьгем но степь кузя пазьгиськем отрядъёссы вылысь Урал котыре люкаськыны ӧдъязы, 5-тӥ—6-тӥ куартолэзе бугыръяськисьёс Магнит крепость вылэ урдскизы, штурм дыръя Пугачёвлэн бур киыз сӧсырмиз.

Магнит крепостез басьтэмзы бере, татчы Овчинников кивалтэм улсын яик казакъёслэн бадӟым отрядъёссы вуизы, озьы ик Белобородов но Максимов кивалтэм улсын урал крестьянъёс но гурезь заводъёсысь ужасьёс бордазы итӥськизы.

Магнит крепостез киултэмзы бере, Пугачёв войскозэ уйпал но шундыӝужан пала азьлань нуиз, заводысь крестьянъёсын сое пумен йылтыса, Карагайысь, Петропавловскысь Степноеысь крепостьёсты басьтӥз, 20-тӥ куартолэзе Троицк крепостез капчиен вормиз. Но ӵукнаяз Пугачёвлэсь кӧлӥсь лагерьзэ И. А. Деколонг генераллэн правительствоысь войскоосыз тарказы, соин валче ӝутскемъёслэн бадӟым люкетсы пазьгемын, пленэ кутэмын яке уллямын вал, нош Пугачёвлы ӧжыт кузя кылем казакъёсын Челябинсклэсь уйпал но шундыпуксён палаз выльысь пегӟоно луиз. Салават Юлаев кивалтэм улсын ӝутскем башкиръёслэн валтӥсь кужымзы казакъёс борды итӥськем бере гинэ югдур тупатскиз, озьы ке но 3-тӥ но 5-тӥ инвожое пуромем ожъёсын Пугачёвез сутэм подполковник И. И. Михельсон бугыръяськисьёсты пазьгиз.

10-тӥ инвожое Пугачёв Красноуфимске вуиз, отӥяз Кунгурез басьтыны выриз, но зол ожмаськонъёсын пумиськыса, уйпала кожиз, татын куинь нунал ӵоже нюръяськемез бере, Оса карез киултӥз.

Осаез басьтэмзы бере Пугачёвлэн войскоез Кам шурлэн бур палаз выжиз, 22-тӥ инвожое Рождественской заводэз киултӥз, 24-тӥ инвожое — Вотка заводэз, 27-тӥ инвожое — Иж заводэз.

«Пугачёв Кузонын суд ортчытэ», 1931-тӥ арысь почта карточка, ССР Союзысь Революцилы сӥзем музейлэн изданиез

Кузон котырысь гуртъёсты но Кузонлэсь валтӥсь люкетсэ киултыса, 12-тӥ пӧсьтолэзе Пугачёв Кузонысь лушкем комиссилэн тюрьма камераосысьтыз 415 адямиез мозмытӥз: пленэ сюрем бугыръяськисьёсты, соослэсь семьяоссэс, соос пӧлысь со аслэсьтыз семьязэ но пумитаз — Трофим, Аграфена но Христина куинь нылпиен Софья нырысетӥ кышнозэ. Е. И. Пугачёвлэсь семьязэ 1774-тӥ арын 17-тӥ южтолэзе Кузонэ вуттӥзы, отын лушкем комиссилэн эскеремез улсын комиссилэн тюрьма висъетаз возизы. Сьӧд Яр котырын пленэ сюрытозязы, Пугачёвлэн семьяез войскоын, нимаз палаткаын улӥз, нош ӵош ожмаськем эшъёсызлэн юанзылы Пугачёв «та-де Емельян Иваныч дон казак эшелэн кышноез, со-де мынам нимы понна сюлоямын» шуиз. Мозмытэмъёс пӧлын игумен Филарет но вал, сое Пугачёвлы Пётр III кариськыны ӵектон сётэмез понна улын возизы.

15-тӥ пӧсьтолэзе Кузон котырын быдэс пазьгемзы бере, бугыръяськисьёслэн армизы Волгалэн бур палысьтыз ярдуре выжиз. Башкиръёс пӧлысь уноез Пугачёв сьӧры мыныны пумит луизы, Салават Юлаев кивалтэм улсын Уфалэн ёросъёсаз берытскизы, татын ожмаськонъёс 1774-тӥ арын шуркынмонозь кыстӥськизы на.

Пугачёвен артэ ялан возиськись 2 сюрс казакъёсыз сяна кылемын ӧй вал ни, озьы ке но Шор Поволжьеысь каръёс но гуртъёс сое сӥё-дано пумиталлязы. 23-тӥ пӧсьтолэзе Алатырьын улӥсьёс «пумитазы … ваньзы ик кар сьӧрын нянен но сылалэн, нош баӵкоос — киросъёсын». Пугачёв «тюрьмаын пукись колодникъёсты мозмытыны, казённой вина поттыны, нош сылалэз котькинлы дунтэк люкылыны» косӥз.

1774-тӥ арын 24-тӥ гудырикошконэ (5-тӥ куарусёнэ) И. И. Михельсон Сьӧд Яр дорын мятежникъёсты пазьгиз.

Кырмемъёс, следствие но казнь

Валтӥсь статья: Пугачёвез но эшъёссэ следствие но суд пыртӥ поттон

Солеников ватага дорын ожмаськонэз келямез бере Е. И. Пугачёв кылем-мылем войскоеныз Волга кузя лымшор но шундыӝужан пала пегӟиз, 25-тӥ гудырикошконлы ӝыт Волгалэн бур ярдурысьтыз Сьӧд Ярлэсь 20 версталы кыдёкысь нырысь огаз волжск шормуӵе, отысен Волгалэн паллян ярдураз выжиз. Татысен ни Е. И. Пугачёв отрядзэ шундыӝужан пала валтӥз, Ахтуба шур вамен выжиз, солэн паллян ярдураз азьланяз ма карон сярысь кенешизы. Пугачёв Волга кузя уллань Каспийск зарезь доры мыныны, отысен лушкем сюресъёстӥ Украинаысь запорожской казакъёс доры яке, некрасовъёс сямен, Турцие потыны, яке Башкирие я Сибире кошкыны ӵектылӥз.

Емельян Пугачёв тюрьмаын. А. С. Пушкинлэн «Истории пугачёвского бунта» изданиезлы тусбуен ватсэт, 1834

Та вакытлы отрядысьтыз казак полковникъёс пӧлын кылдэм лушкем пумит вераськонъёссы сярысь со ӧз тодылы, соос Пугачёвез правительстволы сётыны, таин валче асьсэды утьыны огкылысь кариськизы. Та сярысь гудырикошконлэн шораз кенешыны кутскизы, вераськонэ И. А. Творогов, Ф. Ф. Чумаков, И. П. Федулёв но эшшо дас витё яицк казакъёс пыриськизы. Пугачёвлэн дэмланъёсызлэсь соос мыр-мыр пыкиськизы, Узеня пала вамышъяны ӵектӥзы. Узеня пала отряд котыр сюрестӥ вырӟиз: нырысь Ахтуба шур кузя, собере Волга шурлэн паллян ярдуреныз Камышинлы ваче пумит Николаевской слободаозь, отысен Эльтон ты доры лышор но шундыӝужан пала, нош Эльтонысен Бадӟым Узеня доры уйпал но шундыӝужан пала. 8-тӥ куарусёнэ Бадӟым Узеня доры дугдӥзы. Татын отрядысь мукет казакъёс кыдёкын дыръя заговорщикъёс Пугачёвез керттылыны кутскизы.

Яицк каре мынытозязы, Пугачёв кык пол пегӟыны турттылӥз, но ӧз удалты. Яицк карлы матэ вуыкузы, Творогов но Чумаков Емельянэз сётон пумысен кенешон вылысь азьпалазы мынӥзы, пумитазы Харчев сотниклэн утчась отрядэз сюриз, со ик Пугачёвез Яиц каре 15-тӥ куарусёнэ вуттӥз. Со нуналэ ик нырысетӥ допрос ортчытэмын вал, мукет нуналаз — эшшо огез. Маврин следователь Пугачёвлэн улон-вылонысьтыз, восстанилэсь радлыксэ, отӥяз мар карыны малпанъёссэ пыр-поч тодӥз. Юалляськемез бере, Маврин лушкем комиссилэн генерал-майор кивалтӥсезлы П. С. Потёмкинлы донесенияз пусйиз, Пугачёв ассэ йӧно, кышкатэк возиз шуыса. Берлогес, 17-тӥ куарусёнэ, Яицк каре вуэм генерал-поручик А. В. Суворов самозванецлэсь ачиз юалляськиз, нош 18-тӥ куарусёнэ Пугачёвез Симбирске конвоен келянэз ачиз ик радъяз но отрядэз валтӥз. Со понна кык питрано арба вылэ сюбег четлык лэсьтэмын но пуктэмын вал, отын Пугачёв шонерскыны, мугорзэ вӧлъяны ӧз быгаты.

Пушкин Суворовлэн но Пугачёвлэн пумиськонзы сярысь тазьы гожъялляз: «Суворов дано мятежниклэсь ожгар действиосыз но малпанъёсыз сярысь бадӟым тунсыкен юалляськиз…».Пугачёвлэн ожез радъяны быгатонлыкъёсыз (искусствоез) Суворовлы тунсыко йӧтӥз. Но со вылэ конвоирлэн ролез усиз. Суворов Пугачёвез Симбирске нуиз, татчы ик граф Панин вуыны кулэ.

«Пугачёв кык питрано уробо вылэ юнматэм пу четлыкын пуке вал. Сое кык пушкаосын кужмо отряд котыртӥз. Суворов бордысьтыз ӧз кошкылы. Мосты гуртын (Самаралэсь сю ньыльдон версталы кыдёкын) Пугачёвлэн кӧлон коркаез вӧзын тылпу потӥз. Сое четлыкысь лэзизы, чырткем но сэзь пиен ӵош уробо борды думизы, быдэс уй ӵоже Суворов соосты ачиз возьмаз»

Суворов Пугачёвез Симбирске нуытозяз, Емельянлэн ул дӥсь бордаз вурем «сьӧд нуналлы чаклам» ньыль червонецез шедьтӥзы. Историк Д. Л. Мордовцев та учыр сярысь пусийз: Пугачёв шер пумиськылӥсь шырыт сюлэмо вал, узырмон ужпумъёсты ас азяз ӧз пуктылы, узырмон сьӧры ӧз уйиськылы, сотэк сьӧраз ньыль вурем червонецъёсты ӧй нуллысал — азвесен но зарниен тыро сандыкъёсты нуллысал, соосты со ӟеч сюлэмыныз адямиослы бур пала но, паллян пал но пумтэм люкылӥз.

Пугачёв конвой киулын. XVIII даурысь гравюра

Пугачёв ваньзэ сюлэм пыртӥз поттылӥз, со дыре ик кык ымныро луылӥз: кӧня ке дасо дворянъёсты быдтэм шоры нокыӵе кариськытэк учкон висказ ик куддыр синвуаськыны быгатылӥз. Соин Симбирскын караулын академик Рычков кенешиз (талэн пиез ӵапак Симбирскын пугачёвъёс ки улын быриз), кыксы но бӧрдӥзы.

Симбирскын Пугачёвлэсь 2-тӥ—6-тӥ коньывуонэ карательной войскоосын кивалтӥсь генерал-аншеф граф П. И. Панин но лушкем комиссиослэн кивалтӥсьсы генерал-майор П. С. Потёмкин юалляськизы. Татын Пугачёвез нырысьсэ курадӟытӥзы, соин сэрен со, ачиз вылтӥ но, тодмо раскольникъёс вылтӥ но погыльтыса, восстаниез ӝутон сярысь кемалась малпанъёсыз вал шуыса пӧяз. Бератаз Мускоын та зэм ӧй вал шуыса, пусъемын вал. Со дыре ик курадӟытыкузы но Пугачёв бугыръяськонэ кунгож сьӧрысь кунъёс яке дворянъёс пӧлысь кин ке пыриськыны быгатӥз шуыса ӧз вера.

26-тӥ коньывуонэ Пугачёвез Симбирскысь Муское келязы, конвоез кӧня ке пушкаосын пыдын рота келяз. 4-тӥ шуркынмонэ ӵукна конвой команда Пугачёвез Муское вуттӥз, татын сое Китай-городлэн Воскресенской капкаосыз дорысь Монетной дворысь подвалэ пытсазы. Пугачёвен ӵош Муское генерал следствиез сэрттон-пертчон понна бугыръяськонэ пыриськем, Пугачёвен азьвыл допросъёсын пусъем но улэп кылем вань пленнойёсты вуттӥзы. Следствиез Сенатлэн лушкем экспедициысьтыз следствиея комиссия нуиз, отын валтӥсьёсыз муско губернатор генерал-аншеф князь М. Н. Волконский, лушкем экспедициысь обер-секретарь С. И. Шешковский но генерал-майор П. С. Потёмкин вал. Екатерина II императрица следствилэн мынэменыз зол тунсыкъяськиз, кызьы допросъёс мыныны кулэ шуыса, валэктылӥз. Следствие улэ сюремъёслэн лябӟем тазалыксы пумысен но со сюлмаськиз, таин валче следовательёслы таӵе послание келяз: «Солэн величествоезлы туж умой уз луы, валтӥсь преступникъёс пӧлысь кин ке, воксё но лек Пугачёв курадӟытэмъёслэсь кулӥз но таин валче кырысь ужъёсыз понна наказанитэк кылиз ке, солэсь ортчыт, П. С. Потёмкин сое Муское вуттэмзы бере воксё лябӟемен адӟиз, Симбирскысь келякузы со сыӵе начар ӧй вал».

«Емелька Пугачёвез Мускоын казнить карон». Литография (1865)

Следствие йылпумъяськем бере 1774-тӥ арын 19-тӥ толсуре Екатерина II манифест гожтӥз, соя судлэсь составзэ юнматӥз. Судьяе 14 сенаторъёс, «нырысетӥ куинь классъёсысь» 11 потэмъёс, Синодысь 4 ёзчиос но коллегиысь 6 президентъёс юнматэмын вал. Судлэсь радъяськемзэ чакланы генерал-прокурор Вяземский пуктэмын. Судлэн нырысетӥ заседаниез 30-тӥ толсуре Кремльлэн дворецаз Трон залын ортчиз. Следствилэн йылпумъянъёсыз шараямын вал. 31-тӥ толсуре ӵукна судэ Пугачёв вуттэмын вал. Пыдес йылаз сылыса, йыруж лэсьтэмез сярысь азьвыл дасям юанъёслы валэктонъёс сётӥз, собере суд таӵе решение кутӥз: «Емелька Пугачёвез ньыльлы люконо, йырзэ кол вылэ пуктоно, мугор люкетъёссэ карлэн ньыль пал пумаз нуоно но колёсаос вылэ пононо, отӥяз интыязы ик сутоно». Пугачёвен ӵош ньыльлы люкон пумысен Афанасий Перфильев но приговор басьтӥз. Эшшо куинь адямиез — М. Шигаевез, Т. Подуровез но В. Торновез — ошыны косӥзы, нош И. Зарубинлэсь йырзэ коралтыны косӥзы, нялтас вераса, Чика-Зарубин Уфаын ик казнь улэ сюрыны кулэ вал, ӵапак сое со киултыны выриз. Судысь духовной званиен ёзчиосыз (Крутицкысь Самуил епископ, Суздальысь Геннадий епископ, Новоспасской монастырьысь Иоанн архимандрит но Преображенской полкысь Андрей протопоп), приговорен соглаш луизы ке но, берпуметӥ текст («сентенция») улэ гожтӥськыны пумит луизы, угось приговоръя адямиез быдтыны чакламын вал, «ми духовной чинысь луиськомы бере, сентенция улэ гожтӥськыны ум быгатӥське», шуизы.

«Шайтанэн кышкатэм Пугачёв». Та картинаез Пётр Панин тодмотэм суредасез лэсьтыны косӥз, суред солэн именияз утиськиз

1775-тӥ арын 10-тӥ(21-тӥ) толшоре Болотной площадьын приговорез быдэстӥзы. Современникъёслэн верамъёссыя (кылсярысь, А. С. Пушкинлэн «История Пугачёва» гожтэмаз), палачлы Екатерина II лушкем указание сётӥз, судить каремъёсты зол медаз курадӟыты шуыса, озьы Пугачёвлэсь но Перфильевлэсь нырысь йыръёссэс ӵогизы, собере гинэ мугорзэс ньыльлы люкизы. Эшафотын сылыкуз, Пугачёв соборъёс шоры вӧсяськиз, пӧртэм пала йыбырттӥз но шуиз: «Простить кар, православной калык, тон азьын сьӧлыкъёсме лэзь… простить кар, православной калык!». Кӧня ке минут ортчыса, палачен коралтэм йырыз калыклы возьматэмын но тыбыр вылаз пуктэмын вал, мукет мугор люкетъёсыз — колёса вылын. Перфильевез быдтон Россиын ньыльлы люкон берпуметӥез официальной ужрад вал.

Пугачёвез быдтэмзы бере вань ӵыжы-выжыосыз фамилизэс Сычёвлы воштӥзы, Зимовейын станица Потёмкинской луиз.

Пугачёвлэсь нырысетӥ кышнозэ Софья Дмитриевнаез но Трофим, Аграфена но Христин нылпиоссэс, озьы ик кыкетӥ кышнозэ Устинья Петровнаез (Кузнецоваез) Кексгольм крепосте пытсазы.

1773-тӥ—1775-тӥ аръёсы Крестьян ожлы 200 ар тырмонлы сӥзем СССР-ысь почта марка, Е. И. Пугачёв, 1973, 4 копейка (ЦФА 4282, Скотт 4125)

Буре ваён

Мускоысь, Ленинградысь, СССР-ысь унояз каръёсын Пугачёвлэн нимыз ульчаослы сётэмын вал; солэсь нимзэ колхозъёс, совхозъёс, школаос нуллӥзы.

• Казахстан Республикаысь Уральскын Емельян Пугачёвлы музей юрт сӥземын;
• Саратов улосысь Пугачёв кар Е. Пугачёвлы сӥземын;
• Удмурт Элькунысь Пугачёво каргурт Е. Пугачёвлы сӥземын;
• Волгоград улосысь Котельников ёросысь Пугачёво гурт поселениысь Пугачёвской станица Е. Пугачёвлы сӥземын;
• Саранскын Е. Пугачёвлы сӥзем синпелет юнматэмын;
• Пугачёвлэн тыпыез — Марий Чодра йӧскалык паркысь «Тыпы гурезь» массивысь тыпы (Волжской ёрос, Марий Эл). Мадёсъёслы осконо ке, 1774-тӥ арын, Кузон котырын И. И. Михельсонлэн отрядэныз нюръяськонэз келямез бере, Емельян Пугачёв та тыпы йылысен Кузонлэсь тылын гомамзэ чаклам;
• Магнитогорск карысь гурез;
• Лымшор Уралысь Пугачёв гурезь (Челябинск улос);
• Челябинскысь Пугачёв гурезь.

Ульчаос, проспектъёс но карлудъёс

Каръёсысь «Емельян Пугачёв», «Пугачёв», «Пугачёвской» нимо ульчаос:

• Санкт-Петербург;
• Иркутск;
• Йошкар-Ола;
• Кузон;
• Орёл (24.08.1938-тӥ арын нимамын);
• Калининград;
• Киев;
• Краматорск;
• Кунгур;
• Луцк (нимыз воштэмын);
• Мартыновка;
• Минск;
• Муско: 1-тӥ Пугачёвской ульча но 2-тӥ Пугачёвской ульча;
• Пенза;
• Салават;
• Самара;
• Саранск;
• Саратов;
• Тверь;
• Херсон;
• Армавир;
• Волгоград;
• Стерлитамак;
• Октябрьский (Башкортостан);
• Вологда;
• Магнитогорск;
• Батайск;
• Владимир (кар);
• Ковров.

Ожгар формированиос

Быдӟым Атыкай ож аръёсы Пугачёвлэсь нимзэ партизан отрядъёс асьсэлы карылӥзы — СССР-ын, Чехословакиын, Франциын но Югославиын.

• Чапаевлэн дивизиысьтыз полкъёс пӧлын 1-тӥ полклэн Емельян Пугачёвлэн нимыз вал, отчы Николаев уездысь таркам отрядъёсысь потэмъёс но отӥяз Пугачёв бригада кылдытэмъёс пыризы. Полке И. М. Плясунковлэн, Ф. К. Потаповлэн, С. К. Рязанцевлэн, П. Ф. Баулинлэн отрядъёссы пыризы. Полклы азьвыл батрак И. В. Топорков быръемын вал;
• 1943-тӥ аръёслэн шоразы гитлер пленысь пегӟем капитан А. Г. Емельянов, майор Я. Т. Иликчан но Ладислав Сабо мукет совето военнопленнойёсын ӵош Словакилэн территорияз Пугачёв нимо партизан отряд кылдытӥзы.

Живопись

• Емельян Пугачёвлэн Симбирскысь портретъёсыз

Крезьгур но литература

• «История Пугачёва» («История Пугачёвского бунта») — А. С. Пушкинлэн 1773-тӥ—1775-тӥ аръёсы Емельян Пугачёв кивалтэм улсын Крестьян ож сярысь А. С. Пушкинлэн нырысетӥез наукая но историяя бадӟым произведение. «История Пугачёвского бунта» 1834-тӥ арын толсуре 3000 экземплярен потӥз;

• «Емельян Пугачёв» — В. В. Каменскийлэн поэмаез (1931);
• «Емельян Пугачёв» — В. Каменскийлэн поэмаезлы М. В. Ковальлэн ораториез (1936);
• «Емельян Пугачёв» — дано совето писателен В. Я. Шишковен гожтэм куинь томъем историысь эпопея, 1940-тӥ аръёс;
• «Емельян Пугачёв» рок-опера — «Ариэль» ВИА, Валерий Ярушинлэн крезьгурез, Сергей Есенинлэн «Пугачёв» поэмаезъя Валерий Яшкинлэн либреттоез (1978);
• «Казнь Пугачёва» — Р. Щедринлэн хор поэмаез (1981);
• А. С. Пушкинлэн «Капитанская дочка» романэзъя «Казаки России» эктонъя кун театрлэн (кивалтӥсез РФ-ысь калык артист Милованов Леонид Петрович) вокалъя но хореографияя «Пугачёвъ» спектаклез. Пуктӥсь режиссёрез — Е. Милованова, композиторез — А. Сергунин;
• П. Бажовлэн «Кошачьи уши» выжыкылаз тодэ вайытон (1939);
• Виктор Попов — Емельян Пугачёв («Детство Руси», 1990);
• Георгий но Ольги Арси писательёслэн книгаосазы: «Китовая пристань. Наследие атамана Пугачёва» историысь детектив (2022) но «Повесть об атамане Хлопуше и монетном дворе» приключениосын повесть (2020), Емельян Пугачёв повествованиын валтӥсь герой луэ.

Киноын возьматэмын

• Сергей Борисов («Булат-Батыр», 1927);
• Борис Тамарин («Капитанская дочка», 1928);
• Константин Скоробогатов («Пугачёв», 1937);
• Михаил Болдуман («Салават Юлаев», 1941);
• Арут Вартан («Мюнхгаузен»/ Munchhausen, Германия, 1943);
• Амедео Наццари («Капитанская дочка», Италия, 1947);
• Ван Хефлин («Буря» / La tempesta, Италия, 1958);
• Сергей Лукьянов («Капитанская дочка», 1958);
• Джеймс Меллор («Великая Екатерина» / Great Catherine, Англия, 1968);
• Владимир Самойлов («Капитанская дочка», 1978);
• Евгений Матвеев («Емельян Пугачёв», 1978);
• Вольфганг Гесс («Екатерина, обнажённая царица» / Katharina und ihre wilden Hengste, Германия, 1983);
• Джон Рис-Дэвис («Екатерина Великая» / Catherine the Great, 1995);
• Владимир Машков («Русский бунт», 1999);
• Иоанн Ионеску («Екатерина Великая» / Catherine the Great, Англия, 2005);
• Владимир Маслаков («Мушкетёры Екатерины», 2007);
• Ленар Ахметвалеев («Кинзя Абыз», 2007);
• Дмитрий Муляр («Государыня и разбойник», 2009);
• Пол Кэй («Екатерина Великая», Англия, 2019);
• Артур Иванов («Екатерина. Самозванцы», 2019).

Валэктонъёс

Литература

Чӧлсконъёс

• Емельян Пугачёв и Крестьянская война (1773—1775) [рус.], emelyan.ru. Эскеремын: 27 пӧсьтолэзе 2025 арын.
• Глава IX. Пугачёв в Петровске [рус.], petrcity.ru. Эскеремын: 27 пӧсьтолэзе 2025 арын.
• Предания о Емельяне Пугачеве [рус.], publicadomain.ru. Эскеремын: 27 пӧсьтолэзе 2025 арын.