Калыкъёслэн эшъяськонзылы сӥзем Ижысь монумент
| Монумент | |
| Калыкъёслэн эшъяськонзылы сӥзем Ижысь монумент («Россиен пыраклы» монумент) | |
|---|---|
 | |
| 56°51′08″ с. ш. 53°11′49″ в. д.GЯO | |
| Кун |
 Россия |
| Город | Ижкар |
| Скульпторез | А. Н. Бурганов |
| Архитекторез | Р. К. Топуридзе |
| Кылдытэмын | 1972 |
| Инлыкез |
 ОКН № 1800019000 |
| Ӝуждалаез | 46 |
 Медиафайлъёс РувикиМедиа пушкын | |
 | Россилэн лулчеберето кылёс лэсьтосъёсыз улос инлыкен рег. № 181510297190005 (ЕГРОКН) лэсьтос № 1800019000 (БД Викигида) |
Калыкъёслэн эшъяськонзылы[1]сӥзем Ижысь монумент (озьы ик — «Россиен пыраклы» монумент[2][3], калыкын — «Кулаковалэн куасъёсыз» [4]) — Удмуртилэн Россие пыремез дырысен 400 ар тырмонлы сӥзьыса лэсьтэмын но 1972-тӥ арын 26-тӥ инвожое усьтэмын[5][1][2]. Ижысь но Удмурт Элькунысь учкымон инты луэ[6].
Тодметэз
Монументлэн ӝуждалаез 46 метр. Удмуртия но Россия кусыпъёсты возьматӥсь, инме кыстӥськись кык пилонъёс вискын интыямын ужась калыкез адӟытӥсь кортлэсь дурем но зарнивуам суредъёс-скульптураос[7].
Кортлэсь но бетонлэсь куас кадесь ӝутэм колоннаос (пилонъёс) Ижысь «Промстройтрест» предприятиын лэсьтэмын. Вылазы сыномисьтэм корт лист шуккемын. Горельеф амалэн лэсьтэм скульптураос ыргонлэсь ӵыжатэмын, зарниямын, таосты РСФСР-ысь Художествоя фондлэн Муско ёзысьтыз скульптураос лэсьтонъя экспериментальной комбинатын быдэстӥзы[5].
Ижысь тымет шоры учкись палаз пилонъёс вискы «Мир», «Уж» но «Огъя улон» скульптурая композициос юнматэмын. Мукет палаз Удмуртилэн но Россилэн геральдикая пусъёсыз интыямын. Монументлэн уллапалаз кебитысь дурись возьматэмын. Мукетыз композиция кияз пыӵалтӥрлыкен сылӥсь ожгарчилы сӥземын, со Граждан но Быдӟым ож вакытъёсы ӟучъёслэсь но удмуртъёслэсь Атыкай музъеммес валче утемзэс возьматэ. Композициосты удмурт но ӟуч нылкышноос йылпумъяло, таос йыр вадьсазы знамя куто. Вань та скульптураос чебер но умой мед адӟиськозы шуыса, соос зарниямын[8].
Кебитысь дурисез возьматӥсь «Уж» композицилэн авторез — С. К. Кузьмин. Монументлэсь оглом малпанзэ улонэ пыӵатӥсь, мукет горельефъёсты, «СССР» но «Удмурт АССР» гожтэмъёсты кылдытӥсь А. Н. Бурганов луэ[5]. Архитектор Р. К. Топуридзе чаклаз, огъя композиция интыын чебер мед адскоз шуыса. П. С. Семёнов но В. А. Табах суредаськисьёс проектэз лэсьтон бордын ужазы[1][2].
Монумент вылысь гожтэм
Пилонъёслэн бур но паллян палазы, улӥ люкетаз ӟуч но удмурт кылъёсын гожтэмын: «Дан ӟуч но удмурт калыкъёслэн бадӟым вынлыко эшъяськонзылы».
Интыяськемез
Монумент Иж тыметлэн ярдураз интыяськемын, со дорозь паськыт, ӵуж излэсь вӧлдэм тубат васькытэ. Мукет ласянь монумент доры пыдын ветлон сюрес вылтӥ но вуыны луэ, таиз Ижысь шор карлудысен плиткалэсь вӧлдэмын. Озьыен, монумент Ижкарлэн шор эспланадаезлэн кутскон люкетэз луэ[2].
Историез
1958-тӥ арын Удмуртилэн Россие пыремез дырысен 400 ар тырмонэзлы, удмурт но ӟуч калыкъёслэн эшъяськыса валче улонзылы сӥзем монумент ӝутон сярысь бадӟым юан кылдӥз. Со аре ик вуоно монумент интые, Пушкинской ульчае, из понӥзы, но монументлэсь интызэ Данъян пул басьтӥз[2]. 1969-тӥ арын 17-тӥ куарусёнэ РСФРС-ысь Министръёслэн Кенешсы 2127-р номеро распоряжение юнматӥз, соя монументлы коньдон УАССР-лэн бюджетысьтыз висъяны кулэ вал.
1960-тӥ аръёслэн пумазы гинэ монументлы проект лэсьтыны кутскизы. Нырысь-валысь ӝуждалазэ 52 метр карыны медо вал, отчы «Мир», «Уж», «Огъя улон» но «Туала вакыт» ньыль скульптурая композициосты интыяны кенешизы. Но СССР-ысь авиацилэн куронъёсызъя, 50 метрлэсь ӝужыт сооруженилэн одно ик алӥсь тылъёсыз котыраз пиштыны кулэ, нош со композицилэсь огъя туссэ уродмытоз гинэ. Соин ик «Туала вакыт» горельефез утялтоно но монументлэсь ӝуждалазэ 46 метрозь вуттоно кариськизы. Со сяна, проектэ воштонъёс пыртӥзы. Азьвылгес чакламын вал, огъя композицие кык лапегесь стелаосты юнматыны, соосты смальталэсь лэсьтэм Удмуртилэн историезлы сӥзем мозаикаен чеберъяны медо вал. Вань чертёжъёслы Мускоын бакель сётӥзы ке но, стелаосты ӝутыны коньдон ӧз тырмы ни[5].
Проект лэсьтыкузы, художникъёс бадӟым полотно вылэ вӧё буёлъёсын монументлэсь эскиззэ суредазы — мертан вылысь макет выллем луиз. 1970-тӥ арын 12-тӥ инвожое со полотноез музъем вадьсы вертолётэн ӝутӥзы. Кивалтӥсьёс шораз му вылысен учкизы но эскизэз умоен лыдъязы[5].
Монументэз пуктон 347,8 сюрс совето манет тыр усиз[5].
Городын улӥсьёс монументэз асьсэ куспын «Кулаковалэн куасъёсыз» нимазы, ӝутэм пар куасъёслы тусыз кельшемен. Монументэз усьтон но дано куасчи, удмурт нылкышно Галина Кулаковалэн Саппороысь Олимпиадаын куасэн ӵошатсконын куинь зарни медаль басьтэменызгес тупаз. Ачиз Кулакова монументэз тазьы нимамзэс умоен пумитаз[5].
2007-тӥ арын М. Т. Калашников музеен, Калашников автоматэн, Дун-чылкыт Михаиллэн собореныз но Удмурт Элькунлэн Тӧроезлэн резиденциеныз артэ кылык эшъяськонлы сӥзем монумент «Россиысь сизьым абдрамон интыос» конкурсэ пыриськиз[9][10][11].
2008-тӥ арын Удмуртилэн Россие пыремез дырысен 450 ар тырмонэн валче монументэз выльдӥзы-тупатъязы, котырзэ но умоятӥзы, соку ик синпелетэз уйин югдытӥсь лампаос котыраз юнматӥзы[12][13][5]. Россилэн но Удмуртилэн куншетъёсынызы бинялтэм тусыз юбилеез пусъён дыръя валтӥсь эмблемалэн люкетэз луиз[14]. Со сяна, Ижкар кылдэм дырысен 250 ар тырмонлы сӥзем сиё-дано ужрадын логотипаз суредазы[15].
Галерея
Шундыӝужан палась рельефъёс
Вылӥысен тусыз
Монумент вылысь ивортонэн пул
Уй тусыз
Уй тусыз
Инмысен тусыз
К. Маркс ульчаысен тусыз
М. Горькийлэн ульчаысьтыз тусыз
Иж тыметлэн ярдурысеныз тусыз
.jpg)
_-_6.jpg)
_-_4.jpg)
Валэктонъёс
- ↑ 1 2 3 Шумилов, 1978, с. 62.
- ↑ 1 2 3 4 5 Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 527. — 768 с. — 2200 экз. — ISBN 978-5-7659-0486-2.
- ↑ Постановление Совета министров УАССР № 284 от 25 сентября 1979 года
- ↑ В Ижевске обновили «Лыжи Кулаковой»
- ↑ 1 2 3 4 5 6 7 8 Елена Кардопольцева 26 июня монументу Дружбы народов исполнилось 40 лет: Как «штаны Сысоева» стали «лыжами Кулаковой» [ӟуч] Сетевое издание IZHLIFE. ООО «Радио - Инвест». Эскеремын 2018-09-12 арын
- ↑ Ижевчане признали монумент Дружбы народов символом города
- ↑ Памятники Ижевска
- ↑ Шумилов, 1978, с. 62—63.
- ↑ Монумент «Дружба народов» претендует на звание Чуда России Эскеремын 2021-09-04 арын
- ↑ Александрова Н. Станет ли музей одним из семи чудес света? Эскеремын 2021-09-04 арын
- ↑ Жители России продолжают выбирать семь чудес нашей страны Эскеремын 2021-09-04 арын
- ↑ Открытие монумента «Навеки с Россией» после реставрации
- ↑ «Навеки с Россией»: апгрейд символа
- ↑ У праздника будет эмблема
- ↑ Описание логотипа
Литература
- Шумилов Е. Ф. Архитектура Ижевска (ӟуч): история развития и перспективы архитектуры, градостроительства и монументального искусства / под ред. А. С. Терёхин, В. П. Орлов — Ижевск: Удмуртия, 1978. — 116 с. — 3000 экз.
.svg)