Козлов, Фрол Романович

РАН экспертиза

Экспертизаез ортчытӥз
Россиысь Тодосъёсъя Академия

Пыр-поч лыдӟе

Экспертиза РАН

Экспертизаез ортытӥз
Россиысь Тодосъёсъя Академия

Поыр-поч лыдӟе

Рувикиын таӵе фамилиен мукет муртъёс сярысь гожтосъёс вань. Учке: Козлов.

Фрол Романович Козлов
КПСС-лэн ЦК-езлэн Президиумезлэн ёзчиез
1957-тӥ арын 29-тӥ инвожое — 1964-тӥ арын 16-тӥ шуркынмонэ
СССР-ысь Министръёслэн Кенешсылэн Тӧроезлэн нырысетӥ воштӥсез
1958-тӥ арын 31-тӥ южтолэзе — 1960-тӥ арын 4-тӥ куартолэзе
Кивалтэтлэн тӧроез	Хрущёв Никита Сергеевич
Бӧрысьчиез	Косыгин Алексей Николаевич
6-й РСФСР-ысь Министръёслэн Кенешсылэн Тӧроез
1957-тӥ арын 19-тӥ толсуре — 1958-тӥ арын 31-тӥ южтолэзе
Азьпалчиез	Яснов Михаил Алексеевич
Бӧрысьчиез	Полянский Дмитрий Степанович
6-й КПСС-лэн Ленинград улосысь обкомезлэсь нырысетӥ секретарез
1953-тӥ арын 25-тӥ шуркынмонэ — 1957-тӥ арын 24-тӥ толсуре
Азьпалчиез	Андрианов Василий Михайлович
Бӧрысьчиез	Спиридонов Иван Васильевич
8-й ВКП(б)-лэн Ленинград горкомлэн нырысети секретарез
1950-тӥ арын 19-тӥ толшоре — 1952-тӥ арын пӧсьтолэзе
Азьпалчиез	Андрианов Василий Михайлович
Бӧрысьчиез	Алексеев Алексей Иванович
Вордӥськемын	5‑тӥ (18-тӥ) гудырикошконэ 1908 Лощинино гурт, Касимов уезд, Рязань губерния, Росси империя
Кулэмын	30-тӥ толшоре 1965({{padleft:1965|4|0}}-{{padleft:1|2|0}}-{{padleft:30|2|0}})[…] (56 лет) Муско, РСФСР, СССР
Кузпалыз	Козлова Александра Константиновна
Нылпиосыз	Олег пиез (1938—2001) но Ольга нылыз (1946)
Дышетскемез	Ленинградысь политехникая институт
Данъетъёсыз
Медиафайлъёс РувикиМедиа пушкын

Фрол Рома́нович Козло́в (5‑тӥ (18-тӥ) гудырикошконэ 1908, Касимовской уезд^[d], Рязанской губерния^[d] — 30-тӥ толшоре 1965, Муско) — совето парти но кун ужась. КПСС-лэн ЦК-езлэн Президиумезлэн ёзчиез (1957—1964; 1957-тӥ арын ёзчие кандидат ), КПСС-лэн ЦК-езлэн секретарез (1960—1964). 1958-тӥ—1960-тӥ аръёсы СССР-ысь Министръёслэн Кенешсылэн тӧроезлэн воштӥсез. КПСС-лэн ЦК-езлэн ёзчиез (1952—1965). СССР-ысь Вылӥ Кенешысь 3-тӥ—6-тӥ ӧтчамъёсысьтыз депутат. СССР-ысь Вылӥ Кенешлэн Президиумезлэн ёзчиез (1954—1958, 1962—1965). Н. С. Хрущёвлэн политикаысь матысь адямиосыз пӧлын вал.

Улон сюресэз

Егит дырыз

Рязань губерниысь Касимов уездысь Лощинино гуртын (али — Рязань улосысь Касимов ёрос) крестьян семьяын вордӥськиз. 1921-тӥ арын школалэн нырысетӥ тубатэз пыр потӥз. Ужан сюрессэ 1923-тӥ арын Касимовысь «Горд текстильщик» етӥн сэстон фабрикаын чернорабочий луыса кутскиз. Со дыре ик фабрично-заводской ученичествоя школаын (ФЗУ) дышетскиз.

1923-тӥ арын шуркынмонэ РКСМ-е пыриз, 1925-тӥ арын фабрикаысь комсомоллэн кылкутӥсь секретарез луиз. 1926-тӥ арын гудырикошконэ ВКП(б)-лэн ёзчиосыз пӧлы пыриз но со арысь ик коньывуонэ комсомоллэн Касимов уездысь комитетэзлэн (уком) экономикая комиссиезлэн тӧроез луиз. Со дыре ик 1927-тӥ ар пӧсьтолэзёзь «Горд текстильщиклэн» комсомол огазеяськонэзлэн секретарез луыса ужаз. 1927-тӥ ар пумын РЛКСМ-лэн Рязань губерниысь комитетэзлэн ёзчиез луиз, комсомоллэн Касимов укомаз ужаны ӧдъяз.

Ленинградын дышетскемез

1928-тӥ арын куарусёнэ комсомол ыстэмъя Ленинградысь коммунизмъя университетэ дышетскыны келязы. Но ар дышетскыса, комвузын дышетсконзэ куштӥз но Ленинградысь горной институт бордысь геологоразведкая рабфаке пыриз. Сое йылпумъяса, 1931-тӥ арын Ленинградысь металлургияя институтэ пыриз (1934-тӥ арын институт Ленинградысь индустриальной институтэ факультет сямен пыриз). 1936-тӥ арын инвожое, диплом проектсэ утемез бере, солы инженер-металлурглэсь квалификацизэ сётӥзы.

Ижысь заводын

Егит специалистэз распределениен Ижкарысь Ижсталь заводэ келязы. Заводын сое тодо вал ини (со студент-практикант луыса ассэ умоен возьматӥз), 1936-тӥ арын гудырикошконлэн кутсконаз со прокатной цехлэн сменаеныз кивалтӥсе юнматэмын вал, 1937-тӥ арын коньывуонэ блюминглэн начальникез луиз. Егит специалист ужан дисциплинаез юнматон но технологияя процессэз радъян борды мылысь-кыдысь басьтӥськиз. Заводын кык ар ужатозяз, со рационализатор сямен ӵектонъёсты пыӵатэмез но изобретениосъя уже мыло-кыдо пыриськемез понна ньыль пол премиен пусъемын, прокатной цехысь инженерно-технической кенешлэн бюроезлэн ёзчиосыз пӧлы пыриз.

1939-тӥ арлэн кутсконаз, Ижысь заводэз кык ас кожаз ужась предприятилы —корт но машина поттон заводъёслы — люкемзы бере, Ижысь металлургияя заводлэн (71 номеро завод) ВКП(б)-лэн ЦК-езлэн парткомезлэн но парторгезлэн выль кылдэм секретарез луыны ӵектӥзы.

Партийной ужын: Ижкар — Муско — Куйбышев

1940-тӥ арын южтолэзе ВКП(б)-лэн Ижкар комитетэзлэн кыкетӥ секретарез луиз. Быдӟым Атыкай ож вакытэ интыысь промышленностез ожгар пала берыктон, поттоно ожгар тӥрлыкез йылтон, ӟечлыксэ умоятон, выль ожтӥрлык лэсьтон борды кутскон, эвакуацие шедем но Удмуртие вуттэм тӥрлыкез интыян но ӝоггес уже кутон ласянь трос уж нуиз. Иж заводъёсын ожтӥрлык поттонэз ӝог валаз, эскериз, азинтӥз, та понна СССР-ысь вооружениея Наркоматысь кивалтӥсьёс пӧлын дано луиз.

Ожтӥрлык поттонэз радъян ужпумъёс пумысен трос валче ужано луиз 74 номеро заводлэн азьвыл директореныз, ож кутскон нуналъёсы СССР-ысь вооружениея наркомлэн воштӥсеныз В. Н. Новиковен. Новиков война вылтӥ кема дыр ӵоже Ижын улӥз, огвакытэ наркомлэн воштӥсезлэсь но 71-тӥ металлургияя заводлэн директорезлэсь ужзэ огдыре быдэсъяз. Кыкез ик кивалтӥсьёс ог-огзэс валаса ужамзэс вылӥ дунъязы, кӧня ке ар ӵоже ӵош ужатозязы, оскымон эштосъёс луизы. Ф. Р. Козлов ожтӥрлык поттон удыслэсь вань палъёссэ ӝог валаз, та сярысь ужкагазъёсах цехысь кадровикъёс но пусйизы. Тазьы йылпумъянъёс лэсьтон понна соос СССР-ысь вооружениея Наркоматысь специалистъёслэн мылкыдзы вылэ чӧлскизы. В. Н. Новиков гинэ ӧвӧл, Наркоматысь война аръёсы горкомлэн кыкетӥ секретареныз Ф. Р. Козловен ӵош ужам мукет кивалтӥсьёс но бӧрысь сое «кужмо, корт но ожтӥрлык поттонэз тодӥсь» шуыса, пусйылӥзы.

Ожгар вакытэ Ижкарысь промышленность ожтӥрлык поттонъя, выль кужымен ужанъя пуктэм вылӥ ужпумъёсты умой быдэстӥз. Ф. Р. Козлов И. В. Сталинлы ыстоно ГКО-лэсь куронъёссэ быдэстон но танкъёс, самолётъёс лэсьтыны калыклэсь коньдон люкан сярысь рапортъёс улэ кинюртэмзэ огпол гинэ ӧз пукты. «Правительстволэсь ожтӥрлык поттонъя ужпумзэ ӟеч быдэстэм понна» 1942-тӥ арын пӧсьтолэзе Ф. Р. Козлов пусъемын Горд Кизили орденэн, 1943-тӥ арын (мукет ивортонъёсъя, 1944-тӥ арын толшоре) — Ужысь Горд Знамя орденэн. Партилэн кар комитетъёсысьтыз одӥгез устоез секретарез сямен 1944-тӥ арын Ижысь ВКП(б)-лэн ЦК-езлэн аппаратаз ужаны выжтэмын. 1944-тӥ арын куартолэзьысен радъясь кылкутӥсь луыса ужаз, отӥяз ВКП(б)-лэн ЦК-езлэн кадръёсъя управлениысьтыз инспекторе юнматӥзы.

1947-тӥ арын южтолэзе С. И. Кислин интые ВКП(б)-лэн Куйбышев улос комитетэзлэн кыкетӥ секретаре пуктӥзы, азьвыл кивалтӥсьсэ, обкомлэн нырысетӥ секретарьзэ А. М. Пузановез мозмытӥзы. Улосвыл комитетын промышленность, лэсьтӥськон но транспорт понна кылкутӥз. Куйбышев индустриысь флагманъёс пӧлын висъяськизы кык бадӟым авиацияя заводъёс — Сталин нимо 1 номеро завод но Ворошилов нимо 18 номеро завод. Кыкез ик заводъёс тылож вакытэ но ож бере нырысетӥ аръёсаз Ил-2 но Ил-10 штурмовик самолётъёс лэсьто вал. Ф. Р Козлов секретарьын дыръя ни Сталин нимо завод MИГ-15 реактивной истребительёсты серийной амалэн поттыны кутскиз, нош 18 номеро завод — Ту-4 стратегияя бомбардировщикъёсты. Куйбышевын ик интыяськизы комплект тӥрлык куд-ог лэсьтӥсь-вуттӥсьёс: Фрунзе нимо 24 номеро завод двигательёс бичалляз, 454 номеро завод — ыбылӥськонлы, пушкалы но бомбардировкалы тӥрлык, 525 номеро завод — ожтӥрлык, 9 номеро кун завод — подшипникъёс, 35 номеро завод — инмын ужась винтъёс, отӥяз самолёт шассиос. Улосысь мукет бадӟым предприятиос пӧлын вал: Куйбышевысь автотракторной электрооборудованиея но карбюраторъёсъя завод (КАТЭК), Средневолжск станок лэсьтон завод, Куйбышевысь механикая завод, Масленников нимо завод, эшшо одӥг подшипник лэсьтон завод — ГПЗ № 4, Сызраньысь локомобильной завод но музон. Союзын мувӧй поттон но мувӧй кыскон промышленной предприятиос бадӟым инты басьтӥзы. Уноез заводъёс СССР-ысь Гурт удысъя машиностроениея министерстволэн бурд улаз ужаллязы.

Козлов чаклам улсын озьы ик улосысь одӥгез бадӟымез лэсьтӥськон огазеяськон ужаз — СССР-ысь Авиацияя промышленностья министерстволэн 11 номеро кун пуктӥськонъя трестэз, со унозэ улон интыосты, промышленной, лулчеберет но соцобъектъёсты вуттон понна кылкутылӥз. Куйбышев улосысь валтӥсь транспорт предприятиос таӵеесь вал: Куйбышев нимо чугун сюрес но Средневолжской шур пароходство (соиз но, таиз но Куйбышев улосын но бускель улосын ужазы, нош кивалтон ёзъёссы Куйбышевын интыяськылӥзы). Кивалтыны быгатонлыкез юрттӥзы Козловлы обкомлэн нырысетӥ секретарезлэн А. М. Пузановлэн но ВКП(б)-лэн обкомысьтыз мукет секретарьёслэн син шоразы ӝог йӧтыны. СССР-лэн Вылӥ Кенешезлэн Президиумезлэн 1948-тӥ арын 8-тӥ куартолэзе юнматэм указэзъя «Правительстволэсь мувӧй поттонэз будэтон ужпумзэ ӟеч быдэстэмез но 1946-тӥ но 1947-тӥ аръёсы кун планэз быдэстэмез понна» Ужысь Горд Знамя нимо кыкетӥ орденэн пусъемын. ВКП(б)-лэн ЦК-езлэн кадръёсъя управленилэн эскеронэз пыр умой ортчиз: «Тов. Козлов калыкен кыл шедьтэ. Эрудициез ӟеч, аслэсьтыз малпанъёссэ шонер вераны быгатэ, солэн докладъёсыз но выступлениосыз малпаса но мур анализэн лэсьтэмын». 1947-тӥ арын со техникая грамотной инженер, корт но пыӵалтӥрлык поттон удысэз тодӥсь, производствоя но техникая ужез радъянын кивалтӥсь сямен СССР-ысь вооружениея министрлэн воштӥсез интые резерве пыртэмын вал.

Ленинградэн но улосэн кивалтонын

«Ленинград уж» дыръя 1949-тӥ арын коньывуонэ Ленинградэ Киров заводысь ВКП(б)-лэн ЦК-езлэн парторгез луыса ыстӥзы. 1949-тӥ арын 29-тӥ шуркынмонэ ВКП(б)-лэн Ленинградысь кар комитетэзлэн пленумез сое горкомлы кыкетӥ секретаре бырйиз. Карысь комитетлэн нырысетӥ секретарез но ВКП(б)-лэн Ленинград улосысь комитетэзлэн нырысетӥ секретарез огдыре В. М. Андрианов вал, озьыен, Козловлы Ленинградэн кивалтон оскемын вал, шуыны луоз. 1950-тӥ арлэн кутсконаз ЦК-лэн пуктэтэзъя, улосысь обкомъёслэн но горкомъёслэн нырысетӥ секретарьёссы луыса огдыре ужанлы пум понэмын вал, таин валче 1950-тӥ арын толшоре Козлов ВКП(б)-лэн Ленинградысь комитетэзлэн нырысетӥ секретарез луиз. Кремльысь кутэм мылкыдъя Ленинградысь партаппаратэз «антипартийной» ялэм азьвыл улос но кар кивалтӥсьёслэн пуктэм муртъёссэс чылкытатон уж борды мыло-кыдо басьтӥськиз. Ленинградысь промышленностез выльдон, карысь инфраструктураез умоятон но юнматон ласянь бадӟым уж нуиз. 1952-тӥ арын пӧсьтолэзьысен ВКП(б)-лэн Ленинград улосысь комитетэзлэн кыкетӥ секретарез луиз.

1953-тӥ арын оштолэзе КПСС-лэн Ленинград улосысь комитетэзлэн кыкетӥ секретаре но КПСС-лэн Ленинград карысь комитетэзлэн нырысетӥ секретаре Н. Г. Игнатовез юнматэмен, Козлов улӥегес тубат вылэ выжтэмын, ВКП(б)-лэн Ленинград улосысь комитетэзлэн секретаре пуктэмын. Таин со ӧз тэрытӥськы, КПСС-лэн Ленинград обкомаз нырысетӥ секретарезлэсь В. М. Андриановлэсь но кылэм-адӟем ӧз кары. Андриановлэн, юрттэт курыса, Л. П. Бериялы вазиськонэз югдурез ӧз вошты, берлозэ воксё но пытсэт сьӧры келязы, таин валче 1953-тӥ арын гудырикошконэ КПСС-лэн Ленинград обкомезлэн нырысетӥ секретарьзэ Андриановез палэнтӥзы (Андрианов Г. М. Маленковлэн пуктэм муртэз вал; Н. С. Хрущёв партаппаратэн кивалтӥз но аслэсьтыз адямиоссэ ӝутыны кутскиз). КПСС-лэн обкомезлэн нырысетӥ секретарез интые одӥг гинэ адями тупа на вал — Н. Г. Игнатов, но со Ленинградысь парт но кун аппаратын, кивалтӥсьёс азьын чеберъяськыса, аслэсьтыз интызэ юнматыны кулэен ӧз лыдъя, ӵем дыръя ассэ лякыттэм но вылтӥяськись возиз, озьы ик мукет янгышъёс лэсьтылӥз. Озьыен, Игнатовез Ленинградысь мозмытӥзы, зэм, талы нырысь-валысь Игнатовлы оппозицие султэм Ф. Р. Козлов но юрттӥз. Ленинградысь но улосысь кивалтонысь адямиосты пазьгонэ мыло-кыдо пыриськем Козлов, вылаз ик, умойтэм сямъёсызлы луыса, озьы ик улосысь парт но кун аппаратэз аслыз пумит пуктӥз. Озьы ке но КПСС-лэн ЦК-езлэн нырысетӥ секретарез луэм но кадръёсты вошъяны кутскем Н. С. Хрущёв Козловлы оскиз, сое 1953-тӥ арын шуркынмонэ КПСС-лэн Ленинград обкомезлы нырысетӥ секретаре юнматӥз: Ленинградысь парт но кун аппаратын данзэ ыштэм кивалтӥсьлы юрттон берлозэ Хрущёв шоры учкылыса ужаны косӥз.

1953-тӥ—1957-тӥ аръёсы — КПСС-лэн Ленинград улосысь комитетэзлэн нырысетӥ секретарез. Ленинградысь партноменклатура ласянь Ф. Р. Козловез курланъёс лачак вал ке но, Хрущёв сое кивалтон ёзъёсын шӧдскымон юнматӥз. 1954-тӥ арын оштолэзе Козлов СССР-ысь Вылӥ Кенешлэн IV ӧтчамезлэн Президиумезлэн ёзчиез луиз, 2 толэзь талэсь азьло гинэ со КПСС-лэн ЦК-езлэн пленумаз нырысьсэ вераськиз, соку целина но кыллем музъемъёсты уже кутон сярысь постановление юнматӥзы. Со дырысен КПСС-лэн ЦК-езлэн котькуд пленумаз солы кыл сётъяло вал. КПСС-лэн XX ӧтчамез бере, 1956-тӥ арын 27-тӥ тулыспалысен, РСФСР-ысь КПСС-лэн ЦК-лэн Бюроезлэн ёзчиосыз пӧлы но пыриз (1958-тӥ арын 12-тӥ шуркынмонозь). КПСС-лэн XX ӧтчамаз Н. С. Хрущёв КПСС-лэн ЦК-езлэн Президиумезлэн кандидатэз сямен ёзчие пыртыны медэ вал, но КПСС-лэн ЦК-езлэн Президиумезлэн ёзчиосыз пумит луизы, лэся, малы ке шуоно нырысетӥ секретарь кандидатъёсты Л. И. Брежневез, Е. А. Фурцеваез, Н. А. Мухитдиновез но Т. Шепиловез юнматон сярысь сюлмаськиз ини вал. Таин валче Хрущёв Козловез РСФСР-ысь КПСС-лэн ЦК-лэн Бюроезлэн ёзчиосыз пӧлы гинэ на пыртӥз, со пумысен ЦК-лэн ужзэ радъян пленумаз пусйизы: «Козловез Президиуме кандидатэ пыртон сярысь вераськонъёс вал. Но кандидат но, Бюролэн ёзчиез но карон — та умой ӧвӧл. Кенешонъёсты Ленинградын ортчытъяно, ЦК-лэн Президиумезлэн Мускоын заседаниосаз луоно, Бюроын но луоно. Тамында ужез валтон Ленинградлы но, Росси Федерациысь Бюролы но уродэн берытскоз, таин валче ЦК-лэн Президиумезлы пайдаё уз луы». Но ӝыны ар ортчыса, Хрущёвлэн тулыспалэ ӵектэмезъя (1957-тӥ ар) КПСС-лэн ЦК-езлэн пленумез Ф. Р. Козловез КПСС-лэн ЦК-езлэн Президиумаз кандидатэ юнматӥз.

Дыр ортчемъя, Ленинградын Козловез курласьёс басылазыгес. Н. С. Хрущёвен оскымон кусыпъёссы Ф. Р. Козловлы Мускоын Ленинградысь метрополитенэз лэсьтыны коньдон висъян ужпумъёсты ӝутыны луонлык сётӥзы. Ленинградлы 250 ар тырмонэз пусъён ужрадъёсын валче карысь инфраструктураез выльдонлы бадӟым коньдон вайыны кылдӥз. Карез умоятонъя бадӟымесь ужъёс мытэмын вал.

«Антипартийной группае» пырись Маленковен, Молотовен, Кагановичен нюръяськыны Хрущёв мылкыд сётӥз но юрттӥз. 1957-тӥ арын инвожое ортчем КПСС-лэн ЦК-езлэн пленумаз КПСС-лэн ЦК-езлэн Президиумезлы ёзчие быръемын. 1957-тӥ арын толсурысен — РСФСР-ысь Министръёслэн Кенешсылэн тӧроез.

СССР-ысь вылӥ кивалтон ёзъёсын

1958-тӥ арын южтолэзьысен — СССР-ысь Министръёслэн Кенешсылэн тӧроезлэн нырысетӥ воштӥсез. СССР-ысь Министръёслэн Кенешсылэн тӧроезлэн воштӥсьёсыз куспын люкылэм удысъёсъя Ф. Р. Козловлы оскемын вал СССР-ысь Министръёслэн Кенешсылэн Президиумезлэн кылдэм ужпумъёсъя комиссиеныз кивалтыны, Союзысь министерствоослэсь сюресъёсъя, зарезь флотъя, транспорт лэсьтонъя, связья ужамзэс чакланы, озьы ик СССР-ысь Министръёслэн Кенешсы бордын ужась автомобиль сюресъёсты но граждан воздушной флотэз лэсьтонъя Валтӥсь управлениослэсь ужзэс эскерыны косэмын. Правительстволэн постановлениезъя кылдӥз СССР-ысь Министръёслэн Кенешсылэн Президиумезлэн кылдэм ужпумъёсъя ялан ужась комиссиез, соин Ф. Р. Козлов кивалтӥз. Комиссие СССР-лэн Министръёслэн Кенешсылэн тӧроезлэн воштӥсьёсыз А. Косыгин но А. Ф. Засядько, СССР-лэн Госпланэзлэн тӧроезлэн нырысетӥ воштӥсез Г. В. Перов пыризы. Выль комиссилэсь ужпумъёссэ но ёзчиоссэ учконо ке, СССР-лэн Совминэзлэн Президиумезлэн Ф. Р. Козлов кивалтэм улсын ялан ужась пичи Кенешсы кылдытэмын вал, со СССР-лэн Правительствояз но Н. С. Хрущёвлэсь ныпъетсэс капчиятӥз. Ф. Р. Козлов Союзысь Правительствоен нуналмысь кивалтыны кутскиз, Совминлэн Президиумезлэн заседаниосаз тӧро луылӥз, СССР-ысь Министръёслэн Кенешсылэн тросэз постановлениосыз солэн кинюртэменыз потылӥзы.

1959-тӥ арын пӧсьтолэзе США-е ыстэм совето делегациен кивалтӥз, Нью-Йоркын Совето Союзлэн наукаын но лулчеберетын азинсконъёсызлы сӥзем адӟытонэз усьтӥз, озьы ик США-лэн вице-президентэныз Ричард Никсонэн пумиськиз. 13-тӥ пӧсьтолэзе америка «Time» журнал потӥз, вылбамаз — Козловлэн туспуктэмез но бадӟым букваосын «Хрущёвлэн преемникез?» йыръян. Козлов СССР-лэн вылӥ кивалтэтэзлэн США-е официальной визитэн ветлэм нырысетӥ оскем муртэз луиз.

1960-тӥ арын 4-тӥ куартолэзе КПСС-лэн ЦК-езлэн пленумаз КПСС-лэн ЦК-езлэн секретарез луыса быръемын но СССР-ысь Министръёслэн Кенешсылэн тӧроезлэн нырысетӥ воштӥсь ужезлэсь мозмытэмын (интызэ А. Н. Косыгин басьтӥз). Таин валче КПСС-лэн ЦК-езлэн кыкетӥ секретарезлэсь ужзэ быдэсъяны кутскиз, шуыны луоз, заседаниосы кивалтыны но солы повестка кылдытыны ӧдъяз (1959-тӥ арын шуркынмонозь та ужъёсты А. И. Кириченко быдэсъяз, отӥяз та уж КПСС-лэн ЦК-езлэн вань секретарьёсыз вылэ черодэн усиз). 1960-тӥ арын гужемысен Н. С. Хрущёв ачиз Мускоын ӧвӧл дыръяз солы КПСС-лэн ЦК-езлэн Президиумезлэн уженыз кивалтыны оскылӥз (1957-тӥ арысен та М. А. Суслов вылэ усе вал). 1961-тӥ арын ракета техникалэсь образецъёссэ кылдытонын ӟеч ужамез но совето адямилэсь инсьӧре умой лобамзэ радъямез понна (Ю. А. Гагарин, 1961-тӥ арын 12-тӥ оштолэзе) Социалистической Ужысь Герой нимын пусъемын (СССР-ысь Вылӥ Кенешлэн Президиумезлэн 1961-тӥ арын 17-тӥ инвожое 94 адямилы указэз «совершенно секретно» гриф улын юнматэмын).

1961-тӥ арын 31-тӥ коньывуонэ КПСС-лэн ЦК-елэн XXII ӧтчамезлэн ужамезлы йылпумъянъёс лэсьтонлы сӥзем пленумын Н. С. Хрущёв нырысьсэ шара вераз Ф. Р. Козловлэсь КПСС-лэн ЦК-езлэн кыкетӥ секретарез сямен ужамез пумысен: «Сыӵе статус ӧвӧл, но кыкетӥ секретарьмы милям татчыозь Козлов эш вал. Мон али но лыдъясько: Козлов эш ас ужзэ ӟеч быдэстӥз, иське, таяз но со кыкетӥ секретарь луоз». Зал та кылъёсты кужмо кичабонъёсын пумитаз. Хрущёвен КПСС-лэн ЦК-езлэн пленумаз юнматыны сётэм списокын КПСС-лэн ЦК-езлэн Секретариатэзлэн нимысьтыз списоказ, трос аръёс ӵоже йылолэз тӥяса, ЦК-лэн нырысетӥ секретарез бере Козлов кыкетӥ пусйиськиз, бӧрсяз КПСС-лэн ЦК-езлэн мукет секретарьёсызлэн фамилиоссы алфавитъя мынӥзы. Сыӵе ик радлык КПСС-лэн съездэзлэн йылпумъян заседанияз вылӥ партийной органъёслэсь составзэс шараяку но, валтӥсь печатьын поттыку но утемын вал. Тазьы Ф. Р. Козловлэн партиын, озьыен, кунын кыкетӥ адямилэн статусэз сярысь шара ивортэмын вал. 1962-тӥ арын оштолэзе СССР-ысь Вылӥ Кенешлэн VI ӧтчамезлэн нырысетӥ сессияз Козлов СССР-ысь Вылӥ Кенешлэн Президиумезлэн ёзчиез луыса юнматэмын, А. И. Кириченколэсь интызэ басьтӥз. Та должность ЦК-лэн кыкетӥ секретарезлэн кивалтонын ватсэтэз гинэ вал, номыр понна со кыл ӧз кутылы, но социалистической луымтэ кунъёсы вуылыкуз, Козловлы вылӥ кун статус сётӥз.

«Та адями лек но чурыт вал, — Ф. Р. Козлов сярысь КПСС-лэн ЦК-езлэн ёзэзлэн референтэз Ф. М. Бурлацкий тодаз вайылӥз, — вань ужпумъёсты кырымаз чурыт возиз». «Адӟем карымон, чебер, кивалтыны яратӥсь но дӥсьтӥсь воргорон вал со, — пусйылӥз СССР-ысь Министръёслэн Кенешсылэн тӧроезлэн азьвыл воштӥсез В. Н. Новиков, кудӥз Ф. Р. Козловен Быдӟым ож дырысен ик оскымон эш кусыпъёс тупатӥз. — Карьера понна трос ма лэсьтыны быгатылӥз. Жаль, семьяяз но кышноеныз туж лек вал. Та сямыз мыным ӧз кельшылы. Ужын со кыдёке азьпала учкыны быгатылӥз, адямиосын кусып тупатъяз; промышленной но партийной ёзъёсын ужан опытэз туж бадӟым вал». Ф. Р. Козловлэсь ужаны быгатонзэ аслаз мемуаръёсаз Сергей Никитич Хрущёв но пусйылӥз: «Ужъюлтошъёсыз пӧлын Козлов югдурез мур валаменыз висъяськылӥз, партиын но ужын опытэз но бадӟым вал. <…> Козловлэн политика шоры учконъёсыз радикальноесь ӧй вал, но со вакытэ чыры-пырыосъя но со атайлэн сюресэз кузя вамышъяз». Козлов сярысь шуак урод малпанэз кылдӥз А. И. Микоянлэн: «Козлов визьмо адями ӧй вал, Сталинлы пумит ужаз, реакционер, карьерист, кырсь вал. Зэмос ужам интые интриган сямен выриз». Ф. Р. Козлов сярысь уродэн гинэ малпась мукет кивалтӥсьёс но вал, угось ас вакытаз соос ас вылазы сямзэ шӧдылӥзы. А. Н. Шелепин но В. Е. Семичастный 1989-тӥ арын со сярысь тазьы тодазы вайылӥзы: «Козлов так-то визьмо адями. Со воксё ӧз ужалля. Дораз лыктод — ӝӧк вылын бумага но, карандаш но ӧвӧл — чылкыт!» В. Е. Семичастный ватсалляз: «Козлов — туж сюбег учконэн адями. Одӥгез гинэ кужмо интыез — куара поттон ёзвиосыз». КПСС-лэн Свердловск обкомезлэн азьвыл кыкетӥ секретарез В. И. Довгополлэн Ф. Р. Козловен уж пумысен пумиськонъёс бере мукет мылкыдъёсын пачылаз: «ЦК-лэн мукет секретарьёсыныз но Хрущёвен ӵошатыса, Козловлэн ужазинлыкез но ужаны быгатонлыкез тросгес вал. Козлов югдурез тодыса-валаса вераськылӥз».

Улослэсь кивалтӥсьёссылэсь кунэз пӧямзы понна кылзэс чурыт юалляз. Н. А. Мухитдинов тодаз вайиылӥз: КПСС-лэн ЦК-яз Таджикистанысь хлопок бичам, урожай басьтон но мукет лыдпусъёсъя пӧяськись ивортонъёс вуэм бере, КПСС-лэн ЦК-езлэн инспекциез келямын вал, эскеронъёс дыръя со лыдпусъёсты умоен пусйиз, выльёссэ но шараяз на. ЦК-лэн комиссиез улосъёсысь кивалтӥсьёс законлы пумит ужазы шуыса ӧз пусйы ке но, Козловлэн косэмезъя, соосты ужысь куштӥзы. Таин валче Таджикистанысь компартилэн ЦК-езлэн 1961-тӥ арын 11-тӥ—12-тӥ оштолэзе Душанбеын ортчем VII пленумез Ф. Р. Козлов азьын интыысьтыз мозмытӥз но партиысь куштӥз ЦК-лэсь нырысетӥ секретарьзэ Т. Ульджабаевез, ЦК-лэсь кыкетӥ секретарьзэ П. С. Обносовез, республикаысь Министръёслэн Кенешсылэсь тӧрозэ Н. Додхудоевез.

1962-тӥ арын пӧсьтолэзьлэн кутсконаз Н. С. Хрущёв А. И. Микоянэн ӵош Ростов улосысь Новочеркасске ыстӥз, татын электровозостроительной заводысь ужасьёс сӥльлы, йӧллы дунъёслэн ӝутскемзылы но заводын дунъёсты уськытэмзылы пумит бугыръяськыны ӧдъязы. Н. С. Хрущёв бугыръяськонэ пыриськемъёсты чурыт зӥбломытыны, пыӵалтӥрлыкен кышкатыны, тужгес етӥзъёссэ пытсэт сьӧры пуктыны косӥз, Ф. Р. Козлов югдурысь огкылысь потыны дэмлалляз ке но. Семичастныйлэн, Микоянлэн но Хрущёвлэн Сергей Никитич пиезлэн мемуаръёсаз Новочеркасскын бугыръяськисьёсты кужмысь зӥбломытон Ф. Р. Козлов вылэ куштэмын, но историын озьы ӧй вал.

КПСС-лэн XXII ӧтчамез ортчем бере КПСС-лэн ЦК-езлэн кыкетӥ секретарезлэн Ф. Р. Козловлэн кивалтон ёзъёсын интыез юнманы ӧдъяз. СССР-лэн кивалтэтаз КПСС-лэн ЦК-езлэн Президиумезлэн «рядовой» ёзчиоссэ но ортчиз гинэ, кун кивалтӥсьлэсь матысь котырысьёссэ но азьпалтӥз. КПСС-лэн ЦК-езлэн Секретариатэныз но, Хрущёв ӵем но кема дыр ӵоже кошкылыку, КПСС-лэн ЦК-езлэн Президиуменыз кивалтыкуз но, партиын но кун аппаратысь кадръёсты, армиез но кун кышкытлыкез чаклалляз, озьы Ф. Р. Козлов ас кияз туж бадӟым властез огазеяз. В. Н. Новиков тодаз вайылӥз: «Хрущёв Ф. Р. Козловлы туж мур оскылӥз. Козловлэсь чеберъяськемзэ огпол но ӧй кылылы. Ассэ котьку йӧн-йӧн возиз, Хрущёвлы котьку дурбасьтылӥз. Козлов Ожгар кужымъёсты, ожгар промышленностез, КГБ-ез но партиысь но Правительствоысь кадръёсты пумен кияз кутӥз. Быдэс власть со киын вал. Хрущёвлэсь яратоно адямиоссэ со ӧз исалля. Ачиз Козлов верамъя, ЦК-лэн Президиумезлэн ёзчиосызлы та ӧз кельшылы, пӧртэм ведомствоосын кивалтон сяменыз но котькуд минутэ ЦК-лэн Президиумысьтыз котькинэ палэнтыны быгатылӥз».

Хрущёв ӧз ватылы, Козловез ас интыяз дасялляз шуыса, та пумысен 1959-тӥ арын инвожое Муское вуылэм США-лэн президентэзлэн оскем муртэзлы Аверелл Гарриманлы но ивортӥз, отӥяз та сярысь пумтэм вералляз. 1962-тӥ арын тулыс «Товарищ Хрущёв кивалтэм улсын Конституцияя комиссия» кылдытэмын вал (СССР-лы выль Конституцилы выль проект лэсьтон), комиссилэн кыкетӥ ужаз тӧро Козлов луиз (нырысетӥяз ачиз Хрущёв вал), общественной но кун устройствоя ужпумъёсты чаклаз (кулэмез бӧрсьы интызэ Н. В. Подгорный басьтӥз).

Дырызлэсь вазь отставка

1963-тӥ арын 11-тӥ оштолэзе Ф. Козлов КПСС-лэн ЦК-езлэн Президиумезлэсь кенешонзэ ортчытӥз но ужан нунал пумын дачаяз кошкиз. Дача котыртӥз ветлон дыръяз йырсазьзэ ыштӥз. Ӝегатскытэк дачае ӧтем эмъясьёс диагноз пуктӥзы: йырвиымлэсь бурпалзэ пери шуккиз. Вирзӥбетлэн шудэмезлэн мугъёсыз — кема аръёс ӵоже курадӟытэм гипертония висён, озьы ик вӧлмем атеросклероз йырвиым сэръёссэ шуккиз (трос аръёс ӵоже Ф. Р. Козлов юн йыр висемзэ чидалляз, 1940-тӥ аръёсы ик ВКП(б)-лэн Куйбышев обкомезлэн кыкетӥ секретарез луыса ужан вакытаз ик киыз коскалляз). Эмъян борды совето медицинаысь тужгес азьмынӥсь эмчиос басьтӥськизы: невропатолог, СССР-ысь АМН-лэн корреспондент ёзчиез, профессор Е. В. Шмидт, невропатолог, доцент Р. А. Ткачёв, СССР-ысь АМН-лэн академикъёсыз, профессоръёс: кардиолог П. Е. Лукомский но терапевт В. Х. Василенко. Улонэзлы кышкытлык кылдэмен, эмчиос огкылысь кенешизы: Козловез эмъяськонние нуыны уг яра, дачаяз ик эмъян ужрадъёс радъяно.

Хрущёв нырысь-валысь оскытӥз вал, дыр ортчемъя Ф. Козлов КПСС-лэн ЦК-езлэн кыкетӥ секретарезлэсь ужзэ быдэсъянэ берытскоз шуыса. Но 1963-тӥ арлэн пумаз эмчиослэн тазалыкез сярысь ивортонзы вань осконъёслы пум понӥз. 1963-тӥ арын толсуре КПСС-лэн ЦК-езлэн пленумаз ёзчиослы Козловлэн тазалыкез сярысь ивортыкуз, Хрущёв ялӥз, ас удысъёсаз со берытскыны уз быгаты ни шуыса, но со вакытэ ик пусйиз: сое ужысьтыз мозмытон сярысь юан уг пуксьы, висисьлы ватсаса шуккет медаз луы шуыса. Соин ик Козлов КПСС-лэн Президиумезлэн ёзчиез но ЦК-лэн секретарез кылиз.

Ф. Козловлэн секыт висеменыз сэрен, Хрущёвлэн котыраз кылдэм кужымъёсын но КПСС-лэн ЦК-езлэн Президиумезлэн огъя ужаз бадӟымесь воштӥськонъёс кылдӥзы. Солы воштӥсь шедьтыны тыршыса, Хрущёв кивалтэтын нырысетӥ интыосы Л. Брежневез но Н. Подгорныез поттӥз. КПСС-лэн ЦК-езлэн кыкетӥ секретарезлэсь ужъёссэ 1963-тӥ арын инвожоысен Брежнев быдэсъяз. Пери шуккем бере Ф. Козлов ужаны ӧз берытскы. 1964-тӥ арын толшоре инфаркт кырмиз на. 1964-тӥ арын коньывуонэ КПСС-лэн ЦК-езлэн Президиумезлэн кенешонъёсаз но КПСС-лэн ЦК-езлэн пленумаз ӧз пыриськы, лыдъяське, ӵапак отын Н. С. Хрущёв отставкае келямын вал. Но бератаз Политбюролэн архивысьтыз шедьтэмын КПСС-лэн ЦК-ысьтыз Огъя отделлэн кивалтӥсезлэн В. Н. Малинлэн 1964-тӥ арын 13-тӥ—14-тӥ октябре ортчем ЦК-лэн Президиумезлэн кенешонысьтыз гожъямъёсыз. Та гожъямъёсъя Ф. Р. Козлов заседаниын Хрущёвез курлаз, кылсярысь, Козловез гурт удысэн вырыны ӧз лэзьы шуыса, пыкылӥз. Та заседаниын ӵапак Козлов нырысь ик Хрущёвез «пенсие келяны» ӵектӥз.

Н. С. Хрущёвез отставкае келямзы бере, толэзь ортчыса, 1964-тӥ арын шуркынмонэ ортчем Пленумын «секыт висеменыз но кема дыр ӵоже эмъяськонлы кулэяськеменыз валче» Ф. Р. Козлов Президиумлэн ёзчиез но КПСС-лэн ЦК-езлэн секретарь ужысьтыз мозмытэмын. 1964-тӥ арын шуркынмонысен Ф. Р. Козлов — Союзысь дано пенсионер.

1965-тӥ арын 30-тӥ толшоре, сюлмыз дугдыса, шӧдтэк шорысь улонысь кошкиз. Лысьӧмыныз урна Кремль борддорысь Горд площаде ватэмын.

Буре ваён

2013-тӥ арын 7-тӥ куартолэзе Рязань улосысь Касимов ёросысь Лощинино гуртын татын вордӥськем Ф. Р. Козловлы сӥзем мемориал стеллаез усьтон митинг ортчиз.

Семьяез

• апаез — Любовь Романовна Китаева;
• кузпалыз — Александра Константиновна Козлова;
• пиез — Олег Фролович Козлов (5.11.1938—10.2001). Мускоысь анданъя но ӵыжатэмъёсъя институтэз йылпумъяз, татын ик ужаз, «Салют» КБ-ын тыршиз. СССР-ысь Лулчеберетъя министрлэсь Екатерина Фурцевалэсь (сюан ортчытон вакытлы — КПСС-лэн ЦК-езлэн Президиумезлэн ёзчиез) Светлана нылзэ кышно басьтӥз (1942—2005) (1968-тӥ арын семьязы куашказ);
• нылыз — Ольга Фроловна Козлова (ворд. 1946). Мускоын улэ.

Данъетъёсыз но дано нимъёсыз

• Социалистической Ужысь Герой (1961);
• Ленин нимо ньыль орден (1955, 1957, 1958, 1961);
• Ужысь Горд Знамя нимо кык орден (1943, 1948);
• Быдӟым Атыкай ожысь II степенё орден (1945);
• Горд Кизили орден (1942).

Валэктонъёс

Литература

• Мастыкина И. Фурцева дочь Фурцевой // Совершенно секретно. — 1998. — № 1 (107). — Январь. [2]
• Микоян А. И. Так было: Размышления о минувшем. — М.: Вагриус, 1999. — 640 с.
• Молотов, Маленков, Каганович. 1957. Стенограмма июньского пленума ЦК КПСС и другие документы / под ред. акад. А. Н. Яковлева; сост. Н. В. Ковалёва, А. В. Коротков, С. А. Мельчин, Ю. В. Сигачёв, А. С. Степанов. — М.: МФД, 1998. — 848 с.
• Мухитдинов Н. А. Река времени (от Сталина до Горбачёва): Воспоминания. — М.: Русти-Рости, 1995. — 656 с.
• Новиков В. Н. В годы руководства Н. С. Хрущёва // Вопросы истории. — 1989. № 1. — С. 105—117.
• Новиков В. Н. В годы руководства Н. С. Хрущёва // Вопросы истории. — 1989. № 2. — С. 103—117.
• Региональная политика Н. С. Хрущёва. ЦК КПСС и местные партийные комитеты. 1953—1964 гг. / сост. О. В. Хлевнюк, М. Ю. Прозуменщиков, В. Ю. Васильев, Й. Горлицкий, Т. Ю. Жукова, В. В. Кондрашин, Л. П. Кошелёва, Р. А. Подкур, Е. В. Шевелёва. —М.: РОССПЭН, 2009. — 774 с.
• Фрол Романович Козлов // Правда. — 1965. — 1 февраля.
• Хрущёв С. Н. Рождение сверхдержавы: Книга об отце. — М.: Время, 2000. — 640 с.
• Хрущёв С. Хрущёв. — М.: Вагриус, 2001. — 447 с.
• Хрущёвские времена. Непринуждённые беседы с политическими деятелями «великого десятилетия». (А. Н. Шелепин, В. Е. Семичастный, Н. Г. Егорычев) // Неизвестная Россия. XX век. — М.: Историческое наследие, 1992. — С. 270—304.

• Абрамов А. С. У Кремлёвской стены. 3-е изд., доп. — М.: Политиздат, 1980. — С. 308—309.
• Агарёв А. Ф. Преемник Хрущёва: малоизвестные страницы биографии государственного и политического деятеля Ф. Р. Козлова, нашего земляка из Касимовского района Рязанской области. — Рязань: Русское слово, 2010. — 191 с.
• Агарёв А. Ф. Преемник Хрущёва: малоизвестные страницы биографии государственного и политического деятеля Ф. Р. Козлова, нашего земляка из Касимовского района Рязанской области. Издание второе, дополненное. — Рязань: Русское слово, 2011. — 344 с.
• Агарёв А. Ф. Фрол Козлов. На взлёте: неизвестные страницы биографии государственного и политического деятеля Ф. Р. Козлова, нашего земляка из Касимовского района Рязанской области. — Рязань: Русское слово, 2013. —191 с.
• Болдовский К. А. Падение «блокадных секретарей». Партаппарат Ленинграда до и после «ленинградского дела». — СПб.: Нестор-История, 2018. — 312 с. [3]
• Государственная власть СССР. Высшие органы власти и управления и их руководители. 1923—1991 гг. Историко-биографический справочник / Сост. В. И. Ивкин. — М.: РОССПЭН, 1999. — 639 с.
• Козлов В. А. Массовые беспорядки в СССР при Хрущёве и Брежневе (1953 — начало 1980-х гг.). 3-е изд., испр. и доп. — М.: РОССПЭН, 2010. — 463 с.
• Козлов Фрол Романович // Большая советская энциклопедия. Изд. 2-е. Т. 51. — М.: Большая советская энциклопедия, 1958. —С. 156.
• Кутузов В. А. Несостоявшийся Генсек: Ф. Р. Козлов // Санкт-Петербургская панорама. 1993. — № 7. — С. 33—35.
• Сушков А. В. Козлов Фрол Романович // Металлурги Урала: Энциклопедия. 2-е изд., испр. и доп. — Екатеринбург: Изд-во Урал. ун-та, 2003. — С. 223.
• Сушков А. В. Руководство города Ижевска в период Великой Отечественной войны: второй секретарь горкома ВКП(б) Фрол Романович Козлов // Удмуртия в годы Великой Отечественной войны 1941—1945 гг.: материалы Республиканской научно-практической конференции, посвящённой 60-летию Победы. Ижевск. 7—8 апреля 2005 г. — Ижевск: Издат. Дом «Удмурт. ун-т», 2005. — С. 99—105.
• Сушков А. В. Козлов Фрол Романович // Инженеры Урала: Энциклопедия. Т. II. — Екатеринбург: Уральский рабочий, 2007. — С. 349.
• Сушков А. В. Президиум ЦК КПСС в 1957—1964 гг.: личности и власть. — Екатеринбург: УрО РАН, 2009. — 386 с. [4] [5]
• Сушков А. Ф. Р. Козлов: от чернорабочего до инспектора ЦК ВКП(б) // Веси. — 2015. — № 9 (115). — Ноябрь. — Прил. — С. 33—90. [6] [7]
• Сушков А. «Ленинградское дело». Привилегированная жизнь «ленинградских вождей» в первые послевоенные годы // Свободная мысль. — 2018. — № 4. — С. 41—58. [8]
• Сушков А. В. «Ленинградское дело»: генеральная чистка «колыбели революции» / Екатеринбург: Альфа Принт, 2018. 182 с.
• Сушков А. В. За плотной завесой слухов и домыслов: штрихи к портрету Ф. Р. Козлова // Вопросы истории. — 2022. — № 3(1). — С. 82—94. [9]
• Центральный комитет КПСС, ВКП(б), РКП(б), РСДРП(б): Историко-биографический справочник / Сост. Ю. В. Горячев. — М.: Издательский дом «Парад», 2005. — 496 с.
• Чернев А. Д. 229 кремлёвских вождей. Политбюро, Оргбюро, Секретариат ЦК Коммунистической партии в лицах и цифрах. Справочник. — М.: Журнал «Родина», Научный центр «Руссика», 1996. — 333 с.
• Чистяков А. Ю. Козлов Фрол Романович // Санкт-Петербург: Энциклопедия. 2-е изд., испр. и доп. — СПб.: ООО «Бизнес-пресса»; М.: РОССПЭН, 2006. — С. 377.

Чӧлсконъёс

• Биография Ф. Р. Козлова в Свободной энциклопедии Урала
• Ф. Р. Козловлэн биографиез
• Историк Лев Лурье — кызьы Никита Хрущёвез куштыны дасяськизы: Козлов отпущения // «Огонёк». — № 6 от 17.02.2014. — С. 48.
• «Козлов отпущения» «Советской мафия» циклысь д/ф (ТВ Центр)