Инсьӧр вӧлмет (космос)
Инсьӧр вӧлмет, инсьӧр (др.-греч. κόσμος — «радлык», «ӝикытлык») — Инсьӧрулослэн тарак буш интыосыз, кудъёсыз инсьӧр вылтыръёслэн атмосфераоссылэн висгожъёссы сьӧрын интыяськемын. Инсьӧрэз быдэсак буш интывылэн лыдъяны уг луы: отын, туж пичи ӵемлыкен ке но, кизилиос куспысь тырметэз вань, (тросгес водородлэн ионъёсыз но атомъёсыз), инсьӧр сиос но электромагнитной излучение, озьы ик эсэпам пеймыт материя.
Нимыз сярысь
Грек кылысь вуэм «космос» (дунне радлык) терминлэн нырысь-валысь валатонэз филосовской вылэм — Инсьӧрулослэсь шорзэ — Музъемез котыртӥсь валчеям вакуум[1]. Озьы ке но, латин кыл бордысь потэм кылъёсын «вӧлмет» кыл кутӥське, малы ке шуоно, тодос ласянь, Музъемез котыртӥсь вакуум (омыртэм инты) пумтэм луэ. Соин ӟуч кылын но солы матын луись кылъёсын «инсьӧр вӧлмет» («космическое пространство») термин кылдытэмын.
Висгожъёс
Инсьӧрлэн лад-лад висгожъёсыз пусъемын ӧвӧл. Макем кыдёкегес со палэнске музъемлэсь, сокем шергес луэ атмосфераез. Соин, кытысен кутске инсьӧр юанлы валэктон татчыозь шедьтэмын ӧвӧл на. Температураез вошъяськытэк улысал ке, давлениез экспоненциальной законъя зарезь ӵошталаын 100 кПа-ысен нулёзь вошъяськысал. Калыккуспо авиационной федераци атмосфераен инсьӧр вискысь 100 иськем (линия Кармана) ӝуждалаез юнматӥз, малы ке шуоно, та ӝуждалаын ӝутӥсь аэродинамической кужым кылдытон понна, летательной аппаратлы нырысетӥ космической ӝоглыкен лобыны кулэ, нош соин сэрен авиалобанлэн кулэлыкез быре[2][3][4][5].
США-ысь но Канадаысь астрономъёс атмосферной тӧлъёслэсь но инсьӧр пырыослэсь висгож вылэ пыӵетамзэс мертазы. Со пыӵет 118 иськемысен кутске. NASA инсьӧр висгожлэсь кутсконзэ 122 иськемысен лыдъя ке но. Та ӝуждалаысен шаттлъёс ракетной двигательёсты гинэ кутӥсь огшоры маневрировани режимысь аэродинамическояз, атмосфера вылэ пыкъяськонэн режиме выжо[3][4].
Инсьӧрмукуспо улос
Шундыез котыртӥсь инсьӧр вӧлмет, кытӥ вӧлске шунды тӧл (солнечный ветер), гелиосфера шуыса нимаське. Шунды сӧзнэтысь вань тодмо инсьӧрмуослэн орбитаоссы гелиосфераын интыяськемын[6]. Гелиосфералэн вӧлметэз инсьӧрмукуспо средаен тырмытэмын, нош гелиопауза сьӧрын кизиликуспо среда кутске ини.
Инсьӧркуспо среда туж юн шеромытэмын ке но, быдэсак омыртэм интыен уг лыдъяськы. Солэн суретэзлэсь валтӥсь люкетсэ плазма тырмытэ (Музъемдлэн орбита ӵошкытаз одӥг кубической сантиметрлы 8 пала люкет усе), озьы ик вань на нейтральной атомъёслэсь но молекулаослэсь пӧрмем газъёсыз, но туж ӧжыт. Со пыр пото инсьӧр сиос, магнитной полеос но электромагнитной излучениос. Инсьӧрмукуспо средае озьы ик 10-9 до 10-6 м быдӟалаем инсьӧр тузонэз (Космическая пыль) но пырто[7]. Инсьӧркуспо средаын лобало пӧртэм мугъёсъя лэзем инсьӧр аппаратъёс. 2023-тӥ арын «Вояджер» сериысь кык аппарат гелиосфераысь потыса, кизиликуспо средаез эскеронъёсты шараяз.
Инсьӧркуспо средалэн суретэзлэн кизер ӵемлыкез астрономи эскеронъёслы умой луонлыкъёс сётэ. Солы луыса, инсьӧр телескопъёс кулэ тодэтъёс басьтыны быгато.
Адямилэн эркын инсьӧры потэмез
НАСА-ысь тодосчиослэн оскытэмзыя, эркын инсьӧры утись скафандртэк потыса, адями уз кынмы, уз пушты, йырсазьзэ но уз ышты, вирыз но пӧзьыны уз кутскы, кызьы огдышемъя малпало тросэз — со кислородлэн тырмымтэезлэсь кулоз. Кышкытлык декомпрессия орчыку кылдэ — тужгес та дыр адями мугор понна кышкытэз луэ, малы ке шуоно, пуштӥсь декомпрессия дыръя вирын газ пузыриос бадӟыманы кутско. Отын хладагентэз (кылсярысь, азот) вань ке, сыӵе дыръя со вирез кынтэ. Инсьӧр условиосын тырметлэсь кизерлыксэ возён понна, давление уг тырмы (со газообразной яке чурыт состояниен гинэ луыны быгатэ, кизер гелиез лыдэ басьтытэк). Соин ик вуэз нырысь ик организмлэн тулег интыосысьтыз (кыл вылысь, синмысь, тыосысь) тӧлӟоз. Мукетыз кышкытлык — декомпрессионной висён, шобыртымтэ мугор люкетъёслэн сутсконзы но ку улысь ёзвиослэн висьыны кутскемзы — 10 секунд ортчыса шӧдӥськыны кутскоз. Кӧня ке улыса, кислород тырмымтэен адями йырсазьзэ ыштоз. 1-2 минут ортчыса кулыны быгатоз, но таиз малпан быдэсак шонер шуыса, вераны уг луы. Озьы ке но, эркын инсьӧрын тыосын шоканэз ӧд ке ӝегаты (шоканэз ӝегатон баротравма кылдытоз), 30-60 секунд ӵоже номыр кышкытэз уз луы[8].
Космонавт Михаил Корниенко но астронавт Скотт Келли, юанъёслы валэктон сётъякузы, скафандртэк эркын инсьӧрын вирысь азотэз потоз но вир пӧзьыны кутскоз шуыса огкылысь веразы[9].
Инсьӧр вӧлметлэн эрикрадо режимез
Инсьӧр вӧлметлэн но инсьӧр вылтыръёслэн эрикрадо режимзы ООН-лэн Генеральной Ассамблеяеныз (тужгес кулэлыкоез соос пӧлысь 1962-тӥ арын кутэмез (XVIII) резолюци лыдъяське) но 1967-тӥ арын кутэм Инсьӧр сярысь тупанкылэн чаклаське. Та режимлэн валтӥсь люкетаз инсьӧр но инсьӧр вылтыръёс огъя кутымон интывыл (res communis) луо шуыса пусъемын. Инсьӧрез но инсьӧр вылтыръёсты эскерон калыккуспо эрикрадъя вань кунъёслы лэземын. Та тупанкыл улэ вань гожтӥськем кунъёс Музем котырысь орбитае ожтӥрлыкен но ядерной оружиен аппаратъёсты лэзъянтэм сярысь кыл сётӥзы[10].
Валэктонъёс
- ↑ CABINET // In Between Space and Cosmos
- ↑ Sanz Fernández de Córdoba Presentation of the Karman separation line, used as the boundary separating Aeronautics and Astronautics [англи] Официальный сайт Международной авиационной федерации. Эскеремын 2012-06-26 арын
- ↑ 1 2 Андрей Кисляков Где начинается граница космоса? РИА Новости. Эскеремын 2010-09-04 арын
- ↑ 1 2 Ученые уточнили границу космоса Lenta.ru. Эскеремын 2010-09-04 арын
- ↑ Найдена ещё одна граница космоса Мембрана. Эскеремын 2010-12-12 арын
- ↑ Гелиосфера / Кононович Э. В. // Большая российская энциклопедия [Электронный ресурс]. — 2016.
- ↑ Межпланетная среда / Ермолаев Ю. И. // Большая российская энциклопедия [Электронный ресурс]. — 2017.
- ↑ Бездушное пространство: Смерть в открытом космосе Архивная копия от 10 инвожое 2009 на Wayback Machine, «Популярная механика», 29 ноября 2006 г
- ↑ Космонавты рассказали, что ждет человека в открытом космосе
- ↑ Правовой режим космического пространства
Литература
- Черняков И. H., Дмитриев M. Т., Непомнящий С. И. Атмосфера Земли // Большая медицинская энциклопедия / гл. ред. Б. В. Петровский. — 3-е изд.. — М.: Советская энциклопедия, 1975. — Т. 2. — С. 336—342. — 608 с.