Ижысь М. Т. Калашников нимо техникая кун университет

Википедиысь материал
Ижысь М. Т. Калашников нимо техникая кун университет
(ИжГТУ)
ИжГТУ-лэн 3-тӥ дышетон корпусэз
ИжГТУ-лэн 3-тӥ дышетон корпусэз
Калыккуспо нимыз Kalashnikov Izhevsk State Technical University
Кылдон арез 1952
Ректорлэсь ужзэ быдэсъясь А.В. Губерт
Студентъёс 12.000
Кунсьӧр студентъёс 350
Интыяськемез РоссияFlag of Russia.svg Россия, Ижкар
Юридической адресэз Студенческой ульча, 7-тӥ юрт
Сайтэз istu.ru
Логотип РУВИКИ.Медиа Медиафайлъёс РувикиМедиа пушкын

Ижысь М. Т. Калашников нимо техникая кун университет (ИжГТУ, 1994-тӥ арозь — Ижысь механикая институт) — Приволжск федерал округысь огез валтӥсез техникая вуз, Ижысь вылӥ дышетсконни, Россия.

Историез

ИжГТУ-лэн «Лингвистика» кафедраеныз кивалтӥсь В. А. Баранов СПбГУ-ын ортчись «Корпусная лингвистика ‒ 2019» калыккуспо конференциын «Историысь «Манускрипт» корпусысь даннойёсты утчан но шараян» темая доклад лыдӟе

Ижысь техникая кун университет (ИжГТУ) (1994-тӥ арозь — СССР-ысь Вылӥ тодон-валан сётонъя министерстволэн[ru] Механикая институтэз, Ижысь механикая институт), СССР-ысь Министръёслэн Кенешсылэн[ru] 1952-тӥ арын 22-тӥ тулыспалэ юнматэм 1034 номеро пуктэтэзъя кылдытэмын вал Ижкарысь но Удмурт АССР-ысь промышленной удыслы ӟеч инженеръёсты дасян вылысь. Вылӥ дышетсконни СССР-ысь Вылӥ дышетонъя министерстволэн бурд улаз ужаз.

1952-тӥ арын куарусёнэ институт нырысетӥ студентъёсты кутӥз — ваньмыз ог 200 кузя. Пумен йылӥзы факультетъёс но специальностьёс, нош элькунысь каръёсын (Вотка, Сарапул, Глазов, Чайковск, Камбарка) филиалъёсыз усьтэмын вал.

2008-тӥ арын университетлэн бакалавр но магистер 7 программаосыз калыккуспо аккредитациез ортчизы Эвалуацияя но аккредитацияя шор агентствоын (ZEvA) (Германия, Нижняя Саксония, Ганновер город). Дуннеысь 23 кунъёсысь 40-лэсь трос вузъёсын но огазеяськонъёсын студентъёс, стажёръёс, аспирантъёс ялан воштӥськон мынэ, эскерон проектъёс бордын валче ужало. Ар куспын 100-лэсь ятыр студентъёс кунгож сьӧрысь валче ужась вузъёсын тодон-валан люкало, калыккуспо образецъя диплом басьто.

Университетын кӧня ке тунсыко калыккуспо проектъёс быдэсмо. Аален городысь (Германия) университетэн но Zeh Metallveredelungs GmbH (Zen GmbH) компаниен дэмен ИжГТУ-ын Вылтусэз ӟечомытон амалъёсъя калыккуспо центр кылдытэмын. Университет «ИнтерНаноТех» калыккуспо лабораторие но пыриськиз. Со сяна, Белоруссиысь йӧскалык техникая университетэн, А. В. Лыков нимо тепло-массообменъя институтэн, Беларусь Республикаысь йӧскалык академиен но Венаысь техникая университетэн (Австрия) валче ИжГТУ наноматериалъёсты но наногумыосты эскеронъя калыккуспо проект бордын ужа. ИжГТУ-лэн базаяз Cisco сетевой академилэн лабораториез усьтэмын.

2012-тӥ арын университетлы дано оружейник Михаил Тимофеевич Калашниковлэн нимыз сётэмын.

Туннэ ИжГТУ улосысь огез валтӥсез вуз луэ, озьы ик Россиысь техникая вузъёс пӧлын тужгес кужмоез луэ.

Огъя тодэтъёсыз

ФГБОУ ВПО «Ижысь техникая кун университет» вылӥ дышетсконнилэн учредителез Росси Федерациысь Правительство луэ. Кылдытӥсьлэсь оскетъёссэ Дышетонъя федерал агентство быдэстэ[1].

ИжГТУ-эн кивалтон быдэсме быръем Дышетон Кенеш чаклам улсын, солэсь ужамзэ, луонлыкъёссэ радъя закон но Ижысь техникая кун университетлэн Уставез. Озьы ик Дышетонъя но методикая кенеш, Дышетон изданиосъя эксперт кенеш ужало на. Университетлэсь ужзэ меӵак радъя ректор.

64 кафедраосын (50-эз соос пӧлысь профильёсъя ужало) 800 пала дышетӥсьёс тыршо. Дышетӥсьёс пӧлысь 60 процентэз тодосчиос луо. Кылдэмез дырысен туннэ нуналозь вуз 50 сюрс пала ӧнерчиосты дасяз ни.

Университет нырысь-валысь Ижкарлэн шораз одӥг гинэ корпусын интыяськылӥз. Туала ИжГТУ Иж пумын сик дурын интыяськемын. Студентъёслэн городоказы лач-лач пуктэмын 8 дышетон корпусъёс, стадион, «Интеграл» дворец, 7 общежитие, профилакторий, сиськон комбинат, студентъёслэн поликлиниказы. 2012-тӥ арын бассейн пуктыны кутскемын, сое 2013-тӥ арын 30-тӥ толшоре йылаз-пумаз вуттӥзы.

Рейтингез

Университетын инженеръёсты 6 специальностья, 48 бакалавриат, 37 магистер, 27 аспирантура но докторантура программаосъя дасяло. Университет кун аккредитациез ортчиз. Бакалавр но магистер сизьым программаосыз калыккуспо аккредитациез ортчизы Эвалуацияя но аккредитацияя шор агентствоын (ZEvA) (Германия, Нижняя Саксония, Ганновер город).

2014-тӥ арын «Эксперт РА[ru]» агентство вузэз СНГ-е[ru] пырись устоосыз вылӥ дышетсконниос пӧлы пыртӥз, отын университетлы рейтингъя «Е» класс сётэмын вал[2].

М. Т. Калашников нимо ИжГТУ озьы ик сюремын Азинскись Европа но Шор Азия (QS EECA) #351-400 (2021) рейтинге QS

Университет 2020-тӥ арын ортчытэм «Дуннеысь профессиональной университетъс пӧлысь RankPro рейтинг» ӵошатсконын но устоез луиз. Тазэ арлы быдэ Global World Communicator (GWC), Education and Science программая ужась Тодосчиослэн калыккуспо кенешсы чакла-шарая.

Ректоръёсыз

  • 1952 — Остроумов, Владимир Павлович
  • 1964 — Талантов, Николай Васильевич
  • 1972 — Карпунин, Василий Александрович
  • 1975 — Липанов, Алексей Матвеевич
  • 1983 — Шаврин, Олег Иванович
  • 1989 — Абрамов, Иван Васильевич
  • 2007 — Якимович, Борис Анатольевич
  • 2017 — Грахов, Валерий Павлович
  • 2021 — Губерт, Александр Викторович (ректорлэсь ужзэ быдэсъясь)

Факультетъёсыз

  • Машина лэсьтон факультет
  • «Машина лэсьтонысь, корт ӵыжатонысь туала технологиосъя» институт
  • Приборостроительной факультет
  • «Цифровой экономикая» институт
  • В. А. Шумилов нимо архитектурая но лэсьтӥськонъя институт
  • Информатикая но вычислительной техникая» институт
  • «Математикая но естественной наукая» факультет
  • Энергетикая но жилищно-коммунальной хозяйствоя институт
  • Ньыль полэс олимпи чемпион А. И. Тихонов нимо мугорез кыдатон культурая но спортъя институт
  • Калыккуспо дышетон программаосъя институт
  • Вис карытэк профессиональной тодон-валан басьтонъя институт
  • Ватсаса профессиональной тодон-валан басьтонъя институт
  • Дышетон технологиосъя институт

Калыккуспо ужез

М. Т. Калашников нимо ИжГТУ кунгож сьӧрысь 45 дышетсконниосын но Европаысь, Азиысь но Африкаысь кунъёсысь наукаен но эскеронъёсын вырись огазеяськонъёсын кусыпсэ ялан юнматэ. Университетын 41 кунысь 320 студентъёс дышетско — Азербайджан, Алжир, Ангола, Армения, Бангладеш, Белоруссия, Бурунди, Гаити, Гамбия, Гана, Гвинея, Германия, Грузия, Египет, Зимбабве, Ирак, Йемен, Казахстан, Камерун, Китай, Конго, Кыргызстан, Либерия, Ливия, Малайзия, Марокко, Молдова, Намибия, Нигерия, Пакистан, Сенегал, Сирия, Судан, США, Таджикистан, Танзания, Тунис, Туркменистан, Узбекистан, Украина но ЮАР[3].

2004-тӥ арын 18-тӥ куарусёнэ Болоньяын (Италия) ИжГТУ университетъёслэн Быдӟым Хартизы (Magna Charta Universitatum) улэ кинюртэмзэ пуктӥз.

2005-тӥ арын толшоре ИжГТУ Европаысь университетъёслэн ассоциациязы (European University Association) шедиз, та ассоциациын Европаысь 47 кунъёсысь, озьы ик Россиысь 18 вузъёсысь 850 ёзчиос лыдъясько. М. Т. Калашников нимо ИжГТУ-лэн кивалтӥсьёсыз Европаысь университетъёслэн ассоциациенызы радъям калыккуспо конференциосаз ялан пыриськыло.

Европаысь огкылысь ужано вузъёсын ӵош М. Т. Калашников нимо ИжГТУ Erasmus+ программая «Студентъёслэн, дышетӥсьёслэн но университетын ужасьёслэн воштӥськонъёслы капчиен тупатӥськемзы» ӵошатсконазы пыриське. Туннэ нуналлы университетысь 10 дышетӥсьёс, 8 ужасьёс но 16 студентъёс Дьёрысь (Венгрия) Иштван Сечени нимо университетын, Тренчинысь (Словакия) Александр Дубчек университетын, Задарысь (Хорватия) университетын но Братиславаысь (Словакия) технологической университетын лекциосты лыдӟизы, тодон-валанзэс муромытӥзы но стажировка ортчизы. 2017-тӥ—2018-тӥ дышетскон аръёсы М. Т. Калашников нимо ИжГТУ-ысь 4 аспирантъёс Братиславаысь (Словакия) технологической университетын наукая но эскеронъёсъя проектъёс бордын тыршизы, со дыре ик ИжГТУ Словакиысь 1 аспирантэз но 1 магистрантэз ас дораз кутӥз[4].

Университетын студентъёсты англи кылын дышетон программа но радъямын. 2013-тӥ арысен Египетско-Российской университетэн (ЕРУ) валче  англи кылын таӵе бакалавр программаос радъямын вал: «Лэсьтӥськон», «Мехатроника но робототехника», «Инфокоммуникационной технологиос но связья системаос». 2015-тӥ арысен «Лэсьтӥськонысь проектъёсын кивалтон» магистер программа англи кылын быдэсме. 2017-тӥ—2018-тӥ дышетскон аръёсы университет англи кылын выль бакалавриат программазэ пыӵатӥз — «Программной инженерия», эшшо огзэ вуонояз аре — «Менеджмент»[4].

М. Т. Калашников нимо ИжГТУ кунгож сьӧрысь валче ужано университетъёсын валче соку ик кык диплом басьтыны луонлык сётӥсь 4 программаосты улонэ пыӵатэ — та программаос Остфалиысь (Германия) Прикладной наукаосъя вылӥ школаен но Египетско-Российской университет (Египет) валче гожтэмын. Таин валче 2011-тӥ арын М. Т. Калашников нимо ИжГТУ-ысь теплотехнической факультет но Германиысь Прикладной наукаосъя вылӥ школаысь «Лэсьтӥськон — ву — музъем» факультет бинациональной дышетон бакалавриат программа кылдытӥзы но улонэ пыӵатӥзы, соя партнёр луись вузын 1 ар ӵоже дышетсконо, диплом ужез утэм бере кык диплом басьтыны луоно[4].

М. Т. Калашников нимо ИжГТУ-ысь кылысь кылэ берыктӥсьёслэн институтазы кылъёсъя 2 центр ужа: Гранадаысь (Испания) университет юрттэмен валче усьтэм Испан кылэз но культураез дышетон «¡Hola!» центр но Брноысь (Чехия) технологической университет но Лымшор Моравиысь (Чехия) мобильной калыккуспо центръёс юрттэмен усьтэм Чех кылэз дышетонъя но культурая центр[4].

Машинаослэн но механизмъёслэн теоризыя калыккуспо федерация (IFToMM) сюлмаськемен, 2011-тӥ арын ИжГТУ-ын машинаослэн но механизмъёслэн теоризыя (SIOMMS) нырысетӥез калыккуспо студент олимпиада ортчиз (http://siomms-2020.istu.ru/). Отчы 8 кунъёсысь 17 вузъёсысь командаос пыриськизы. 2013-тӥ арын коньывуонэ Шанхайысь Цзяо Тун университетын кыкетӥез калыккуспо олимпиада ортчиз, отчы М. Т. Калашников нимо ИжГТУ-ысь команда но пыриськиз. 2016-тӥ арын коньывуонэ Карла II университетын (Мадрид, Испания) радъям SIOMMS-2016 олимпиадаын ИжГТУ-ысь команда 11-тӥ интые потӥз. 2018-тӥ арын коньывуонэ ТММ-я Лымшор Америкаысь Лима городысь Перу университетын ортчиз, отчы кыкысьтыз ик Америкаосысь, Европаысь, Китайысь, Россиысь командаос вуылӥзы. Отын Россилэсь данзэ Н. Э. Бауман нимо МГТУ-ысь но М. Т. Калашников нимо ИжГТУ-ысь командаос утизы. V калыккуспо студент олимпиада ИжГТУ-ын 2020-тӥ арын коньывуонэ радъяськоз.

М. Т. Калашников нимо ИжГТУ Китайысь дышетонъя но наукая огазеяськонъёсын мылысь-кыдысь ужа. Университет Россиысь но Китайысь техникая университетъёслэсь ассоциацизэс (АТУРК) огез кылдытӥсез но ёзчиез луэ, ассоциациен радъяно ваньмаз ужрадъёсаз пыриське.

2014-тӥ—2015-тӥ аръёсы Харбинысь политехникая но Нанкинысь политехникая университетъёсын валче ужан сярысь огкылъёс юнматэмын, со огкылъёсты 2019-тӥ—2020-тӥ аръёсы но азинтӥзы. Туннэ нуналлы ИжГТУ-ысь бакалавриатысь но магистратураысь 12 мурт Харбинысь политехникая университетын дышетскео но дышетсконзэс йылпумъязы, соослы Китайысь правительство стипендия тыриз.

2019-тӥ арын куарусёнэ М. Т. Калашников нимо ИжГТУ-э Сиань городысь делегация вуылӥз, ужрад ӟуч-китай егитъёслэн бизнес-инкубаторзы улсын ортчиз — та туж аспӧртэм акселерацияя программа, сое Россиысь проектъёсты Китайын вӧлмытон, Китайысь инвестициосты Россиысь экономикае кыскон вылысь малпазы. 2019-тӥ арын коньывуонэ Удмурт Элькунысь делегация ИжГТУ-ысь ӧнерчиосын валче Сиане вуылӥз.

Студентъёслэн улон-вылонзы

Шпаргалка» кафе

Студент улон со — котыр ваньзэ эскерон-тодон, выльзэ шараян но лэсьтон, выль адямиосын тодматскон но кусып тупатон, юнман, астэ шедьтон мылкыдъёсын пачылам аспӧртэм улон. Студент вакыт дисциплинаосты дышетонэн, лекциосын, семинаръёсын но контрольной ужъёсын гинэ герӟаськемын ӧвӧл, та дыр пӧртэм учыръёсын астэ но быгатонлыкъёстэ возьматыны луонлык сётэ.

Ӝыны даур ӵоже университет Ижкарлэн пумаз синмаськымон инкуазяз интыяське. Кампус одӥг дышетскон корпус бордысен (али 2 номеро корпус) но студентъёслы одӥг огъяулонни бордысен кутскиз вал. Туннэ со дышетскон корпусъёслэн, огъяулонниослэн быдэс комплекссы луэ, татын ик калыкез сюдон комбинат, спорт сооружениослэн огъетсы (стадион, уян бассейн, спортзалъёс). Тазалык ужпумъёсты сэрттон-пертчон понна кыл куто университетысь студентъёс но ужасьёс поликлиника, профилакторий.

Студентъёслэн «Интеграл» лулчеберетъя юртсы

Вузлэн улоназ аспӧртэм инты басьто студентъёслэн «Интеграл» центрзы но Кам шурлэн ярдураз 16 гужем коркаосын но 1 тол коркаен 100 муртлы интыяськем «Галево» дышетонъя но спортъя центрзы. Озьы ик татын 3 пол сиськонэн столовой, футболэн, волейболэн, баскетболэн но бадминтонэн шудон спорт площадкаос, сауна ужало.

Студент отрядъёс

«Механ» отрядлэн пусэз
  • 1967-тӥ арын ИМИ-ын (ИжГТУ) ЦК ВЛКСМ-лэн Студент отрядъёслэн шор штабзылэн бурд улаз нырысетӥосыз студотрядъёс кылдӥзы, соосты гуртын пуктӥськонэ но тыл кысконэ ысъязы. Штаб отӥяз «Удмуртия» нимо транспортъя но транспорт хозяйствоез ӝутонъя студотряд но кылдытӥз, сое пумен кык отрядъёслы люкизы, но валтӥсь кужым отын ИМИ (ИЖГТУ) вал, отрядэ татысь 191 студент пыриськиз, со сяна, 4 — УГПИ (УдГУ) но 2 — ИГМА. «Удмуртия-1» отрядысь студентъёс Янаул станцилы минерал удобрениосты возён склад лэсьтӥзы, со склад дорозь чугун сюрес ӝутӥзы, озьы ик чугун сюрес вылын ужасьёслы 2 этажъем корка пуктӥзы. «Удмуртия-2» отряд Чад станцие келямын вал, татын кык улоно кирпич коркаос, пассажиръёслы кык площадкаос ӝутоно, чугун сюреслы валтӥсь сюрес лэсьтоно вал.
  • 1968-тӥ арын «Транзистор» отряд кылдӥз, со ИМИ-ысь (ИжГТУ) студентъёсты огазеяз, озьы ик «Энергия» отряд люкаськиз, татысь егитъёс Удмуртиысь пыдлось гуртъёсы тыл кыскизы.
  • 1971-тӥ арын Удмуртиын проводникъёслэн нырысетӥ студент отрядъёссы кылдӥзы, нош 1974-тӥ арын вуоно дышетӥсьёс отрядэ огазеяськизы, егитъёс пӧлын уноез вал Ижысь механикая институтысь студентъёс.
  • 1987-тӥ но 1988-тӥ аръёсы ИМИ-ысь (ИжГТУ) но Удмурт Элькунысь мукет вузъёсысь отрядъёсы пырись студентъёс всесоюзной социалистической ӵошатсконын вормизы.

Туала отрядъёс

  • 2001-тӥ арын Удмуртиын студент отрядъёсты вунэтэмысь выльысь улӟытыны ӧдъязы. ИжГТУын «Victory», «Д. Э. М. С.» отрядъёс кылдӥзы. 2005-тӥ арын проводникъёслэн 3 отрядзы ужаны ӧдъяз: «РОМАТ», «Эдельвейс» но «Проф.com».
  • 2004-тӥ арын 4-тӥ южтолэзе ИжГТУ-лэн бурд улаз ужась студент отрядъёслэн штабзы кылдытэмын, солы техникая вузлэсь нимзэ сётӥзы — «Механ».
  • 2008-тӥ арын проводникъёслэн, лэсьтӥськисьёслэн но дышетӥсьёслэн кӧня ке отрядъёссы кылдӥзы. Пуктӥськисьёс озьы Сочиысь олимпи объектъёсты ӝутонэ, Екатеринбургысь «Академический» объектэз лэсьтонэ, Ямалысь, «Бованенково» объектэз быдэстонэ пыриськизы. Проводникъёслэн отрядъёссы Горьковской но Октябрьской чугун сюрес вылын ужазы, «ФПК» ОАО-лэн данъян грамотаосынызы пусъемын.
  • 2013-тӥ—2014-тӥ аръёс «Механлэн» улоназ бадӟым инты басьтӥзы. 3 выль студотрядъёс кылдытэмын вал: «Данко» СПО, «Италмас» СОП, «Молот» ССО. «Механ» штаб 10 аръем юбилейзэ пусйиз[5].

Галерея

  • 2-тӥ корпус котырысь сквер

    2-тӥ корпус котырысь сквер

  • 2-тӥ корпус котырысь ожтӥрлыклы сӥзем экспозиция

    2-тӥ корпус котырысь ожтӥрлыклы сӥзем экспозиция

  • 2-тӥ корпус котырысь ожтӥрлыклы сӥзем экспозиция

    2-тӥ корпус котырысь ожтӥрлыклы сӥзем экспозиция

  • 6-тӥ корпус

    6-тӥ корпус

Валэктонъёс

  1. ↑ Ижевский государственный технический университет имени М. Т. Калашникова. Основные сведения
  2. ↑ Рейтинг высших учебных заведений России и стран членов Содружества Независимых Государств.
  3. ↑ Ижевский государственный технический университет имени М. Т. Калашникова. ВУЗы-партнеры
  4. ↑ 1 2 3 4 Ижевский государственный технический университет имени М. Т. Калашникова. Международное сотрудничество
  5. ↑ Ижевск официальный сайт. Студенческие отряды Удмуртской Республики

Чӧлсконъёс

«https://udm.ruwiki.ru/w/index.php?title=Ижысь_М._Т._Калашников_нимо_техникая_кун_университет&oldid=502184»-ысь басьтэмын