Ижысь медициная кун академия

Россиысь Тазалыкез утёнъя министерстволэн ФГБОУ ВО «Ижысь медициная кун университет»
(ИжГМУ)
Дышетонъя но лабораториосъя корпус
Международное название	Izhevsk State Medical Academy (ISMA)
Прежнее название	Ижысь медициная кун академия (ИГМА)
Кылдон арез	1933
Тип	академия
Ректор	Алексей Евгеньевич Шкляев
Студенты	3961 (2020-тӥ арын толсуре)
Иностранные студенты	140 (2020-тӥ арын толсуре)
Доктора	84 (2020-тӥ арын толсуре)
Преподаватели	401 (2020-тӥ арын толсуре)
Интыяськемез	Удмуртия Удмуртия, Ижевск
Юридический адрес	426034, Удмурт Элькун, Ижкар, Коммунаръёслэн ульчазы, 281-тӥ юрт
Сайт	igma.ru
Медиафайлъёс РувикиМедиа пушкын

Ижысь медициная кун университет(ИжГМУ; быдэс нимыз: Россиысь Тазалыкез утёнъя министерстволэн кун бюджет чотын ужась «Ижысь медициная кун университет» федерал вылӥ дышетсконниез яке Россиысь Минздравлэн ФГБОУ ВО ИжГМУ) — Удмурт Элькунысь Ижкарысь эмъян ӧрысь вылӥ дышетсконни.

Историез

Зуркатӥсь Граждан ож бере Россиын сибирь язва но калера висёнъёс пуромыны кутскизы. Таин валче бадӟым ужпум кылдӥз: Удмурт автономной областьын вылӥ квалификациен эмчиосты дасяно-дышетоно. 1933-тӥ арын 15-тӥ оштолэзе РСФСР-ысь Калык Комиссаръёслэн Советсылэн 341 номеро пуктэмезъя, Ижкарын медициная кун институт усьтэмын. Дано совето тодосчи но эмъясь Василий Николаевич Парин — вузэз кылдытӥсьёс пӧлысь огез вал.

1933-тӥ арын гудырикошконэ Ижысь медициная институтэ нырысетӥ курсэ 171 студентъёсты кутӥзы. Нырысь-валысь институтын одӥг гинэ факультет вал — йӧнатонъя факультет, со бордын ньыль кафедраос ужазы: нормальной анатомияя, огъя химияя, физикая но биологияя. Отӥяз вить ар ӵоже факультет ялан паськытаз: эшшо ог кызь кафедраос радъямын на вал, соосты дышетон пособиосын юнматон сярысь Мускоысь медициная кыкетӥез институт сюлмаськиз.

1938-тӥ арын институтысь дипломен нырысетӥ врачъёс потӥзы — ваньмыз 109 кузя, уноез соос пӧлысь Удмуртиысь больницаосы ужаны ыстэмын вал. Быдӟым Атыкай ож вакытэ институт вить выпуск поттӥз — 762 выль врачъёс пӧлысь тросэз тыложысь но фронт мышкын ужась госпитальёсы келямын вал. 1943-тӥ арын сюлмысь ужамез но мыло-кыдо юрттэмез понна институт Совето Армилэн Вылӥ главнокомандующиезлэсь Генералиссимус Сталинлэсь таукаронэныз пусъемын.

Быдӟым ож ортчем бере институт эшшо но азинскиз: 1975-тӥ арын педиатрияя факультет усьтэмын, 1980-тӥ арын — пинь эмъянъя факультет. Дышетон удысын техникаен герӟаськем арбериосты мыло-кыдо кутыны ӧдъязы, лабораториосысь тӥрлыкез выльдӥзы, дышетон вылысь кинофильмъёс лэсьтэмын вал. 1980-тӥ аръёслэн кутсконазы вычислительной центр кылдытэмын, вычислительной техникаез дышетонэ пыӵатыны кутскизы.

1995-тӥ арын 23-тӥ инвожое Россиысь Госкомвузлэн 953 номеро приказэзъя, озьы ик Росси Федерациысь Тазалыкез утёнъя но медицинаысь промышленностья министерстволэн 1995-тӥ арын 20-тӥ пӧсьтолэзе кутэм 209 номеро приказэзъя, Ижысь медициная кун институтлы академилэн статусэз сётэмын вал, таин валче институт Ижысь медициная кун академия луиз.

2023-тӥ арын Россиысь Тазалыкез утёнъя министерстволэн бурд улаз ужась ИГМА-лэн уставезъя, институтлэсь нимзэ воштӥзы но со Ижысь медициная кун университет луиз.

Ректоръёсыз

• 1933-тӥ—1937-тӥ аръёсы — Гавриил Григорьевич Стерхов;
• 1937-тӥ—1940-тӥ аръёсы — Самуил Рувимович Гехман;
• 1940-тӥ—1944-тӥ аръёсы — Николай Фёдорович Рупасов;
• 1944-тӥ—1948-тӥ аръёсы — Иван Иванович Косицын;
• 1948-тӥ—1952-тӥ аръёсы — Семён Иванович Ворончихин;
• 1952-тӥ—1955-тӥ аръёсы — Илья Васильевич Олюнин;
• 1955-тӥ—1961-тӥ аръёсы — Николай Фёдорович Рупасов;
• 1961-тӥ—1968-тӥ аръёсы — Арсений Михайлович Загребин;
• 1968-тӥ—1975-тӥ аръёсы — Иван Петрович Мокеров;
• 1975-тӥ—1987-тӥ аръёсы — Георгий Ефимович Данилов;
• 1987-тӥ—1993-тӥ аръёсы — Вениамин Арсеньевич Ситников;
• 1993-тӥ—2018-тӥ аръёсы — Николай Сергеевич Стрелков;
• 2019-тӥ арысен — Алексей Евгеньевич Шкляев.

Дышетон

Пусъем, 2020-тӥ арын ИГМА-ысь дышетон удысэ 5 факультетъёс пырисько:

• йӧнатонъя факультет;
• педиатрияя факультет;
• пинь эмъянъя факультет;
• вузэ пыремлэсь азьвыл дышетсконъя но ватсаса тодон-валан люканъя центр;
• эмчиослэсь тодон-валанзэс муромытонъя факультет.

Ӧнерчиосты дасян «йӧнатон уж», «педиатрия» но «стоматология» ӧръёсъя мынэ. Озьы ик диплом басьтэмзы бере интернатураысь 22 ӧнеръёсъя, ординатураысь 28 ӧнеръёсъя но аспирантураысь 19 ӧнеръёсъя тодон-валанзэс муромыто. Со сяна, эмчиослэсь тодон-валанзэс ялан муромыто, квалификацизэс йылтыны юртто, абитуриентъёсты вузэ пырыны дасяло.

Со сяна, медакадемия Ижкарысь техникая кун университетэн валче «Медицинаысь интроскопияя тӥрлыкъёс но физической амалъёс» ӧръя вуоно ӧнерчиосты дасяло. Озьы ик медакадемия Удмурт кун университетэн дэмен «Медицинаысь биотехнология» ӧръя специалистъёсты дасяло.

ИГМА-лэн клиникая базаосыз Удмурт Элькунысь но Ижкарысь валтӥсь эмъянъя но профилактикая ужъюртъёс луо: 1-тӥ элькун эмъяськонни, клиникая но диагностикая элькун центр, 1, 2, 6, 9 номеро кар эмъяськонниос но мукетъёсыз. Котькудаз больницаосын эмъянын но висёнэз тодманын-алонын туала тӥрлыкъёс, выль ужан амалъёс кутӥсько, ваньмыз та медакадемиысь студентъёсты рос-прос дышетыны, наукаын но практикаын тодон-валанзэс ӝутыны, занятиосты узырмытыны юрттэ.

2008-тӥ арысен Ижысь медициная академиын ӟуч но англи кылъёсын «Здоровье, демография, экология финно-угорских народов» («Health, Demography, Ecology of Finno-Ugric People»; ISSN 1994-8921) наукая но практикая журнал потэ.

Валэктонъёс

Чӧлсконъёс

• Официальный сайт

Литература

• Шубин Л. Л., Зайцева В. И., Попова Е. В., Сухих Н. В. История создания и становления Ижевского государственного медицинского института // Таврический научный обозреватель. — 2016. — № 11-1 (16).
• Ижевская медицинская академия государственная // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 352. — 768 с. — 2200 экз. — ISBN 978-5-7659-0486-2.
• История Удмуртии: XX век / Под ред. К. И. Куликова; введение О. В. Васильевой, Л. Н. Бехтеревой, Н. А. Родионова. — Ижевск: УИИЯЛ УрО РАН, 2005. — 544 с. — 3000 экз. — ISBN 5-7691-1649-8.