Стрелков, Николай Сергеевич

Рувикиын таӵе фамилиен мукет муртъёс сярысь гожтосъёс вань. Учке: Стрелков.

Николай Сергеевич Стрелков
Вордӥськем  дырыз	28-тӥ коньывуонэ 1951({{padleft:1951|4|0}}-{{padleft:10|2|0}}-{{padleft:28|2|0}}) (74 года)
Вордӥськем интыез	Валовыр[d], Эгра ёрос, Удмурт Автономной Советской Социалистической Республика, РСФСР, СССР
Кун	Россия  СССР
Быдэс нимыз	Николай Сергеевич Стрелков
Ужан удысэз	преподаватель университета, хирург, тодосчи, ректор
Наука удысын	хирургия
Ужан интыез	Ижысь медициная кун академия
Учёной степенез	эм наукаосъя доктор
Данъетъёсыз

Стрелков Николай Сергеевич (ворд. 28-тӥ коньывуонэ 1951, Валовыр^[d], Удмурт Автономной Советской Социалистической Республика) — росси тодосчи, вылӥ категориен эмъясь, нылпи хирург, эм наукаосъя доктор, профессор. Ижысь медициная кун академилэн ректорез (1993—2018). Росси Федерациысь дано эмчи, Удмурт Элькунысь тазалыкез утён удысысь дано ужась, Ижкарлэн дано муртэз.

Улон сюресэз

Вордӥськиз 1951-тӥ арын 28-тӥ куарусёнэ Удмурт АССР-ысь Эгра ёросысь Валовыр гуртын. Семьяын бадӟымез пинал вал. Мумиз роддомын акушер луыса тыршиз.

Зура школаез йылпумъямез бере, 1968-тӥ арын Ижысь медициная институтэ (ИГМИ) дышетскыны пыриз, «эмъян уж» специальностья, отӥяз интернатураын нылпи хирургияя тодон-валанзэ будэтӥз.

1974—1975-тӥ аръёсы УАССР-ысь элькун клиникая больницаын эмчи-хирург вал, собере 1989-тӥ арозь  ИГМИ-ысь нылпи хирургияя кафедраын ассистент луыса ужаз. 1987-тӥ арын нылпиослэсь остеомиелит висёнзэс шараянъя но эмъянъя кандидат диссертацизэ утиз (бератаз та темалы ик доктор диссертацизэ сӥзиз). 1989-тӥ арын ИГМИ-ысь нылпи хирургияя кафедраысь доцент луиз. 1985—1990-тӥ аръёсы деканлэн воштӥсез вал, 1990-тӥ арысен — ИГМИ-ысь педиатрияя факультетысь декан но дышетон ужъёсъя проректор. 1993-тӥ арысен 2018-тӥ арын пӧсьтолэзёзь Ижысь медициная кун академилэн дас куинетӥ ректорез вал.

«1994-тӥ арын кунгож сьӧрысь нырысетӥ студентъёсты кутӥмы. Со Шри-Ланкаысь егитъёс вал. Али ИГМА-ын 18 кунъёсысь студентъёс дышетско. Умой студентъёс. Со Шри-Ланкаысь ик тазалыкез утёнъя министр – милям выпускницамы. Огазеяськем Араб Эмиратъёсысь валтӥсь кардиолог ми дорын тодон-валан басьтӥз. Суданысь одӥг гинэ философияя профессор (отын со озьы нимаське) — азьвыл студентмы. Асьме адями Александр Гольдфарб Гарвардын дышетэ, нош солэсь азьвыл со Юта штатын ужаз но мормонъёслэсь пекля висёнъёссыя быдэс банк ивортонъёс люказ. Нош та структура туж ворсамын. Озьыен, солы оскизы»

— Н. С. Стрелков (2018-тӥ ар)

2017-тӥ арысь ивортонъёсъя, Николай Стрелков 750-лэсь ятыр наукая ужъёслэн авторез но улонэ пыӵатэм 38 рационализатор дэмланъёслэн огез авторез луэ. 2018-тӥ арын пӧсьтолэзе ивортонъёсъя, изобретениослы солэн 86 патентэз. Солэн кивалтэмез улсын 27 кандидат но 4 доктор диссертациос утемын. Нылпи хирургияя монографилэн но учебниклэн авторез, со Россиысь но СНГ кунъёсысь медициная вань вузъёсын дышетыны чакламын.

Удмурт Элькунысь Кун Кенеше депутатэ кӧня ке пол быръёнъёсы пыриськылӥз. 2014-тӥ арын Удмуртилэсь быръемын вал Росси Федерациысь Мерлыко палатае. Солэн сюлмаськемезъя Ижкарысь валтӥсь эмъян огазеяськонъёс ИГМА-лэсь клиникая базаезъя инлык басьтӥзы, со калыклы эмъюрттэт сётонлэсь ӟечлыксэ будэтӥз.

Ас улонэз

Кышнояськемын, вань нылыз (озьы ик эмчи) но кык пиез.

Н. С. Стрелков но И. Н. Семёнов финн-угор калыкъёслэн калыккуспо конференциязы. Петрозаводск, 2015-тӥ ар

Мерлыко уже мыло-кыдо пыриське. Уно аръёс ӵоже финн-угор калыкъёслэн калыккуспо кенешъя комитетысь ёзчиез луэ, «Тазалык, демография, экология» комиссилэн кивалтӥсез, «Финн-угор калыкъёслэн тазалыксы, демографизы, экологизы» калыккуспо журналлэн валтӥсь редакторез вал, нош 2018-тӥ арлэн шорысеныз — валтӥсь редакторлэн воштӥсез.

Данъетъёсыз но дано нимъёсыз

• Росси Федерациысь дано эмчи;
• Удмурт Элькунысь тазалыкез утён удысысь дано ужась;
• Ижкарлэн дано муртэз;
• Удмурт Элькунлэн наука удысысь Кун премиез;
• Калыккуспо ЕАRТНМАКЕR премия — кивалтон политикаез визьмо но азьпала адӟыны быгатыса кутэмез понна (1998, Париж);
• «Азвесь папирус» — кадръёсты дасянын трос лэсьтэмез понна (Женева);
• Нимысьтыз лэсьтӥськонъя федерал агентстволэн «Россиысь Спецстройлы 55 ар» юбилей медалез;
• «Кылкутонын но Атыкай музъемлы оскымон луэмез понна» медаль;
• «Эмъян удысэз но тазалыкез утёнэз азинтонын ӟеч тыршемез понна» орден.

Валэктонъёс

Чӧлсконъёс

• Тринадцатый ректор [ӟуч]

• Николай Стрелков покинул пост ректора медицинской академии [ӟуч]

• Стрелков Николай Сергеевич [ӟуч]

• Николай Стрелков покинул пост ректора Ижевской медакадемии [ӟуч]