Ворончихин, Семён Иванович

Семён Иванович Ворончихин
Семён Иванович Ворончихин
Вордӥськем дырыз	20-тӥ пӧсьтолэзе 1902
Вордӥськем интыез	Балезино ёрос;
Кулэм дырыз	8-тӥ гудырикошконэ 1982 (80 лет)
Кулэм интыез	Иж, РСФСР, СССР;
Кун	СССР;
Ужан удысэз	политик
Данъетъёсыз

Ворончихин Семён Иванович (1902 — 1982) — хирург, эм тодосъя доктор, Ижысь эм институтлэн профессорез. УАССР-ысь но РСФСР-ысь дано эмъясь, СССР-ысь тазалыкез утён удысысь отличник, Удмурт АССР-ысь тодос удысысь дано ужась.

Улон сюресэз

Вордскиз Глаз уездысь Покчи Ягошур гуртын (али Удмуртиысь Балезино ёросэ пыре) удмурт крестьян семьяын^[1].

1916-тӥ арысен 1920-тӥ арозь Глазысь дышетӥсьёслэн семинариязы дышетскиз, сое йылпумъямез бере ар ӵоже Нововолково школаын дышетӥсь луыса ужаз.

1921-тӥ арын Томскысь кун университетлэн медициная факультетаз дышетскыны пыриз. Сое йылпумъяса, 1926-тӥ арысен Ижкар эмъяськоннилэн хирургияя ёзэтаз ординатор луыса ужаз, 1928-тӥ арысен — Свердловскысь ожгар госпитальын ординатор луыса, нош 1929-тӥ арысен — нош ик Ижкар больницаын.

1932-тӥ арысен 1933-тӥ арозь Ижкар эмъяськонниын валтӥсь врач вал^[2].

1935-тӥ арысен 1948-тӥ арозь тыршиз Ижысь эм институтын: нырысь ассистент, доцент, нош собере оперативной хирургияя кафедралэн кивалтӥсез луыса^[1].

1941-тӥ арын 22-тӥ инвожое Удмурт АССР-ысь Тазалыкез утёнъя наркомлэн эвакогоспитальёсаз валтӥсь хирурге юнматэмын вал. Ас вакытэзлы туж секыт но шер операция лэсьтыны дӥсьтӥз: сӧсырмем ожгарчилэн сюлэм мышцаысьтыз корт осколоксэ поттӥз. Висись, улэп кылем гинэ ӧвӧл, копак йӧназ. Ворончихин оглом 80 сӧсыр солдатъёслэн тыосысьтызы осколокъёссэс но пуляоссэс поттӥз, одӥгез но соос пӧлысь ӧз кулэ. Соку ик хирург выль эмъяськон амалъёс ӵектӥз^[3].

1945-тӥ арын Москваын доктор диссертацизэ утиз. 1947-тӥ арын Семён Ворончихин профессор звание басьтӥз.

1948-тӥ арысен 1952-тӥ арозь Ижысь эм институтлэн ректорез вал. 1952-тӥ арысен 1969-тӥ арозь факультативной хирургияя кафедраен кивалтӥз. Ижысь медучилищеын но дышетыны вуттылӥз.

1947-тӥ арысен 1954-тӥ арозь Удмуртиысь «Знание» огазеяськонлэн но хирургъёслэн огазеяськонзылэн тӧроез вал, озьы ик СССР-ысь но РСФСР-ысь хирург огазеяськонъёслэн правлениосызлэн ёзчиез, СССР-ысь травматологъёслэн но ортопедъёслэн огазеяськоназы правленилэн ёзчиез, «Хирургия» журналлэн редколлегиезлэн ёзчиез вал.

Семён Ворончихин 130-лэсь уно тодос ужъёслэн авторзы луэ. Со 9 бичет, нош кафедраяз ужасьёс 250 пала научной ужъёс поттӥзы. Солэн кивалтэмез улсын гожтэмын но утемын 4 доктор но 16 кандидат диссертациос.

1959-тӥ арын 11-тӥ куарусёнысен 1963-тӥ арын 20-тӥ куарусёнозь С. Ворончихин Удмурт АССР-ысь Вылӥ Кенешлэн тӧроез вал.

Улонысь кошкиз Ижын 1982-тӥ арын 8-тӥ пӧсьтолэзе.

Данъетъёсыз

Удмурт АССР-ысь дано эмъясь
РСФСР-ысь дано эмъясь
Удмурт АССР-ысь тодос удысысь дано ужась
Ленин орден
Ужысь Горд Знамялэн куинь орденэз
«Знак Почёта» орден
СССР-ысь тазалыкез утён удысысь отличник

Буре ваён

Удмуртиын Семён Ворончихинлы сизем кык буре ваён пулъёс юнматэмын: Ижысь эм академилэн но Балезино ёрос эмъяськоннилэн юртъёссы бордын^[4].

Чӧлсконъёс

↑ ¹ ² Ворончихин С. И. Официальная биография
↑ Ворончихин С. И. Официальная биография
↑ Ворончихин Семен Иванович Архивная служба Удмуртской Республики.
↑ Великий хирург, общественный деятель, организатор здравоохранения [рус.] Новости Балезино и Балезинского района.

[:0-1] ¹ ² Ворончихин С. И. Официальная биография

[:02-2] Ворончихин С. И. Официальная биография

[:1-3] Ворончихин Семен Иванович Архивная служба Удмуртской Республики.

[4] Великий хирург, общественный деятель, организатор здравоохранения [рус.] Новости Балезино и Балезинского района.

[1]

[2]

[3]

[4]