Рупасов, Николай Фёдорович

Николай Фёдорович Рупасов
Николай Фёдорович Рупасов
Вордӥськем дырыз	30-тӥ оштолэзе 1901
Вордӥськем интыез	Малмыж[d], Ватка губерния, Росси империя[d];
Кулэм дырыз	14-тӥ оштолэзе 1968 (66 лет)
Тодос удысэз	хирургия
Ужан интыез	Ижысь медициная кун академия;
Дышетскемез	Кузон университет[d] (1924);
Учёной степенез	Эм тодосъёсъя доктор[d]
Учёной званиез	профессор
Тодмо луэ	Ижысь мединститутлэн ректорез (1940-тӥ-1944-тӥ но 1956-тӥ-1961-тӥ аръёсы)

Николай Фёдорович Рупасов (1901-тӥ арын 30-тӥ оштолэзе Ватка губерниысь Малмыжын, Росси империя — 1968-тӥ арын 14-тӥ оштолэзе Ижын) — совето хирург, медицина наукаосъя доктор, профессор, УАССР-ысь тазалыкез утёнъя министр, Ижысь медициная кун институтлэн кык полэс ректорез. УАССР-ысь Вылӥ Советлэн депутатэз^[1].

Улон сюресэз

Н. Ф. Рупасов 1901-тӥ арын 30-тӥ оштолэзе Ватка губерниысь Малмыжын служащийлэн семьяяз вордӥськиз.

1919-тӥ арын шор ёзо школаез йылпумъяз. Ньыль толэзь Горд Армиын^[ru] службазэ нуиз, Шундыӝужан фронтын колчакъёсын^[ru] ожмаськиз.

1919-тӥ—1924-тӥ аръёсы Кузон университетысь^[ru] медициная факультетын дышетскиз. Тиф^[ru] чер пуромон вакытэ медбрат луыса ужаз.

1924-тӥ арын Горд армие сое эмъясез сямен кутӥзы. 1925-тӥ арысен Мари улосысь Оршанскысь гурт больницаын хирург луыса тыршиз.

1928-тӥ арысен Йошкар-Олаысь улос больницаын хирургияя ёзэн кивалтӥз. Татын со операциос лэсьтылӥз, ачиз но наука удысэ кыстӥськиз, мукет эмчиосты но сьӧраз валтӥз. Аслэсьтыз тодон-валанзэ Кузонысь А. В. Вишневский профессорлэн хирургияя клиникаяз муромытӥз. Вишневскийлэн учконъёсыз солы туж яраллязы, бератаз соос эшъяськизы но^[2].

1932-тӥ—1940-тӥ аръёсы Удмуртиысь Можга ёрос больницаысь хирургияя ёзэн кивалтӥз, со дыре ик валтӥсь врач вал. Можга больницаез со рак висёнэз эмъянъя пичи центрлы пӧрмытӥз, шуыны луоз. Рупасов Удмуртиын наукая но медициная конференциез нырысьсэ радъясь вал, ужрад Можгалан ортчиз^[3].

1937-тӥ арын кандидат диссертацизэ утӥз, ужез нылпи ваён ёзвиосын секыт операциос лэсьтонлы но вӧсез шӧдытӥсьтэм препаратъёслы сӥземын вал. 1939-тӥ арын доктор диссертацизэ утӥз. 1941-тӥ арын профессор луиз.

Финнъёсын ожмаськон вакытэ Сарапулысь эвакогоспитален кивалтӥз. 1940-тӥ арын РСФСР-ысь Тазалыкез утёнъя министерство Рупасовез Ижысь мединститутлы кивалтӥсе юнматӥз, со сяна, военно-полевой хирургия курсъя госпитальной хирургияя кафедралы профессор кариз.

Быдӟым ож вакытэ эвакогоспитальёс усьтон ужрадъёсы, хирургъёсты дышетонэ мыло-кыдо пыриськиз. Удмуртиысь эвакогоспитальёсын ачиз 2 сюрс 500 пала операциос лэсьтӥз. Н. Ф. Рупасов сӧсырмем, вандэм суй-пыдъёсты ӝоггес бурмытонъя амалъёсты эмъян удысын кутыны ӵектӥз. Озьы ик фронтын зол кынмыны шедем мугорез эмъяны амалъёс кылдытӥз. Ыбылэмен йырин ваче бурмисьтэм лыосты тупатон-эмъян понна трос лэсьтӥз.

1944-тӥ арын Н. Ф. Рупасовез, кивалтыны быгатонлыкъёссэ адӟыса, Удмурт АССР-ысь тазалыкез утёнъя наркоме юнматӥзы. Та удысын со ньыль ар тыршиз. Но со эмъятэк улыны уг быгаты вал. 1946-тӥ—1965-тӥ аръёсы Ижысь мединститутысь огъя хирургияя кафедраен кивалтӥз. Ижысь медучилищеын но дышетыны вуттылӥз. Со вакытэ ик, 1955-тӥ—1956-тӥ аръёсы, Вьетнамысь демократической республикалы хирург сямен визь-кенешен юрттылӥз, Ханойысь университетын ужаз^[3].

1956-тӥ—1961-тӥ аръёсы Николай Рупасовлы Ижысь мединститутэн кивалтыны кыкетӥзэ оскизы.

Рупасовлэн наукаын юн куараез кылиз. Можга ёрос больницаын ужакуз ик, лек пыктосэн висисьёслы бадӟым саклык висъялляз, тужгес но — ымдурын кылдэм пыктосъёслы. Люкам материалъёсыз вылэ пыкиськыса, доктор ужзэ но утӥз (1939), отӥяз «Ымдурысь лек пыктос» монография но гожтӥз (1948)^[2].

Н. Ф. Рупасов эмъян удысысь 50-лэсь ятыр тодосчи ужъёслэн авторзы луэ. Ӟеч тыршемез, кивалтонын ужзэ рос-прос радъямез, наукаын трос лэсьтэмез понна УАССР-ысь Наука удысысь дано ужась нимын пусъемын (1940). СССР-ысь Тазалыкез утён удысысь отличник луэ (1940). Уно медальёсыз^[2].

1934-тӥ—1939-тӥ но 1947-тӥ—1951-тӥ аръёсы УАССР-ысь Вылӥ Советлэн депутатэз вал. Калык солы оскылӥз.

1968-тӥ арын 14-тӥ оштолэзе улонысь кошкиз. Ижысь Нагорной шайвылэ ватэмын ^[4].

Солэн нимыз Ижысь^[5] но Можгаысь ульчаослы сётэмын.

Данъетъёсыз

Ужысь Горд Знамялэн^[ru] кык орденъёсыз (1946, 1958)^[6].
Горд кизили орден^[ru] (1944)^[6].
УАССР-ысь наука удысысь дано ужась (1940)
Тазалыкез утён удысысь отличник (1940)

Валэктонъёс

Чӧлсконъёс

Наших улиц имена: очерки о можгинцах / А. Г. Вичужанин. — Можга : [б.и.], 2012. — 110 с. : фото ; 20 см. — Библиогр.: с. 108. — 500 экз. — ISBN 978-5-901304-49-5
Избранные страницы истории хирургической школы Удмуртии. — Ижевск, 2010. — С.15-17.
Рупасов Николай Федорович. Центральный государственный архив Удмуртской Республики
Знаменитые люди края. Министерство культуры, печати и информации УР

[Рупасов_Николай_Федорович_-_доктор_медицинских_наук,_профессор,_(1901-1968гг.)-1] Центральный государственный архив Удмуртской Республики. Рупасов Николай Федорович — доктор медицинских наук, профессор (1901-1968 гг.)

[Творческий_и_жизненный_путь_доктора_медицинский_наук,_профессора_Н._Ф._Рупасова-2] ¹ ² ³ Успехи современного естествознания. Творческий и жизненный путь доктора медицинский наук, профессора Н. Ф. Рупасова

[Знаменитые_люди_края-3] ¹ ² Историко-краеведческий музей г. Можги. Знаменитые люди края

[Захоронения_Восточного_(Южного)_Нагорного_кладбища_Ижевска_(напротив_«Нефтемаша»)-4] Сайт Родная Вятка. Захоронения Восточного (Южного) Нагорного кладбища Ижевска (напротив «Нефтемаша»)

[Улица_Профессора_Рупасова_в_Ижевске._Рупасов_Николай_Федорович-5] Информационный сайт по Ижевску, Удмуртской Республике. Улица Профессора Рупасова в Ижевске. Рупасов Николай Федорович

[Рупасов_Николай_Федорович_(1901-1968_гг.)_-_доктор_медицинских_наук,_профессор-6] ¹ ² Фондовый каталог УР. Рупасов Николай Федорович (1901—1968 гг.) — доктор медицинских наук, профессор

[1]

[2]

[3]

[4]

[5]

[6]