Липанов, Алексей Матвеевич

Рувикиын таӵе фамилиен мукет муртъёс сярысь гожтосъёс вань. Учке: Липанов.

Алексей Матвеевич Липанов
Вордӥськем дырыз	3-тӥ южтолэзе 1935(1935-03-03) (91 арес)
Вордӥськем интыез	Бурят-Монгол АССР-ысь Баргузин ёросысь Усть-Баргузин каргуртын, РСФСР, СССР
Кун	СССР СССР → Россия Россия
Тодос удысэз	физика
Ужан интыез	«Союз» ФЦДТ; Ижысь техникая кун университет; Россиысь наукаосъя академилэн Урал ёзысьтыз Наукая удмурт центр; РАН-лэн Урал ёзысьтыз Механикая институт
Дышетскемез	Томский государственный университет[d] (1959)
Учёной степенез	техника наукаосъя доктор
Учёной званиез	профессор, СССР-ысь АН-лэн член-корреспондентэз (1987) РАН-лэн академикез (2000)
Научной руководитель	Б. П. Жуков
Дышетскисьёсыз	Вахрушев Александр Васильевич, Алиев Али Вейсович, Шишкина Лариса Владимировна, Альес Михаил Юрьевич, Кисаров Юрий Фёдорович, Кисарова Рохиля Гимазетдиновна, Кисарова Светлана Юрьевна, Ключников Игорь Геннадьевич, Булгаков Виктор Кирсанович
Тодмо луэ	турбулент течениосъя, камераос пушкын кылдэм югдурез эскеронъя, ракета двигательёсын ужась чурыт топливолэсь ӝуамзэ валась но солы проект лэсьтӥсь ӧнерчи, чурыт топливоын кутӥськись пуш баллистикаез наука ласянь эскеронъя ӧрез кылдытӥсь, наносистемаослы но соослы математикаысь амалъёсъя эскеронъёс ортчытъянъя ӧнерчи
Данъетъёсыз
Медиафайлъёс РувикиМедиа пушкын

Алексей Матвеевич Липанов (ворд. 1935-тӥ 3-тӥ южтолэзе Бурят-Монгол АССР-ысь Усть-Баргузин каргуртын) — совето но росси тодосчи, Россиысь наукаосъя академилэн академикез, КПСС-лэн ёзчиез, КПРФ-лэн ёзчиез. СССР-ысь Кун премилэн лауреатэз. Удмурт Элькунлэн Дано кунмуртэз.

Улон сюресэз

А. М. Липановлэн бубиз, Матвей Кириллович (1912—1966), бурят выжыысь луэ, крестьянъёс пӧлысь потэмын, Усть-Баргузинысь чорыглэсь сиён лэсьтон комбинатын директорлэн воштӥсез вал, отӥяз бригадир луыса тыршиз. Мумиз, Евдокия Ивановна (1912—1971), юртъер котырын выриз. Семьяязы 8 пинал будэтӥзы.

А. М. Липанов Усть-Баргузин шор ёзо школаез йылпумъямез бере (1953), Баргузин леспромхозын разнорабочий луыса ужаз, отӥяз нюлэс дасянын электропильщик вал. 1954-тӥ арын Томск кун университетысь физикая факультетысь нимысьтыз ёзэ пыриз. Дышетӥсьёсыз пӧлын В. Е. Зуев, П. С. Соломин, В. В. Поттосин, В. Н. Вилюнов, М. С. Горохов, Т. М. Платова но мукетъёсыз вал. Школаын но университетын спортэн выриз (куасъёсын, волейболэн, капчи атлетикаен), университетлэн капчи атлетикая сборнояз пырылӥз. 3-тӥ но 4-тӥ курсъёсын факультетысь ВЛКСМ-лэн бюроезлы секретаре бырйылӥзы, 4-тӥ но 5-тӥ курсъёсын университетлэн комсомолэзлэн комитетаз ёзчие кутылӥзы. 1956-тӥ арын Казахстанэ целинаез ӝутонэ, урожай бичанэ пыриськиз, со понна ректорлэн Таукаронэныз но медален пусъемын. Егитъёсты котыраз кыскыны но ужзэс радъяны быгатэмез понна сое КПСС-сэ кутӥзы. 1959-тӥ арын Томск университетэз «баллистика» специальностья йылпумъяз. Муско котырысь Вычислительной центрлэн 14 номеро предприятияз (НИИ-125, Химияя но технологияя тодос институт, наукая но производствоя «Союз» огазеяськон, кык полэс технологиосъя «Союз» федерал центр ) инженер, ёзлэн кивалтӥсез, центрлэн кивалтӥсез луыса тыршиз.

Р. Е. Соркин профессор но Б. П. Жуков академик кивалтэм улсын ракетаысь чурыт топливоен ужась двигательёсын (РДТТ) физика но химия ласянь кылдэм процессъёсты математикаысь моделирование амалэн эскериз. Чурыт топливоен ужась кивалтоно но вошъяськись-вырись составен «Темп-С» нырысетӥ совето ракетаосты кылдытонэ пыриськиз. 1965-тӥ арын диссертацизэ утӥз, техника наукаосъя кандидат луиз.

1967-тӥ арысен континентъёс куспын лобась «Темп-2С» ракетаосты кылдытонэ пыриськиз. 1974-тӥ арлы командаен ӵош чурыт топливоен ужась ракета двигательёслы зарядъёсты автоматизированной карон вылысь кык системаослы проект лэсьтӥз, озьы ик эксперимент амалэн шараям ивортонъёсты люкан вылысь автомат система кылдытӥз. 1970-тӥ арын доктор диссертацизэ утӥз, отын 2 бадӟым ужпумъёсты ӝутӥз: камера пушкын кылдэм югдурез эскерон вылысь газодинамической модельёсты уже кутон но ӝуась заряд котырысь шуак кылдэм «бусыослэсь» быдӟалазэс но кужымзэс эскерон. Чурыт топливоос ӝуаку, котырысьтыз ӟырдам сиос пушкын кылдэм физикаысь но химиысь процессъёсты чаклаз-эскериз. Чурыт топливолэсь ӝуамзэ эскерон вылысь лаборатория кылдытӥз.

1975-тӥ арын профессор луиз. Со аре ик Алексей Липановез чурыт топливоен ужась кивалтоно «Тайфун» зарезь ракетаослы проект лэсьтонъя ведомствоос куспын ужась комиссие пыртӥзы.

Отӥяз 8 ар ӵоже Ижысь механикая институтлэн ректорез вал. Татын машиностроительной факультет бордын ужась конструкторъёслэсь бюрозэс кылдытӥз. Озьы ик пӧртэм лабораториос усьтӥз, институтэ кужмо вычислительной техника вуттӥз. Со кивалтэм улсын лэсьтӥськон ужъёс но зол ӧръяськизы: дышетонъя но лабораторияя кык корпусъёс, 4 улоно коркаос, 12 этажъем квартираос сямен лэсьтэм кык общежитиос, столовой, культурая дворец, профилакторий, нылпи сад ӝутӥз, город сьӧры экспериментъёс лэсьтон база но шутэтскон инты пуктӥз.

1983-тӥ арын РСФСР-ысь вылӥ но нимысьтыз шоро-куспо дышетонъя министрлэн наукая воштӥсез луиз. А. М. Липанов сюлмаськемен, вузъёсын кабинетъёс выль тӥрлыкъёсын узырмизы, заводъёс, конструкторъёслэн бюрооссы вузъёсын валче ужаны кутскизы. 1987-тӥ арын СССР-ысь наукая академилэн корреспондент ёзчиез луиз.

1988-тӥ арысен, Г. А. Месяц академик ӧтемъя, Наукаосъя академиын ужаны ӧдъяз. Прикладной механикая институт но Наукая удмурт центр усьтӥз, со центрлэн бурд улаз пӧртэм филиалъёс но ёзъёс ужаны ӧдъязы, соос Наукаосъя академилэн Урал ёзэзлэн институтъёсаз пыризы.

2000-тӥ арысен Россиысь наукаосъя академилэн ужась ёзчиез луэ.

Наукая удмурт центрын наукаен выре. РАН-лэн Урал ёзэзлэн бурд улаз ужась Механикая институтлэн директорез луэ, РАН-лэн Урал ёзэзлэн бурд улаз ужась Наукая удмурт центрлэн президиумезлэн тӧроез. РАН-лэн Урал но Волжской ёзысьтыз огезлэн кенешлэн тӧроез. Пиротехникъёслэн калыккуспо огазеяськонзылэн ёзчиез (США). Индиысь пиротехникъёслэн клубысьтызы дано ёзчиез. Россиысь ВАК-лэн математикая но механикая эксперт кенешлэн ёзчиез. «Химическая физика и мезоскопия» журналлэн валтӥсь редакторез, «Физика горения и взрыва», «Теплофизика и аэромеханика», «Вычислительная механика сплошных сред» журналъёслэн, Eurasian physical technical journal изданилэн редколлегиезлэн ёзчиез.

Семьяез

Кышноез — Людмила Николаевна (ныл нимыз Стукалина, 1936-тӥ арын вордскемын), Томск кун университетысь физикая факультетэз йылпумъяз, техника наукаосъя кандидат. «Союз» НПО-ын ужаз, отӥяз Ижысь механикая институтын дышетӥз. Андрей пизы (ворд. 1960) — ужбергатӥсь, Мускоысь физикая но техникая институтэз йылпумъяз, физика но математика наукаосъя кандидат. Иван пизы (ворд. 1967) Мускоысь кун университетэз йылпумъяз, КПРФ-е пыриське, ёзчиез луэ.

Политика шоры учконъёсыз

А. М. Липанов КПСС-лэн ёзчиез вал, 1990-тӥ аръёсы КПРФ-лэсь партийной огазеяськонзэ кылдытӥз, татын соин ӵош Наукая удмурт центрысь наукая 16 докторъёс и кандидатъёс тыршо. Липанов коммунист начар улӥсьёс пала дурбасьтэ. «Маслюков лыдӟонъёс» ужрад радъялля.

Наукаын вормонъёсыз

Турбулент потокъёсты теория ласянь эскерон амалъёсты дуннеын нырысьсэ шедьтӥз. Таин валче ужпумъёсты быдэстыны капчиен, дунтэмен луэ, инметӥ, музъем вылтӥ но вуэтӥ лобась аппаратъёслы проект лэсьтон понна табере аэродинамикая трубаосты уже одно кутоно ӧвӧл ни, озьыен, военной техникаын но вооружениын выль образецъёс лэсьтонлэн дырыз но кулэсмиз.

Чурыт топливоен ужась ракетаослы реакция сётӥсь ӝуась эстӥськонлэсь сизэ эскерон, югдурзэ валан вылысь физикаысь, химияысь, математикаысь процессъёсызлы модель кылдытӥз. Математика ласянь со модельёсты валэктӥз, ӝуась ӝоглыкъёслэсь классика формулаоссэ поттӥз, озьы ик ракетаослы чурыт туала топливоослэсь ӝуась суретсэс но математика ласянь возьматӥз.

Наночастицаосты поттон вылысь аспӧртэм плазмогазодинамикая установка — плазматрон («ЛипаТрон 2000») — кылдытӥз но улонэ пыӵатӥз; наночастицаосты но наногумыосты поттон «пӧсь» но «кезьыт» амалъёсты кылдытӥз.

Гурт удысын поттэм ваньбурлы но гурезь породасты векчиёмытыны вуко кылдтӥсьёс пӧлысь огез луэ. Озьы ик частицаысь атомъёслэсь лыдзэс пумен-пумен йылтонъя веществоослэсь макрохарактеристикаоссэс шараян пумысен уж гожтӥз, тазьы кортъёсты но полимеръёсты эскерыны луэ. Наноструктураосты пӧртэм интыосын кылдытонын-эскеронын ужпумъёсты сэрттӥз-пертчиз. Атомарно йылсо веньёсты кылдытон амалъёсты улонэ пыӵатӥз но трос мукетсэ лэсьтӥз.

Академик Липановлэн нимыз сётэмын чурыт ракета топливолэн эрозионной ӝуамезлэн параметрезлы — Булгаковлэн но Липановлэн числоез, авторез — профессор Сабденов Каныш Оракбаевич. Булгаковлэн-Липановлэн числоез положительной я отрицательной эрозиез эскеронын кутӥське. Озьы ик РДТТ-ез лэсьтонын Булгаковлэн-Липановлэн числоез ӵемысь кутӥське.

А. Липанов наукая 60 докторъёсты но кандидатъёсты дасяз. 16 монография гожтӥз, 65 изобретениослэн огез авторез луэ, Россиысь но кунгож сьӧрысь журналъёсын 600-лэсь ятыр наукая статьяосыз печатламын.

Валтӥсь ужъёсыз

• Аликин В. Н., Липанов А. М., Серебренников С. Ю. и соавт. Пороха, топлива, заряды = Powders, Fuels, Charges. — М.: Химия, 2004. — Т. 2: Заряды народохозяйственного назначения. — 202 с. — 1000 экз. — ISBN 5-7245-1219-X.
• Булгаков В. К., Кодолов В. И., Липанов А. М. Моделирование горения полимерных материалов. — М.: Химия, 1990. — 237 с. — 1500 экз. — ISBN 5-7245-0557-6.
• Булгаков В. К., Липанов А. М. Теория эрозионного горения твёрдых ракетных топлив. — М.: Наука, 2001. — 137 с. — 500 экз. — ISBN 5-02-002750-2.
• Ваулин С. Л., Липанов А. М., Феофилактов В. И. Внутренняя баллистика низкотемпературных твердотопливных газогенераторов: учеб. пособие. — Челябинск: Изд-во ЮУрГУ, 2005. — 220 с. — 50 экз. — ISBN 5-696-02986-8.
• Ерохин Б. Т., Липанов А. М. Нестационарные и квазистационарные режимы работы РДТТ. — М.: Машиностроение, 1977. — 200 с. — 1110 экз.
• Калинин В. В., Ковалёв Ю. Н., Липанов А. М. Нестационарные процессы и методы проектирования узлов РДТТ. — М.: Машиностроение, 1986. — 214 с. — 2050 экз.
• Липанов А. М. Теоретическая гидромеханика ньютоновских сред. — М.: Наука, 2011. — 550 с. — 400 экз. — ISBN 978-5-02-037481-2.
• Липанов А. М. Физико-химическая и математическая модели горения смесевых твёрдых топлив. — Ижевск: ИПМ УрО РАН, 2007. — 112 с. — 300 экз.
• Липанов А. М., Алиев А. В. Проектирование ракетных двигателей твёрдого топлива: [Учеб. для вузов по направлению «Авиац. и ракет.-космич. техника» и спец. «Двигатели и энерг. установки космич. техники», «Авиац. и ракет.-космич. теплотехника»]. — М.: Машиностроение, 1995. — 399 с. — 1000 экз. — ISBN 5-217-02650-2.
• Липанов А. М., Андреев В. В. Метод декомпозиции времени в моделировании физических задач. — Ижевск: РИО Института прикладной механики УрО РАН, 2009. — 70 с. — 100 экз.
• Липанов А. М., Бобрышев В. П., Алиев А. В. и соавт. Численный эксперимент в теории РДТТ / Под ред. А. М. Липанова. — Екатеринбург: Наука; Урал. изд. фирма, 1994. — 300 с. — 600 экз. — ISBN 5-02-007404-7.
• Липанов А. М., Кисаров Ю. Ф., Ключников И. Г. Численный эксперимент в классической гидромеханике турбулентных потоков. — Екатеринбург: УрО РАН, 2001. — 160 с. — 300 экз. — ISBN 5-7691-1140-2.
• Липанов А. М., Стрелков Н. С., Ураков А. Л. и др. Способ и устройство для промывания желудка, Патент РФ 2329072,. — Институт прикладной механики УрО РАН: Роспатент, 2007. — 5 с.

Озьы ик учке А. М. Липановлэсь публикациосын списоксэ РАН-лэн Урал ёзысьтыз Механикая институтлэн сайтысьтыз.

Данъетъёсыз

• «За заслуги перед Отечеством» IV степенё орденлэн медалез (2006)
• Эшъяськон орден (1999)
• «Целина музъемъёсты ӝутэм понна» медаль (1956)
• «В. И. Ленин вордскем дырысен 100 ар тырмонлы сӥзем» медаль (1970)
• «Знак Почёта» орден (1980)
• СССР-ысь Кун премилэн лауреатэз (1985)
• Росси Федерациысь наука но техника удысысь премия (1998)
• Удмурт Элькунысь наука удысысь дано ужась
• Удмурт Элькунлэн Дано кунмуртэз
• РАН-лэн Урал ёзэзлэн академик А. Ф. Сидоров нимо премиез
• Ф. А. Цандер нимо РАН-лэн премиез (2014)

Валэктонъёс

Чӧлсконъёс

• Профиль А. М. Липанова на официальном сайте РАН
• Профиль А. М. Липанова на сайте Института механики УрО РАН
• Липанов А. М. на сайте MathNet.Ru
• Почётные доктора Томского университета : Липанов Алексей Матвеевич