Ву кыскон но возён башня (Ижысь архитектурая синпелет)
| Чеберлыко инты | |
| Ву кыскон но возён башня | |
|---|---|
.jpg) | |
| 56°51′03″ с. ш. 53°12′27″ в. д.GЯO | |
| Кун |
 Россия |
| Город | Ижкар, Бородинлэн ульчаез, 4[1] |
| Архитектурной стиль | Неоготика |
| Кылдытэмын | 1915 |
| Юртэз пуктэмын | 1915[2] |
| Инлыкез |
 ОКН № 1830046000 |
 Медиафайлъёс РувикиМедиа пушкын | |
 | Россилэн лулчеберето кылёс лэсьтосъёсыз улос инлыкен рег. № 181510297070005 (ЕГРОКН) лэсьтос № 1830046000 (БД Викигида) |
Ву кыскон но возён башня Ижысь Бородинлэн ульчаяз интыяськемын, городысь огез вашкалаез гидротехнической лэсьтос лыдъяське. Удмурт Элькунысь индустри архитектурая синпелетъёс но лулчеберет удысысь утёно объектъёс пӧлы пыре[1][2].
Башня Ижысь Шор площадь котырысь М. Т. Калашников нимо музей но Park Inn гостиница вискын интыяськемын.
Историез
Ижысь калыклы юон ву вуттон вылысь 1814-тӥ—1816-тӥ аръёсы ик завод котырысь каргуртын нырысетӥ липето колодчаос гудэмын вал. Базарной ульчаын (али Горькийлэн) ву люкан вылысь нимысьтыз инты лэсьтэмын вал, со бордысен пулэсь нырысетӥ гумыос кыскизы. ХIX даурлэн пумаз корт ӵыжатон заводлэн котыраз нырысетӥез ву кыскон но возён башня ӝутэмын вал, ӵапак отысь предприятие ву вуылӥз. Та бадӟым уж промышленностез зол азинтоныны юрттӥз. Нырысетӥ дунневыл ож вакытэ Ижысь заводъёс эшшо но паськытазы но кужмоязы, каргуртын калык но йылыны кутскиз, таин валче вулы кулэяськон ужпум юнгес султӥз[3].
1915-тӥ арын Ижысь Михайловской (али Шор) площадьын, городэ ву гумыос кыскыны турттыса, Бородинлэн ульчаяз башня ӝутэмын вал. Со Нагорной каргуртын улӥсьёслы чылкыт ву вуттонъя нырысетӥ проектлэн люкетэз вал. Соя музъем валлин штольня юнматыны, сое ошмес вуосын тырмытыны медо вал. Но империалистической ож бере кылдэм шуг-секытъёс, отӥяз пуромемын революция проектэз йылаз-пумаз вуттыны ӧз сёты. Нялтас вераса, 1920-тӥ аръёсы но городын улӥсьёс колодчаосысь но Иж тыметысь ву юылӥзы на, трос квартираем кирпич коркаосын улӥсьёс пӧлысь шер кин завод гумыос кузя кошкись вуэн пӧраськылӥз но пыласькылӥз[3].
Историяя но архитектурая синпелетъёслэн реестразы пыртэм Бородинлэн ульчаысьтыз ву кыскон башня ньыльдон ар ӵоже, интыысь кивалтӥсьёс лэземен но дурбасьтэмен, скалолазъёслы ӵошатсконъёслы дасяськыны яралляз. 2008-тӥ арын башняез куашкан калэ вуэмын лыдъязы, соку ик тренировкаосты но алӥзы-дугдытӥзы. Удмурт Элькун Кивалтэт малпаськонэ усиз: ма кароно Удмуртилэн шоркараз интыяськем синпелетэн — рос-прос выльдоно яке куашкатоно. Башняез утён пумысен дурбасьтӥсьёс вормизы. 2011-тӥ арын ву кыскон башняез Ижысь спасательёслэн службазылэн балансаз сётӥзы[1]. 2014-тӥ арын башняын Вулы сӥзем музей усьтӥзы[4]. 2017-тӥ арын башняез Ижкар администрацилэн Егитъёсын ужанъя управлениез ки улэ сётӥзы[5]. 2019-тӥ арын но 2020-тӥ арын Ижкар кивалтӥсьёс башняез музъеменыз валче вузаны медо вал, но ӧз пӧрмы. 2021-тӥ арын архитектурая синпелетэз муниципал ваньбурез сямен приватизацияя планэ пыртазы, башняез выльдонъя проектъёс но кылдылӥзы. Али со озьы ик куашкан калэ вуэмын, пушказ пырыны шуг но кышкыт, но урбанистикая туризмез яратӥсьёс пушсэ эскерыны, синпелетлэсь чеберлыксэ адӟыны вуыло ик.
Эшшо но вашкалаез ву кыскон башня пыӵалтӥрлык лэсьтон заводлэн валтӥсь корпусэз дӥньын (али Ижсталь завод котырын) интыяськылӥз[6].
Галерея
Башня борды юнматэм ивортонэн пул
Улӥысен тусыз
Улӥысен тусыз
Бородинлэн ульчаысеныз тусыз
Башня вылын скалолазъёс ӵошатскылӥзы
Ижсталь завод котырын ву кыскон вуж башня (шорысез)
.jpg)
Валэктонъёс
- ↑ 1 2 3 Водонапорная башня, 1915 г. [ӟуч] Информационно-аналитическоe управление Администрации города Ижевска. Эскеремын 2019-05-28 арын
- ↑ 1 2 Туганаев, 2008, с. 342.
- ↑ 1 2 ИА «Сусанин». По стальным трубам: рождение ижевского водопровода
- ↑ Григорий Глухов Музей воды открылся в столетней водонапорной башне на центральной площади Ижевска [ӟуч] susanin.news. ИА «Сусанин». Эскеремын 2019-05-28 арын
- ↑ «Водонапорная башня 1915 года» Ижевск [ӟуч] IZ-article.ru. Эскеремын 2019-05-28 арын
- ↑ Елена Кардопольцева Улица Бородина: первый ижевский цирк и 100-летняя башня [ӟуч] Сетевое издание IZHLIFE. ООО «Радио - Инвест». Эскеремын 2019-05-28 арын
Литература
- Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — 768 с. — 2200 экз. — ISBN 978-5-7659-0486-2.
.svg)