Удмуртия (книгапоттонни)

Википедиысь материал
Та кыллэн «Удмуртия» мукет валатонъёсыз но вань: учке Удмуртия (кыллэсь валатонъёссэ).
«Удмуртия» книгапоттоннни (Удмурт Элькунысь огъям кун предприятие)
Кылдытэмын 1919-тӥ арын куарусёнэ
Кун СССР, РСФСР
Адресэз РоссияFlag of Russia.svg Россия УдмуртияFlag of Udmurtia.svg Удмуртия Ижевск, Пастухов урам, 13.
Кивалтӥсез Ю. В. Кузнецов
Валтӥсь редакторез Г. Г. Грязев
СССР-ысь Госкомиздатлэн кодэз 134
Префикс ISBN 5-7659
Веб-сайтэз Книжное издательство «Удмуртия»
Логотип Викиданных Информация в Викиданных ?

«Удмуртия» книгапоттонни" Удмурт Элькунысь огъям кун предприятие (ӟуч: ГУП УР "Книжное издательство «Удмуртия») — интыяськемын Ижын. Ӟуч но удмурт кылъёсын чеберлыко, нылпи, дышетонъя, шаертодонъя, справочной, научной но научно-популярной литература поттэ.

Историез

«Удмуртия» книгапоттонни 1919-тӥ арын куарусёнэ РСФСР-ысь Наркомнац улсын Удмурт комиссариатлэн книгапоттонни ёзэтэз шуыса кылдытэмын вал[1]. Нырысетӥ книгаосыз 1920-тӥ арын потӥзы.

Кылдэм бераз ик ёзэтэн кивалтӥз кылбурчи, тодосчи но мер ужчи К. П. Чайников. Со вакытэ книгапоттонни удмурт кылын ӟуч но мировой классикаез, удмурт гожъяськисьёслэсь произведениоссэс поттылӥз. 1920-тӥ ар куспын 2 миллионлэсь ятыр огъя тиражен дасолэсь трос изданиос поттӥз[2].

Ёзэтлэн инъетэз вылын 1922-тӥ арын «Удкнига» — Вотской кооперативной книгапоттон дэменлык кылдытэмын. Со арын крестьян но ужась калык понна трос книгаос, брошюраос поттэмын вал, соос пӧлын: С. П. Жуйковлэн «Грамматика удмуртского языка» (1923), «Оригинальный учебник вотякского языка для русских» (1924), М. Ильинлэн берыктэмезъя дасям Н. А. Рубакинлэн «Кыр животьёслэн ужъёссы сярысь» («Рассказы о делах в животном царстве») книгаез (1924). та вакыт ик кылдӥзы нырысетӥ библиотечной сериос: «Ленинская библиотечка», «Обязательные книги для крестьян», «Дешевые книги по медицине» но мукет.

1931-тӥ арын «Удкнига» «Удгиз» — Удмурт кун книгапоттони (Удмуртское государственное издательство) шуыса нимаськыны кутскиз.

1964-тӥ арын оштолэзе «Удгиз» «Удмуртия» нимын воштэмын.

95 ар ӵоже «Удмуртия» книгапоттонни 9 сюрслэсь ятыр удмурт но ӟуч кылъёсын книгаос, брошюраос но учебникъёс поттӥз. Огъя тиражез 90 миллион пала лыдъяське[3] Арлы быдэ татын пӧртэм жанрен но тематикаен ог 50-70 изданиос пото. «Память Удмуртии», «Русская классика на удмуртском языке», «Феномен Удмуртии», «Моя малая Родина», «Человек. Писатель. Время» но мукет выль сериос кылдытэмын.

2019-тӥ арын Удмуртиысь Кун Кенешлэн кенешон бӧлетаз «Удмуртия» книгапоттоннилэн 100 ар тырмонэзлы сӥзем сӥё-дано ужрад ортчиз. Ӧтем дано куноос пӧлын вал Кун Кенешлэн тӧроез Алексей Прасолов, наукая, образования, культурая, йӧскалык политикая, егитъёсын ужанъя но спортъя ялан ужась ӧрилэн тӧроез Татьяна Ишматова, Кун Кенешысь депутатъёс, Кивалтэтлэн ёзчиосыз, Удмуртилэн дано муртъёсыз, книгапоттони удысысь ветеранъёс но али дыре ужасьёс, литературатодосчиос, лыдӟиськисьёс, Россиысь книгапоттӥсьёслэн ассоциацизылэн огмуртъёсыз, Уралысь но Поволжьеысь йӧскалык книгапоттониосын тыршисьёс, Москваысь, Екатеринбургысь, Тюменьысь но Кировысь куноос[4].

Книгапоттоннилэн ужаз валтӥсь инты басьтэ ӟуч но удмурт кылъёсын быръем произведениосты — ӟуч, совето но мировой классической литератураез поттон. Пӧртэм аръёсы татын поттылэмын ӟуч но удмурт гожъяськисьёслэн но кылбурчиослэн ужъёссы. Кылсярысь, Ф. И. Васильевлэн, М. А. Коноваловлэн, Т. А. Архиповлэн, Т. И. Шмаковлэн, Э. Батуевлэн, В. А. Болтышевлэн, В. М. Ванюшевлэн, И. Г. Гавриловлэн, Айво Ивилэн, Кедра Митрейлэн, М. И. Федотовлэн, Ашальчи Окилэн, С. П. Широбоковлэн, С. А. Самсоновлэн, О. А. Поскрёбышевлэн, Ф. Г. Кедровлэн, М. А. Коноваловлэн, Г. Д. Красильниковлэн, М. А. Ляминлэн, В. К. Семакинлэн, З. А. Богомоловалэн, Е. Е. Загребинлэн, О. Н. Хлебниковлэн, Е. Ф. Шумиловлэн, В. И. Емельяновлэн, М. П. Петровлэн, Г. С. Медведевлэн, А. И. Вепрёвлэн, В. Ар-Сергилэн, К. Е. Ломагинлэн, С. В. Матвеевлэн, Л. Д. Кутяновалэн но мукет авторъёслэн произведениоссы. Али дыре пӧртэм предприятиосын, организациосын но ведомствоосын валчеяськыса, соослэн юрттэмзыя туала ӟуч но удмурт гожъяськисьёслэсь но литературатодосчиослэсь ужъёссэс печатла (О. Ведровалэсь, В. Голубевлэсь, А. Ельцовлэсь, А. Карповлэсь, Л. Кривошеевлэсь, А. Диевалэсь, Паздериналэсь, А. Пушкиналэсь, Ю. Разиналэсь но мукет)[5]

Туала вакытэ

2020-тӥ арын татын 75 издани печатламын вал, огъя тиражез 44,6 сюрс экземпляр луиз, соос пӧлысь 48-ез удмурт кылын. «Удмурты. На земле древних алангасаров» книга федерал грант басьтӥз но РФ книгапоттӥсьёслэн ассоциациенызы ялэм «Лучшие книги года — 2020» конкурслэн пумкылъянэзъя, РФ 50 тужгес усто улос изданиос пӧлы пыриз. Озьы ик пусъемын Россиысь книга поттӥсьёслэн лигазылэн дипломеныз.

2021-тӥ арын «Удмуртия» книгапоттонни 46 книга поттӥз, огъя тиражез 35 сюрс экземпляр луиз. Соос пӧлысь 22-ез удмурт кылын, 5-ез кык кылын, 1-ез — бесерман кылын. Таиз книга, удмуртаз гинэ ӧвӧл, росси но быдэс мировой культураын нырысетӥез бесерман кылын нимаз поттэм книга луэ. Со художественно-документальной прозаен гожтэм «Вортча мадьёс» («Ворцинские сказы») бичет. Та арын ик Удмурт Элькунысь Дышетонъя но наукая министерствоен тупатэм огкылъя, 19 пумо дышетон книга но пособие поттэмын. 12-ез соос пӧлысь чылкак вылесь луо. 2021-тӥ арын «Удмуртия» книгапоттонни выльысь федерал юрттэт басьтӥз. Кыкез книгаос — «Удмуртия от А до Я» но «Удмурты. Зов языческих предков» Росси Федерациысь цифровой развития, связья но массовой коммуникациосъя министерстволэн грантъёсыныз пусъемын[6].

«Удмуртия» книгапоттонни арлы быдэ пыриське «Красная площадь» огъяросси фестивале[7].

К. П. Чайников (1898—1937) — Удмурт комиссариатлэн книгапоттон ёзэтэзлэн нырысетӥ кивалтӥсез

Кивалтӥсьёс

Данъетъёсыз

  • 1989 — УАССР-лэн кун премиез «Удмуртское народное искусство» фотоальбомез дасямез но поттэмез понна (автор-составителез К. М. Климов, туспуктӥсез М. В. Егоров).
  • Россиысь книгапоттӥсьёслэн ассоциацизылэн (АСКИ) «Лучшие книги 2000 года» Х конкурсэзлэн лауреатэз — «Удмуртская Республика» нырысетӥ йӧскалык энциклопедиез поттэмез понна.
  • И. Д. Сытин нимо фондлэн уксё премиез.
  • 2020 — «Издание, вносящее вклад в диалог культур» номинациын лауреатлэн дипломеныз но вормисьлэн статуэткаеныз пусъемын «Удмуртская народная кухня» ужез (составителез Г. И. Соковнин, дизайнерез В. Ю. Семёнов). «Секреты удмуртских мастеров» книга (составителез Г. Г. Грязев, дизайнерез В. Ю. Семенов) «Лучшая книга о России» номинациын лауреат диплом басьтӥз[8].
  • 2022 — Россиысь книгапоттӥсьёслэн ассоциацизылэн (АСКИ) РФ 2021-тӥ ар понна тужгес устоосыз региональной книгаосын лыдметэ пыртэмын «Удмуртия» книгапоттонилэн «Удмурты. Зов языческих предков» книгаез (составителез Георгий Грязев, дизайнерез Валентин Семёнов, проектэн кивалтӥсез Юрий Кузнецов)[9].
  • 30 палаез книгаос пусъемын «Искусство книги» Огъясоюзной но Огъяросси конкурсъёслэн дипломъёсынызы[10].
  • данъян грамотаос, дипломъёс, таукарон гожтэтъёс[11].

Цитата

Книга — составной элемент культуры. Это один из основных факторов, определяющих уровень развития общества как материальное воплощение научной и художественной мысли. Книга способствует формированию и укреплению духовного менталитета, интеллектуального потенциала, сохранению и развитию языка каждого народа. В многонациональном государстве книгоиздание должно быть важнейшей частью социальной политики, ведь в конечном итоге это стабильность, гражданское единение и консолидация общества.

— Ю. В. Кузнецов, директор книжного издательства «Удмуртия»[12]

Валэктонъёс

  1. ↑ Знаменатые и памятные даты Удмуртии. Сентябрь 1919 г. Эскеремын 2015-02-12 арын
  2. ↑ «Известия Удмуртской Республики»: Юрий Кузнецов: «Наш принцип — не спи на печи», 2019
  3. ↑ Клуб «Край удмуртский». Заседание клуба, посвященное 95-летию издательства «Удмуртия»
  4. ↑ Книжное издательство «Удмуртия» отметило вековой юбилей. 26.09.2019
  5. ↑ Удмуртская вики. Художественная литература
  6. ↑ Книжное издательство «Удмуртия» выиграло два гранта на выпуск уникальных изданий
  7. ↑ Книги регионов на Красной площади. Региональные издания, на которые стоит обратить внимание на книжном фестивале «Красная площадь» — 2018
  8. ↑ Книги из Удмуртии стали лауреатами конкурса «Книга года»
  9. ↑ Книга издательства «Удмуртия» «Удмурты. Зов предков» вошла в число лучших региональных книг России 2021 года
  10. ↑ Книга издательства «Удмуртия» победила в общероссийском конкурсе
  11. ↑ Книжное издательство «Удмуртия» отметило вековой юбилей
  12. ↑ Об издательстве. Сайт книж. изд. «Удмуртия»

Литература

  • Емельянов Л. П. Печать Удмуртии : из истории возникновения и развития партийно-совет. печати Удмуртии (1905—1934) / Л. П. Емельянов. — Ижевск : Удмуртия, 1964. — 82 с.
  • Национальное книгоиздание Удмуртии : страницы истории и современности. — Ижевск : Удмуртия, 2005. — 200 с. : фот.
  • Фролова Г. Д. Удмуртская книга : история книгопечатания. Соврем. кн. / Г. Д. Фролова. — Ижевск : Удмуртия, 1982. — 232 с. : ил.
  • Кузнецов Ю. Национальное книгоиздание : век XX / Ю. Кузнецов // На переломе эпох : Союзу писателей Удмуртии 70 лет, 1934—2004. — Ижевск, 2006. — С. 286—292.
  • Органы управления в области печати // Органы государственной власти и управления Удмуртской АССР (1918—1980 гг.) : справочник. — Ижевск, 1986. — С. 274—277.

Чӧлсконъёс

«https://udm.ruwiki.ru/w/index.php?title=Удмуртия_(книгапоттонни)&oldid=483254»-ысь басьтэмын