Ломагин, Кирилл Егорович

Рецензировать карем гожтос

Рецензент: Клементьев Андрей Александрович, филологи наукаосъя кандидат, «Вордскем кыл» журналлэн валтӥсь редакторез

Кирилл Егорович Ломагин
Вордӥськем дырыз	24-тӥ куартолэзе 1933(1933-05-24)
Вордӥськем интыез	Сундуково гурт, Пичи Пурга ёрос, Удмурт АО, СССР
Кулон дырыз	6-тӥ оштолэзе 2012(2012-04-06) (78 арес)
Кунмуртлыкез	СССР СССР → Россия Россия
Ужудысэз	Проза, сатира но кылбур гожъясь, журналист
Гожъяськон кылыз	удмурт
Данъетъёсыз

Кирилл Егорович Ломагин (24-тӥ куартолэзь 1933-тӥ ар Пичи Пурга ёросысь Сундуково гурт — 6-тӥ оштолэзь 2012-тӥ ар) ― удмурт гожъяськись, кылбурчи, проза но сатира амалэн гожъясь, журналист. СССР-ысь журналистъёслэн огазеяськонзылэн ёзчиез, СССР-ысь но Россиысь гожъяськисьёслэн огазеяськонзылэн ёзчиез. УАССР-ысь культура удысысь Дано ужась (1977-тӥ ар), Кузебай Герд нимо удмурт йӧскалык премилэн лауреатэз (1999-тӥ ар). Удмуртиысь калык гожъяськись (2009-тӥ ар).

Биографиез

Кирилл Ломагин вордӥськиз Удмурт автономи улосысь Пичи Пурга ёросысь Сундуково гуртын, бадӟым крестьян семьяын. Пичиысен дышиз лыдӟиськыны но гожъяськыны, соин школаын дышетскон капчиен сётиськиз. Ньыль аръем начальной школаез со кык ар куспын йылпумъяз. Дышетсконзэ азьланьтӥз гуртэзлэсь сизьым иськеме интыяськем Кечёво черкогуртысь сизьым аръем школаын. Но семьяязы шуг-секытъёс кылдэмен, дышетсконзэ куспетӥ кароно луиз. Быдӟым Атыкай ож вакытэ мойыосын оградын колхозын ужаз: пудо возьмаз, гыриз, кизиз, усыяз. 1947-тӥ арын Брангурт черкогуртысь сизьым аръем школае дышетскыны пыриз. Сое 1950-тӥ арын ушъян грамотаен йылпумъяз. Со арын ик Ижкарысь педагогической училищелэн школьной ёзэтаз дышетскыны пыриз. Татын гожъяны кутскиз нырысетӥ гожтосъёссэ, кылкутӥсь редактор чотын нуиз ёзэтлэсь рукописной литературной журналзэ.

1952-тӥ арын, кыкетӥ курсын дышетскыкуз, куарусён толэзе, Кирилл Ломагинэз Горд армие басьтӥзы. Ожгар службазэ Тихоокеанской флотын ортчытӥз. Служить карон вакытаз Русский шормуӵлэн гарнизонысьтыз Офицеръёслэн юртсы улсын кылдытэм К. Е. Ворошилов нимо ӝыт шор ёзо школаез йылпумъяз. Печатласькиз «Советской Удмуртия» газетлэн бамъёсаз. Арми бере Удмурт АССР-ысь Военной комиссариатын ужаз, нош берлогес — Ижкарысь военной гарнизонысь Военной трибуналын. Ужаменыз валче заочно амалэн дышетскиз Ижкарысь гурт возёсъя институтысь механизация но электрификация факультетын.

1961-тӥ арын азьланезлы оскон сётись рабкор Ломагин литературной сотрудник чотын «Советской Удмуртия» газетлэн редакцияз ужаны ӧтемын вал. 1963-тӥ арын южтолэзе Удмурт книгапоттонние гурт удыс литературая ёзэтэ кылкутӥсь редакторе ужаны выжтэмын.

1966-тӥ арысен 1968-тӥ арозь Кирилл Егорович Москваын ЦК КПСС-лэн Вылӥ партийной школаяз дышетскиз, со ик луиз солэн литературной школаез но. Ӵапак татын со пумиськиз тодмо удмурт прозаикен Семён Самсоновен, ӵемысь ӵошен ветлылӥзы Литераторъёслэн юртазы, отын пумиськылӥзы Сергей Михалковен, Расул Гамзатовен, Сергей Викуловен, Егор Исаевен, Сергей Залыгинэн, Чингиз Айтматовен, Агния Бартоен но мукет гожъясь усточиосын.

1968-тӥ арысен кутскыса, Кирилл Ломагин кызь аръёслэсь трос «Советской Удмуртия» газетлэн редакцияз гурт удыс но культура ёзэтъёсын кивалтӥз. Со сяна, К. Ломагин СССР-ысь журналистъёслэн огазеяськонзылэн ёзчиез, редколлегиезлэн ёзчиез, секретарезлэн воштӥсез, берлогес «Советской Удмуртия» газетлэн парторганизациезлэн секретарез, «Молот» журналлэн редколлегиезлэн ёзчиез, УАССР-ысь гожъяськисьёслэн огазеяськонзылэн ёзчиез. Ломагинлэн гожтосъёсыз но заметкаосыз печатласькизы элькунысьтымы но кунысьтымы газет-журналъёсын, кылсярысь, «Журналист» журналын. Озьы ик со вал «Сельская жизнь» газетлэн УАССР-ысь внештатной корреспондентэз. 1993-тӥ арысен 1996-тӥ арозь «Удмурт дунне» газетын корреспондент луыса ужаз.

Творчествоез

Кирилл Ломагинлэн лирической но сатирической гожтосъёсын «Тылсиос но вужеръёс» нимо нырысетӥ книгаез 1964-тӥ арын «Удмуртия» книгапоттонниын потӥз. Авторлэн тужгес ӟечъёсыз сатирической гожтосъёсыз, кудъёсыз пӧлын иронической диалогъёс, басняос но фельетонъёс, «Шӧкычен кенешыса» бичетэ пыризы. «Кошкиськом революцие» кылбур бичетаз Ломагин удмурт калыклэсь ортчем вакытсэ усьтэ.

Ломагинлэн прозаез публицистика шӧмо, сюжетъёсыз чырмыт азьланьтӥсько, угрес кусыпъёсты усьтэ. Тросэз очеркъёсыз но веросъёсыз психологизмен тырмемын. Журналистика удысын ужамезлэн узыр адӟем-чакламез, адямиослэсь улонзэс, Музъем вылын соослэсь кулэлыксэс умой тодэмез гожъяськисьлы шонерак, пафостэк аогшоры гурт калыклэсь ужзэ сэрттыны-пертчыны юрттӥзы.

Кирилл Ломагинлэн куд-ог произведениосыз берыктэмын ӟуч, молдаван, пор, бигер кылъёсы.

Данъетъёсыз

Культура но литература удысын мыло-кыдо тыршемез понна Кирилл Егорович Ломагин Калыкъёслэн Эшъяськон орденэнызы данъямын вал. УАССР-ысь но Удмурт Элькунысь Вылӥ Кенешлэн Президиумезлэн Данъян грамотаосынызы пусъемын. УАССР-ысь лулчеберетъя Министерстволэн Данъян грамотаеныз, УАССР-ысь журналистъёслэн огазеяськонзылэн правлениезлэн Дипломеныз пусъемын. 1977-тӥ арын Кирилл Егоровичлы «Лулчеберет удысын сиё-дано ужась» дано ним сётэмын. 1999-тӥ арын — Кузебай Герд нимо йӧскалык премия.

2003-тӥ арын Удмурт Элькунысь Ужысь но ожысь ветеранъёслэн кенешсы, Кирилл Ломагинлы «Удмуртиысь Калык гожъяськись» дано ним сётон вылысь, Удмурт Элькунысь гожъяськисьёслэн огазеяськонзылы куронэн вазиськиз. 2009-тӥ арын гожъяськись «Удмуртиысь калык гожъяськись» дано нимын пусъемын вал.

Валэктонъёс

Литература

• Ломагин Кирилл Егорович // Удмуртская Республика : Энциклопедия / гл. ред. В. В. Туганаев. — 2-е изд., испр. и доп. — Ижевск : Издательство «Удмуртия», 2008. — С. 453. — 768 с. — 2200 экз. — ISBN 978-5-7659-0486-2.
• Кирилл Ломагин // Писатели Удмуртии: Библиографический справочник / Составитель А. Н. Уваров. — Ижевск : Удмуртия, 1989. — С. 256—257. — 464 с. — 5000 экз. — ISBN 5-7659-0131-X.
• Писатели и литературоведы Удмуртии: Биобиблиографический справочник / Сост. А.Н. Уваров. - Ижевск: Ассоциация «Научная книга», 2006. - 220 с.