Томиловский, Георгий Сергеевич

Георгий Сергеевич Томиловский
Георгий Сергеевич Томиловский
Вордӥськем дырыз	3-тӥ пӧсьтолэзе 1913
Вордӥськем интыез	Минск
Кулэм дырыз	1-тӥ куарусёнэ 1990 (77 арес)
Кулэм интыез	Ижевск
Кунмуртлыкез	СССР
Кыӵе войскоез	пехота
Служить карон аръёсыз	1931—1959
Званиез
Командовать кариз	211-тӥ стрелковой дивизия,; Ижысь гурт удысъя институтысь ожгар кафедра
Ожмаськонъёс/ожъёс	Горд армилэн Польшае походэз ; Быдӟым Атыкай ож
Данъетъёсыз	; Советская гвардия[d]

Георгий Сергеевич Томиловский (1913—1990) — совето офицер, Совето Союзысь Герой. Гвардиысь полковник (1943).

Улон сюресэз

Ожлэсь азьвыл

Дышетскиз Минскысь шор ёзо школаын (1921—1929) но Гомель карысь фабрично-заводской школаын (1929—1931). Ужаз нюлэс пилён заводын, собере Узбек ССР-ын чугун сюрес вылын.

Горд армиын 1931-тӥ арын коньывуонысен. 1934-тӥ арын Белоруссиысь М. И. Калинин нимо ожгар школаез йылпумъяз. Белорус ожгар округысь 33-тӥ стрелковой дивизилэн 98-тӥ стрелковой полказ (Могилёв улосысь Быхов карын) службаез ортчиз: пулемётной взводлэн командирез, ПВО взводлэн командирез, полуроталэн командирез, стрелковой роталэн командирез, батальонлэн старшой адъютантэз, батальонлэн командирез вал. 1939-тӥ арын куарусёнэ совето войскоослэн Шундыпуксён Белоруссиез мозмытонъя походазы пыриськиз. 1939-тӥ арын шуркынмонысен — Могилёвысь стрелково-пулемётной училищеын (бӧрысь сое Полоцкысь стрелково-пулемётной училищелы пӧрмытӥзы) стрелковой роталэн командирез.

Быдӟым Атыкай ож

Капитан Г. С. Томиловский Быдӟым Атыкай оже 1941-тӥ арын инвожоысен пыриськиз. Училищеысь кадетъёслэн но дышетӥсьёслэн отрядэныз пыриськиз Шундыпуксён фронтысь ожмаськонъёсы. 1941-тӥ арын куарусёнэ дышетскыны келямын, 1942-тӥ арын толшоре Ташкентэ эвакуировать карем Горд армилэн М. В. Фрунзе нимо ожгар академияз вакчиятэм курсэз йылпумъяз^[1].

1942-тӥ арын толшоре Шор Азия ожгар округын (Семипалатинскын) кылдытӥськись 8-тӥ стрелковой дивизиысь 151-тӥ стрелковой полклэн штабаз кивалтӥсе юнматэмын. 1942-тӥ арын оштолэзьысен Г. С. Томиловский аслаз полкеныз но дивизиеныз Брянск фронтысь 3-тӥ армия пушкы пыриз. 1942-тӥ арын инвожое-пӧсьтолэзе пыриськиз Воронеж-Ворошиловград обороная операцие . 14-тӥ пӧсьтолэзе Орёл улосысь Ливны кар дорын сӧсырмиз, но ожмаськонэ кылиз. Гудырикошконэ одӥгаз ожын 151-тӥ стрелковой полклэн командирез быриз, ожмаськонын сое Томиловский майор воштӥз но бӧрысь та должносте ик кельтэмын вал. 1943-тӥ арын толшоре Воронеж-Касторное наступление дыръя полкен быгатыса кивалтӥз. Ожмаськон дыръя, 28-тӥ толшоре, кыкетӥзэ сӧсырмиз, но нош ик службазэ азьланьтӥз.

Шор фронтысь 13-тӥ армиысь 151-тӥ стрелковой полклэн командирез Георгий Томиловский полковник Курск но Орёл операциосын ассэ усто командирен возьматӥз. Полк солэн кивалтэмез улсын Курск ожын юн возиз оборонаез, 1943-тӥ арын 5-тӥ-8-тӥ пӧсьтолэзе 2 сюрс пала тушмон солдатъёсты но офицеръёсты но соослэсь 29 танкъёссэс быдтӥз. Кышкыт югдурын, куке бускель дивизия позициоссэ кельтӥз, Томиловскийлэн полкез тушмон вылэ флангысен ӝутскиз но югдурез тупатӥз. Со ожъёсын командир контузить каремын вал, но госпитале выдыны пумит луиз.

Соку ик Днепр понна ожмаськон кутскиз, отын полковник Г. С. Томиловский нош ик висъяськиз. Нырысетӥ этапаз, Чернигов-Припять наступлениын, полк ӝог азьлань, шундыпуксён пала мынӥз. Оглом 1943-тӥ арын 23-тӥ пӧсьтолэзьысен 27-тӥ куарусёнозь 151-тӥ стрелковой полк сюосын гуртъёсты мозмытӥз, висъяськиз Кромы но Короп каръёсты мозмытыку, дивизиысь нырысетӥосыз пӧлын Десна (11-тӥ куарусён), Днепр (2-тӥ куарусён), Припять (25-тӥ куарусён) шуръёс вамен выжиз. Та дыр куспын полк Томиловский кивалтэм улсын 11 танкез, ачиз ветлӥсь 2 орудиосты, 100-лэсь трос пулемётъёсты, 32 миномётъёсты, 14 машинаосты быдтӥз, 11 миномётной батареяослэсь ыбылэмзэс дугдытӥз, 3 сюрс пала гитлеровецъёсты быдтӥз но пленэ басьтӥз.

Припять шур дуре вуыса, полкысь ожгарчиос Д. К. Шишковлэн бускель полкеныз ӵош тушмонлэсь плацдармзэ быдтӥзы но немецъёслэсь переправазэс киултӥзы. Солы луыса 8-тӥ стрелковой дивизилэн валтӥсь войскоосыз бур ярдуре ӝог потыны быгатӥзы. Кык арня ӵоже ожгарчиос Томиловский полковник кивалтэм улсын юн утизы асьсэлэсь рубежзэс, нуналлы быдэ кӧня ке тушмон атакаосты палэнтыса, тушмон авиацилэн дугдылытэк ыбылэмез улын. Плацдарм юн возиськиз, но тушмон чутрак валтӥсь атакалэсь ӧрзэ воштӥз но, Припятьлэн ярдурез кузя переправаозь вуиз но сое быдтӥз. Кӧня ке ожгарчиоссы паллян ярдураз интыяськыны но быгатӥзы. Совето войскоослэн югдурзы соку ик уродмиз: соос сюризы котыртэме, паллян палысен артиллерилэсь юрттэтсэ басьтэмысь дугдӥзы.

Котыртэм полкъёслэн командиръёссы кенешазы дӥсьтӥсь решение кутӥзы — котыртэмысь потыны сыӵе интытӥ, кытӥ тушмон сое ӧз возьма — шундыпуксён пала. Со вакытлы Совето Союзысь Геройлэн А. Н. Сабуровлэн частьысьтыз партизанъёсын кусып тупатэмын ни вал, партизан разведчикъёс котыртэм ожгарчиосты асьсэлы гинэ тодмо сюресъёстӥ частьсы дорозь поттыны басьтӥськизы. 1943-тӥ арын 15-тӥ коньывуонэ уйин совето ожгарчиос котыртэмысь потӥзы, соос нюр интыостӥ ки вылазы вань сӧсырмемъёсты поттӥзы но кык полкъёслэсь артиллеризэс. Эшшо кӧня ке нунал ӵоже Томиловлэн полкез партизанъёсын ӵош тушмонлы пумит ожмаськиз, нош собере мукет совето частьёсын огазеяськиз^[2].

СССР-ысь Вылӥ Кенешлэн президиумезлэн 1943-тӥ арын 16-тӥ коньывуонэ поттэм косэтэзъя Днепр шур вамен ортчемез, шурлэн шундыпуксён ярдураз интыяськемез но ожын ассэ геройлыко возьматэмез понна Георгий Сергеевич Томиловский полковник пусъемын Совето Союзлэн Героез нимын, Ленин орденэн но «Зарни Кизили» медален^[3].

1943-тӥ арын шуркынмон пумын Г. С. Томиловский 8-тӥ стрелковой дивизилэн командирезлэн воштӥсез луиз. Пыриськиз Житомир-Бердичев, Ровно-Луцк, Проскуров-Черновцы операциосы.

1944-тӥ арын оштолэзьысен Вормон нуналозь — 1-тӥ Украин фронтысь 38-тӥ армиысь Горд знамяё 211-тӥ Чернигов стрелковой дивизилэн командирез (1945-тӥ арын оштолэзьлэн кутсконаз дивизиез но армиез 4-тӥ Украин фронтэ выжтӥзы). Быгатыса кивалтӥз дивизиен Львов-Сандомир, Шундыӝужан-Карпатской, Шундыпуксён-Карпатской, Моравска-Острава но Прага наступлениосын. 1944-тӥ арын сӥзьыл Карпаты понна ожъёсын эшшо кык пол сӧсырмиз. Дивизия солэн кивалтэмез улсын пусъемын 2-тӥ степенё Суворов орденэн (5.04.1945).

Ож вакытэ Томиловский 6 пол пусъемын Вылӥ Главнокомандующейлэн таукарон приказъёсаз^[4].

1945-тӥ арын 24-тӥ инвожое Мускоысь Горд площадьын ортчем Вормон парадэ пыриськиз^[5].

Ож бере

Ож бере азьланьтӥз дивизиен кивалтыны, сое расформировать карытозь. 1945-тӥ арын гудырикошконысен Львов ожгар округысь 52-тӥ армилэн штабаз ожгар дасяськонъя ёзэтэн кивалтӥз; 1946-тӥ арын инвожое сыӵе ик должносте Прикарпатье ожгар округысь 13-тӥ армилэн штабаз выжтэмын. 1947-тӥ арын оштолэзьысен — Прикарпатье ожгар округысь 15-тӥ гвардейской стрелковой дивизиысь 50-тӥ гвардейской стрелковой полклэн командирез. Ортчиз «Выстрел» курсъёсты (1948-тӥ-1949-тӥ аръёсы), собере 1954-тӥ арын йылпумъяз М. В. Фрунзе нимо вылӥ ожгар академия бордысь вылӥ академической курсъёсты. 1954-тӥ арын куарусёнысен — Уйпал ожгар округысь 367-тӥ стрелковой дивизилэн (1955-тӥ арын южтолэзьысен — 65-тӥ стрелковой дивизия) командирезлэн воштӥсез. 1955-тӥ арын шуркынмонысен — Ижысь гурт удысъя институтын ожгар кафедралэн кивалтӥсез. 1959-тӥ арын гудырикошконысен — запасын.

Улӥз Ижын. 1959-тӥ арысен 1990-тӥ арозь ПТУ-лэн директорез вал. Мыло-кыдо выриз мерлыко ужен, Удмурт АССР-ын «Орлёнок» военно-спортивной шудонэн кивалтӥз (1976, 1979)^[6].

Ватэмын Ижысь Хохряки шайвылын.

Данъетъёс

Совето Союзысь Герой (16.10.1943);
Ленин орден (16.10.1943);
кык Горд Знамя орден (13.07.1943, 20.04.1953);
Кутузовлэн 2-тӥ степенё орденэз (№ 1368, 23.05.1945);
Суворов 3-тӥ степенё орденэз (№ 586, 07.02.1943);
Атыкай ожлэн 1-тӥ степенё орденэз (11.03.1985);
Горд Кизили орден (05.11.1946);
СССР-ысь 12 медаль;
Дукель тодэ ваён медаль (Чехословакия).

Ижысь Ялан ӝуась тыл вӧзысь буре ваён стела

Буре ваён

Нимыз пусъемын Ижысь Ялан ӝуась тыл вӧзысь буре ваён стелаын.
Буре ваён пул служба нуон интыяз юнматэмын (Ижкар, Киров ульча, 16 номеро юрт), пулэз пуктӥз Октябрь ёросысь ветеранъёслэн кенешсы Быдӟым Вормонлэн 50 ар тырмонэзлы.

Валэктонъёс

↑ Герои Советского Союза — узбекистанцы. — Ташкент, 1984. — С. 313.
↑ От Курска к Днепру: из воспоминаний командира 151-го стрелкового полка 8-й стрелковой бригады дивизии Героя Советского Союза Г. С. Томиловского (25 апреля — 23 сентября 1943 г.) // Не щадя жизни, презирая смерть… — Ижевск, 2005. — С. 58-61.
↑ Азовский А. Георгий Сергеевич Томиловский // Награды Отечества в истории Удмуртии. — Ижевск, 2007. — С. 47-48.
↑ Приказы Верховного Главнокомандующего в период Великой Отечественной войны Советского Союза. Сборник. М., Воениздат, 1975 Архивная копия от 5 инвожое 2017 на Wayback Machine.
↑ Парад Победы: из воспоминаний командира 211-й стрелковой дивизии Героя Советского Союза Г. С. Томиловского (23-24 июня 1945 г.) // Не щадя жизни, презирая смерть… — Ижевск, 2005. — С. 144—145.
↑ Великой славы светлая память / Н. С. Кузнецов. — Ижевск, 2012. — С. 351—352.

Литература

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — С. 594. — 863 с. — 100 000 экз. — ISBN 5-203-00536-2.
Иванов М. М. Повесть о комдиве. — Ижевск: Удмуртия, 1983. — 112 с.
Кузнецов Н. С. Воинская слава Удмуртии. — Ижевск, 2009. — С.310.
Кулёмин И. Г. Героев наших имена, 2-е изд. — Ижевск, 1975. — С. 63—65.
Кулёмин И. Г., Сентемова Л. Ф., Ислентьева Р. А. Герои Советского Союза — наши земляки. — Устинов, 1985. — С. 168—169.
Сонина Р. М. Дорогой отцов-героев. — Ижевск, 1995.
Главный редактор В. В. Туганаев. Удмуртская Республика: Энциклопедия = Удмурт Элькун: Энциклопедия. — Ижевск: «Удмуртия», 2000. — С. 800 + ил.. — ISBN 5-7659-0732-6.
Наши земляки: Герои Советского Союза, Герои Российской Федерации, Полные кавалеры ордена Славы. — Ижевск, 1995. — С.176.

Чӧлсконъёс

Антон Бочаров Георгий Сергеевич Томиловский [ӟуч] «Герои страны» сайт. Эскеремын 2020-02-18 арын

[1] Герои Советского Союза — узбекистанцы. — Ташкент, 1984. — С. 313.

[2] От Курска к Днепру: из воспоминаний командира 151-го стрелкового полка 8-й стрелковой бригады дивизии Героя Советского Союза Г. С. Томиловского (25 апреля — 23 сентября 1943 г.) // Не щадя жизни, презирая смерть… — Ижевск, 2005. — С. 58-61.

[3] Азовский А. Георгий Сергеевич Томиловский // Награды Отечества в истории Удмуртии. — Ижевск, 2007. — С. 47-48.

[Приказы-4] Приказы Верховного Главнокомандующего в период Великой Отечественной войны Советского Союза. Сборник. М., Воениздат, 1975 Архивная копия от 5 инвожое 2017 на Wayback Machine.

[5] Парад Победы: из воспоминаний командира 211-й стрелковой дивизии Героя Советского Союза Г. С. Томиловского (23-24 июня 1945 г.) // Не щадя жизни, презирая смерть… — Ижевск, 2005. — С. 144—145.

[6] Великой славы светлая память / Н. С. Кузнецов. — Ижевск, 2012. — С. 351—352.

[1]

[2]

[3]

[4]

[5]

[6]