Опалёв, Владимир Никифорович

Владимир Никифорович Опалёв
Владимир Никифорович Опалёв
Вордӥськем дырыз	17-тӥ гудырикошконэ 1919
Вордӥськем интыез	Глаз утем, Ватка губерния, РСФСР[d];
Кулэм дырыз	28-тӥ южтолэзе 1994 (74 года)
Кулэм интыез	Белгород, Россия;
Кунмуртлыкез	СССР
Кыӵе войскоез	Горд Армилэн Ожгар-омыр кужымъёсыз (ВВС)
Служить карон аръёсыз	1939—1960
Званиез
Интыужез	эскадрильялэн командирез
Ожмаськонъёс/ожъёс	Быдӟым Атыкай ож;
отставкаын	Граждан авиацилэн управлениысьтыз старшой инженер
	Медиафайлъёс РувикиМедиа пушкын

Владимир Никифорович Опалев (1919-тӥ арын 17-тӥ гудырикошконэ Ватка губерниысь Глаз утемын — 1994-тӥ арын 28-тӥ южтолэзе Белгородын) — Совето Армилэн полковникез, Быдӟым Атыкай оже пыриськем мурт, Совето Союзлэн Героез (1944).

Улон сюресэз

Вордӥськиз 1919-тӥ арын 17-тӥ гудырикошконэ Ватка губерниысь Глаз утемын Батиха гуртын (али — Киров улос Фалёнки ёрос^[1]) ӟуч крестьян семьяын. Школаысь куать классэз йылпумъяса, Ижкаре лыктӥз. Татысь фабрично-заводской ученичестволэсь школазэ йылпумъяз но машина лэсьтон заводын ужаз. Комсомол огазеяськонлэн ёзчиез луиз. Комсомоллэн путевкаезъя ик аэроклубе дышетскыны пыриз. 1939-тӥ арын толсуре дышетсконзэ йылпумъямез бере, Ижысь кар военкомат Пермьысь пилотъёсты дасянъя военной авиационной школае дышетскыны ыстӥз. Сое 1940-тӥ арын гудырикошкон толэзе йылпумъяз. Тылож кутскыку, Опалёв лётно-инструкторской ужын тырше вал^[2].

Коньывуон толэзе, ачиз куриськемъя, сое действующей армилэн 622-тӥ штурмовой авиационной полказ выжтӥзы. 1942-тӥ арын шуркынмонысен Быдӟым Атыкай ожлэн фронтъёсаз ожмаськиз^[3]. Нырысьсэ боевой задание 28-тӥ шуркынмонэ, тылӝуэн гомась Сталинград пала лобиз. Нырысь рядовой лётчик чотын ожмаськиз, берло – звенолэн командирез луиз. 1943-тӥ арын сӥзьыл эскадрильяен кивалтыны пуктӥзы. Донбасс, Уйпал Кавказ, Крым вадьсын инбамын ожмаськиз. Тужгес висъяськиз асьмелэнъёс Керчь но Севастополь пала наступлениен мыныку. Латвиез мозмытон ожъёсы пыриськиз.

1942-тӥ арын 30-тӥ шуркынмонэ штабысь, фашистъёслэсь транспортной авиацизэс пушкытон сярысь косэт вуиз. Боевой задание Опалёвлы но Кузнецовлы оскемын вал. Синтэм-пельтэм куазен совето лётчикъёс пусъем интые вуизы, отын соосты "мессеръёс" пумитазы. Озьы ке но, асьме штурмовикъёс тушмон аэродром вылэ потыса, сое пушкытыны быгатӥзы. Со куспын немец Кузнецовлэсь самолётсэ дэмӟытӥз, солы тушмон интывылэ пуксёно луиз. Опалёв, аслэсьтыз самолётсэ шуак берыктыса, эшсэ пленэ шедёнлэсь утиз. Ачиз но, самолетэз сӧриськемен пуксёно луиз. Ӝоген асьме войскоос вуыса, тӥяськем самолётэз тягачен асьме пала поттӥзы^[2].

Штурмовой шуккет сётонъя мастер, Опалёв тылож кыстӥськон куспын 204 пол боевой лобанъёсы потаз, трос тушмон техникаез но солдат-офтцерез быдтӥз. Аслаз кышкасьтэм сэзь луэменыз, эшъёссэ сьӧраз валтылӥз но соосты вормыны дышетъяз^[2].

1944-тӥ арын толшор толэзёзь старшой лейтенант Опалёв 4-тӥ омыр армилэн 2-тӥ суро авиакорпуслэн 214-тӥ штурмовой авиадивизилэн 622-тӥ штурмовой авиаполклэн эскадрильяеныз командовать каре вал ини. Со дырозь 103 пол тушмонлэсь огазе люкам техниказэ но солдат -офицеръёссэ штурмовать карыны боевой лобанъёсы потаз^[3].

СССР-ысь Вылӥ Кенешлэн Президиумезлэн 1944-тӥ арын 13-тӥ оштолэзе гожтэм Косэтэзъя «командованилэсь заданиоссэ ӟеч быдэсъямез но геройлыко ожмаськемез понна» старшой лейтенант Владимир Опалёв Совето Союзлэн Героез нимын пусъемын, Ленин орденэн но «Зарни Кизили» медален данъетамын (3174-тӥ номер)^[3].

Тылож йылпумъяськем бере Опалёв службазэ Совето Армиын азьланьтӥз. Вормон Парадэ пыриськиз. 1950-тӥ арын Военно-воздушной академиез йылпумъяз. 1960-тӥ арын полковник званиен запасэ потӥз. Улӥз но ужаз Ригаын. СССР куашкам бере Белгородэ кошкиз. Улонысь кошкиз 1994-тӥ арын 28-тӥ южтолэзе, ватэмын Белгородысь Ячневской шайвылын^[3].

Кировысь Вормон паркысь Данлыко Аллеяысь гранит стела.

Данъетъёсыз

Краснодар шаерысь Темрюк ёросысь Вышестеблиевской станицалэн Дано муртэз.
Кык Ленин орденэз,
Горд Знамялэн кык орденэз,
Александр Невскийлэн орденэз,
Атыкай ожлэн 1-тӥ степенё орденэз,
Кык Горд Кизили орденэз.
Мукет медальёсыз^[3].

Кировысь мемориал пул

Буре ваён

Геройлэн нимыз Киров карын Вормон паркын Данлыко Аллеяысь гранит стелаын гожтэмын.
Совето Союзлэн Героезлэн нимыз Кировысь Пионер Дворецлэн парказ Кировысь Совето Сюзлэн Геройёсызлы сӥзем мемориал пул вылын гожтэмын.
Геройлэн нимыз Мускоысь Вормон Паркын Быдӟым Атыкай ожлы сӥзем Шор музейлэн Данлыко бӧлетаз зарниям букваосын гожтэмын.
Опалёвлэн нимыз Ижын Ялан ӝуась тыл дорысь мемориал стелаын гожтэмын^[4].
Геройлэн нимыз пусъемын Ижысь машина лэсьтон заводлэн буре ваён пулаз^[4].
Киров улосысь Фалёнки ёросысь Верхосунье черкогуртысь шаертодонъя музейын Геройлы сӥзем экспозиция кылдытэмын^[4].

Валэктонъёс

Литература

Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
В небе Сталинграда. — Волгоград: Нижне-Волж. кн. изд., 1983.
Герои Советского Союза — кировчане. — Киров, 1985. — Вып. 3.
Гофман Г. Б. Самолёт подбит над целью. — М., Воениздат, 1982.
Кулёмин И. Г. Героев наших имена. — Ижевск, 1975.
Чечельницкий Г. А. Лётчики на войне. — М., Воениздат, 1974.

[1] Герои Отечества. Опалёв Владимир Никифорович

[Библиотека-2] ¹ ² ³ Национальная библиотека Удмуртской Республики. Опалёв Владимир Никифорович

[wh-3] ¹ ² ³ ⁴ ⁵ Владимир Никифорович Опалёв [ӟуч] «Герои страны» сайт.

[Киров-4] ¹ ² ³ Официальный информационный сайт Правительства Кировской области. ОПАЛЁВ Владимир Никифорович

[1]

[2]

[3]

[4]