Обухов, Василий Михайлович

РУВИКИ энциклопедиын таӵе фамилиен муртъёс сярысь мукет гожтосъёс вань.Учке Обухов.

Василий Михайлович Обухов
Вордӥськем дырыз	30-тӥ толсуре 1909(1909-12-30)
Вордӥськем интыез	Ижкар
Кулэм дырыз	6-тӥ куартолэзе 1945(1945-05-06) (35 арес)
Кунмуртлыкез	СССР СССР
Кыӵе войскоез	кыдёкысь лобанъёсъя авиация
Служить карон аръёсыз	1940—1945
Званиез
Ожмаськонъёс/ожъёс	Быдӟым Атыкай ож
Данъетъёсыз

Василий Михайлович Обухов (1909-тӥ арын 30-тӥ толсуре Ижкарын — 1945-тӥ арын 6-тӥ куартолэзе Саратов улосын) — совето ожгар лётчик, кыдёкысь лобанъёсъя 8-тӥ авиационной корпуслэн кыдёкысь лобанъёсъя 45-тӥ авиационной дивизилэн 25-тӥ гвардейской авиационной полклэн эскадрильяезлэн командирезлэн воштӥсез, гвардилэн майорез, Совето Союзлэн Героез (1944). 1942-тӥ арын совето делегациез Великобритание но США-е вуттонэ 2-тӥ пилот чотын пыриськем мурт.

Улон сюресэз

Вордӥськиз Ижкарын ужасьлэн семьяяз. Фабрично-заводской ученичестволэн школаяз дышетскиз. Собере «Ижсталь» заводын дуриськись луыса ужаз. 1931-тӥ арын Осоавиахимлэн азьветлӥсез чотын Балашовоысь Граждан омыр флотъя авиационной школае дышетскыны келязы. Сое йылпумъямез бере, кӧня ке лётчик-инструктор луыса тыршиз, собере Граждан омыр флотэ выжиз, Ижысь отрядэзлэн пилотэз луыса ужаз, собере Новосибирскысь авиаотрядлэн пилотэз вал. 1940-тӥ арын Новосибирскысен ик Горд Армие басьтӥзы.

Быдӟым Атыкай ож

1941-тӥ арын инвожо толэзьысен Быдӟым Атыкай ожмаськонъёсы пыриськиз. Службае интыязы Владимир улосысь Ковров кар котырысь аэродроме, кыдёкысь лобанъёсъя 81-тӥ авиационной дивизилэн секыт бомбардировкаосъя 412-тӥ полке (1941-тӥ арын гудырикошконысен — 432-тӥ, 3-тӥ толсурысен — 746-тӥяз).

Майор Обуховлэн экипажез

Трос пол поталляз тумшмон мышкысь кулэлыко объектъёсты пушкытъянэ, кылсярысь, Берлин, Данциг (али дыре Гданьск, Польша), Кёнигсберг (али Калининград), Тильзит, Бухарест, Варшава но мукет совето каръёсы, кудъёсаз со вакытэ кузёяськиз тушмон.

1942-тӥ арын куартолэзе Обуховлы бомбардировщиклэн кыкетӥ пилотэз чотын (экипажлэн командирез майор Э. К. Пусэп, штурманъёс: капитанъёс А. П. Штепенко но С. М. Романов) совето делегациез, Молотов кивалтэм улсын, вачевераськонъёсы нырысь Великобритание, собере США-е вуттыны задание сётэмын вал. 1942-тӥ арын 19-тӥ куартолэзе 4-моторъем секыт бомбардировщик Пе-8 Великобритание лобиз, собере Исландия но Канада пыр — Вашингтонэ. Лётчик-геройёсын экипажез пумитазы Уинстон Черчилль но Франклин Рузвельт. 1942-тӥ арын 12-тӥ инвожое Мускоысь Шор аэдромын историысь аспӧртэмлыко миссия азинлыко быдэстэмын вал.

1943-тӥ арын коньывуон толэзёзь 25-тӥ гвардейской авиационной полклэн эскадрильяезлэн командирезлэн воштӥсез, гвардилэн майорез В. М. Обухов тушмон мышкысь кулэлыко объетъёсты быдтонъя 156 пол боевой лобанъёсы потаз. Боевой лобанъёсызлэн огъя лыдыз — 172.

СССР-ысь Вылӥ Кенешлэн Президиумезлэн 1944-тӥ арын 13-тӥ южтолэзе гожтэм Косэтэзъя, командованилэсь боевой заданиоссэ ӟеч быдэсъямез но сэзь, геройлыко луэмез понна гвардилэн майорезлы Обуховлы Совето Союзлэн Героез дано ним сётэмын но Ленин орденэн но «Зарни Кизили» медален данъетамын.

1945-тӥ арын 6-тӥ куартолэзе Василий Михайлович Обухов, сюрес вылын шуэрес учырын шуккиськыса, бырыны шедиз. Ватэмын Саратов улосысь Балашов карын.

Данъетъёсыз

• «Зарни Кизили» медаль;
• 2 Ленин орденэз, нырысетӥез совето делегациез вачевераськонъёсы нуллэмез понна, кыкетӥез Герой званиен ӵош;
• Горд Знамялэн орденэз;
• Атыкай ожлэн 1-тӥ степенё орденэз.

Буре ваён

• Балашов карын Геройлэн ниыз одӥгезлы ульчалы сётэмын.
• Ижкарысь «Ижсталь» производственной огазеяськонлэн интывылаз Василий Обуховлы сӥзем Мемориал пул юнматэмын.

Валэктонъёс

Чӧлсконъёс

Василий Михайлович Обухов [ӟуч] «Герои страны» сайт.