Мусалимов, Николай Николаевич

Википедиысь материал
Николай Николаевич Мусалимов
Nikolay Musalimov.jpg
Вордскем дырыз 20-тӥ пӧсьтолэзе 1953({{padleft:1953|4|0}}-{{padleft:7|2|0}}-{{padleft:20|2|0}}) (73 года)
Вордскем интыез
Кунмуртлыкез
Ужудысэз Росси Федерациысь Кун думалэн V но VI ӧтчамъёсысьтыз депутат
Партия «Единая Россия»
Логотип РУВИКИ.Медиа Медиафайлъёс РувикиМедиа пушкын

Николай Николаевич Мусалимов (ворд. 20-тӥ пӧсьтолэзе 1953, Сьӧлта ёрос, Удмурт Автономной Советской Социалистической Республика) — росси кун ужась, политик, РФ-ысь Федерал Собранилэн Кун Думаысьтыз депутат (2007—2011 но 2014—2016), «Единая Россия» фракцилэн ёзчиез. Удмурт Элькунысь Кивалтэтлэн Тӧроезлэн воштӥсез (2011—2014).

Улон сюресэз

Вордӥськиз 1953-тӥ арын 20-тӥ пӧсьтолэзе Удмурт АССР-ысь Сьӧлта ёросысь Каменный Ключ гуртын.

1971-тӥ арысен 1974-тӥ арозь совето армиын службазэ нуиз. 1974-тӥ арын Сьӧлта ёросысь «Россия» колхозын мугорез кыдатон культурая методистын ужаны ӧдъяз, нош вуоно араз мугорез кыдатон культурая но спортъя ёрос комитетлэн тӧроез луиз.

1982-тӥ арын Удмурт кун университетэз «История но обществоведение» ӧнеръя йылпумъяз но Удмурт АССР-ысь Министръёслэн Кенешсылэн ужпумъёсызъя управлениысь ужъёсты радъясь ёзэтысь инструктор, кивалтӥсьлэн воштӥсез луыса ужаны кутскиз.

1993-тӥ арын со вакытэ ай Удмуртиысь Правительстволэн Тӧроезлэн, нош 1995-тӥ арысен — Кун Кенешлэн Тӧроезлэн Александр Волковлэн секретариатэныз кивалтӥсьлэн юрттӥсез, отӥяз кивалтӥсез луиз. 1999-тӥ арын элькунысь йӧскалык политикая министре юнматэмын. 2001-тӥ арысен Удмуртиысь Президентлэн секретариатэныз кивалтӥз.

2007-тӥ арын «Единая Россиялэн» списокъёсызъя Кун Думае  [ӟуч] (удм. депутатэ бырйиськиз. Думаысь федерацилэн ужпумъёсызъя но улос политикая комитетэ пыриськиз.

2008-тӥ ар пумын вань удмуртъёслэн «Удмурт Кенеш» огазеяськонзылы 4 арлы тӧрое быръемын[1].

2011—2012

Гужем ортчем праймеризъя 2011-тӥ арын куарусён пумын Кун Думае Удмуртилэсь быръёнъёсы кандидатъёс пӧлы пыртэмын вал. Нырысетӥ интыын Удмурт Элькунлэн Президентэз А. Волков юнматэмын вал, кыкетӥ — Н. Мусалимов, куинетӥ — Нимысьтыз лэсьтӥськонъя федерал агентстволэн азьвыл кивалтӥсез, армиысь генерал Николай Аброськин, ньылетӥ — «Краснодар НПЗ — Краснодарэконефть» ЗАО-лэн директоръёсызлэн кенешсылэн тӧроез Бекхан Агаев, витетӥ — «АСПЭК» ООО-лэн директоръёсызлэн кенешсылэн тӧроез Михаил Питкевич, Удмуртиысь премьерлэн пиез[2].

Быръёнъёсъя бюллетеньёсын «Волков, Мусалимов, Аброськин» фамилиос пусъемын вал. Быръёнъёсъя кампания дыръя «Удмурт Кенеш» ассоциацилэн тӧроез элькунысь ёросъёстӥ котыръяськиз но, «кивалтэтлэн партиез» понна, удмурт адями понна куара сётыны курыса, калыкез ӝутъяз[3].

Быръёнъёс дыръя кивалтэт партия элькунын 45,9 % куара люказ но вить депутат кресло пӧлысь кыксэ вормиз. 14-тӥ толсуре Волков аслэсьтыз мандатсэ Николай Аброськинлы сётӥз. Со дыре ик кылӥськиз: Мусалимов мандатэзлэсь куштӥськиз[4]. Мукет нуналаз та сярысь избирком ялӥз: Мусалимовлэн Думаысь пуконэз чечен ужбергатӥсьлы Бекхан Агаевлы сётэмын[5].

Та калыкез бугыртӥз. 18-тӥ толсуре «Зэмлыко быръёнъёс понна  [ӟуч] (удм.» митингын элькун кивалтӥсьёсты куара сётон дыръя махинациосын янгыше уськытӥзы но отставкае кошкыны куризы[6].

Ачиз Мусалимов нырысетӥ нуналъёсаз югдур пумысен номыр ӧз вералля. Журналист но политик Сергей Щукин малпамъя, калыкен быръем адямилэн та ужез лэсьтэмын вал элькун тӧролэн зӥбетэз улсын. Таяз рад Волков оскымон ужъюлтошсэ мувӧй ужбергатонэн герӟаськем ужпумъёсын воштоно кариськиз[4]. Пумит луэмзэ вераз Виктор Шудегов но, Кун Думае со «Справедливой Россилэсь» сюриз но Федерал Собраниын  [ӟуч] (удм. огназ удмурт луиз. Солэн малпамезъя, таӵе выросэныз «Удмурт Кенеш» палэнскиз валтӥсь ужпумезлэсь — удмурт калыклэсь тунсыкъёссэ ӝутон, азинтон но утён, нош элькун калык пӧечие кылиз[7]. Политолог но «Удмурт Кенешлэн» ёзчиез Леонид Гонин малпамъя, та вырос йӧскалык огазеяськонъёслэсь «пиньтэм луэмзэс» возьматӥз[8].

Удмурт йӧскалык движение пыриськисьёс Мусалимовлэн «Удмурт Кенешез» валтэменыз соглаш луымтэзэс вераллязы. Чузъяськизы сое деполитизировать каронъя ӧтёнъёс (азьвыл солэн исполкомаз трос гинэ чиновникъёс вуизы но со «шыпытак» «Калык фронтэ» выжиз). Курланъёссэс вераны чакламын вал 2012-тӥ арын 18-тӥ толшоре ортчоно ӧтчамын. Но отчы пыронэз пытсазы югдурез утисьёс, соос делегатъёсты азьло ик кылдытэм списокъя гинэ лэзизы[3].

2011-тӥ арын 21-тӥ толсуре ай Удмуртилэн Президентэз Волков Мусалимовез пуктӥз элькунысь спортъя но егитъёсын ужан политикая ужпумъёсъя вице-премьере. 2012-тӥ арын 28-тӥ тулыспалэ Кун Кенеш со понна дурбасьтэм 58 куараен сое та ужинтыяз юнматӥз[9].

2012-тӥ арын толсуре, ужан вакытыз йылпумъяськыса, Николай Мусалимов «Удмурт Кенешлэн» тӧроысьтыз кошкиз.

2014—2016

2014-тӥ арын Удмуртиын вылӥ кивалтэт воштӥськиз — элькун тӧро Александр Соловьёв луиз. 2014-тӥ арын 13-тӥ коньывуонэ Удмуртиысь выль Правительство кылдытэмын вал, отчы Мусалимов ӧз шедьы[10]. Котьма ке но, арня ортчыса, Соловьёв Николай Мусалимовез йӧскалык ужпумъёсъя аслыз советнике юнматӥз[11].

2014-тӥ арын 1-тӥ шуркынмонэ Николай Аброськин, мукет уже выжеменыз, Кун Думаысь депутат мандатэзлэсь куштӥськиз. Бушам депутат креслое Михаил Питкевич пуксёз шуыса, вераськылӥзы[12]. Но бератаз элькун тӧро ӵектӥз Мусалимовлы мандат сётыны[13]. Озьы РФ-ысь ЦИК-лэн 3-тӥ толсуре кутэм пуктэтэзъя Мусалимов выльысь депутатлэсь мандатсэ басьтӥз[14].

2014-тӥ арын 23-тӥ толсуре РФ-ысь Конституцияя Суд азьвыл депутат мандатлэсь куштӥськем муртлы выльысь мандат сётонэз умойтэмен лыдъяз.

2016-тӥ арын Кун Думаын ужзэ йылпумъяз[15].

2017-тӥ арын 16-тӥ куартолэзе Сьӧлта ёросысь потэмъёс Ижкарын «Сьӧлта землячество» огазеяськон кылдытӥзы. 27-тӥ коньывуонэ Эшъяськон юртын Сьӧлта землячестволы презентация возьматӥзы. Ужрад дыръя огазеяськонлы тӧрое Кун Думалэн азьвыл депутатэз Н. Н. Мусалимов быръемын вал[16].

Данъетъёсыз

  • «Удмурт Элькунысь кун но муниципал службаысь дано ужась» дано ним.

Валэктонъёс

  1. ↑ Избран новый президент «Удмурт Кенеш» [ӟуч] udm-info.ru (15 декабря 2008). Эскеремын 02.10.2025 арын
  2. ↑ Александр Волков возглавил удмуртский список «Единой России» на выборах в Госдуму [ӟуч] susanin.news. Эскеремын 02.10.2025 арын
  3. ↑ 1 2 Сергей Мельников (30 января 2012) Переходящий мандат [ӟуч] kommersant.ru. Эскеремын 02.10.2025 арын
  4. ↑ 1 2 Президента Удмуртии обвинили в «махинациях голосами избирателей» [ӟуч] club-rf.ru (19 декабря 2011). Эскеремын 02.10.2025 арын
  5. ↑ Н. Е. Конкин (15 декабря 2011) Постановление № 73/584-6 [ӟуч] ЦИК РФ. Эскеремын 02.10.2025 арын
  6. ↑ В Ижевске на митинг «За честные выборы» вышла молодежь [ӟуч] dayudm.ru (18 декабря 2011). Эскеремын 02.10.2025 арын
  7. ↑ Виктор Шудегов: «Это скандал, который выходит за рамки российского уровня» [ӟуч] club-rf.ru (19 декабря 2011). Эскеремын 02.10.2025 арын
  8. ↑ Президент «Удмурт Кенеш» отдаст место в Госдуме чеченскому бизнесмену? [ӟуч] finugor.ru. Эскеремын 02.10.2025 арын
  9. ↑ Николай Мусалимов стал шестым вице-премьером Правительства Удмуртии [ӟуч] svdelo.ru (29 февраля 2012). Эскеремын 02.10.2025 арын
  10. ↑ В Удмуртии назначено правительство: некоторые министры лишились постов [ӟуч] udm.aif.ru (13 октября 2014). Эскеремын 02.10.2025 арын
  11. ↑ Глава Удмуртии назначил Николая Мусалимова своим советником по вопросам национальной политики [ӟуч] d-kvadrat.ru (20 октября 2014). Эскеремын 02.10.2025 арын
  12. ↑ Депутатом Госдумы от Удмуртии вместо Аброськина может стать Михаил Питкевич [ӟуч] susanin.news (02.11.2014). Эскеремын 02.10.2025 арын
  13. ↑ Мандат депутата Госдумы от Удмуртии могут передать Николаю Мусалимову [ӟуч] susanin.news (10.11.2014). Эскеремын 02.10.2025 арын
  14. ↑ Евгений Зайнуллин (28.11.2014) Николай Мусалимов представит Удмуртию в Госдуме [ӟуч] kp.ru. Эскеремын 02.10.2025 арын
  15. ↑ Мусалимов Николай Николаевич [ӟуч] udm.travel. Эскеремын 02.10.2025 арын
  16. ↑ Презентация Селтинского землячества [ӟуч] ijevsk.bezformata.com. Эскеремын 02.10.2025 арын

Чӧлсконъёс

«https://udm.ruwiki.ru/w/index.php?title=Мусалимов,_Николай_Николаевич&oldid=506884»-ысь басьтэмын