Богомольный, Евгений Исаакович

Евгений Исаакович Богомольный
Евгений Исаакович Богомольный
Росси Федерациысь Кун Думаысь IV ӧтчамысьтыз депутат, Росси Федерациысь Кун Думаысь V ӧтчамысьтыз депутат
	2003-тӥ арын 29-тӥ толсуре — 2011-тӥ арын 21-тӥ толсурозь
Вордӥськемын	29-тӥ толсуре 1952; Львов улосысь Дрогобыч, СССР
Кулэмын	14-тӥ оштолэзе 2019 (66 арес); Муско, Россия;
Кузпалыз	Елена Васильевна
Дышетскемез	Мускоысь И. М. Губкин нимо нефтехимияя но газ промышленностья институт
	Медиафайлъёс РувикиМедиа пушкын

Евгений Исаакович Богомольный (1952-тӥ арын 29-тӥ толсуре Львов улосысь Дрогобыч карын, СССР — 2019-тӥ арын 14-тӥ оштолэзе) — «Удмуртнефть» акционер огазеяськонлэн валтӥсь директорез. Ижкар Думаысь депутат. Удмурт Элькунысь Кун Кенешысь депутат. Удмурт Элькунлэн Президентэзлэн мувӧй поттон комплексысь юанъёсъя советникез. Росси Федерациысь Кун Думаысь депутат^[1].

Улон сюресэз

Евгений Богомольный 1952-тӥ арын 29-тӥ толсуре СССР-ысь Львов улосысь Дрогобыч карын мувӧй поттон удысын ужасьёслэн (нефтяникъёслэн) семьяязы вордӥськиз. Мускоысь И. М. Губкин нимо нефтехимияя но газ промышленностья институтын дышетскиз, мувӧй но газ поттон удысэз выль технологиос ласянь азинтонъя тодон-валанзэ муромытӥз^[1].

1975-тӥ арын егит ӧнерчиез Удмурт Элькунэ распределениен ыстӥзы. Татысь «Удмуртнефть» огазеяськонын со 30 ар ужаз. 1993-тӥ арын «Удмуртнефть» огазеяськонлы валтӥсь инженере юнматӥзы. 1996-тӥ арысен 2003-тӥ арозь республикаысь тужгес бадӟымез предприятилы — «Удмуртнефть» акционер огазеяськонлы — валтӥсь директоре пуктӥзы. Ижкар Думалэн^[ru] куинь ӧтчамаз депутат вал. Со сяна, Удмурт Элькунысь Кун Кенешлэн кык ӧтчамаз депутатэ бырйылӥзы. Удмурт Элькунлэн Президентэзлэн мувӧй поттон комплексысь юанъёсъя советникез вал^[1].

2003-тӥ арын толсуре Е. И. Богомольный Росси Федерациысь Кун Думаысь^[ru] Ижысь 29 номеро быръён округъя депутатэз луиз^[1].

Удмурт Элькунэз ӝутон ласянь трос лэсьтӥз. Техника наукаосъя кандидат, экономика наукаосъя доктор луэ. Мувӧй поттон удысын кутӥськись 60 изобретениосыз. 40-лэсь ятыр наукая ужъёсыз.

2019-тӥ арын 14-тӥ оштолэзе улонысь кошкиз. Мускоысь Троекуровской шайвылын ватэмын.

Данъетъёсыз

«Удмуртнефть» акционер огазеяськонлэсь тодосчиоссэ но ӧнерчиоссэ наука но техника удысын вормонъёс басьтэмзы понна Росси Федерацилэн Кун премиеныз пусйизы, пӧлазы Е. И. Богомольный но вал^[2].
Россиысь Правительстволэн но Удмуртиысь Правительстволэн премиезлэн лауреатэз^[2].
1993-тӥ арын Росси Федерациысь мувӧй но газ поттон удысысь дано ужась нимын пусъемын^[2].
1997-тӥ арын быгатыса ужамез понна Удмурт Элькунлэн Кун премиеныз пусъемын^[2].
1998-тӥ арын Данъян орденэн пусъемын^[2].
2000-тӥ арын «Россиысь устоез менеджер» нимын пусъемын^[2].
2002-тӥ арын — Удмурт Элькунысь мувӧй поттон удысысь дано ужась нимын пусъемын^[2].
«Россиысь горно-геологической службалы 300 ар» юбилей гадьпусэн данъямын^[2].
Россиысь МЧС-лэн «За заслуги» гадьпусэныз данъямын^[2].
Ӟуч православной черклэн — дун-чылкыт Сергий Радонежскойлэн куинь степенё орденэныз пусъемын^[2].
2003-тӥ арын Удмурт Элькунлэн Кун Кенешлэн Данъян грамотаеныз сӥлы каремын^[2].
2005-тӥ Удмурт Элькунысь Кун премилэн лауреатэз луиз^[2].
2006-тӥ арын «За заслуги перед Отечеством» мадальлэн II степенё орденэныз пусъемын^[2].
2008-тӥ арын Росси Федерациысь Кун Думалэн Данъян грамотаеныз пусъемын^[2].

Валэктонъёс

↑ ¹ ² ³ ⁴ Ушел из жизни экс-депутат Госдумы от Удмуртии Евгений Богомольный | Udm-Info [ӟуч] udm-info.ru. Эскеремын 2019-04-14 арын
↑ ¹ ² ³ ⁴ ⁵ ⁶ ⁷ ⁸ ⁹ ¹⁰ ¹¹ ¹² ¹³ ¹⁴ Богомольный Евгений Исаакович [ӟуч] ЗАКОНИЯ. Эскеремын 2019-04-14 арын

[Инфо-1] ¹ ² ³ ⁴ Ушел из жизни экс-депутат Госдумы от Удмуртии Евгений Богомольный | Udm-Info [ӟуч] udm-info.ru. Эскеремын 2019-04-14 арын

[Закония-2] ¹ ² ³ ⁴ ⁵ ⁶ ⁷ ⁸ ⁹ ¹⁰ ¹¹ ¹² ¹³ ¹⁴ Богомольный Евгений Исаакович [ӟуч] ЗАКОНИЯ. Эскеремын 2019-04-14 арын

[1]

[2]