П. И. Чайковскийлэн дор палъёсаз
| П. И. Чайковскийлэн дор палъёсаз | |
|---|---|
 | |
| устолыкъя фестиваль[d] | |
| Тематикаез | Устолык |
| Кылдытӥсьёсыз | Удмурт кун филармония |
| Радъясьёс | Удмурт кун филармония |
| Кутсконэз | 1958 |
| Ортчытон интыез | |
| Кар | Вотка, Ижкар, Сарапул |
П. И. Чайковскийлэн дор палъёсаз (ӟуч: На Ро́дине П. И. Чайко́вского) — Удмуртиын ортчись устолыкъя фестиваль. Улосын одӥг гинэ академической крезьгурлы сӥзем но арлы быдэ ортчись ужрад[1]. Нырысь-валысь П. И. Чайковскийлэн вордӥськем нуналызлы сӥзыса (7-тӥ куартолэзе), куартолэзе ортчытъязы.
Россиысь тужгес вашкалаез но бадӟымез фестиваль луэ[2].
Историез
1958-тӥ арын южтолэзьысен оштолэзёзь Москваын ортчиз П. И. Чайковскийлы сӥзем нырысетӥез калыккуспо вожвылъяськон. Калык солы вылӥ дунъет сётӥз но ужрад паськыт ваӧлмиз[3]. Со арын ик 6-тӥ куартолэзе Вотка карын П. И. Чайковскийлэн музей-юртэз азьын устӥськиз крезьгурчилэн вордӥськем нуналэзлы сӥзем нырысетӥез крезьгуро фестиваль[2]. Со дырысен та ужрад арлы быдэ ортчылэ[1].
Туж усто, куке кунмылэн тужгес но секыт дыръёсаз кивалтэт та фестивальлэсь кулэлыксэ вылӥ дунъялляз но 66 ар ӵоже вис карылытэк сое ортчытъяны луонлыкъёс шедьтылӥз.
— Владимир Соловьёв, Удмуртиысь культурая министр, 2023-тӥ арын фестивалез усьтон ужрадын[4]
Трос аръёс ӵоже ужрадлэн валтӥсь кичӧлтӥсез но радъясез луэ Удмурт кун филармония[2].
Арлы быдэ «П. И. Чайковскийлэн дор палъёсаз» фестивале кӧня ке сюрс адями вуылэ. 2023-тӥ арын концертъёсы 12,5 сюрслэсь ятыр крезьгурез яратӥсьёс люкаськылӥзы. Концертъёсы лыктыны быгатӥсьтэмъёс понна мерлыко вотэсъёсын онлайн-трансляциос радъяськылӥзы, «Мынам Удмуртие» телеканалын меӵак эфиръёс ортчытъязы[5].
Площадкаос нофестивальлэн програмаез
Фестивальлэн валтӥсь ужрадъёсыз Удмуртилэн куинь каръёсаз ортчо: Пётр Чайковскийлэн вордӥськем интыяз, Воткаын, улослэн шоркараз но Сарапулын[6]. Концертъёс залын гинэ ӧвӧл, кырын но ортчыло: Воткаын со котьку ик Чайковскийлэн музей-юртэз азьын радъяське, Сарапулын — Ленин нимо паркын, Ижкарын — Иж тыметлэн ярдур урамысь эспланадаяз[7]. 2021-тӥ арысен Ижкарын улӥсьёс озьы ик «Динамо» стадионэ люкаськыло[8][2].
Ми ӧм но малпаллялэ, академической крезьгур быдэс стадионъёсты люканы быгатоз шуыса. Мон кӧня ке куректӥсько, open air-форматэ бергес потӥмы шуыса, малы ке шуоно, вазьгес выжысалмы ке, тросгес калык адӟыны но кылзыны быгатысал быдӟым крезьгурчиосты, кудъёсыз фестивале пыриськылӥзы.
— Алексей Фомин, Удмурт кун филармонилэн кивалтӥсез
Нырысь фестиваль крезьгуро гинэ вал[1], берло, 2017-тӥ арысен, фестивальлэн 60 ар тырмонэныз валче, программае кино, кылбурет но балет пыртэмын вал. Ужрадэз дасясьёс котькуд ар мар ке но выльзэ ватсаны тыршо. Озьы, 2021-тӥ арын программае ватсамын вал образовательной блок, отын Россиысь культура удысысь валтӥсь менеджеръёс Елена Яковлева, Ольга Гринченко но Анна Зейман культура удысын ужасьёсты дышетӥзы[9]. Нош 2023-тӥ арын Удмуртиын нырысьсэ чузъяськиз карильон — крезьгуро инструмент, кудӥз 51 гырлылэсь кылдытэмын (Россиын со интыысь интые нуллоноез одӥг гинэ)[6][10].
Озьы ик воштӥськиз фестивалез ортчытонлэн дырыз. Азьвыл со куартолэзе гинэ ортчытъяське ке вал, берло кӧня ке аръёссэ ини сое гужем ортчыто[11][9]. Озьы ик азьвыл фестиваль улсын ортчись концертъёсын Чайковскийлэн гинэ крезьгурез чузъяськылӥз, берло программае мукет крезьгурчиосты но пыртылыны кутскизы[1]. Кылсярысь, 2023-тӥ арын фестиваль усьтӥськиз Чайковскийлэн Витетӥ симфониеныз но Рахманиновлэн Фортепьяноен оркестрлы гожтэм 3-тӥ номеро концертэныз[12].
2025-тӥ арын Россиысь но кунгож сьӧрысь тодмо артистъёслэн, крезьгурчиослэн концертъёссы ортчизы Воткинскын, Ижын, Сарапулын, Можгаын но Глазовын. Фестиваль улсын шаере вуылӥзы: Уральской академической оркестр (кивалтӥсез — Россиысь калык артист Дмитрий Лисс), пианист Дмитрий Маслеев, немец виолончелист Бенедикт Клёкнер, Олег Лундстрем нимо джаз оркестр, тодмо джаз кырӟась Мариам Мерабова но мукетъёс. Концертъёс сяна, Ижысь «Динамо» стадионын возьматэмын вал П. Чайковскийлэн «Щелкунчик» балетэз[13].
Фестивале лыктэм куноос
Котькуд ар фестивале пырисько Россиысь но дуннеысь тодмо муртъёс: кырӟасьёс, пианистъёс, крезьгурчиос, дирижёръёс культура удысысь мукет ӧнерчиос. «П. И. Чайковскийлэн дор палъёсаз» фестивальлэн концертъёсаз пӧртэм аръёсы вуылӥзы[11]:
Пианистъёс
- Россиысь калык артист Денис Мацуев;
- Россиысь сӥё-дано артист Александр Гиндин;
- Россиысь калык артист Даниил Крамер;
- РСФСР-ысь калык артист, пианист, дирижёр но композитор Михаил Плетнёв.
Опера кырӟасьёс
- СССР-ысь калык артистка Тамара Синявская;
- СССР-ысь калык артистка Елена Образцова;
- СССР-ысь калык артистка Нани Брегвадзе;
- Россиысь калык артист Дмитрий Хворостовский.
Дирижёръёс
- СССР-ысь калык артист Евгений Светланов;
- СССР-ысь калык артист Юрий Темирканов;
- СССР-ысь калык артист Владимир Спиваков;
- СССР-ысь калык артист Юрий Башмет;
- Росси Федерациысь калык артист Валерий Гергиев.
Валэктонъёс
- ↑ 1 2 3 4 Мария Пудеева Фестиваль "На Родине П. И. Чайковского" Музыкальные сезоны.
- ↑ 1 2 3 4 Фестиваль искусств «На Родине П.И. Чайковского» Удмурт кун филармония.
- ↑ Международный конкурс имени П. И. Чайковского. События. Факты. Имена Мемориальный Музыкальный Музей-заповедник П.И. Чайковского.
- ↑ Дмитрий Стрелков Фестиваль искусств «На родине П. И. Чайковского» — 2023: программа мероприятий ИА «Сусанин».
- ↑ Завершился 66-й фестиваль искусств «На Родине П.И. Чайковского» Удмурт кун филармония.
- ↑ 1 2 Анастасия Дворская Фестиваль искусств «На Родине П.И. Чайковского» стартует в Удмуртии 7 июля Удмуртская правда.
- ↑ Один день до начала фестиваля искусств «На Родине П.И. Чайковского»! Удмурт кун филармония.
- ↑ 65 фестиваль искусств «На родине П.И. Чайковского» пройдет в Удмуртии в начале июля ClassicalMusicNews.Ru.
- ↑ 1 2 Фестиваль "На родине П. И. Чайковского" в Ижевске открылся в усеченном формате ТАСС.
- ↑ В Удмуртии впервые прозвучал карильон Удмурт кун филармония.
- ↑ 1 2 О фестивале Фестиваль искусств «На Родине П.И. Чайковского».
- ↑ 7-9 июля ижевчан приглашают на 66-й фестиваль искусств «На родине П. И. Чайковского» Официальный сайт Администрации города Ижевска.
- ↑ Галина Савина (07.07.2025) Удмуртиын йылпумъяськиз 68-тӥез «П. И. Чайковскийлэн дор палъёсаз» фестиваль. [ӟуч] Удмурт дунне. Эскеремын 07.07.2025 арын